Mɛ̈t 8 - RUAC KUƆTH IN RƐL RƆ

Jak Yecu ram mi tekɛ dhɔp kä gɔaa

¹ Mëë ci Yecu ben piny wi̱i̱ pa̱a̱m, cu buɔ̱n nath mi di̱i̱t jɛ guɔ̱ɔ̱r.

² Kä cu ram mi tekɛ dhɔp ben kä jɛ, cuɛ rɔ ka̱m mua̱a̱l nhiamdɛ, kä cuɛ wee i̱, “Kuäär ni Kuoth, mi nhɔki jɛ, deri ɣä jakä gɔaa.”

³ Kä cu Yecu tetdɛ ri̱c, cuɛ jɛ thiap, wëë i̱, “Ɣän nhɔakä jɛ. Bi gɔaa!” Kä niɛ wanɔ cu dhɔpdɛ gɔaa.

⁴ Kä cu Yecu jɛ jiök i̱, “Nɛnɛ /cu jɛ lär radɔ̱diɛn, kä wër, nyuthni rɔɔdu bööth palä tin di̱t, kä wër tho̱pni muc ëë ca lar ɛ Muthɛ ala nyuuth kä kɛ.”

Jak Yecu läät kua̱r kä gɔaa

⁵ Kä min wëë rɛy Ka-pɛr-ni-äm, cu bo̱o̱th lathkëëri ben nhiamdɛ, läŋɛ jɛ,

⁶ kä wëë i̱, “Kuäär ni Kuoth, raan lätädä nuäŋɛ puɔ̱nydɛ cieŋ kɛ juey mi bɛc ɛlɔ̱ŋ.”

⁷ Kä cuɛ jɛ jiök i̱, “Ɣän bä jɛ ben jakä gɔaa.”

⁸ Kä cu bo̱o̱th lathkëëri jɛ loc i̱, “Kuäär ni Kuoth, /ci ɣän a ram mi gɔaa ɛn ɣöö deri ben dueelä, kä lar ni riet, kä bi raan lätädä cu gɔaa.

⁹ Kɛ ɣöö ɣän ta̱a̱ kɛ kuäär mi guɔ̱ɔ̱rä, kä ta̱a̱ kɛ lathkëëri ti guɔ̱ɔ̱rkɛ ɣä. Kä mi jiökä kɛl i̱, ‘Wër,’ jɛn la wee, kä mi jiökä min dɔ̱diɛn i̱, ‘Bër,’ jɛn la bëë, kä mi jiökä kuanydä i̱, ‘Lätni mɛmɛ,’ la lätdɛ jɛ.”

¹⁰ Mëë ci Yecu jɛ liŋ, cuɛ ga̱a̱c ɛlɔ̱ŋ, kä cuɛ jɛ la̱r nɛy tin guɔ̱ɔ̱rkɛ jɛ i̱, “Ɛpuc, ɣän la̱rä jɛ yɛ, amäni rɛy I-thɛ-rɛl, /ka̱n ŋa̱th mi di̱i̱t mi ce̱tkɛ mɛmɛ met jek.

¹¹ Ɣän la̱rä jɛ yɛ, bi nɛy ti ŋuan ben kä käny ca̱ŋ kɛnɛ kony ca̱ŋ, kä bikɛ mi̱th kɛɛl kɛ A-bɛ-ram, kɛnɛ Ay-dhɛk, kɛ Je-kɔb rɛy ciëŋ kuäärä nhial.

¹² Kä ba gaat kuäärä yuɔr rɛy muɔ̱th raar, ɛn wi̱ni bi naath tekɛ lul kɛnɛ muɔ̱th lɛc!”

¹³ Kä cu yecu kuäär lathkëëri jiök i̱, “Wër, ba jɛ lät kä ji̱ ce̱tkɛ min ci ŋäth.” Kä cua raan lätdä jakä gɔaa kɛ jɛn thaak ɛmɔ.

Jak Yecu jua̱th nɛɛni ti ŋuan kä gɔw

¹⁴ Kä mëë ci Yecu coth dueel Pi-tɔr, cuɛ manthu Pi-tɔr nɛn tɔ̱ɔ̱cä, tëë kɛ lɔɔp.

¹⁵ Cuɛ tetdɛ thiap, kä cu lɔɔpdɛ jiɛɛn, kä cuɛ rɔ jiɛc kä lätdɛ Yecu ikä.

¹⁶ Kɛ jɛn thiaŋ ɛmɔ, cua jɛ nöŋ nɛy ti ŋuan ti ca käp ɛ yiey ti jiäk, kä cuɛ yiey tɔ̱tɔ̱ tuɔ̱k raar kɛ riet, kä cuɛ nɛy diaal tin tekɛ jua̱th jakä gɔw.

¹⁷ Mɛmɛ ɛ ɣöö bi mëë ca lar ɛ gök ni I-ca-yaa a thuɔ̱k i̱, “Jɛn cɛ jua̱thkɔ ka̱n, kä cɛ liawkɔ naŋ.”

