Mikaa 4 - RUAC KUƆTH IN RƐL RƆ

Ruec malä Kuɔth kɛ wi̱c muɔ̱ɔ̱n

¹ Kä kɛ ni̱n tia̱ bi beni, bi päm in ca luak Kuɔth Nhial täth thi̱n, bär ni jiɛɛn kä pääm diaal. Kä bi nɛy ti ŋuan rɔ̱ dol thi̱n.

² Kä bi där ti ŋuan ben, kä bikɛ wee, “Bia wanɛ wi̱i̱ pa̱a̱m Kuɔth Nhial, wanɛ luaak Kuɔth ji̱ I-thɛ-rɛl. Dɔ̱ŋ bɛ kɔn nyuɔ̱th dupkɛ, a banɛ ja̱l thi̱n.” Kä bi ŋuɔ̱t ben kä Dha-yɔn, kä ba ruacdɛ lat kä Jɛ-ru-tha-lɛm.

³ Kä bɛ kam nɛɛni ti ŋuan luk, kä bɛ kam döri ti buɔ̱m buɔ̱ɔ̱m ti na̱n kä ŋuan lat. Kä bikɛ thɛpnikiɛn täth ala puɔ̱ri, kä bikɛ mutnikiɛn täth ala car caari. Kä bɛ thil dör mi nyiëëny kɛ dör in dɔ̱ŋ, kä bikɛ ko̱r cu kui̱c.

⁴ Kä bi ramɔ cu nyuur thar jiaath ŋɔ̱a̱pdɛ, kä thilɛ mi bikɛ jak kä dual. Kɛ ɣöö latdɛ Kuoth Nhial in la Ruey Ɣɔaa.

⁵ Kä dör diaal pal ramɔ kɛ ciöt kuothdɛ, kä duundɛ ɣöö banɛ pal kɛ ciöt Kuɔth Nhial Kuothdan amäni cäŋ kɛl.

Luny ji̱ I-thɛ-rɛl jɔk pëcä

⁶ Ɛn ni̱ni tɔ̱tɔ̱ cu Kuoth Nhial ruac i̱, “Ɣän bä rɔɔm ruɔl guäth kɛl, kä bä tin ca buath raar ma̱a̱t, kɛ nɛy tëë cä moc kɛ riɛk.

⁷ Kä bä tin ci duɔth jak kä kuay, kɛnɛ nɛy tin ca buath raar ɛ do̱r mi bum bum. Kä bi Kuoth Nhial kɛ ruac wi̱i̱ pa̱a̱m Dha-yɔn ɛn cäŋ ɛmɔ amäni cäŋ kɛl.

⁸ “Kä kɛ kui̱du ji̱n luak deet in bäär, kɛ ji̱n päm nya Dha-yɔn in bum. Kä ji̱ bi ruec ben, kuäär bɛ luny kä nya Jɛ-ru-tha-lɛm.”

⁹ Kä ɛŋu wiee kɛ ji̱ ɛlɔ̱ŋ ɔ? A kuɛɛ thil kuäär? Kiɛ ci ram in la lueekdu li̱w, a jɛn ci puɔ̱nydu bɛc ɔ ce̱tkɛ ciek mi tekɛ mäc?

¹⁰ Kä kuin rɔ lö nya Dha-yɔn, ce̱tkɛ ciek mi dap. Kä täämɛ bi wec ba̱ny piny, kä bi wä ciɛŋ ni piny wec, kä bi wä kä Bɛ̈-bi-lɔn. Ɛn wi̱ni ba ji̱ wä luäk, kä bi Kuoth Nhial ji̱ wä luɛl tetni ji̱ tɛ̈ru.

¹¹ Kä täämɛ ci dör ti ŋuan rɔ thac kɛ kui̱du, wäkɛ i̱, “A jɛ da̱kɛ, kä banɛ jɛ guic kɛ nyinkɔn.”

¹² Duundɛ ɣöö /kui̱c kɛn min te wi̱i̱ Kuɔth Nhial, kä /ca min caarɛ ŋäc, ɛn ram in rol kɛ ce̱tkɛ bɛl ti kɔ̱a̱mkɛ döör.

¹³ Kä cuɛ wee, jiɛc rɔ lö nya Dha-yɔn, kä kɔ̱mkɛ, kɛ ɣöö bä ji̱ moc buɔ̱m mi ce̱tkɛ buɔ̱m yieethä. Kä ji̱n bi dör ti ŋuan riam, kä bi ɣä ley tëë cikɛn kɛ mac, bi ria̱ŋdiɛn ka̱m Kuäär wec muɔ̱ɔ̱n kɛɛliw.