Mɛ̈t 26 - RUAC KUƆTH IN RƐL RƆ

Ca̱p go̱rä na̱k Yecu

¹ Mëë ci Yecu thuɔ̱k kɛ la̱t ruaacni ti̱ti̱ diaal, cuɛ ji̱ kɔaarɛ jiök i̱,

² “Yɛn ŋa̱cɛ jɛ ɛn ɣöö bi Cäŋ Bälä ben kɛ kɔr ni̱ni da̱ŋ rɛw, kä ba Gat Ran kuëŋ tetni nath kɛ ɣöö ba jɛ pua̱t jiaath.”

³ Kä cu bööth palä tin di̱t kɛnɛ di̱t nath rɔ̱ dol rɛy luaak kua̱riɛn in di̱i̱t ni Kay-pɛth.

⁴ Kä cukɛ ca̱p cäp kɛɛl, kɛ ɣöö ba Yecu käp kɛ tɛ̱̈ɛ̱̈, kä ba jɛ näk.

⁵ Kä cukɛ wee i̱, “/Cɛ bi a cäŋ mi̱eth ti̱mä, kɛ ɣöö derɛ tekɛ rɔal kamni nath.”

Yi̱er Yecu kä Beth-ani

⁶ Täämɛ, mëë te Yecu kä Beth-ani dueel wutdä mi cɔali Thay-mɔn mi tekɛ dhɔp,

⁷ cu ciek ben kä jɛ kɛ cuk mi tekɛ yi̱eer mi ŋuäny mi di̱t kökdɛ ɛlɔ̱ŋ, kä cuɛ jɛ tiɛth wi̱i̱ Yecu, min tëë nyuurä guäth mi̱eth.

⁸ Kä mëë ci ji̱ kɔaarɛ jɛ nɛn cukɛ gaak, wäkɛ i̱, “Ɛŋu ŋarkɛ mɛmɛ ŋar ɔ?

⁹ Kɛ ɣöö yi̱eer ɛmɛ dëë jɛ kɔk ni yio̱w ti ŋuan, kä dëë kɛ ka̱m can.”

¹⁰ Kä kɛ ɣöö ŋäc Yecu ruacdiɛn ɛmɛ, cuɛ kɛ jiök i̱, “Ɛŋu juɔ̱tdɛ ciek ɔ? Jɛn lätdɛ ni ɣä kä mi gɔaa.

¹¹ Kɛ ɣöö bia te kɛɛl kɛ can ni ciaŋ, kä /ci ɣän bi te kɛɛl kɛ yɛ ni ciaŋ.

¹² Cɛ liɛth ɛmɛ tiɛth puɔ̱ɔ̱nydä, kɛ ɣöö bɛ ɣä rialikä kɛ kui̱ kunyädä.

¹³ Ɛpuc ɣän la̱rä jɛ yɛ, gua̱a̱th ɔ ba thuk Kuɔth ti gɔw ti̱ti̱ lat thi̱n ɔ rɛy ɣɔaa kɛɛliw, ba mɛ ci ciek ɛmɛ jɛ la̱t ɛ, lat kɛ kui̱ ti̱mädɛ.”

Nhök Ju-däth kɛ ɣöö bɛ Yecu kɔak

¹⁴ Kä cu ram kɛl kä jaakɛ da̱ŋ wäl wi̱cdɛ rɛw, mi cɔal i̱ Ju-däth Ith-kɛ̈-ri-ɔt, wä kä bööth palä tin di̱t,

¹⁵ kä cuɛ wee i̱, “Bia ɣä moc ŋu mi wa̱a̱ Yecu ka̱m yɛ?” Kä cukɛ jɛ kuën yio̱w cikä min bo̱r ti jiɛn diɔ̱k.

¹⁶ Kä ni ɛn guäth ɛmɔ cu Ju-däth gua̱a̱th go̱r mi bɛ kɔk ni Yecu.