Nɛy ti görkɛ guur Yecu

¹⁸ Täämɛ mëë ci Yecu nɛy ti ŋuan ti te gëëknikɛ nɛn, cuɛ jaakɛ la̱r ɣöö bikɛ wä kui̱c.

¹⁹ Kä cu ram mi gɔ̱ɔ̱r ben kä jɛ, cuɛ jɛ jiök i̱, “Ŋi̱i̱c, ɣän bä ji̱ guɔ̱ɔ̱r gua̱thni diaal tin bi wä thi̱n.”

²⁰ Kä cu Yecu jɛ jiök i̱, “Wa̱a̱ni tekɛ kɛ ɣo̱t, kä te diit nhial kɛ duël, kä Gat Ran thilɛ gua̱a̱th mi läthɛ wi̱cdɛ thi̱n.”

²¹ Kä cu raan kɔaarɛ kɛl jɛ jiök i̱, “Kuäär ni Kuoth, a kɔanä gua̱a̱r wä kony.”

²² Kä cu Yecu jɛ jiök i̱, “Guuri ɣä, päli nɛy tin ci li̱w kuɔ̱ny nɛɛnikiɛn tin ci li̱w.”

Guɔ̱k Yecu kɛ jiɔam

²³ Kä min ci Yecu wä rɛy murkäbä, cu ji̱ kɔaarɛ jɛ guɔ̱ɔ̱r.

²⁴ Kä nɛnɛ, cu thul mi di̱i̱t rɔ jiɛc däär baar, mi dee riey jakä di̱ŋ kɛ muaŋdɛ. Kä duundɛ ɣöö te Yecu ni̱n.

²⁵ Cukɛ wä, wa jɛ ker, cukɛ wee i̱, “Kuäär ni Kuoth kän kɔ! Li̱ewkɔ!”

²⁶ Kä cuɛ kɛ jiök i̱, “Yɛn nɛy ti kuiy ŋa̱thdun, ɛŋu mi dual kɛ yɛ?” Kä cuɛ rɔ jiɛc, cuɛ jiɔam kɛnɛ muaŋ baar luek. Kä cuɛ tekɛ kääp mi di̱i̱t.

²⁷ Kä cu ji̱ kɔaarɛ ga̱a̱c ɛlɔ̱ŋ, wäkɛ i̱, “Ɛ ram mi te di ɛn liɛŋkɛ ruacdɛ mɛ ɛ jiɔam kɛnɛ muaŋ?”

Jak Yecu ji̱ yieyni ti jiäk da̱ŋ rɛw kä gɔaa

²⁸ Kä mëë ci Yecu cop kui̱ci, ro̱o̱l Gɛ-ri-thiin, cu nɛy da̱ŋ rɛw ti ca käp ɛ yiey ti jiäk röm kɛ jɛ, bäkɛ raar kɔ̱a̱kni kunyä. Kä kɛ nɛy ti ŋɛ̈ny ŋɛ̈ɛ̈ny ti dual naath kɛ kɛ ɛlɔ̱ŋ, a thilɛ ram mi dee rët kɛ jɛn duɔ̱ɔ̱p ɛmɔ.

²⁹ Kä cukɛ rɔal ɛn wanɔ i̱, “Ŋumdu kɛ kɔ, ji̱n Gat Kuɔth? Ji̱n bi̱i̱kɛ kɛ ɣöö, bikɔ ben tɔ̱ŋ a /ken gua̱a̱th ni ben?”

³⁰ Kä tëë kɛ buɔ̱n kuɔ̱ndhuɔ̱ɔ̱ri ti ŋuan ti läk guäth mi nɔ̱a̱n kɛ kɛ.

³¹ Kä cu yiey ti jiäk jɛ läŋ i̱, “Mi tuki kɔ raar, jäkni kɔ kä rɛy kuɔ̱ndhuɔ̱ɔ̱ri.”

³² Kä cuɛ kɛ jiök i̱, “Wiaa.” Kä cukɛ ben raar cukɛ wä rɛy kuɔ̱ndhuɔ̱ɔ̱ri, kä cu buɔ̱n kuɔ̱ndhuɔ̱ɔ̱ri ni kɛɛliw riŋ piny po̱mä baar mi luŋ, kä cukɛ mua rɛy pi̱i̱ni.

³³ Kä cu yiëënkiɛn rɔ̱ bar, kä min cikɛ wä rɛy wec cukɛ ti diaal tin ci tuɔɔk kɛ kui̱ wutni tin tekɛ yiey tin jiäk lat.

³⁴ Kä cu ji̱ wec diaal ben raar bäkɛ ben röm kɛ Yecu. Kä mëë cikɛ jɛ nɛn, cukɛ jɛ läŋ kɛ ɣöö bɛ rɔ woc dhɔriɛn.