Mikaa 3 - RUAC KUƆTH IN RƐL RƆ

Kueth Mikaa kɛ bööth I-thɛ-rɛl

¹ Kä cua wee, “Liɛŋɛ jɛ yɛn bööth ji̱ Je-kɔb kɛ yɛn ruëëc I-thɛ-rɛl! /Cɛ gɔaa ɛn ɣöö bia cuɔ̱ŋ ŋa̱c?

² Yɛn nɛy tin lökɛ mi gɔaa kä nhɔakɛ ni min jiääk, yɛn tin yɔatdɛ guɔ̱p nɛɛnikä, kä jiarɛ ri̱ŋdiɛn jɔk cɔ̱ɔ̱nikiɛn.

³ Yɛn nɛy tin camɛ ri̱ŋ nɛɛnikä, kä jiaŋɛ guɔ̱pdiɛn, kä tölɛ cɔ̱wkiɛn, kä jɔapɛ kɛ ce̱tkɛ ri̱ŋ mi la̱thkɛ rɛy dhar, kɛnɛ ri̱ŋ mi kɛ̈lkɛ kɛ thac.”

⁴ Ɛ jɛn bikɛ Kuoth Nhial ro̱l, duundɛ ɣöö /cɛkɛ bi liŋ. Ɛn guäth ɛmɔ bɛ rɔ tɛ̱̈ɛ̱̈ kɛ kɛ, kɛ ɣöö jiäk lätkiɛn.

⁵ Kä nɛmɛ ɛ min ci Kuoth Nhial ɛ lar kɛ kui̱ göökni tin ca nɛɛkä jak kä bath, tin wee “Ɛ mal” kɛ nɛy tin mockɛ mi̱eth. Kä lat kɛn ni ko̱r kɛ nɛy tin /kenkɛ moc mi̱eth.

⁶ Kɛ kui̱c ɛmɔ bi wäär ben kä yɛ a /cia nɛn, kä bi muth ben kä yɛ a thilɛ mi nyoothɛ. Kä bi cäŋ kony kɛ kui̱ göökni, kä bi cäŋdäär cual kɛ kui̱diɛn.

⁷ Kä bi ti̱t lɔcdiɛn jiääk, kä bi nɛy tin markɛ ŋɔak pöc, bi kɛn diaal thukiɛn lëk thi̱n, kɛ ɣöö thilɛ mi luc Kuoth ɛ kɛ.

⁸ Kä kɛ kui̱dä, ɣän cä thia̱ŋ kɛ buɔ̱m, yieekä Kuɔth Nhial, amäni thuɔ̱k kɛnɛ cuɔ̱ɔ̱ŋ, kɛ ɣöö bä ji̱ I-thɛ-rɛl ben la̱r dueerkiɛn.

⁹ Liɛŋɛ nɛmɛ yɛn bööth ji̱ Je-kɔb, kɛ yɛn ruëëc ji̱ I-thɛ-rɛl, tin ci thuɔ̱k yia̱r, kä ci cuŋ diaal bath,

¹⁰ tin ci Dha-yɔn täth kɛ rim nɛɛni tin cia näk kä cia Jɛ-ru-tha-lɛm la̱t kɛ dueer.

¹¹ Kä lat bööthkɛ luk kɛ kök, kä ŋi̱i̱c bööth palädɛ naath kɛ kök, kä lat göökɛ nyuuthni kɛ yio̱w, kä lat kɛnɛ i̱, “Te Kuoth Nhial kɛɛl kɛ kɛ, thilɛ riɛk mi bi ben kä nɛy.”

¹² Kɛ kui̱dun, bä Dha-yɔn pur ce̱tkɛ kak, kä bi Jɛ-ru-tha-lɛm a di̱r nyueeyni. Kä bi luak pa̱a̱m do̱ny kɛ rup.