Mɛ̈t 21 - RUAC KUƆTH IN RƐL RƆ

Cuɔ̱p Yecu kä Jɛ-ru-tha-lɛm

¹ Kä mëë cikɛ thia̱k kɛ Jɛ-ru-tha-lɛm, cukɛ ben kä Beth-pac, Pääm Ɔ-lip, kä cu Yecu jaak da̱ŋ rɛw ja̱k,

² jio̱kɛ kɛ i̱, “Wiaa rɛy ciëŋ mia̱ nhiamdun, kä ɛn wi̱ni bia muul mi ca yian piny jek kɛnɛ ruathdɛ. Luɔnyɛ kɛ, kä nöŋɛ kɛ ɣä.

³ Mi wëë tekɛ ram mi bi yɛ thiec, bia jɛ jiök i̱, ‘Ɛ Kuäär ni Kuoth go̱o̱rɛ kɛ mɔ.’ Kä bɛ kɛ ja̱k nikä kɛɛl.”

⁴ Cu mɛmɛ tuɔɔk, kɛ ɣöö bi mëë ca lar ɛ gök a thuɔ̱k, mëë ɛ jɛn i̱,

⁵ “La̱rɛ jɛ nya Dha-yɔn i̱, ‘Nɛnɛ kuääru min di̱i̱t a bëë kä ji̱ ni, kɔ̱c lɔcdɛ, kä ko̱tdɛ jɔk muɔ̱l, kɛnɛ ruathdɛ.’ ”

⁶ Cu ji̱ kɔaarɛ wä, kä cukɛ jɛ la̱t ce̱tkɛ min ci Yecu ɛ la̱r kɛ.

⁷ Cukɛ muul kɛnɛ ruathdɛ nööŋ, kä cukɛ bieynikiɛn pap jio̱knikiɛn, kä cu Yecu nyuur thi̱n.

⁸ Kä cu ri̱w nath rɛy bunä bieynikiɛn ɣa̱r dup, kä cu tha̱a̱ŋkiɛn kar jiɛn tëm, cukɛ kɛ ɣa̱r dup.

⁹ Kä rɔal naath tin jäl nhiamdɛ kɛnɛ tin guɔ̱ɔ̱rkɛ jɛ i̱, “Liakɛ, Gat Dee-bid! Puɔ̱th akɛ ram mi bëë kɛ ciöt Kuäär ni Kuoth! Liakɛ Kuoth in te nhial!”

¹⁰ Kä mëë cɛ cop kä Jɛ-ru-tha-lɛm, cu wec kɛɛliw rɔ jiëc cuɔ̱ŋ, kä cukɛ thiec wäkɛ i̱, “Ɛŋa ɛ nɛ?”

¹¹ Kä cu buɔ̱n nath kɛ loc i̱, “Mɛmɛ ɛ gök ni Yecu, raan Na-dha-rɛth, kä Gɛ̈-lɛ-li.”

Wä Yecu rɛy Luaak Kuɔth

¹² Kä cu Yecu wä rɛy luaak Kuɔth. Cuɛ ji̱ ko̱kä diaal kɛnɛ nɛy tin ko̱k rɛy luaak Kuɔth juɔc raar, cuɛ tharbëtni ji̱ luël yio̱wni buɔ̱p mäni kɔamni ji̱ ko̱kä guɔ̱kni.

¹³ Kä cuɛ kɛ jiök i̱, “Ca jɛ gɔ̱r i̱, ‘Luaakdä ba jɛ cɔl i̱ luaak palä,’ kä ci yɛnɛ jak kä luaak ma̱a̱cni.”

¹⁴ Cu nɛy ti ciöör kɛnɛ dua̱nyni ben kä jɛ rɛy luaak Kuɔth, kä cuɛ kɛ jak kä gɔw.

¹⁵ Kä mëë ci bööth palä tin di̱t kɛnɛ ji̱ gɔ̱rä lät tin ga̱ykɛ naath tëë cɛ la̱t nɛn, kɛnɛ rɔal gan rɛy luaak Kuɔth i̱, “Liakɛ, Gat Dee-bid,” cuɛ lo̱ckiɛn waŋ.

¹⁶ Kä cukɛ jɛ jiök i̱, “Ji̱n liŋi min latkɛ ɛ nɛy ti̱ti̱?” Cu Yecu kɛ jiök i̱, “Ɣɔ̱ɔ̱n, /ka̱nɛ jɛ met kuɛn i̱, ‘Thok gan ti dööth kɛnɛ gaat ti lueth cia liak rialikä kɛ kui̱dun’?”

¹⁷ Kä cuɛ kɛ ba̱ny piny, cuɛ jiɛɛn rɛy wec cuɛ wä kä Beth-ani, cuɛ wä niɛɛn ɛn wi̱ni.

La̱m Yecu kɛ jiath ŋɔa̱a̱p

¹⁸ Kɛ runwaŋ min lunyɛ wi̱c, cu buɔth ɛ näk.

¹⁹ Mëë cɛ jiath ŋɔa̱a̱p nɛn gekä duɔ̱p, cuɛ wä thi̱n, kä thilɛ dɛy ti cɛ jek thi̱n, ɛ ni ji̱th kärɔ̱. Kä cuɛ jiath jiök i̱, “Thil dɛy ti bi nyɔk kɛ kuer.” Kä niɛ guäth ɛmɔ cu jiath rɔɔl.

