Mɛ̈t 4 - RUAC KUƆTH IN RƐL RƆ

Ɣɔm Yecu

¹ Kä cua Yecu buath rɛy dɔaar ɛ Yiëë kɛ ɣöö ba jɛ wä ɣɔam ɛ gua̱n jiäkni.

² Kä /kenɛ mi̱th kɛ ni̱n ti jiɛn ŋuan wäär kɛnɛ cäŋ. Kä kɛ kɔrɛ cu buɔth ɛ näk ɛlɔ̱ŋ.

³ Kä cu gua̱n ɣɔmä ben kä Jɛ, cuɛ jɛ jiök i̱, “Mi ɛ ji̱n Gat Kuɔth, ruacni kɛ pääm ti̱ti̱ kɛ ɣöö bikɛ rɔ̱ loc ni juray.”

⁴ Kä cu Yecu jɛ loc i̱, “Ca jɛ gɔ̱r i̱, ‘/Ci raan dee tëk kɛ mi̱eth kärɔa, ɛ ni riet in bä raar thok Kuɔth.’ ”

⁵ Kä cu gua̱n jiäkni jɛ naŋ kä Jɛ-ru-tha-lɛm wec in rɛl rɔ kä cuɛ jɛ wä la̱th wi̱i̱ luaak Kuɔth mi bäär.

⁶ Cuɛ jɛ jiök i̱, “Mi ɛ ji̱n Gat Kuɔth, yori rɔɔdu piny, kɛ ɣöö ca jɛ gɔ̱r i̱, ‘Kuoth bɛ ja̱a̱kɛ la̱t ruac, kɛ kui̱du’, kä, ‘Bikɛ ji̱ thak kɛ tetkiɛn, kɛ ɣöö /ci cio̱o̱kdu bi pi̱em pa̱a̱m.’ ”

⁷ Cu Yecu jɛ jiök i̱, “Ca jɛ gɔ̱r bä i̱, ‘/Cu Kuäär ni Kuothdu ɣɔ̱n.’ ”

⁸ Kä cu gua̱n jiäkni jɛ lɛni naŋ wi̱i̱ pa̱a̱m mi bäär, cuɛ jɛ nyuɔ̱th kuääri ɣɔaa diaal kɛnɛ wuɔ̱tdiɛn,

⁹ kä cuɛ Yecu jiök i̱, “Mi kämi rɔ mua̱a̱l nhiamdä a pali ɣä, bä ji̱ ka̱m ŋɔak ti̱ti̱ diaal.”

¹⁰ Kä cu Yecu jɛ jiök i̱, “Woc rɔ, Cɛy-tan, kɛ ɣöö ca jɛ gɔ̱r i̱, ‘Pal ni Kuäär in la Kuothdu, kä bi lät ni jɛ ikä kärɔa.’ ”

¹¹ Kä cu gua̱n jiäkni jɛ ba̱ny piny. Kä cu ja̱a̱k Kuɔth ben kä cua jɛ ben lätikä.

Tuk Yecu kɛ lätkɛ kä Gɛ̈-lɛ-li

¹² Kä mëë ci Yecu jɛ liŋ ɛn ɣöö ca Jɔ̱ɔ̱n yian, cuɛ wä kä Gɛ̈-lɛ-li.

¹³ Cuɛ jiɛɛn kä Na-dha-rɛth, cuɛ wä cieŋ kä Ka-pɛr-ni-äm mi te gekä baar, rɛy rööl Dhɛ-bu-lun kɛnɛ Nap-ta-li.

¹⁴ Cua nɔmɔ la̱t kɛ ɣöö bi mëë ca lar ɛ gök ni I-ca-yaa a thuɔ̱k i̱,

¹⁵ “Ciëŋ Dhɛ-bu-lun kɛnɛ ciëŋ Nap-ta-li, duɔ̱ɔ̱p mi lot ni bar kɛnɛ kui̱c kiɛɛr Jɔr-dɛn, Gɛ̈-lɛ-li, dhɔr Juri.

¹⁶ Nɛy tin te nyuurä rɛy muɔ̱th cikɛ buay mi di̱i̱t nɛn, kä kɛ kui̱ nɛɛni tin ci nyuur rɛy ti̱pä li̱eth, ci buay ben kä kɛ.”

¹⁷ Kä ɛn guäth ɛmɔ cu Yecu ruac tok, kä cuɛ wee i̱, “Rietdɛ rɔ̱ kä jiäkun, kɛ ɣöö ci ciaŋ kuäärä nhial thia̱k.”

Ciöt Yecu kɛ jaak tin nhiam

¹⁸ Kä mëë jäl Yecu gekä baar Gɛ̈-lɛ-li, cuɛ gaat wutdä da̱ŋ rɛw nɛn, Thay-mɔn min cɔal i̱ Pi-tɔr, kɛnɛ däman ni An-dɛ-röw, yuɔrkɛ cambak rɛy baar, kɛ ɣöö kɛ dëëp rɛc.

¹⁹ Kä cuɛ kɛ jiök i̱, “Bia, guɔ̱ɔ̱rɛ ɣä, kä bä yɛ jakä dëëp nath.”

²⁰ Nikä kɛɛl cukɛ cambaknikiɛn ba̱ny piny, kä cukɛ jɛ guɔ̱ɔ̱r.

²¹ Kä min wä Yecu kɛ thɔ̱a̱ŋ ɛ mɔ, cuɛ gaat wutdä da̱ŋ rɛw kɔ̱kiɛn nɛn, Je-mɛth, kɛnɛ däman ni Jɔ̱ɔ̱n gaat Dhɛ-ba-dii. Kä tekɛ rɛy ria̱a̱y kɛɛl kɛ gua̱ndiɛn ni Dhɛ-ba-dii, kɔackɛ cambaknikiɛn, kä cuɛ kɛ cɔl.

²² Nikä kɛɛl cukɛ riey kɛnɛ gua̱ndiɛn ba̱ny piny, cukɛ jɛ guɔ̱ɔ̱r.

Ŋi̱i̱c Yecu kɛnɛ jakdɛ kɛ naath kä gɔw

²³ Kä cu Yecu ja̱l rɛy Gɛ̈-lɛ-li kɛɛliw, ŋi̱i̱cɛ naath gua̱thni palädiɛn, kä latdɛ thuk kuäärä Kuɔth ti gɔw, kä jakɛ jua̱th diaal kä gɔw, kä woocɛ liaw pua̱nyni nath.

²⁴ Kä cu kɛ̈kdɛ räth rɛy Thi-ri-ya kɛɛliw, kä cukɛ jɛ nöŋ ji̱ jua̱thni diaal tin tekɛ liaw ti gööl kɛnɛ bɛc pua̱ny, kɛ kuth ti jiäk, kɛ nok, amäni nɛy ti cɛ nuäŋ, kä cuɛ kɛ jakä gɔw.

²⁵ Kä cu buɔ̱n nath mi di̱t jɛ guɔ̱ɔ̱r kä Gɛ̈-lɛ-li kɛ Dɛ-ka-po-lith kɛnɛ Jɛ-ru-tha-lɛm kɛ Ju-dia, amäni ji̱ kuec kiɛɛr Jɔr-dɛn.