Mɛ̈t 23 - RUAC KUƆTH IN RƐL RƆ

Lui̱k Yecu mi jiääk kɛ kui̱ ŋi̱eec ŋuɔ̱tni kɛnɛ ji̱ Pa-ri-thii

¹ Kä cu Yecu bua̱n nath kɛnɛ ji̱ kɔaarɛ jiök i̱,

² “Ŋi̱eec ŋuɔ̱tni kɛnɛ ji̱ Pa-ri-thii tekɛ kɛ lua̱ŋ mi latkɛ luɔt ŋuɔ̱tni Muthɛ.

³ Inɔ, la̱tdɛ kä nhɔakɛ tin diaal tin la̱rkɛ yɛ, kä /cuarɛ lät ni tin lät kɛn kɛ. Kɛ ɣöö /ca tin ŋi̱i̱c kɛn kɛ lät.

⁴ Kɛn yiankɛ ɣa̱c ti thiak thiaak, ti bɛc ka̱pdiɛn, kä kuëŋkɛ wuɔ̱ɔ̱kni nɛɛni ti kɔ̱ŋ, kä kɛn pua̱nykiɛn /cikɛn kɛ luäk kɛ ka̱pdiɛn nhial.

⁵ Kɛn la̱tkɛ nyinkiɛn diaal kɛ ɣöö ba kɛ nɛn ɛ naath, kɛ ɣöö la̱tkɛ wäl tin ca ruac Kuɔth gɔ̱a̱r thi̱n a di̱t, kä jakɛ dhuɔɔr thuk bieyni palädiɛn kä bär.

⁶ Kä nhɔakɛ gua̱th luthä, mi nyuurkɛ guäth mi̱thni kɛnɛ kɔamni tin gɔw ɛlɔ̱ŋ rɛy gua̱thni palä ji̱ Juudh.

⁷ Kä nhɔk kɛn neri nhiam nath kɛnɛ ɣöö bakɛ cɔl i̱ ‘ŋi̱eec’ ɛ naath.

⁸ Kä yɛn /ca yɛ bi cɔl i̱ ‘ŋi̱eec’, kɛ ɣöö ŋi̱i̱cdun ɛ kɛl, kä yɛn diaal lapɛ dämani.

⁹ Kä a thil ram mi cɔl yɛnɛ i̱ ‘gua̱a̱ra’ wi̱i̱ muɔ̱ɔ̱n, kɛ ɣöö Guurun ɛ kɛl, ɛ jɛn min te nhial.

¹⁰ Kä a yɛ /ca cɔl i̱ ‘bööth’, kɛ ɣöö bo̱o̱thdun ɛ kɛl, ɛ jɛn Mɛ-thia.

¹¹ Kä ram in di̱t ni jɛn rɛydun bɛ a läätdun.

¹² Kä ram mi jak rɔɔdɛ kä di̱t ba jɛ luɔ̱c piny, kä ram mi jak rɔɔdɛ kä kuiy ba jɛ kuëŋ nhiam.”

Kuëth Yecu kɛ ciaaŋ mɛɛtädiɛn

¹³ “Riɛk akɛ yɛ, yɛn ji̱ gɔ̱rä kɛnɛ yɛn ji̱ Pa-ri-thii, kɛ yɛn ji̱ mɛɛtdä! Kɛ ɣöö gäk yɛn naath raar kuäärä nhial. Kɛ ɣöö /ci yɛn wä rɛc, kä /cia jɛ nhɔk ɛn ɣöö bi nɛy kɔ̱kiɛn wä rɛc. [

¹⁴ Riɛk akɛ yɛ, yɛn ji̱ gɔ̱rä kɛnɛ Pa-ri-thii, kɛ yɛn ji̱ mɛɛtdä! Kɛ ɣöö macɛ duël mään jɔɔkni kä latdɛ la̱ŋ ti ba̱a̱r ba̱a̱r kɛ ca̱p nyuthä, kɛ kui̱ ɛmɔ bi yɛn kuëth mi di̱t ni jɛn jek].

