Mɛ̈t 22 - RUAC KUƆTH IN RƐL RƆ

Cäät mi̱eth ji̱ kuën

¹ Kä cu Yecu lɛni ruac kɛ kɛ, kɛ cäätni wëë i̱,

² “Dëë ciaŋ kuäärä nhial pa̱a̱r kɛ kuäär mi ci mi̱th rialikä kɛ kui̱ kuën gatdɛ.

³ Cuɛ la̱a̱tkɛ ja̱k kɛ ɣöö ba nɛy tin ca cɔal guäth kuën wä nööŋ, kä /kenkɛ ben.

⁴ Cuɛ la̱a̱tkɛ kɔ̱kiɛn lɛ nyɔk kɛ jäkni, lärɛ jɛ kɛ i̱, ‘Jiökɛ nɛy tin ca cɔal guäth kuën i̱, “Nɛnɛ, ɣän cä mi̱th rialikä, kä thääkä kɛnɛ kɔa̱a̱lkä ca kɛ näk, kä ŋɔaani diaal ca kɛ thuŋ rialikä, bia guäth mi̱eth kuën.” ’

⁵ Kä cu naath dɔl ni jɛ, cukɛ wä, wä ramɔ kakädɛ, kä wä ram in dɔ̱ŋ guäth läätädɛ.

⁶ Kä cu tha̱a̱ŋkiɛn la̱a̱tkɛ käp kä ciaŋkɛ kɛ jiäk, kä na̱kɛ kɛ.

⁷ Cu kuäär ŋɛ̈ɛ̈ny, cuɛ rɛmdɛ ja̱k, cuɛ luɔ̱ɔ̱c nath wä näk, kä cuɛ wi̱i̱kiɛn waŋ.

⁸ Kä cuɛ la̱a̱tkɛ jiök i̱, ‘Ca kuën rialikä, kä nɛy tin ca cɔl /cikɛ gɔw.

⁹ Kɛ kui̱ ɛmɔ wiaa duɔ̱pni tin di̱t, cɔalɛ nɛy diaal tin bia jek kɛ kui̱ mi̱thni kuën.’

¹⁰ Kä cu la̱a̱tkɛ wä duɔ̱pni, cukɛ nɛy diaal tin ci kɛn kɛ jek dol, nɛy ti jiäk kɛnɛ nɛy ti gɔw. Cu luaak kuën thia̱a̱ŋ kɛ ja̱a̱l.

¹¹ “Kä mëë ci kuäär ben rɛy luaak kɛ ɣöö bɛ ja̱a̱l ben nɛn, cuɛ wut kɛl mi thil bi̱i̱ kuën nɛn.

¹² Cuɛ jɛ jiök i̱, ‘Määthdä, bi̱i̱ wanɛ mɛ i̱di a thil bi̱i̱ kuën?’ Cuɛ thil mi luäŋɛ kɛ lat.

¹³ Kä cu kuäär la̱a̱tkɛ jiök i̱, ‘Yianɛ jɛ tetni kɛnɛ ciökɛ, kä yuɔrɛ jɛ raar rɛy muɔ̱th. Ɛn wi̱ni bɛ tekɛ lul kɛnɛ muɔ̱th lɛc.’

¹⁴ Kɛ ɣöö ca nɛy ti ŋuan cɔl, kä ca kuany ni nɛy ti tɔt.”

Thiec kɛ kui̱ tho̱pä tho̱lbo̱kä

¹⁵ Kä cu ji̱ Pa-ri-thii rɔ̱ mat kä cukɛ ca̱p cäp kɛ ɣöö ba Yecu käp kɛ ruacdɛ.

¹⁶ Cukɛ tha̱a̱ŋ nɛɛnikiɛn jäk kä jɛ kɛnɛ nɛɛ Ɣɛ-rod, wäkɛ i̱, “Ŋi̱i̱c, ŋa̱ckɔ jɛ ɛn ɣöö ɛ Ji̱n gua̱n thukä, kä nyuthi naath ciaŋ Kuɔth kɛ thuɔ̱k, kä /ci riɛk kɛ raan, kɛ ɣöö ciɛŋi nɛy diaal a päär.

¹⁷ Kä inɔ lärikɔ mɔ caari mɔ. Lotdɛ rɔ ɛn ɣöö ba tho̱lbo̱k luɔ̱ny Thii-thɛr, kiɛ /cɛ rɔ lot?”

¹⁸ Kä kɛ ɣöö ŋäc Yecu ca̱riɛn, cuɛ wee i̱, “Ɛŋu ɣɔ̱a̱nɛ ɣä mɔ, yɛn ji̱ mɛɛtdä?

¹⁹ Nyuɔ̱thɛ ɣä yiëëth tho̱lbo̱kä.” Kä cukɛ jɛ nöŋ yiëëth.

²⁰ Kä cu Yecu kɛ thiec, “Ɛŋa mi ca wi̱cdɛ gɔ̱a̱r thi̱n kɛnɛ ciötdɛ?”

²¹ Cukɛ wee i̱, “Ɛ Thii-thɛr.” Kä cuɛ kɛ jiök i̱, “Kɛ kui̱ ɛmɔ ka̱mɛ Thii-thɛr tin la nyin Thii-thɛr, kä ka̱mɛ Kuoth tin la nyin Kuɔth.”

²² Mëë cikɛ jɛ liŋ, cukɛ ga̱a̱c ɛlɔ̱ŋ, cukɛ jɛ ba̱ny piny, kä cukɛ wä.

