Mikaa 2 - RUAC KUƆTH IN RƐL RƆ

Riɛk nɛɛni tin miɛtkɛ ga̱y

¹ Riɛk akɛ nɛy ti ca̱pkɛ tin jiäk, kä la̱tkɛ ti jiäk rɛy kölikiɛn! Kä niɛ mɔ ci ɣɔw baakɔ, la kɛn kɛ cua̱ lät, kɛ ɣöö luäŋ kɛn ɛ kɛ lätni.

² Kä mɔ cikɛ kak bɛc ɔ, naŋ kɛn kɛ, kä mi kɛ duel, naŋ kɛn kɛ. Kä la kɛn raan a mac kɛ dhɔrɛ, kä mackɛ raan kɛ kakdɛ.

³ Kɛ kui̱c ɛmɔ, cu Kuoth Nhial wee, “Ɣän bä thok duëël ɛmɛ ca̱p mi jiäk, mi /cia ŋua̱kkun bi luäŋ kɛ luɔ̱ny thi̱n. Kä /cia rɔ̱ bi nyɔk kɛ ja̱l liakä, kɛ ɣöö ba cäŋ jiäkni.

⁴ Ɛn cäŋ ɛmɔ bikɛ yɛ lɛŋ, kä bikɛ yɛ par kɛ wiee mi bɛc bɛc, wä kɛ i̱, ‘Cakɔ da̱k ɛ puc, cɛ munda ka̱m naath. Cɛ jɛ ka̱n kä kɔ! Kä cɛ jɛ dääk kä ji̱ tɛ̈ra.’ ”

⁵ Kä kɛ kui̱c ɛmɔ /bi thil gua̱a̱th rɛy dolä nɛɛni Kuɔth Nhial mi wa mun da̱a̱k kɛ yor gaakni.

⁶ Kä cu naath ɣä jiök i̱, “/Cu nɛy lät ruac. /Cu ruac kɛ kui̱ ti̱ti̱ diaal. /Ci pöc bi ben kä kɔ.”

⁷ Kä ba nɛmɛ lat, lö thok duëël Je-kɔb? A ci yiëë Kuɔth Nhial ku ŋɔ̱a̱ŋ? A cɛ ti̱ti̱ bi ku la̱t, in cuŋ dupkɛ? Kä /ci ruacdä ku gɔaa kɛ ram.

⁸ Kä kɛ kɔr kä mi tɔt, cu yɛn nɛɛkä mak ce̱tkɛ ji̱ tɛ̈r. Kä cuarɛ bieyni ka̱n, kä nɛy ti ji̱ malä, kä nɛy ti jäl a thil ko̱r mi carkɛ.

⁹ Kä tuk yɛn män nɛɛnikä duëlikiɛn tin nhɔkɛ kɛn kɛ. Kä cia gaatkiɛn tin tɛ̈thkɛ lɔcdä naŋ kä kɛ.

¹⁰ Jiɛc rɔ kä wërkɛ, kɛ ɣöö ɛn gua̱th ɛmɛ thilɛ jɛ ka̱n, kɛ ɣöö cɛ jiääk, kä ci da̱kdɛ di̱t.

¹¹ Kä mi ci gua̱n kacä kɛnɛ ram kaaŋ naath ben, kä ba yɛ jiök i̱, “Ɣän bä ruac kɛ ɣöö bi tekɛ kɔaŋ mi di̱i̱t,” jɛn ba gök nɛɛni ti̱ti̱!

¹² Kä ɣän ɛ puc bä yɛ ruɔ̱ɔ̱l yɛn diaal lö ji̱ I-thɛ-rɛl, ɛ puc ɣän bä duɔth ji̱ I-thɛ-rɛl ma̱a̱t. Ɣän bäkɛ ruɔl guäth kɛl ce̱tkɛ rɔɔm rɛy luaak, ce̱tnikɛ det rɛy tɔ̱ɔ̱rä, kä bi mun thia̱a̱ŋ kɛ nɛy ti ŋuan.

¹³ Kä bi ram in lepkɛ duɔ̱ɔ̱p kɛ cu bo̱th. Kä bikɛ lɛny raar kɛ jɛ, kä bikɛ cu wä. Kä bi kuääriɛn wä nhiamdiɛn, kä bi Kuoth Nhial kɛ cu böth.