Mɛ̈t 24 - RUAC KUƆTH IN RƐL RƆ

Ruac yecu kɛ kui̱ däkä Luaak Kuɔth

¹ Cu Yecu luaak Kuɔth ba̱ny piny kä min wëë raar, cu ji̱ kɔaarɛ jɛ nyuɔ̱th ti̱ec luaak Kuɔth.

² Kä cu Yecu kɛ thiec i̱, “Yɛn nɛnɛ ti̱ti̱ diaal? Ɛpuc, ɣän la̱rä jɛ yɛ, bɛ thil päm kɛl mi ba ba̱ny wi̱i̱ pa̱a̱m in dɔ̱ŋ, ba kɛn diaal yuɔr piny.”

Nyuuthni guutdä ɣɔaa

³ Kä min ci Yecu nyuur wi̱i̱ Pa̱a̱m Ɔ-lip, cu ji̱ kɔaarɛ ben kä jɛ kärɔ̱, cukɛ wee i̱, “Läri jɛ kɔ, bi mɛmɛ tuɔɔk i̱ nɛy, kä bi nyuuth benädu a ŋu kɛnɛ guut ɣɔaa?”

⁴ Kä cu Yecu kɛ loc i̱, “Niɛkɛ rɔ̱ kɛ ɣöö bɛ thil ram mi bo̱th yɛ jɔ̱ɔ̱r.

⁵ Kɛ ɣöö bi nɛy ti ŋuan ben kɛ ciötdä, wäkɛ i̱, ‘Ɛ ɣän Mɛ-thia!’ Kä bikɛ nɛy ti ŋuan böth jɔ̱ɔ̱r.

⁶ Kä bia ko̱o̱ri liŋ kɛnɛ thuk ko̱o̱ri, a wi̱cdun /cɛ yi̱c, kɛ ɣöö ɛn nɛmɛ bɛ dhil tuɔɔk, kä gua̱a̱th guutdä ŋotdɛ.

⁷ Kɛ ɣöö bi do̱rɔ rɔ jiɛc kɛ do̱rɔ, kɛ kuäärɔ kɛnɛ kuäärɔ, kä bɛ tekɛ buaath kɛnɛ lath piɛny gua̱thni.

⁸ Kɛn ti̱ti̱ diaal bikɛ ce̱tnikɛ tuk bɛ̈c mäcni däpä gatdä.”

Läär kɛ kui̱ ciaaŋ jiäkni mi bi ben

⁹ “Kä kɛn bikɛ yɛ yian kä ba yɛ duäc, kä bikɛ yɛ näk. Kä ba yɛ nyir ɛ döör diaal kɛ kui̱ cio̱tädä.

¹⁰ Kä bi nɛy ti ŋuan kac jɔk, kä bi ramɔ ramɔ luɔm, kä nyiir ramɔ ramɔ.

¹¹ Kä bi göök ka̱a̱cni ti ŋuan rɔ̱ jiɛc, kä bikɛ nɛy ti ŋuan böth jɔ̱ɔ̱r.

¹² Kä bi nhök in tekɛ ri̱w nath niäär kɛ ɣöö ci ciaŋ jiäkni di̱t.

¹³ Kä ram mi wä te dhieel amäni pek teekädɛ, ba jɛ kän.

¹⁴ Kä ba thuk kuäärä Kuɔth ti gɔw ti̱ti̱ lat wi̱i̱ muɔ̱ɔ̱n kɛɛliw, kɛ kui̱ nenä röli diaal, kä ɛ jɛn bi guut ɣɔaa cu ben ɔ.

Lär rikni ti bi ben

¹⁵ “Kä inɔ bia mi jiääk ɛlɔ̱ŋ nɛn yärɛ duŋ Kuɔth mi gɔaa guäth in rɛl rɔ, ce̱tkɛ mëë ci gök ni Da-ni-yel ɛ lar. (A jɛ cop lɔɔc raam mi kuɛɛn jɛ),

¹⁶ a nɛy tin te kä Ju-dia barkɛ rɔ̱ wuɔ̱thni päämni.

