Mikaa 5 - RUAC KUƆTH IN RƐL RƆ

¹ Kä täämɛ yɛn ji̱ Jɛ-ru-tha-lɛm matdɛ rɛmkun, kɛ ɣöö ca kɔn go̱l. Bikɛ bo̱o̱th I-thɛ-rɛl mak.

Lär Kuɔth kɛ rueec mi bi ben kä Beth-lɛ-ɣɛm

² Duundɛ ɣöö ji̱n Beth-lɛ-ɣɛm Ɛp-ra-tha, kuiy ni yɛn rɛy thuɔk duëël Juda. Kä yɛ bi ram in bi I-thɛ-rɛl ruac ben thi̱n, min karkɛ lockɛ nikä nɛy tëë wal.

³ Kɛ kui̱c ɛ mɔ, bɛ nɛɛkɛ päl amäni mi ci gua̱a̱th in bi dap kɛ ram in dap gatdɛ dap. Ɛ jɛn bi duɔth gan man kulɛ luny rɛy ji̱ I-thɛ-rɛl ɔ.

⁴ Kä bɛ ben cuɔ̱ŋ, kä bɛ detkɛ yien rɛy bumä Kuɔth Nhial, kɛnɛ gɔɔy ciötdä Kuɔth Nhial Kuothdɛ. Kä bikɛ cieŋ kɛ mal, kä ba di̱tdɛ cu ŋa̱c ɛ wi̱c muɔ̱ɔ̱n kɛɛliw.

⁵ Kä bɛ cua̱ maliɛn. Kä mi wä ji̱ A-thi-ri-ya wecdan wä mak a bikɛ ben muundan, banɛ bööthkɔn jak kä wä nyiëëny kɛ kɛ.

Luäk kɛnɛ duäc

⁶ Kä bikɛ mun A-thi-ri-ya kɛnɛ mun Nim-rɔd ruac kɛ buɔ̱m. Kä ba kɔn gaŋ kɛ ji̱ A-thi-ri-ya mi wa kɔn wä mak a bikɛ ben këthdan.

⁷ Kä bi duɔth ji̱ I-thɛ-rɛl ciɛŋ ni rɛy döri ti ŋuan, ce̱tkɛ thäc mi bä kä Kuoth Nhial, kɛnɛ nyuɛ̈ɛ̈r rɛy juaacni, tin /ca lip ni raan kiɛ gat ran.

⁸ Kɛn duɔth ji̱ I-thɛ-rɛl bikɛ cieŋ rɛy döri, rɛy nɛɛni ti ŋuan, ce̱tkɛ lony rɛy leeyni ti ŋuan, kɛnɛ ruath luɔny rɛy buni deet, min camɛ kɛ, kä thilɛ ram mi luäkɛ.

⁹ Kä bi ji̱ gaakdu puɔ̱t, kä bi ji̱ tɛ̈ru diaal näk.

¹⁰ Cu Kuoth Nhial wee i̱, “Ɛn cäŋ ɛmɔ, bä jiöŋköörikun woc rɛydun kä bä thurbiɛɛlikun yia̱r.

¹¹ Kä bä wi̱i̱kun däk kä bä ti̱eckun tin buɔ̱m buɔ̱ɔ̱m thia̱y piny.

¹² Kä ɣän bä gaakni woc tetnikun, /cia bilɛ wä tueeth kä ti̱t.

¹³ Kä bä jɔɔk kolaaŋnikun kɛnɛ riäkni woc rɛydun, kɛ ɣöö /cia kuth ti la̱tdɛ kɛ tetkun bilɛ nyɔk kɛ pa̱l.

¹⁴ Kä bä kuothdun ni Ä-ce-rim kuac piny rɛydun, kä bä wi̱i̱kun däk.

¹⁵ Kä ɣän bä rɔ col kɛ gak kɛnɛ ŋɛ̈ɛ̈ny, kä dör diaal tin /ca ɣä luth.”