Thiec kɛ kui̱ jiecä nath li̱th

²³ Kɛ jɛn cäŋ ɛmɔ cu ji̱ Thɛ̈d-du-thii, tin larkɛ jɛ i̱ thilɛ jiëc nɛɛni tin ci li̱w li̱th ben, kä cukɛ Yecu thiec,

²⁴ wäkɛ i̱, “Ŋi̱i̱c, ci Muthɛ jɛ lar, i̱ mi ci raan li̱w kä thilɛ jɛ gaat, bi däman ciek jɔkä ɛmɔ yi̱k kuëŋ dueel, kä bɛ däman diëth gaat.

²⁵ Täämɛ tëë kɛ gaat raam kɛl da̱ŋ bärɔw rɛydan. Cu gat in kɛ̱̈ɛ̱̈ kuɛɛn, kä cuɛ li̱w, a thilɛ jɛ gaat, kä cua ciekdɛ ka̱n ɛ däman.

²⁶ Kä cua jɛ la̱t inɔ bä ɛ rɛwdiɛn kɛnɛ diɔ̱ɔ̱kdiɛn, cuɛ wee wä amäni bärɔwdiɛn.

²⁷ Kä kɛ kɔriɛn kɛn diaal, cu ciek li̱w.

²⁸ Kä kɛ cäŋ jiecä nath li̱th bɛ ku la ciek ŋa kä kɛn da̱ŋ bärɔw? Kɛ ɣöö ci kɛn diaal ɛ ka̱n?”

²⁹ Kä cu Yecu kɛ loc i̱, “Dui̱r yɛn, kɛ ɣöö kuecɛ ruaacni Kuɔth kɛnɛ buɔ̱mdɛ.

³⁰ Kɛ ɣöö kɛ cäŋ jiecä nath li̱th /ci raan bi kuɛɛn, kä /ca nyal bi kuɛn, kä bi naath ce̱tkɛ ja̱a̱k Kuɔth nhial.

³¹ Kä kɛ kui̱ jiecä nath li̱th, /ka̱nɛ mëë ca la̱r yɛ ɛ Kuoth kuɛn i̱,

³² ‘Ɛ ɣän Kuoth A-bɛ-ram, Kuoth Ay-dhɛk, Kuoth Je-kɔb’? /Ciɛ Kuoth nɛɛni ti ci li̱w, ɛ Kuoth nɛɛni ti tëk.”

³³ Kä mëë ci buɔ̱n nath ɛ liŋ, cukɛ ga̱a̱c kɛ ŋi̱i̱cdɛ.

Ŋut in di̱t ni jɛn

³⁴ Kä mëë ci ji̱ Pa-ri-thii jɛ liŋ ɛn ɣöö cɛ ji̱ Thɛ̈d-du-thii dhal kɛ ruac, cukɛ rɔ̱ mat kɛɛl.

³⁵ Cu ram kɛl kä kɛ mi la gua̱n ŋuɔ̱tni jɛ thiec, ɣɔ̱nɛ jɛ i̱,

³⁶ “Ŋi̱i̱c, ɛ ŋut in mi̱th di̱tɔ rɛy ŋuɔ̱tni?”

³⁷ Kä cu Yecu jɛ loc i̱, “Ji̱n bi Kuäär ni Kuothdu nhɔk kɛ lɔcdu kɛɛliw, kɛ tieydu kɛɛliw, kɛnɛ ca̱ru kɛɛliw.

³⁸ Nɛmɛ ɛ jɛn ŋut in di̱i̱t, kä ɛ jɛn in nhiamdiɛn.

³⁹ Kä tëë kɛ rɛwdɛ mi ce̱tkɛ jɛ, ji̱n bi gua̱n thieekädu nhɔk ce̱tkɛ rɔɔdu.

⁴⁰ Rɛy ŋuɔ̱tni ti̱ti̱ da̱ŋ rɛw kɛ kɛn yiankɛ ŋut kɛɛliw kɛnɛ ruaacni göökni kɛɛl tɔ̱.”

Thiec kɛ kui̱ Mɛ-thia

⁴¹ Kä täämɛ min te ji̱ Pa-ri-thii guäth kɛl, cu Yecu kɛ thiec,

⁴² wee i̱, “Carɛ ni ŋu kɛ kui̱ Mɛ-thia? Ɛ gat ŋa?” Cukɛ jɛ jiök i̱, “Ɛ gat Dee-bid.”

⁴³ Cuɛ kɛ jiök i̱, “Kä ɛ kui̱ ŋukä cɔl Dee-bid ɛ i̱, ‘Kuäär ni Kuoth’ mi ruacɛ kɛ Yiëë Kuɔth, wëë i̱,

⁴⁴ ‘Ci Kuäär ni Kuoth Kuäärä jiök i̱, “Nyuuri kui̱c cuëëcdä, amäni mi cä ji̱ tɛ̈ru la̱th ciökniku” ’?

⁴⁵ Kä mi cɔɔl Dee-bid jɛ i̱, ‘Kuäärä ni Kuoth’, kuɛ la gatdɛ i̱di?”

⁴⁶ Kä cuɛ thil ram mi cu jɛ luɔ̱c riet. Kä ɛn cäŋɔ cuɛ thil ram mi cu jɛ ɣɔ̱n i̱ thiecɛ jɛ kɛ thiecni kɔ̱kiɛn.