Ca̱m Yecu kɛ mi̱eth Ca̱ŋ Bälä kɛnɛ ji̱ kɔaarɛ

¹⁷ Täämɛ kɛ cäŋ in jio̱l kɛ gua̱a̱th ti̱mä mi̱eth mi thil thuɔp, cu jaak ben kä Yecu, wäkɛ i̱, “Ɛ gua̱a̱th in mi̱th go̱o̱ri mɔ i̱ bakɔ mi̱eth Ca̱ŋ Bälä wä rialikä kɛ kui̱du thi̱n?”

¹⁸ Cuɛ kɛ loc i̱, “Wiaa kä ram kɛl rɛy wec kä jiökɛ jɛ i̱, ‘Ɛ Ŋi̱i̱c i̱ ci gua̱a̱thdä thia̱k, ɣän bä mi̱eth Cäŋ Bälä wä la̱t cieŋdu kɔnɛ jaakä.’ ”

¹⁹ Kä cu ji̱ kɔaarɛ jɛ la̱t ce̱tkɛ min ci Yecu ɛ lar kɛ. Kä cukɛ mi̱th Cäŋ Bälä rialikä.

²⁰ Mëë ci ɣɔw a thiaŋ, cuɛ nyuur guäth mi̱eth kɛnɛ ji̱ kɔaarɛ da̱ŋ wäl rɛw,

²¹ kä min mi̱thkɛ, cuɛ wee i̱, “Ɛpuc, ɣän la̱rä jɛ yɛ, bi ram kɛl kä yɛ ɣä kɔak.”

²² Kä cu lo̱ckiɛn jiath ɛlɔ̱ŋ, kä cukɛ jɛ tok kɛ thiecni kɛ̈l kɛ̈ɛ̈li i̱, “Kuäär ni Kuoth, ɛ ɣän?”

²³ Cuɛ jɛ loc i̱, “Ɛ jɛn ram in ci jiɔam rɛy tokä kɛ ɣä kɛɛl ɛ ni̱n bi ɣä kɔak.

²⁴ Kä Gat Ran wëë ce̱tkɛ min ca gɔ̱r kɛ kui̱dɛ. Kä riɛk bɛ tekɛ ram mɔ ci Gat Ran kɔak ɔ! Kä kɛ kui̱ wutdä ɛmɔ dee gɔaa ni mi /ka̱n jɛ dap.”

²⁵ Kä cu Ju-däth in kɔk jɛ wee i̱, “Ŋi̱i̱c, ɛ ɣän?” Cuɛ jɛ jiök i̱, “Ɛ jɛn ɛ ni̱n ci lar!”

Ca̱m Yecu kɛ mi̱eth in jɔak kɛnɛ ji̱ kɔaarɛ

²⁶ Täämɛ min mi̱thkɛ, cu Yecu juray ka̱n, cuɛ jɛ poth kä cuɛ jɛ puɔ̱ny, cuɛ jɛ ka̱m ji̱ kɔaarɛ, kä cuɛ wee i̱, “Ka̱nɛ jɛ, kä camɛ jɛ. Mɛmɛ ɛ jɛn puɔ̱nydä.”

²⁷ Kä cuɛ liɛɛr lɛni ka̱n bä, kä mëë cɛ Kuoth la̱r tɛ̈th lɔaac, cuɛ jɛ ka̱m ji̱ kɔaar wëë i̱, “Ma̱thɛ thi̱n, yɛn diaal,

²⁸ kɛ ɣöö mɛmɛ ɛ riɛmdä kɛ kui̱ matdä ruac in pay tuɔɔk kɛ päl dueeri nɛɛni ti ŋuan.

²⁹ Ɣän la̱rä jɛ yɛ, /cä rɔ bi nyɔk kɛ ma̱th kɛ jɛn liɛɛr ɛmɛ, amäni mi wä cäŋ ɛmɔ ben min bä lɛni math kɛɛl kɛ yɛ rɛy ciëŋ kuäärä Gua̱a̱r.”

³⁰ Kä mëë cikɛ dit Kuɔth kɛt, cukɛ wä wi̱i̱ Pa̱a̱m Ɔ-lip.

Ma̱r Yecu kɛ ga̱k Pi-tɔr kɛ jɛ

³¹ Kä cu Yecu kɛ jiök i̱, “Ɛn wääri bi yɛn diaal kac jɔk kä ɣä, kɛ ɣöö ca jɛ gɔ̱r i̱, ‘Bi Kuoth yieen deet näk, kä bi rɔɔm cu riaw dɔɔr.’

