Mɛ̈t 27 - RUAC KUƆTH IN RƐL RƆ

Naŋ Yecu nhiam Pay-lɛt

¹ Mëë ci ɣɔw baak, cu bööth palä diaal tin di̱t kɛnɛ di̱t nath ruac kärɔ̱ kɛ ɣöö ba Yecu näk.

² Cukɛ jɛ yian, kä cukɛ jɛ naŋ, cukɛ jɛ nöŋ rueec ni Pay-lɛt.

Ŋa̱p Ju-däth kɛ rɔ

³ Mëë ci ram ëë kɔk Yecu ni Ju-däth ɛ nɛn ɛn ɣöö ca Yecu kuɛ̈th li̱th, cuɛ lɔcdɛ ri̱t, kä cuɛ yio̱w cikä min bo̱r ti jiɛn diɔ̱k luɔ̱c bööth palä tin di̱t kɛnɛ di̱t nath.

⁴ Kä cuɛ wee i̱, “Ɣän cä duer kɛ kɔk riɛm raam mi thil duer.” Cu bööth palä kɛnɛ di̱t nath wee i̱, “Thilɛ kɔ ca̱p thi̱n. Ɛ ni ruacdu kärɔa!”

⁵ Kä cuɛ yio̱w yuɔr piny rɛy luaak Kuɔth, kä cuɛ wä, cuɛ rɔ wä ŋap.

⁶ Kä cu bööth palä tin di̱t yio̱w kuany, cukɛ wee i̱, “/Cɛ rɔ lot ɛn ɣöö dëë kɛ la̱th guäth tɔ̱wä yio̱o̱ni luaak Kuɔth, kɛ ɣöö kɛ yio̱w riɛm.”

⁷ Kä cukɛ ruac mat, cukɛ yio̱w kɔk kak raam mi tääth dha̱a̱ri, kɛ ɣöö ba jur kony thi̱n.

⁸ Kɛ kui̱ ɛmɔ cua kak ɛmɔ cɔl i̱, “Kak riɛm,” amäni wa̱lɛ.

⁹ Kä cu ruac ëë ca lar ɛ gök ni Yir-mɛ-yaa a thuɔ̱k ëë ɛ jɛn i̱, “Cukɛ yio̱w cikä min bo̱r ti jiɛn diɔ̱k ka̱n, kɛn yio̱w tin ca mat ɛ ji̱ I-thɛ-rɛl ɛn ɣöö ɛ jɛn pek ko̱kädɛ,

¹⁰ kä cukɛ yio̱w kɔkni kak raam mi tääth dha̱a̱ri, ce̱tkɛ min ci Kuäär ni Kuoth ɛ la̱r ɣä.”

Thiec Pay-lɛt kɛ Yecu

¹¹ Kä täämɛ te Yecu cuŋä nhiam rueecä ni Pay-lɛt, kä cu rueec ɛ thiec i̱, “Ɛ jɛn ji̱n Kuäär ji̱ Juudh?” Cu Yecu jɛ jiök i̱, “Ɛ jɛn ci lar ɔ.”

¹² Kä min ca jɛ gɔany ɛ bööth palä tin di̱t kɛnɛ di̱t nath, cuɛ thil mi cɛ loc.

¹³ Kä cu Pay-lɛt ɛ jiök i̱, “Ji̱n /ci ŋɔak diaal ti ŋuan ti gɔanykɛ ni ji̱ ti liŋ?”

¹⁴ Kä cuɛ thil mi cɛ loc a cäŋɛ riet kɛl, kä cu rueec ga̱a̱c ɛlɔ̱ŋ.

Kuɛth Yecu li̱th

¹⁵ Täämɛ kɛ cäŋ mi̱eth ti̱mä Ca̱ŋ Bälä la rueec naath a luny ram kɛl in ci kɛn ɛ go̱r.

¹⁶ Kä tëë kɛ raan yieenä mi ŋa̱ckɛ nyuɔɔnkɛ ɛ nɛy diaal, mi cɔal i̱ Bä-ra-bäth.

¹⁷ Kä mëë cikɛ rɔ̱ dol, cu Pay-lɛt kɛ jiök i̱, “Ɛŋa mi görɛ i̱ bä luɔ̱ny yɛ, ɛ Bä-ra-bäth kiɛ Yecu in cɔalkɛ i̱ Mɛ-thia?”