¹⁷ A ram mi te wi̱i̱ duëël nhial /ci lɛ ben piny kɛ ɣöö bɛ mi te dueelɛ ben ka̱n.

¹⁸ Kä a ram mi te rɛy kakä /ci lɛ luny jɔk kɛ ɣöö bɛ bi̱i̱dɛ ben ka̱n.

¹⁹ Bɛ la riɛk kä män tin ruët kɛnɛ tin lueth ɛn ni̱ni tɔ̱tɔ̱!

²⁰ Palɛ Kuoth kɛ ɣöö /ci barun kɛ rɔ̱ bi ben kɛ jiɔam kiɛ cäŋ lɔ̱ŋä.

²¹ Kɛ ɣöö ɛn guäth ɛmɔ bɛ tekɛ cuɔ̱c mi di̱i̱t, mi ce̱tkɛ mi /ken kɔŋ te thi̱n ni tukä ɣɔaa amäni täämɛ, kä /cɛ rɔ bi met nyɔk kɛ tuɔɔk.

²² Kä mi /ka̱n ni̱n tɔ̱tɔ̱ jakä kuiy, thilɛ ram kɛl mi ba kän, kä ba ni̱n tɔ̱tɔ̱ jakä ciɛk kɛ kui̱ nɛɛni ti ca mɛk.

²³ Kä mi jio̱k ram kɛl yɛ i̱, ‘Mɛ-thia ɛn!’ kiɛ ‘Jɛn ni!’ /cuarɛ jɛ ŋa̱th.

²⁴ Kɛ ɣöö bi mɛthiani kɛnɛ göök ka̱a̱cni rɔ̱ jiɛc, kä bikɛ nyuuthni ti ga̱ykɛ naath la̱t, kɛ ɣöö bikɛ naath böth jɔ̱ɔ̱r, mi tekɛ kɛ lua̱ŋ, bikɛ nɛy ti ca mɛk böth jɔ̱ɔ̱r.

²⁵ Nɛnɛ, ɣän la̱rä jɛ yɛ a /kenɛ ni tuɔɔk.

²⁶ Kä inɔ mi jio̱kɛ yɛ i̱, ‘Jɛn a därdɔaar,’ /cuarɛ wä thi̱n. Kä mi ɛ kɛn i̱, ‘Jɛn a rɛy duëël,’ /cuarɛ jɛ ŋäth.

²⁷ Ce̱tkɛ min la nhiaal a yiel nhial nikä käny ca̱ŋ, kä bi buaydɛ amäni kony ca̱ŋ, bi ben Gatdä Ran te inɔ bä.

²⁸ Gua̱a̱th mi te puɔ̱ny mi ci li̱w, bi cor rɔ̱ dol thi̱n.”

Ben Gatdä Ran

²⁹ “Kɛ kɔr cucä ɛn ni̱ni tɔ̱tɔ̱, ni kä kɛɛl bi cäŋ a muth, kä /ci pay bi lɛ̈p, kä bi ciɛr pën nhial, kä ba buɔ̱m buɔ̱ɔ̱m nhial yɔ̱k.

³⁰ Ɛ jɛn bi nyuuth benä Gatdä Ran cu jɔɔc nhial, kä bi döör wec muɔ̱ɔ̱n diaal pa̱r, kä bikɛ Gat Ran nɛn bëë rɛy pua̱a̱ri nhial kɛ buɔ̱m kɛnɛ gɔɔy puɔnyä mi di̱i̱t.

³¹ Kä bɛ jaakɛ jäkä raar kɛ ciöt kaaŋä mi di̱i̱t, kä bikɛ nɛɛkɛ tin cɛ mɛk ruɔ̱l kui̱cni da̱ŋ ŋuan, ni kä pek kɛl amäni min dɔ̱ŋ.”

Ŋi̱i̱c kɛ kui̱ jiaath ŋɔa̱a̱p

³² “Carɛ jɛ ni kä ta̱a̱ ŋɔa̱a̱p, mëë ci yuankɛ kɔ̱a̱c kä ci ji̱thkɛ tunh, ŋa̱cɛ jɛ i̱ ci ruel thia̱k.

