Mɛ̈t 3 - RUAC KUƆTH IN RƐL RƆ

Ŋi̱i̱c Jɔ̱ɔ̱n in la lääk

¹ Kä ɛn ni̱ni tɔ̱tɔ̱ cu Jɔ̱ɔ̱n in la lääk ben lätdɛ naath ruac där dɔaar kä Ju-dia, wëë i̱,

² “Rietdɛ rɔ̱ kä jiäkun, kɛ ɣöö ci ciaŋ kuäärä nhial thia̱k.”

³ Kä nɛmɛ ɛ jɛn ram in ca lar ɛ gök ni I-ca-yaa mëë ɛ jɛn i̱, “Jɔw raam mi cio̱t där dɔaar i̱, ‘Rialɛ duɔ̱ɔ̱p Kua̱r ni Kuɔth ikä, jakɛ dupkɛ kä cuŋ.’ ”

⁴ Täämɛ Jɔ̱ɔ̱n ciɛŋɛ ni bi̱i̱ mi ca la̱t kɛ mi̱em thɔ̱a̱rɔa̱a̱l, kä te la̱a̱k gupä lɛtädɛ, kä mi̱ethdɛ ɛ kɔaryɔaamni kɛnɛ tuaar.

⁵ Kä cu ji̱ Jɛ-ru-tha-lɛm kɛnɛ ji̱ Ju-dia diaal, kɛ ji̱ wi̱i̱ni diaal tin thia̱k kɛ Jɔr-dɛn wä kä jɛ.

⁶ Kä cuɛ kɛ lak rɛy kiɛɛr Jɔr-dɛn, kä latkɛ dueerkiɛn.

⁷ Kä mëë cɛ ji̱ Pa-ri-thii kɛnɛ ji̱ Thɛ̈d-du-thii ti ŋuan nɛn a bëë bakɛ ben lak, cuɛ kɛ jiök i̱, “Yɛn dɛy thɔ̱ɔ̱li, ɛŋa mi ci yɛ la̱r lär i̱ bia rɔ̱ bar kä duäc Kuɔth in bi ben?

⁸ La̱tdɛ lät ti gɔw ti ro̱ŋ kɛ rietdun kɛ rɔ̱ dueeri,

⁹ kä /cuarɛ jɛ car a ruacɛ kärɔ̱ i̱, ‘Kɔn akɛ gua̱ndɔŋda ni A-bɛ-ram’. Kɛ ɣöö la̱rä jɛ yɛ, ɛn ɣöö te Kuoth kɛ buɔ̱m kɛ ɣöö bɛ A-bɛ-ram moc gaat kɛ pääm ti̱ti̱.

¹⁰ Kä mäni täämɛ te jio̱p thäri jiɛn, kɛ kui̱ ɛmɔ jiɛn diaal ti thil dɛy ti gɔw bakɛ jɔap piny, kä ba kɛ yuɔr maac.

¹¹ “Ɣän lakä yɛ kɛ pi̱ kɛ kui̱ ri̱tädun kɛ rɔ̱ dueeri, kä ram mi bum ni jɛn kä ɣä a bëë kɔɔrä ni, kä /cä ro̱ŋ kɛ ɣöö bä wa̱a̱rikɛ kap. Jɛn bɛ yɛ lak kɛ Yiëë in Gɔaa in Rɛl Rɔ kɛnɛ mac.

¹² Kä te duŋ lök bɛɛl tetädɛ, kä bɛ do̱rɛ la̱t agɔaa. Bɛ bɛlkɛ piɛk tueyni, kä bɛ jiliɛn waŋ kɛ mac mi /ca bi yieny.”

La̱k Yecu

¹³ Kä cu Yecu jiɛɛn kä Gɛ̈-lɛ-li, bëë kä Jɔr-dɛn kɛ ɣöö ba jɛ ben lak ɛ Jɔ̱ɔ̱n.

¹⁴ Cu Jɔ̱ɔ̱n ɛ dee pën, wëë i̱, “Ji̱n bi̱i̱ kä ɣä? Ŋua̱ni ɣöö bi ɣä lak ɛ ji̱n.”

¹⁵ Kä cu Yecu jɛ loc i̱, “A jɛ te inɔ ɛn täämɛ. Kɛ ɣöö ro̱ŋɛ ɛn ɣöö banɛ cuŋ diaal la̱t.” Kä cu Jɔ̱ɔ̱n ɛ nhɔk.

¹⁶ Kä mëë ca Yecu lak, kä niɛ min pälɛ raar rɛy pi̱i̱ni cu nhial rɔ lɛp, kä cuɛ Yiëë Kuɔth nɛn bëë piny ce̱tkɛ guuk, kä cuɛ ben kä jɛ.

¹⁷ Kä cu jɔw ben nhial, cuɛ wee i̱, “Mɛmɛ ɛ jɛn Gatdä min nhɔakä, in tɛth lɔcdä kɛ jɛ.”