³² Kä mi wa ɣä jiɛc li̱th bä wä kä Gɛ̈-lɛ-li kɛ nhiam kä yɛ.”

³³ Kä cu Pi-tɔr jɛ jiök i̱, “Cäŋ bi kɛn diaal kac jɔk kä ji̱, ɣän /cä bi met kac jɔk.”

³⁴ Cu Yecu jɛ jiök i̱, “Ɛpuc ɣän la̱rä jɛ ji̱, ɛn wäär ɛmɛ pa̱ny, a ŋot /ken tuut manpalɛ̈k ni röt, bi ɣä gak ni kä diɔ̱ɔ̱k.”

³⁵ Cu Pi-tɔr jɛ jiök i̱, “Cäŋ bä li̱w kɛ ji̱ kɛɛl, /cä ji̱ bi gak.” Kä cu ji̱ kɔaarɛ diaal lar niɛ nɔ.

Pal Yecu kä Gɛ-thɛ-ma-ni

³⁶ Kä cu Yecu wä kɛɛl kɛ kɛ guäth mi cɔal i̱ Gɛ-thɛ-ma-ni, kä cuɛ ji̱ kɔaarɛ jiök i̱, “Nyuɔ̱ɔ̱rɛ wanɛ mɛ a wa̱a̱ pal wi̱nɛ mi.”

³⁷ Kä min naŋɛ Pi-tɔr kɛnɛ gaat Dhɛ-ba-dii da̱ŋ rɛw kɛɛl kɛ jɛ, cu lɔcdɛ jɛ tok kɛ mi jiathɛ kä diɛɛrɛ.

³⁸ Kä cuɛ kɛ jiök i̱, “Lɔcdä jiɛthɛ ɛlɔ̱ŋ ɛ näkɛ ɣä. Duɔthɛ wanɛ mɛ kä ta̱yɛ jinä kɛ ɣä kɛɛl.”

³⁹ Kä min wëë nhiam kä mi tɔt, cuɛ wi̱cdɛ guɔ̱l piny kä cuɛ pal i̱, “Gua̱di̱n, mi lotdɛ rɔ, ɛ liɛɛr ɛmɛ wooc rɔ kä ɣä. Kä /ci mɔ a min göörä, ɛ min go̱o̱ri.”

⁴⁰ Kä cuɛ ben kä ji̱ kɔaarɛ, cuɛ kɛ jek cikɛ niɛɛn, kä cuɛ Pi-tɔr jiök i̱, “/Cia dee te jinä kɛ ɣä kɛɛl kɛ thaak kɛl?

⁴¹ Jiënɛ, kä palɛ kɛ ɣöö /cia bi pɛn rɛy ɣɔmä. Ɛpuc yiëë go̱o̱rɛ la̱tdɛ, kä puɔ̱ny nyuänɛ.”

⁴² Kɛ wä in rɛwdɛ, cuɛ lɛni wä la̱ŋ wëë i̱, “Gua̱di̱n, mi /ci mɛmɛ dee woc ɛ ni mi maathä liɛɛr cucä nɛmɛ, a ruacdu ba la̱t.”

⁴³ Kä cuɛ rɔ lɛni nyɔk kɛ ben, cuɛ kɛ jek ni̱n, kɛ ɣöö cɛ wäŋkiɛn kum kɛ ni̱en.

⁴⁴ Min bänyɛ kɛ piny, cuɛ lɛni wä pal kɛ wä in diɔ̱ɔ̱kdiɛn, kä nyɔkɛ niɛ rieet tin kɔn.

⁴⁵ Kä cuɛ ben kä ji̱ kɔaarɛ, cuɛ kɛ jiök i̱, “Yɛn ŋuɔ̱tdɛ kä ni̱en kä lɔ̱a̱ŋɛ? Nɛnɛ, ci gua̱a̱th cop, kä ca Gat Ran kɔak tetdä ji̱ dueeri.

⁴⁶ Jiacɛ rɔ̱, wanɛ. Nɛnɛ ci ram in kɔk ɣä thia̱k.”