¹⁵ Riɛk akɛ yɛ, yɛn ji̱ gɔ̱rä kɛnɛ yɛn ji̱ Pa-ri-thii, kɛ yɛn ji̱ mɛɛtdä! Yɛn jiathɛ bar kä ja̱lɛ mun kɛ ɣöö bia ram kɛl jak kä ri̱i̱tdɛ rɔ ciɛŋädun, kä mi cia jɛ jek ɛn ram ɛmɔ, bia jɛ cu jak kä ram mi jiääk mi ro̱ŋ kɛ gua̱a̱th maac mi leny ni yɛ.

¹⁶ “Riɛk akɛ yɛ, yɛn bööth ti ciöör, tin larkɛ jɛ i̱, ‘Mi yaac raan rɔɔdɛ kɛ luaak Kuɔth, thilɛ mi yiɛɛn jɛ. Kä duundɛ ɣöö mi yaac raan rɔɔdɛ kɛ da̱a̱p luaak Kuɔth, jɛn bɛ min cɛ lar la̱t.’

¹⁷ Yɛn nɛy ti ciöör ti dɔ̱a̱a̱r! Ɛŋadiɛn di̱t ni jɛn ɔ, ɛ da̱a̱p kiɛ ɛ luaak Kuɔth in jak da̱a̱p kä rɛl rɔ?

¹⁸ Kä ruac yɛn i̱, ‘Mi yaac raan rɔɔdɛ kɛ yi̱kä, thilɛ mi yiɛɛn jɛ. Kä mi yaac raan rɔɔdɛ kɛ muc in cɛ ka̱m Kuoth wi̱i̱ yi̱kä, bɛ min cɛ lar la̱t.’

¹⁹ Ku yɛn la nɛy ti ciöör i̱di? Ɛŋadiɛn di̱t ni jɛn ɔ, ɛ muc kiɛ ɛ yi̱k in jak muc kä lɛy lɛy ɔ?

²⁰ Kä inɔ ram mi yaac rɔɔdɛ kɛ yi̱k, a jɛ, yaac rɔɔdɛ kɛ jɛ kɛnɛ ŋɔak diaal tin te thi̱n.

²¹ Kä ram mi yaac rɔɔdɛ kɛ luaak Kuɔth, a yaac rɔɔdɛ kɛ jɛ kɛnɛ ram in cieŋ thi̱n.

²² Kä ram mi yaac rɔɔdɛ kɛ nhial, a jɛ yaac rɔɔdɛ kɛ kɔm kuäärä Kuɔth kɛnɛ ram in nyuur thi̱n.

²³ “Riɛk akɛ yɛ, yɛn ji̱ gɔ̱rä kɛnɛ Pa-ri-thii, kɛ yɛn ji̱ mɛɛtdä! Kɛ ɣöö ka̱mɛ Kuoth wa̱l wa̱a̱li nanani kɛnɛ wal kɔ̱kiɛn, kä pa̱lɛ tin di̱t ni kɛn kä ŋuɔ̱t, thuɔ̱k kɛnɛ kɔ̱a̱c lɔaac kɛ ŋa̱th. Gɔaa ni mi cia ti̱ti̱ la̱t, a thil päl kɛ tin kɔ̱kiɛn.

²⁴ Yɛn bööth ti ciöör, la yɛn burbur a thiiy, kä ba̱tdɛ thɔ̱rɔ̱l!

²⁵ “Riɛk akɛ yɛ, yɛn ji̱ gɔ̱rä kɛnɛ yɛn ji̱ Pa-ri-thii, kɛ yɛn ji̱ mɛɛtdä! Kɛ ɣöö yɛn lakɛ jɔk lirä kɛnɛ jɔk thaak, kä thiäŋ rɛydiɛn kɛ mac kɛnɛ da̱r kɛ cam jiic.

²⁶ Ji̱n Pa-ri-thii mi cɔr! Kɔŋni lak ni rɛy lirä, kɛ ɣöö bi jɔkdɛ cu puath bä.

