Mɛ̈t 28 - RUAC KUƆTH IN RƐL RƆ

Jiëc Yecu li̱th

¹ Kɛ kɔr ca̱ŋ lɔ̱ŋä ji̱ Juudh, bakä ɣɔaa kɛ cäŋ in jio̱liɛn, cu Mɛri raan Mag-da-la kɛ Mɛri in dɔ̱ŋ gua̱a̱th kunyä wä gui̱l.

² Kä nɛnɛ, cuɛ tekɛ lath piɛny mi di̱i̱t, kɛ ɣöö ci jääk Kua̱r ni Kuɔth ben piny nhial, cuɛ päm rial gekä thok kɔ̱kä, kä cuɛ nyuur wi̱i̱dɛ.

³ Kä buɔy guec pua̱nydɛ ce̱tkɛ yiel nhial, kä bieynikɛ buɔykɛ ce̱tkɛ kɛ kën.

⁴ Kä cu yiëën dual ɛlɔ̱ŋ kɛ jääk, a bikɛ ce̱tkɛ nɛy ti ci li̱w.

⁵ Kä cu jääk Kuɔth nhial män jiök i̱, “/Cuarɛ dual, kɛ ɣöö ŋa̱cä jɛ ɛn ɣöö görɛ ni Yecu ëë ca pua̱t jiaath.

⁶ Thilɛ jɛ ɛn wanɛ, jɛn cɛ rɔ jiɛc li̱th, ce̱tkɛ mëë cɛ lar. Bia nɛnɛ gua̱a̱th ëë ca tɔ̱a̱c thi̱n.

⁷ Kä wiaa kɛ pɛ̈th, kä la̱rɛ jɛ ji̱ kɔaarɛ ɛn ɣöö cɛ rɔ jiɛc li̱th, kä jɛn wëë kä Gɛ̈-lɛ-li kɛ nhiam kä yɛ. Bia jɛ wä nɛn ɛn wi̱ni, kä tiɛtdɛ mëë cä la̱r yɛ.”

⁸ Kä inɔ cukɛ jiɛɛn kɛ pɛ̈th guäth kunyä, kɛ dual kɛnɛ tɛ̈th lɔaac mi di̱i̱t, kä cukɛ riŋ kɛ ɣöö bikɛ jɛ wä la̱r ji̱ kɔaarɛ.

⁹ Kä nɛnɛ, cu Yecu röm kɛ kɛ, cuɛ wee i̱, “Malɛ!” Cukɛ ben kä jɛ, cukɛ jɛ käp ciökni, kä cukɛ jɛ pal.

¹⁰ Kä cu Yecu kɛ jiök i̱, “/Cuarɛ dual, wiaa la̱rɛ jɛ dämaari ɛn ɣöö bikɛ wä kä Gɛ̈-lɛ-li, kä bikɛ ɣä wä nɛn ɛn wi̱ni.”

Lär yiëëni kɛ min ci tuɔɔk

¹¹ Kä min wä män cu tha̱a̱ŋ yiëëni wä rɛy rɛ̈ɛ̈k, kä cukɛ ti diaal tin ci tuɔɔk wä la̱t bööth palä tin di̱t.

¹² Kä mëë cikɛ rɔ̱ dol kɛɛl kɛ di̱t nath cukɛ ruac kärɔ̱, cukɛ yio̱w ti ŋuan ka̱m lathkëëri,

¹³ wäkɛ i̱, “La̱rɛ jɛ naath ɛn ɣöö ci ji̱ kɔaarɛ ben kɛ wäär, kä cikɛ puɔ̱nydɛ kual mëë ta̱kɔ ni̱n.

¹⁴ Kä mi wä rueec mɛmɛ liŋ, bakɔ lɔcdɛ jakä ro̱ŋ, kä bia kään rɛy rikä.”

¹⁵ Kä inɔ cukɛ yio̱w ka̱n, kä cukɛ jɛ la̱t ce̱tkɛ min ca la̱r kɛ. Kä ruac ɛmɛ ŋotdɛ latkɛ jɛ rɛy ji̱ Juudh amäni wa̱lɛ.

Jäk jaakni Yecu

¹⁶ Täämɛ cu ji̱ kɔaarɛ da̱ŋ wäl kɛl wä kä Gɛ̈-lɛ-li, wäkɛ wi̱i̱ pa̱a̱m in ci Yecu ɛ nyuɔ̱th kɛ.

¹⁷ Kä mëë cikɛ jɛ nɛn, cukɛ jɛ pal, kä te tha̱a̱ŋkiɛn kɛ diw.

¹⁸ Kä cu Yecu ben kä kɛ, cuɛ kɛ jiök i̱, “Lua̱ŋ nhial kɛnɛ piny kɛɛliw ca jɛ ka̱m ɣä.

¹⁹ Kä wiaa, kä jakɛ naath kä ji̱ kɔaarä rɛy dööri diaal, kä lakɛ kɛ kɛ ciöt Gua̱a̱r in te nhial, kɛ Gat, kɛ Yiëë in Gɔaa in Rɛl Rɔ,

²⁰ kä ŋi̱eecɛ kɛ, kɛ ɣöö bikɛ ruaacni diaal tin ca la̱t yɛ luɔ̱th. Kä tiɛmɛ jɛ, ɣän a kɛɛl kɛ yɛ ni ciaŋ amäni guut ɣɔaa.”