Ka̱p Yecu

⁴⁷ Kä min ŋotdɛ kɛ ruac, cu Ju-däth in la ram kɛl kä jaak da̱ŋ wäl rɛw ben, kä jälɛ kɛ buɔ̱n nath mi di̱i̱t mi jäl kɛ thɛpni kɛnɛ kɛtni, ti ca ja̱k ɛ bööth palä tin di̱t kɛnɛ di̱t nath.

⁴⁸ Täämɛ cu ram in kɔk jɛ naath nyuɔ̱th ca̱p, wëë i̱, “Ɛn ram ɔ wa̱a̱ cim ɔ, ɛ jɛn, ka̱pɛ jɛ.”

⁴⁹ Kä cuɛ ben kä Yecu nikä kɛɛl, cuɛ wee i̱, “Malɛ, Ŋi̱i̱cdä,” kä cuɛ jɛ cim.

⁵⁰ Cu Yecu jɛ jiök i̱, “Mäthdä, lätni min bäkɛ ji̱ ɛn wänɛ mɛ.” Kä cu naath ben, cukɛ Yecu käp ɛ bum kɛ tetkiɛn.

⁵¹ Kä nɛnɛ, cu ram in te kɛɛl kɛ Yecu thɛpdɛ guëëth raar, kä min cɛ kuany bööth palä tin di̱t yɔ̱t, cuɛ ji̱thdɛ yup.

⁵² Kä cu Yecu jɛ jiök i̱, “Locni thɛpdu guäthdɛ, kɛ ɣöö nɛy diaal tin ka̱nkɛ thɛpni bikɛ li̱w kɛ thɛpni.

⁵³ Caari jɛ ɛn ɣöö /cä Gua̱a̱r dee thiec, kä jɛn nikä kɛɛl bɛ ɣä jäkä bua̱n ja̱a̱kni nhial, ti la̱nykɛ bun wäl rɛw?

⁵⁴ Kä mi cä mɔmɔ la̱t dee ruaacni Kuɔth tëë ca gɔ̱r a thuɔ̱k i̱di, mëë laar ɣöö bi nɛmɛ tuɔɔk inɔ?”

⁵⁵ Kä ni ɛn guäth ɛmɔ cu Yecu buɔ̱n jiök i̱, “Bä yɛn raar kɛ thɛpni kɛnɛ kɛtni, kɛ ɣöö bia ɣä käp ce̱tkɛ mi lapä määc nath? Ɣän la nyuɔ̱ɔ̱rä ni ciaŋ rɛy luaak Kuɔth, ŋi̱eecä naath, kä /ka̱nɛ ɣä käp.

⁵⁶ Kä ci ti̱ti̱ diaal tuɔɔk kɛ ɣöö bi ruaacni Kuɔth tëë ca lat ɛ göök a thuɔ̱k.” Kä cu ji̱ kɔaarɛ diaal ɛ ba̱ny piny kä cukɛ puɔ̱t.

Yecu nhiam bo̱o̱thä palä in di̱i̱t

⁵⁷ Kä cua Yecu naŋ dhɔr Kay-pɛth in la bo̱o̱th palä in di̱t ɛ nɛy tëë ka̱pkɛ jɛ, guäth in ci ji̱ gɔ̱rä kɛnɛ di̱t ji̱ Juudh rɔ̱ duɔl thi̱n.

⁵⁸ Kä cu Pi-tɔr ja̱l kɔriɛn a nɔ̱a̱n, cu mäni jɔk kal bo̱o̱thä palä in di̱i̱t, kä min cɛ wä rɛc, cuɛ nyuur kɛɛl kɛ yiëën, kɛ ɣöö bɛ pek ruac ɛmɛ ŋa̱c.

⁵⁹ Kä cu bööth palä tin di̱t kɛnɛ ji̱ luɔ̱k diaal nëën kacä go̱r kɛ kui̱ Yecu, kɛ ɣöö dee kɛ jɛ näk.

