Mɛ̈t 9 - RUAC KUƆTH IN RƐL RƆ

Jak Yecu kɛ ram mi cɛ nuäŋ kä gɔaa

¹ Cu Yecu wä rɛy ria̱a̱y cuɛ wä kui̱ci dhɔriɛn.

² Kä cuɛ tekɛ nɛy ti kapkɛ ram mi cɛ nuäŋ kɛ gal. Kä mëë ci Yecu ŋa̱thdiɛn nɛn, cuɛ ram in cɛ nuäŋ jiök i̱, “A lɔcdu bum, gatdä, ca dueerku päl.”

³ Kä inɔ, cu tha̱a̱ŋ ji̱ gɔ̱rä ruac kärɔ wäkɛ i̱, “Ram ɛmɛ kuethɛ ni Kuoth.”

⁴ Duundɛ ɣöö min ci Yecu ca̱riɛn ŋa̱c, cuɛ wee i̱, “Ɛŋu car yɛn ni jiäk ɔ kɛ lo̱ckun?

⁵ Ɛŋadiɛn mi thia̱k, ɛ lärɛ i̱, ‘Ca dueerku päl,’ kiɛ ɛ ɣöö i̱, ‘Jiɛc rɔ, kä jäli?’

⁶ Ɛ ɣöö bia jɛ ŋa̱c ɛn ɣöö Gat Ran tëë kɛ buɔ̱m mi derɛ päl ni dueer wi̱i̱ muɔ̱ɔ̱n.” Kä cuɛ ram in cɛ nuäŋ jiök i̱, “Jiɛc rɔ, käni ko̱lu, kä wër dhɔru.”

⁷ Kä cuɛ rɔ jiɛc, kä cuɛ wä cieŋ.

⁸ Kä mëë ci buɔ̱n nath ɛ nɛn, cukɛ ga̱a̱c, kä cukɛ Kuoth in ci nath ka̱m buɔ̱m mi ce̱tkɛ mɔmɔ liak.

Ciöt Yecu kɛ Mɛ̈-thiw

⁹ Kä mëë jäl Yecu nhiam ɛn wi̱ni, cuɛ wut mi cɔal i̱ Mɛ̈-thiw nɛn nyuurä guäth tho̱lbo̱kä, kä cuɛ jɛ jiök i̱, “Guuri ɣä.” Cu Mɛ̈-thiw rɔ jiɛc, kä cuɛ jɛ guɔ̱ɔ̱r.

¹⁰ Kä min nyuur Yecu guäth mi̱eth rɛy duëël, cu thuɔ̱ɔ̱l tho̱lbo̱kä ti ŋuan kɛnɛ ji̱ dueeri ben, kä cukɛ nyuur kɛɛl kɛ Yecu kɛnɛ ji̱ kɔaarɛ.

¹¹ Kä mëë ci ji̱ Pa-ri-thii mɛmɛ nɛn, cukɛ ji̱ kɔaarɛ jiök i̱, “Kä ɛŋu mi̱th ŋi̱i̱cdun kɛɛl kɛ thuɔ̱ɔ̱l tho̱lbo̱kä kɛnɛ ji̱ dueeri mɔ?”

¹² Kä mëë ci Yecu mɛmɛ liŋ, cuɛ wee i̱, “/Ci nɛy ti puɔl pua̱nykiɛn ki̱m go̱r, ɛ ni nɛy tin bɛc pua̱nykiɛn.

¹³ Yɛn wiaa, ŋa̱cɛ luɔt kä mɛmɛ i̱, ‘Ɣän göörä ni kɔ̱a̱c lɔaac, kä /ci mɔ a muc.’ Kɛ ɣöö /cä bä kɛ ciöt ji̱ cuŋni, ba̱a̱ kɛ kui̱ ji̱ dueeri.”

Ŋi̱i̱c Yecu kɛ kui̱ thëk mi̱thni

¹⁴ Kä cu ji̱ kɔaar Jɔ̱ɔ̱n ben kä Yecu, wäkɛ i̱, “Kä ɛŋu kɔn kɛ ji̱ Pa-ri-thii thɛ̈kɔ mi̱th ɔ, kä /ci ji̱ kɔaaru thek?”

¹⁵ Kä cu Yecu kɛ jiök i̱, “Dee ja̱a̱l kuën pa̱r, mi ŋot cɔ nyaal kɛɛl kɛ kɛ? Bi ni̱n tin ba naŋ ni cɔ nyaal kä kɛ ben, kä inɔ bikɛ mi̱th cu thɛk.

¹⁶ Thilɛ ram mi dee bi̱i̱ mi bo̱r mi /ken rɔ jop kɔac biey mi dɔaŋ, kɛ ɣöö bi bi̱i̱ in bo̱r rɔ rɛ̈t dɔɔr puɔ̱ny biey in dɔaŋ, kä bi cu di̱t ni rɛ̈ɛ̈tdɛ.

¹⁷ Kä /ca kɔaŋ mi pay mil dee piɛk rɛy göökni guup ti dɔŋ. Mi ɛ jɛn inɔ, bi göök pa̱t, kä bi kɔaŋ lo̱ny jɔ̱ɔ̱r, kä bi göök cu da̱k. Kä kɔaŋ mi pay la̱t ba jɛ piɛk rɛy göökni ti bo̱o̱r, kä bi kɛn da̱ŋ rɛw cu gɔw.”

