Mikaa 6 - RUAC KUƆTH IN RƐL RƆ

Luk Kuɔth Nhial kɛ ji̱ I-thɛ-rɛl

¹ Liɛŋɛ mi ci Kuoth Nhial ɛ larɛ: jiɛc rɔ wër lat ruacdu kɛ pääm, kä akɛ liɛŋkɛ min latdi.

² Liɛŋɛ go̱o̱ny Kuɔth Nhial lö pääm, kä liɛŋɛ jɛ yɛn tuk muɔ̱ɔ̱n. Te Kuoth Nhial kɛ go̱o̱ny kɛ nɛɛkɛ, kä bɛ ji̱ I-thɛ-rɛl luk.

³ “Kä yɛn nɛɛkä, ɛŋu mi cä lätkä yɛ? Kä ci ɣän a riɛkdun nɛy? Luɔcɛ ɣä!

⁴ Kä ɣän mëë cä yɛ ka̱m raar muun I-jëp, kä cä yɛ luɛl dueel yieenä. Kä cä Muthɛ jak bɛ yɛ bo̱th kɛ Ä-ron kɛnɛ Mir-yam bä.

⁵ Nɛɛkä tiɛmɛ mëë ci Ba-lak kuäär Mo-ab ɛ car i̱ bɛ lät kä yɛ, kɛnɛ luɔ̱c ëë ci Bil-am gat Bɛ-or ɛ loc ni jɛ. Kä ɛŋu ci tuɔɔk ɔ dup kä Ci-tim amäni Gil-gal, derɛ cuɔ̱ɔ̱ŋ Kuɔth Nhial dhil ŋa̱c.”

Tin go̱o̱r Kuoth kɛ

⁶ “Kä ɛŋu dee wä kɛ ɣä nhiam Kuɔth Nhialɔ, min dëë wä pal ni jɛ? A dëë ku wä kä jɛ kɛ kɔa̱a̱l ala muc ti waŋkɛ?

⁷ A dee lɔc Kuɔth Nhial ku tɛɛth kɛ det ti bathdɔɔri, kiɛ kɛ lith ti bathdɔɔri wäl? Kiɛ bä gatdä min kɛ̱̈ɛ̱̈ thöp kɛ kui̱ dueerikä?”

⁸ Kä jɛn cɛ ji̱ nyuɔ̱th ti gɔw ji̱n raan. Kä ɛŋu go̱o̱r Kuoth Nhial ɛ kä ji̱ mɔ? Ɛ ɣöö bi thuɔ̱k lat, kä bi gɔɔy nhɔk, kä bi ja̱l agɔaa yɛnɛ Kuothdu.

⁹ Liɛŋɛ jɛ, lö yɛn nɛy tin ci rɔ̱ dol wi̱c, ciöt Kuoth Nhial, kä luth cio̱tädɛ ɛ pɛl mi cuɔ̱ŋ.

¹⁰ A dëë ku ŋot a palä ram mi ci rɔ duɔl ŋɔak kɛ duɔ̱p mi jiäk rueec?

¹¹ Kä dëë ram mi tekɛ theemni ti nyuɔ̱n nyuɔ̱ɔ̱n, kɛnɛ ki̱thni ka̱a̱cni päl i̱di?

¹² Kä ria̱ŋ ria̱a̱ŋku kɛ ji̱ ko̱o̱r, kä lat nɛɛku ni ka̱a̱cni, kä kaŋ kɛn ni naath.

¹³ Kɛ kui̱c ɛmɔ ɣän cä tok kɛ, mi da̱kä yɛ, kɛ kui̱ dueerikun.

¹⁴ Bia mi̱th duundɛ ɣöö /cia bi ria̱ŋ, bia ŋot näk buɔth yɛ. Bia rɔ tɔ̱wikä duundɛ ɣöö thilɛ mi bia jek, kä min bia kään, ɣän bä näk ko̱o̱r.

¹⁵ Yɛn bia pi̱eth, duundɛ ɣöö /ciakɛ bi ŋɛr, bia dɛy Ɔ-lip nhiac, duundɛ ɣöö cia rɔ, bi yi̱r kɛ liɛɛthdɛ. Kä bia bɛl ɣɔ̱l, duundɛ ɣöö /cia kɔaŋdiɛn bi math.

¹⁶ Yɛn cia guɔ̱ɔ̱r ni ciɛŋ Ɔmri, kɛnɛ ciɛŋ dhɔaar Ɛ̈-ɣab diaal, kä cia liŋ ni luekdiɛn. Kɛ kui̱c ɛmɔ, ɣän bä yɛ däk kä bä nɛɛku jak kä lökɛ, kä bia bɛ̈c ciɛŋä nɛɛnikä jëk.