¹⁸ Kɛ ɣöö cɛ jɛ ŋa̱c ɛn ɣöö nööŋkɛ jɛ kɛ kui̱ tiilä.

¹⁹ Kä min nyuurɛ wi̱i̱ kɔam luɔ̱k, cu ciekdɛ jɛ jäkä ruac i̱, “A jɛ thil mi lätdi kä gua̱n cuŋni ɛmɔ, kɛ ɣöö cä cuuc ɛn walɛ kɛ läk mi cä läkikä kɛ kui̱dɛ.”

²⁰ Kä cu bööth palä tin di̱t kɛnɛ di̱t ji̱ Juudh naath com kɛ ɣöö ba thiec ni luɔ̱ny Bä-ra-bäth, kä ba Yecu näk.

²¹ Kä cu rueec kɛ nyɔk kɛ thiec i̱, “Ɛŋadiɛn kä kɛn da̱ŋ rɛw mi görɛ i̱ bä luɔ̱ny yɛ?” Kä cukɛ jɛ loc i̱, “Bä-ra-bäth.”

²² Kä cu Pay-lɛt kɛ jiök i̱, “Kä ɛŋu mi bä lät kä Yecu in cɔalkɛ i̱ Mɛ-thia?” Kä cu kɛn diaal wee i̱, “A jɛ pua̱tkɛ jiaath.”

²³ Kä cu Pay-lɛt thiec i̱, “Ɛ kui̱ ŋukä, kä ɛ mi jiääk ŋukä cɛ la̱tɔ?” Kä cukɛ ku rɔal ɛlɔ̱ŋ i̱, “A jɛ pua̱tkɛ jiaath!”

²⁴ Kä mëë ci Pay-lɛt ɛ ŋa̱c ɛn ɣöö thilɛ mi bɛ luäŋ kɛ lätni, kä took rɔal rɔɔdɛ, cuɛ pi̱ ka̱n, kä cuɛ tetkɛ lak nhiam nath, wëë i̱, “Ɣän thilɛ ɣä duer kɛ lia̱a̱ wutdä nɛmɛ, nɛnɛ jɛ lätdɛ yɛn pua̱nykun.”

²⁵ Kä cu nɛy diaal ɛ loc i̱, “Bi riɛmdɛ te wi̱i̱da amäni gaatkɔ.”

²⁶ Kä cuɛ kɛ luɔ̱ny Bä-ra-bäth. Kä mëë cɛ Yecu jakä dua̱ckɛ, cuɛ jɛ ka̱m kɛ kɛ ɣöö ba wä pua̱t jiaath.

Buɔ̱y lathkëëri kɛ Yecu

²⁷ Kä cu lathkëëri rueecä Yecu naŋ rɛy dhɔaar Pay-lɛt, kä cu buɔ̱n lathkëëri rɔ̱ duɔl gëëknikɛ.

²⁸ Cukɛ bieynikɛ ka̱m raar, kä cukɛ bi̱i̱ mi do̱l la̱th puɔ̱ɔ̱nydɛ.

²⁹ Kä mëë cikɛ kum kuiyni tak, cukɛ jɛ la̱th wi̱cdɛ, cukɛ kɛɛt la̱th tetdä cuëëcdɛ. Kä cukɛ rɔ̱ ka̱m mua̱a̱l nhiamdɛ, cukɛ jɛ buy, wäkɛ i̱, “Malɛ, Kuäär ji̱ Juudh!”

³⁰ Kä cukɛ jɛ ŋul kä ruɛy, kä cukɛ kɛɛt ka̱n kä cukɛ yɔ̱t wi̱i̱dɛ.

³¹ Mëë cikɛ jɛ buy, cukɛ bi̱i̱ woc kä jɛ, cukɛ bieynikɛ la̱th puɔ̱ɔ̱nydɛ, kä cukɛ jɛ naŋ kɛ ɣöö ba wä pua̱t jiaath.

Puɔ̱t Yecu jiath

³² Min wäkɛ raar, cukɛ raan Thay-rin mi cɔal i̱ Thay-mɔn jek, cukɛ wut ɛmɛ kok i̱ bɛ jiath in ba wä puɔ̱t ni Yecu kap.