Tëk Yecu kɛ nya kua̱r kɛnɛ ciek mi ci bi̱i̱dɛ thiap

¹⁸ Kä min lat Yecu rieet ti̱ti̱, cu bo̱o̱th guäth palä ben kä jɛ, kä cuɛ rɔ ka̱m mua̱a̱l nhiamdɛ, wëë i̱, “Nyaadä cɛ pay li̱w. Duundɛ ɣöö bër bi tetdu ben la̱th puɔ̱nydɛ, kä bɛ tëk.”

¹⁹ Cu Yecu rɔ jiɛc, kä cuɛ jɛ guɔ̱ɔ̱r kɛnɛ ji̱ kɔaarɛ.

²⁰ Kä cu ciek mi tekɛ löny riɛm kɛ run da̱ŋ wäl wi̱cdɛ rɛw ben kɛ jɔkdɛ, kä cuɛ thok biey Yecu thiap.

²¹ Kɛ ɣöö carɛ jɛ i̱, “Cäŋ thiapä ni bi̱i̱dɛ kärɔa, bä cu gɔaa.”

²² Cu Yecu rɔ ri̱t kä guicɛ jɛ, cuɛ wee i̱, “Nyaadä, a lɔcdu bum, ŋa̱thdu cɛ ji̱ jakä gɔaa.” Kä niɛ guäth ɛmɔ cua jɛ jakä gɔaa.

²³ Mëë ci Yecu cop dueel bo̱o̱thä indaan, cu nɛy ti pär nɛn kɛnɛ buɔ̱n nath mi rɔal,

²⁴ cuɛ wee i̱, “Wiaa raar, kɛ ɣöö nyam ɛmɛ /kenɛ li̱w, duŋdɛ ni̱en.” Kä cu naath dɔl ni jɛ.

²⁵ Kä mëë ca buɔ̱n jakä wä raar, cuɛ wä dueel, cuɛ nyal käp tetdä, kä cu nyal rɔ jiɛc.

²⁶ Kä cu ruac ɛmɔ däk rɛy ciëŋ ɛmɔ kɛɛliw.

Lëp Yecu kɛ wäŋ ciööri da̱ŋ rɛw

²⁷ Kä mëë jiɛy Yecu ɛn wi̱ni, cu wutni da̱ŋ rɛw ti ciöör jɛ guɔ̱ɔ̱r, wieekɛ kɛ jɔw mi di̱i̱t i̱, “A lɔcdu kɔ̱c kɛ kɔ, Gat Dee-bid!”

²⁸ Kä mëë cɛ coth dueel, cu ciöör ben kä jɛ. Kä cu Yecu kɛ jiök i̱, “Yɛn ŋa̱thɛ jɛ ɛn ɣöö bä mɛmɛ luäŋ kɛ lätni?” Cukɛ jɛ jiök i̱, “Ɣɔ̱ɔ̱n, Kuäär ni Kuoth.”

²⁹ Kä cuɛ wäŋkiɛn thiap, wëë i̱, “Kɛ kui̱ ŋäthädun ba jɛ lät kä yɛ.”

³⁰ Kä cu wäŋkiɛn rɔ̱ lɛp. Kä cu Yecu kɛ gok a bum, wëë i̱, “A jɛ bɛ thil ram mi ŋäc jɛ.”

³¹ Kä cukɛ wä, kä cua ruac wä dääk kä rɛy ciëŋ ɛmɔ kɛɛliw kɛ kui̱ Yecu.

Ci Yecu miŋ jak kä ruac

³² Kä kɛ kɔr kä mi cikɛ wä, cua ram mi ca miŋ ɛ yiëë mi jiääk nöŋ jɛ.

³³ Kä mëë ca yiëë mi jiääk tuk, cu wut in miŋ ruac, kä cu nath ga̱a̱c, wäkɛ i̱, “Thilɛ duɔ̱ɔ̱r mi ce̱tkɛ mɛmɛ mi ca met nɛn kä I-thɛ-rɛl.”

³⁴ Kä cu ji̱ Pa-ri-thii wee i̱, “Jɛn tukɛ kuth ti jiäk raar kɛ lua̱ŋ mi ka̱mkɛ jɛ ɛ kuäär kuthni jiäkni.”

Te Yecu kɛ nhök kɛ naath

³⁵ Kä cu Yecu wi̱i̱ kɛnɛ ciëëŋ diaal jäl, ŋi̱i̱cɛ naath gua̱thni palädiɛn, kä latdɛ thuk ti gɔw kɛ kui̱ kuäärä Kuɔth, kä jakɛ liaw diaal kä gɔw, kɛnɛ jua̱th diaal.

³⁶ Kä min cɛ buɔ̱n nɛn, cuɛ tekɛ nhök kɛ kui̱diɛn, kɛ ɣöö ga̱a̱rkɛ kä thilkɛ lua̱ŋ, ce̱tkɛ kɛ det ti thil yieen.

³⁷ Kä cuɛ ji̱ kɔaarɛ jiök i̱, “Ŋër di̱tdɛ, kä ji̱ ŋër kuiykɛ.

³⁸ Kɛ kui̱ ɛmɔ, thiecɛ Kuäär ni Kuoth ŋër, kɛ ɣöö bɛ ji̱ ŋër jäkä rɛy kakä.”