²⁷ “Riɛk akɛ yɛ, yɛn ji̱ gɔ̱rä kɛnɛ yɛn ji̱ Pa-ri-thii, yɛn ji̱ mɛɛtdä! Kɛ ɣöö ce̱t yɛn kɛ kɔ̱a̱k kunyä ti ca rɔth kɛ buɔ̱yɛ mi bo̱r, bi rariɛn kula duŋ gɔaa, kä thiäŋ rɛydiɛn kɛ cɔ̱w nɛɛni tin ci li̱w kɛnɛ jia̱k jia̱a̱k diaal.

²⁸ Kä mäni yɛn bä, jɔc rarun kɛ ciaŋ cuŋni kä naath, kä thiäŋ rɛydun kɛ mɛɛt kɛnɛ nyuɔɔn.”

Ma̱r Yecu kɛ ɣöö bi Kuoth ji̱ gɔ̱rä kɛnɛ ji̱ Pa-ri-thii duäc

²⁹ “Riɛk akɛ yɛ, yɛn ji̱ gɔ̱rä kɛnɛ yɛn ji̱ Pa-ri-thii, yɛn ji̱ mɛɛtdä! Kɛ ɣöö ta̱thɛ kɔ̱a̱k kunyä göökni agɔaa, kä jakɛ muɔ̱ɔ̱n ji̱ cuŋni kä gɔw guec biɛɛlikiɛn,

³⁰ kä larɛ jɛ i̱, ‘Mi canɛ tëk guäth ëëdan ëë te gua̱ndɔɔŋnikɔn thi̱n, /canɛ rɔ̱ dee mat kɛ näk göökni.’

³¹ Kä inɔ ci yɛn ɛ lat pa̱ny ɛn ɣöö kɛ yɛn gaat nɛɛni tëë ca göök näk.

³² Kä inɔ cuɔ̱pɛ jiäk guurikun.

³³ Yɛn thɔ̱ɔ̱l! Yɛn dɛy thɔ̱ɔ̱li! Bia kään i̱di kä yorun maac mi thil pek?

³⁴ Kɛ kui̱ ɛmɔ ɣän ja̱kä göök kä yɛ kɛ nɛy tin pɛl kɛ ji̱ gɔ̱rä, kä bia tha̱a̱ŋkiɛn näk, kä bia tha̱a̱ŋkiɛn pua̱t jiɛn, kä bia tha̱a̱ŋkiɛn duäc gua̱thni palädiɛn, kä bia kɛ guɔ̱ɔ̱r wec ɔ kɛ wec ɔ.

³⁵ Kɛ kui̱c ɛmɔ bi riɛm ji̱ cuŋni diaal in ci lo̱ny piny wi̱i̱ muɔ̱ɔ̱n a wi̱cdun, nikä riɛm raam mi thil duer ni E-bɛl amäni riɛm Dhɛ-kar-yaa gat Ba-ra-kia mi cia näk kam duëël palä kɛnɛ yi̱k Kuɔth.

³⁶ Ɛpuc, ɣän la̱rä jɛ yɛ, bi mɛmɛ kɛɛliw pɛn wi̱i̱ ri̱cä mɛmɛ.”

Pa̱r Yecu kɛ Jɛ-ru-tha-lɛm

³⁷ “Aɣ, Jɛ-ru-tha-lɛm, Jɛ-ru-tha-lɛm! Ji̱n mi näk göök kä bo̱k nɛy tëë ci Kuoth kɛ jäkä ji̱! Kɛ gua̱th da̱ŋ di ti cä go̱r ɛn ɣöö dee gaatku kul, ce̱tkɛ min la rol manpalɛ̈k dɛykɛ kɛ gɔ̱kɛ, kä /ka̱nɛ jɛ nhɔk!

³⁸ Nɛnɛ, ciëëŋdu ba jɛ ba̱ny piny ni baaŋ.

³⁹ Kä ɣän la̱rä jɛ yɛ, /cia ɣä bi nyɔk kɛ nën, amäni mi wiaa jɛ lar i̱, ‘Puɔ̱th akɛ ram mi bëë kɛ ciöt Kua̱r ni Kuoth.’ ”