³³ Kä inɔ bä, mi nɛnɛ ti̱ti̱ diaal bia cu ŋa̱c ɛn ɣöö ci gua̱a̱th thia̱k, a tëë thok ciëŋ.

³⁴ Ɛpuc, ɣän la̱rä jɛ yɛ, /ci ri̱c ɛmɛ bi thuuk a ŋot /ken ŋɔaani ti̱ti̱ diaal tuɔɔk.

³⁵ Kä bi nhial kɛnɛ piny thuuk, kä /ci ruaacnikä bi met thuuk.”

Thilɛ ram mi ŋäc cäŋ benä Gatdä Ran

³⁶ “Thilɛ ram mi ŋäc cäŋdɛ kiɛ thaakdɛ, cäŋɛ ni ja̱a̱k nhial kiɛ Gat, ɛ ni Gua̱n in te nhial kärɔa ŋäc jɛ mɔ.

³⁷ Bi ben Gatdä Ran ce̱tkɛ ni̱n Nowa.

³⁸ Mëë ŋot nyɔc /kenɛ ni ben, mi̱th naath kä mäthkɛ, kuenkɛ kä kuɛnkɛ kɛ, amäni cäŋ ëë ci Nowa wä rɛy ria̱a̱y,

³⁹ kä kueckɛ mëë tuɔɔk amäni mi ci nyɔc ben, kä cu kɛn diaal mua, bi ben Gatdä Ran ce̱tkɛ inɔ bä.

⁴⁰ Kä bi wutni da̱ŋ rɛw te rɛy kakä, ba kɛl naŋ, kä bi kɛl duɔth.

⁴¹ Bi män da̱ŋ rɛw guär kɛɛl kɛ pil, ba kɛl naŋ, kä bi kɛl duɔth.

⁴² Kɛ kui̱ ɛmɔ, guecɛ, kɛ ɣöö kuecɛ cäŋ in bi ben kɛ Kuäärun ni Kuoth.

⁴³ Kä ŋa̱cɛ mɛmɛ, mi ci gua̱n ciëŋ gua̱a̱th in bi ben kɛ kueel kɛ wäär ŋa̱c, derɛ cu te jinä, kä cɛ kueel dee lɛ jakä to̱lɛ duelɛ.

⁴⁴ Kɛ kui̱ ɛmɔ, yɛn bia rɔ̱ dhil rialikä, kɛ ɣöö bi Gat Ran ben kɛ gua̱a̱th mi kui̱c yɛn ɛ.”

Läät mi ŋa̱thkɛ kɛnɛ mi /ca ŋäth

⁴⁵ “Ɛŋa mi mɔ läät mi ŋa̱thkɛ kä pɛl, mi ci kuäärɛ jɛ kuany kɛ ɣöö bɛ a ti̱i̱t gɔaalɛ, kä bɛ la̱a̱t tin kɔ̱ŋ moc kɛ mi̱eth kɛ gua̱a̱th in lot rɔ?

⁴⁶ A puɔ̱th tekɛ läät, mi bi kuäärɛ jɛ jek lät mi wëë ben.

⁴⁷ Ɛpuc, ɣän la̱rä jɛ yɛ, bi kuäär läät ɛmɔ jakä ti̱i̱t kuaknikɛ diaal.

⁴⁸ Kä mi ɛ läät mi jiääk bɛ wee i̱, ‘Ci kuäärä jääny jɔ̱ɔ̱r,’

⁴⁹ kä bɛ jɛ tok kɛ mi duääc ji̱ la̱t kɛɛl kɛ jɛ, kä mi̱thɛ kä mäthɛ kɛɛl kɛ yɔ̱a̱ŋ kɔaaŋni.

⁵⁰ Kä bi kuäär lätdä ɛmɔ ben kɛ cäŋ mi kui̱cɛ, kɛnɛ thaak mi /cɛ ŋäc.

⁵¹ Kä bi kuäärɛ jɛ tuɔ̱k raar, kä bɛ jɛ la̱th guäth kɛl kɛ ji̱ mɛɛtdä. Ɛn wi̱ni bɛ wiee kä bɛ lɛckɛ moth.”