⁶⁰ Kä thilɛ mi ci kɛn ɛ jek, cäŋɛ mëë ci nëën kacä ti ŋuan ben nhiam. Kä kɛ jɔak, cu nëë da̱ŋ rɛw ben,

⁶¹ cukɛ wee i̱, “Wut ɛmɛ cɛ wee i̱, ‘Ɣän dëë luaak Kuɔth däk, kä dëë jɛ cuŋ kɛ ni̱n da̱ŋ diɔ̱k.’ ”

⁶² Kä cu bo̱o̱th palä in di̱t rɔ jiɛc, cuɛ jɛ jiök i̱, “Ji̱n thilɛ luɔc? Ɛŋu mi gɔanykɛ ji̱ ɛ nɛy ti̱ti̱ mɔ?”

⁶³ Kä cu Yecu biɛt. Kä cu bo̱o̱th palä in di̱t jɛ jiök i̱, “Ɣän jiökä ji̱ i̱ yac rɔ kɛ ciöt Kuɔth in tëk, läri jɛ kɔ mi ɛ ji̱n Mɛ-thia in la Gat Kuɔth.”

⁶⁴ Cu Yecu jɛ jiök i̱, “Ɛ jɛn ɛ nɔ ci lar ɔ. Kä ɣän la̱rä jɛ ji̱, ɛn walɛ bia Gat Ran nɛn nyuurɛ kui̱c cuëëc Kuɔth, in Leny Buɔ̱mdɛ ti Diaal kä bɛ ben kɛ pua̱a̱r nhial.”

⁶⁵ Kä cu bo̱o̱th palä in di̱t bieynikɛ rɛ̈t, cuɛ wee i̱, “Jɛn cɛ Kuoth kuëth. Ɛŋu lɛnɛ go̱r ni nëën kɔ̱kiɛn? Cia kuethnidɛ kɛ Kuoth liŋ täämɛ.

⁶⁶ Ɛŋu mi caar yɛn ɛ?” Cukɛ wee i̱, “Jɛn ro̱ŋɛ kɛ lia̱a̱.”

⁶⁷ Kä cukɛ nhiamdɛ ŋul kä ruɛy, kä pi̱emkɛ jɛ, kä pät tha̱a̱ŋkiɛn ɛ,

⁶⁸ wäkɛ i̱, “Läri jɛ kɔ, ji̱n Mɛ-thia, ɛŋa mi ci ji̱ pi̱m?”

Ga̱k Pi-tɔr kɛ Yecu

⁶⁹ Täämɛ Pi-tɔr tëë nyuurä rɛy kal. Kä cu nyam mi läät ben kä jɛ, cuɛ wee i̱, “Ji̱n bä la ti̱i̱ kɛɛl kɛ Yecu raan Gɛ̈-lɛ-li.”

⁷⁰ Kä cuɛ jɛ gak nhiamdiɛn diaal, wëë i̱, “Kuecä mɔ lotdi mɔ.”

⁷¹ Kä mëë cɛ wä bääŋ luaak, cu nya dɔ̱diɛn jɛ nɛn, kä cuɛ nɛy ti bëë liɛŋ jiök i̱, “Wut ɛmɛ tëë kɛɛl kɛ Yecu raan Na-dha-rɛth.”

⁷² Kä cuɛ jɛ nyɔk kɛ ga̱k ɛ yaacɛ rɔ i̱, “Ɣän kuecä jɛ ɛn wut ɛmɔ.”

⁷³ Kɛ kɔr kä mi tɔt cu nɛy ti bëë liɛŋ ben kä Pi-tɔr, cukɛ wee i̱, “Ɛpuc, ji̱n bä lapi ram kɛl kä kɛ, kɛ ɣöö jɔcɛ ni rɛy ruaacdu.”

⁷⁴ Kä cuɛ jɛ tok kɛ mi biitdɛ rɔ, kä yaacɛ rɔ i̱, “Ɣän kuecä jɛ ɛn wut ɛmɔ.” Kä niɛ guäth ɛmɔ cu tuut manpalɛ̈k röt.

⁷⁵ Kä cu Pi-tɔr ruac Yecu tim i̱, “A ŋot /ken tuut manpalɛ̈k ni röt, bi ɣä gak nikä diɔ̱ɔ̱k.” Kä cuɛ wiee ɛlɔ̱ŋ kɛ jiath lɔaac.