³³ Kä mëë cikɛ gua̱a̱th mi cɔal i̱ Gɔl-gö-tha mi lot ni ɣöö (gua̱a̱th po̱o̱rä) cop,

³⁴ cukɛ jɛ moc kɔaŋ mi ca liɔm kɛ wäl mi kɛc kɛ ɣöö bɛ jɛ math, kä mëë cɛ jɛ met, cuɛ ma̱thdɛ lo̱k.

³⁵ Kä cukɛ jɛ pua̱t jiaath, cukɛ bieynikɛ dääk kärɔ̱ kɛ yor gaakni.

³⁶ Cukɛ nyuur, kä guɛckɛ jɛ ɛn wi̱ni.

³⁷ Cukɛ min gɔanykɛ ni jɛ gɔ̱r, kä cua la̱th wi̱i̱dɛ nhial i̱, “Mɛmɛ ɛ Yecu, Kuäär ji̱ Juudh.”

³⁸ Kä cua ma̱a̱c nath da̱ŋ rɛw pua̱t kɛ jɛ kɛɛl, te kɛl cueecdɛ kä te min dɔ̱ŋ caamdɛ.

³⁹ Kä cu ja̱a̱l tin wëë kɛ jɛn duɔ̱ɔ̱p ɛmɔ jɛ buy, kä tiɛŋkɛ wuɔ̱thkiɛn,

⁴⁰ cukɛ wee i̱, “Ji̱n ram mi dee luaak Kuɔth däk kä cuŋi jɛ kɛ ni̱n da̱ŋ diɔ̱k, kän rɔɔdu! Kä mi ɛ ji̱n Gat Kuɔth, bër piny wi̱c jiaath.”

⁴¹ Kä cu bööth palä tin di̱t kɛnɛ ji̱ gɔ̱rä kɛ di̱t ji̱ Juudh jɛ buy bä, wäkɛ i̱,

⁴² “Jɛn cɛ nɛy ti kɔ̱kiɛn kän, kä /cɛ rɔ kän. Jɛn ɛ Kuäär I-thɛ-rɛl. A jɛ bä piny wi̱c jiaath ɛn täämɛ, kä banɛ jɛ ŋäth.

⁴³ Jɛn ŋääthɛ ni Kuoth, a Kuoth luäk jɛ ɛn täämɛ, mi go̱o̱rɛ jɛ, kɛ ɣöö cɛ jɛ lar i̱, ‘Ɛ ɣän Gat Kuɔth.’ ”

⁴⁴ Kä cu ma̱a̱c nath tin ca pua̱t kɛ jɛ kɛɛl jɛ buy kɛ jɛn duɔ̱ɔ̱p ɛmɔ bä.

Lia̱a̱ Yecu

⁴⁵ Täämɛ kɛ cäŋdäär cu ɣɔw cuɔl kɛ thaakni da̱ŋ diɔ̱k.

⁴⁶ Kä mëë ci cäŋ rɔ buɔ̱k, cu Yecu ciöt kɛ jɔw mi di̱i̱t i̱, “Eli, Eli, lama thabakthanay?” Mi lot ni ɣöö, “Kuothdä, Kuothdä, ɛŋu ci ɣä ba̱ny piny ɔ?”

⁴⁷ Kä mëë ca jɛ liŋ ɛ tha̱a̱ŋ nɛɛni ti te cuŋä ɛn wa̱n ɔ, cukɛ wee i̱, “Wut ɛmɛ cɔlɛ ni E-li-yaa.”

⁴⁸ Kä cu ram kɛl kä kɛ riŋ nikä kɛɛl, kä cuɛ li̱pɛ cua̱th rɛy kɔŋä mi kɛc, cuɛ jɛ kuëŋ wi̱i̱ taŋ, kä cuɛ jɛ ka̱m jɛ, kɛ ɣöö bɛ jɛ lot.

⁴⁹ Cu tha̱a̱ŋkiɛn wee i̱, “Li̱epɛ, kä guɛcnɛ jɛ mi bi E-li-yaa jɛ ben kän.”

⁵⁰ Kä cu Yecu lɛni rɔal kɛ jɔw mi di̱i̱t, kä cuɛ yiëëdɛ min jɔak ŋök raar.

⁵¹ Kä niɛ guäth ɛmɔ, cu bi̱i̱ luaak Kuɔth in di̱i̱t rɛ̈ɛ̈t ni däär, ni wi̱i̱dɛ amäni piny. Kä cu piny lath, kä cu pääm ba̱k.

