Mikaa 1 - RUAC KUƆTH IN RƐL RƆ

¹ Nɛmɛ ɛ ruac Kuɔth Nhial mëë ci ben kä gök ni Mikaa raan rööl mi cɔali Mo-rɛ-cɛth, mëë ruec ni Yo-tham kɛnɛ A-ɣadh kɛ Ɣidh-ki-yaa, kua̱r Juda tin di̱t, mëë cɛ nyuɔ̱th jɛ kɛ kui̱ Tha-mɛ-ria kɛnɛ Jɛ-ru-tha-lɛm.

Pa̱r kɛ kui̱ Tha-mɛ-ria kɛnɛ Jɛ-ru-tha-lɛm

² Liɛŋɛ nɛmɛ yɛn dör diaal, kä liŋɛ lö wi̱c muɔ̱ɔ̱n, kɛ tin diaal tin cieŋ thi̱n. Kuäär ni Kuoth ɛ neendun, ɛn Kuoth Nhial ni luaakdɛ min rɛl rɔ.

³ Nɛ̈nɛ jɛ, Kuoth Nhial bëë kɛ ni guäth cieŋädɛ, bɛ ben ja̱l wuɔ̱thni päämni wi̱i̱ muɔ̱ɔ̱n.

⁴ Kä bi pääm thia̱y ciöknikɛ, ce̱tkɛ kɔl rɛy maac, Kä bi lööli rɔ ba̱k, ce̱tkɛ pi̱w, ti ca wuɔc guäth mi lɛ̈ɛ̈r.

⁵ Kɛn tɔ̱tɔ̱ diaal bäkɛ kɛ kui̱ dui̱rä Je-kɔb, kɛnɛ dueer tin ca la̱t ɛ thok duëël I-thɛ-rɛl. Kä duer I-thɛ-rɛl ɛŋu? /Ciɛ gua̱th palä kuthni ji̱ Tha-mɛ-ria? Kä dueer thuɔk duëël Juda ɛŋu? /Ciɛ gua̱th palä kuthni ji̱ Jɛ-ru-tha-lɛm?

⁶ Kɛ kui̱c ɛmɔ ɣän bä Tha-mɛ-ria jak kä di̱r juaacni rɛy dɔaar, ala gua̱th pi̱thä ka̱a̱kni wal kɛ kui̱ kɔaŋ. Kä ɣän bä päämkɛ yuɔr ni rɛy lo̱o̱lä, kä bä keŋkɛ jak kä jɔc.

⁷ Kä ba kuthkɛ diaal tiath ni ŋëëtni, kä ba tin diaal tin ca thöp rɛy luaak riäärädɛ waŋ kɛ mac, kä bä kolaaŋkɛ diaal dup. Kɛ ɣöö cɛ tin kɔakɛ leerɛ mat, kä bi kɛn loc jɔk nikɛ duɔ̱p leerä.

⁸ Kɛ kui̱ kä nɛmɛ, ɣän bä wiee kä bä pa̱r. Ɣän bä ja̱l kɛ pa̱a̱tkä kä bä te juutdä. Ɣän bä wiee ce̱tnikɛ rɛɛl, kä bä pa̱r ce̱tnikɛ wuɔ̱t.

⁹ Kä /ci buɔ̱ɔ̱tkɛ bi gɔw, kä cɛ ben kä Juda, kä cɛ cop ni thiekni Jɛ-ru-tha-lɛm guäth in cieŋ nɛɛkä thi̱n.

Cuɔ̱p gua̱n tɛ̈r kä Jɛ-ru-tha-lɛm

¹⁰ /Cuarɛ jɛ lat kä Gɛ̈th kä /cuarɛ wiee. Kä yɛn ji̱ Beth-ɔp-ra, dalɛ ni rɔ̱ rɛy tupä duëël pärä.

¹¹ Kä yɛn ji̱ Ca-pir wiaa baaŋ a thil bieyni. Kä /ci nɛy tin cieŋ kä Dhää-nan bi ben raar. Kä ji̱ Beth-e-dhɛl pärkɛ, thilɛ gua̱a̱th luäkä ɛn wi̱ni.

¹² Kä nɛy tin cieŋ kä Ma-roth liɛpkɛ luäk a bɛc, kɛ ɣöö ci Kuoth Nhial da̱k nööŋ thiekä Jɛ-ru-tha-lɛm.

¹³ Kä yɛn ji̱ La-kic, yiënɛ jio̱ŋko̱o̱ri kɛ thurbiɛɛli. Kɛ yɛn kɛn tëë jekɛ duer kä ji̱ I-thɛ-rɛl, kä cia ji̱ Dha-yɔn cu jak kä dui̱r.

¹⁴ Kɛ kui̱c ɛmɔ bi yɛn muc däkä piɛny thöp ji̱ Mo-rɛ-cɛth-gath. Kä bi wi̱i̱ Ak-dhib a ti kaŋkɛ kua̱r I-thɛ-rɛl.

¹⁵ Kä yɛn ji̱ Mo-rɛ-cɛth, bä yɛ nyɔk, kɛ nöŋ ram mi bi yɛ käp. Kä bi wuɔ̱t I-thɛ-rɛl wä kä Ä-du-lam.

¹⁶ Kä muɔ̱tdɛ wuɔ̱thkun kɛ kui̱ pärä gankun tin nhɔakɛ. Muɔcɛ rɔ̱ wok ce̱tkɛ nyoŋgol kɛ ɣöö ba gaatkun naŋ pɛɛcä.