⁵² Cu kɔ̱a̱k kunyä rɔ lëëp, kä cua pua̱ny nɛɛni ti ŋuan ti gɔw ti ci li̱w jiɛc.

⁵³ Cukɛ ben raar rɛy kɔ̱a̱kni, mëë ca Yecu jiɛc li̱th cukɛ wä rɛy ciëŋ in rɛl rɔ, kä cuakɛ nɛn ɛ nɛy ti ŋuan.

⁵⁴ Mëë ci kuäär lathkëëri kɛnɛ nɛy tin guɛckɛ Yecu kɛ jɛ kɛɛl, lath piɛny kɛnɛ min ci tuɔɔk nɛn, cukɛ dual ɛlɔ̱ŋ, kä cukɛ wee i̱, “Ɛpuc wut ɛmɛ ɛ Gat Kuɔth!”

⁵⁵ Te män ti ŋuan thi̱n bä, gui̱ckɛ guäth mi nɔ̱a̱n, ɛ kɛn tëë ca Yecu guɔ̱ɔ̱r kä Gɛ̈-lɛ-li, kä la̱tkɛ jɛ ikä.

⁵⁶ Rɛydiɛn te Mɛri raan Mag-da-la, kɛ Mɛri man Je-mɛth kɛnɛ Jo-thɛp, amäni man gan Dhɛ-ba-dii.

Kuɔ̱ny Yecu

⁵⁷ Mëë ci ɣɔw a thiaŋ cu raan A-ri-ma-thia mi riäŋ riäŋ mi cɔal i̱ Jo-thɛp ben, kä cɛ kɔŋ a raan kɔaar Yecu bä.

⁵⁸ Cuɛ wä kä Pay-lɛt, kä cuɛ puɔ̱ny Yecu wä thiec. Cu Pay-lɛt ɛ lar ɛn ɣöö ba jɛ wä ka̱m jɛ.

⁵⁹ Kä cu Jo-thɛp puɔ̱ny Yecu naŋ, cuɛ jɛ rith kɛ bi̱i̱ mi puɔth puɔth.

⁶⁰ Kä cuɛ jɛ tɔ̱a̱c rɛy kɔ̱a̱k kunyädɛ ɛn Jo-thɛp mi pay guaŋ puɔ̱ɔ̱ny pa̱a̱m. Cuɛ päm mi di̱i̱t rial thok kɔ̱kä, kä cuɛ wä.

⁶¹ Kä te Mɛri raan Mag-da-la kɛnɛ Mɛri min dɔ̱ŋ thi̱n, nyuurkɛ lotdä guäth kunyä.

Yieen kɔ̱kä kunykä

⁶² Mëë ruɔ̱ndɛ kɛ kɔr ca̱ŋ riali ŋɔaani ikä, cu bööth palä tin di̱t kɛnɛ ji̱ Pa-ri-thii rɔ̱ dol nhiam Pay-lɛt,

⁶³ cukɛ wee i̱, “Kuäär, kɔn cakɛ mëë ci gua̱n kacä ɛmɔ jɛ lat tim mëë ŋotdɛ kɛ tëk i̱, ‘Kɛ kɔr ni̱ni da̱ŋ diɔ̱k, ɣän bä rɔ jiɛc li̱th.’

⁶⁴ Kɛ kui̱c ɛmɔ lat ruac kɛ ɣöö ba kɔ̱a̱k kunyädɛ yien agɔaa amäni diɔ̱k ni̱ni, kɛ ɣöö /ci ji̱ kɔaarɛ puɔ̱nydɛ dee lɛ kual, kä dee kɛ jɛ la̱t naath ɛn ɣöö i̱, ‘Jɛn cɛ rɔ jiɛc li̱th,’ kä mët in jɔak bi jiääk ni jɛn kä mët ëë nhiam.”

⁶⁵ Kä cu Pay-lɛt kɛ jiök i̱, “Ta̱yɛ kɛ yiëën ti lathkëëri, wiaa yiënɛ jɛ agɔaa kɛ pek luäŋädun.”

⁶⁶ Kä inɔ cukɛ wä, kä cukɛ kɔ̱a̱k kunyädɛ gäk agɔaa kɛ di̱li pa̱a̱m in te thok kɔ̱kä kɛnɛ läth yiëëni thi̱n.