²⁰ Mëë ci ji̱ kɔaarɛ jɛ nɛn, cukɛ ga̱a̱c, wäkɛ i̱, “Ci jiath ŋɔa̱a̱p rɔɔl nikä kɛɛl i̱di?”

²¹ Kä cu Yecu kɛ loc i̱, “Ɛpuc, ɣän la̱rä jɛ yɛ, mi ta̱yɛ kɛ ŋa̱th, mi thil diw, /cia bi la̱t ni mɛ cä lät kä ŋɔ̱p ɛ kärɔa, cäŋ jiökɛ ni päm mi di̱i̱t ɛmɛ i̱, ‘Woc rɔ̱ wanɛ mɛ kä yuɔrɛ ji̱ där bar,’ ba jɛ la̱t.

²² Kä mɔ bia thiec rɛy palä mɔ kɛ ŋa̱th, bia jɛ jek.”

Thiec kɛ kui̱ luäŋä Yecu

²³ Kä mëë cɛ wä rɛy luaak Kuɔth in di̱i̱t, cu bööth palä tin di̱t kɛnɛ di̱t nath ben kä jɛ, kä min ŋi̱i̱cɛ naath, cukɛ Yecu thiec i̱, “Ɛ lua̱ŋ ŋukä min lätdi ŋɔaani ti̱ti̱, kä ɛŋa käm ji̱ lua̱ŋ ɛmɛ ɔ?”

²⁴ Cu Yecu kɛ loc i̱, “Ɣän bä, bä yɛ thiec kɛ kɛl, kä mi wiaa thiecdä wä loc, ɣän bä, bä yɛ la̱t lua̱ŋ in la̱tdä ŋɔaani ti̱ti̱.

²⁵ Ɛn la̱k Jɔ̱ɔ̱n kɛ naath bëë nikä? Bëë nhial kiɛ bëë kä naath?” Kä cukɛ gaak kärɔ̱ wäkɛ i̱, “Mi wanɛ wee i̱, ‘Bëë nhial,’ bɛ kɔn jiök i̱, ‘Kä ɛŋu /ka̱nɛ jɛ ŋäth ɔ?’

²⁶ Kä mi wanɛ wee i̱, ‘Bëë kä naath,’ dual kɔn kɛ naath kɛ ɣöö ŋääth kɛn diaal ɛ, ɛn ɣöö Jɔ̱ɔ̱n ɛ gök.”

²⁷ Kä inɔ cukɛ Yecu loc i̱, “Kɔn kueckɔ jɛ.” Kä cuɛ kɛ jiök i̱, “Ɣän bä, /cä yɛ bi la̱r lua̱ŋ in la̱tdä ŋɔaani ti̱ti̱.”

Cäät kɛ kui̱ gan da̱ŋ rɛw

²⁸ “Kä ɛŋu mi dërɛ car? Tëë kɛ wut mi tekɛ gaat da̱ŋ rɛw. Kä cuɛ wä kä gat in kɛ̱̈ɛ̱̈, cuɛ jɛ jiök i̱, ‘Gatdä, wër lätni rɛy kakä wal kɛ kui̱ kɔaŋ wa̱lɛ.’

²⁹ Cuɛ jɛ loc i̱, ‘/Cä bi wä,’ kä kɛ kɔrɛ cuɛ wi̱cdɛ car, kä cuɛ wä.

³⁰ Kä cuɛ wä kä gat in dɔ̱ŋ, cuɛ jɛ la̱r ɛn ruac ɛmɔ. Cu gat ɛ loc i̱, ‘Ɣän bä wä, Guä’, kä /kenɛ wä.

³¹ Ɛŋadiɛn kä kɛn da̱ŋ rɛw mi ci ruac gua̱n la̱t?” Cukɛ wee i̱, “Ɛ min nhiam.” Cu Yecu kɛ jiök i̱, “Ɛpuc, ɣän la̱rä jɛ yɛ, bi thuɔ̱ɔ̱l tho̱lbo̱kä kɛnɛ lëër wä rɛy kuäärä Kuɔth kɛ nhiam kä yɛ.

³² Kɛ ɣöö ci Jɔ̱ɔ̱n ben kä yɛ kɛ ciaŋ lätdä cuŋni, kä /ka̱nɛ jɛ ŋäth, kä cu thuɔ̱ɔ̱l tho̱lbo̱kä kɛnɛ lëër jɛ ŋäth. Kä cäŋɛ mëë cia jɛ nɛn, /ka̱nɛ wi̱cdun car, kä /ka̱nɛ jɛ ŋäth.”

Cäät läätdä mi jiääk

³³ “Liɛŋɛ cäät mi dɔ̱diɛn. Tëë kɛ wut kɛl mi gua̱n ciëŋ, mi ci kak wal kɛ kui̱ kɔaŋ pith, kä cuɛ jɛ rɛk, kä cuɛ gua̱a̱th nhiecä kɔaŋ tɛt rɛydɛ, kä cuɛ dhaŋ mi bäär kɛ kui̱ yiën bɛɛl la̱t rɛydɛ. Kä cuɛ kak ba̱ny pi̱eeth wal, kä cuɛ wä ro̱o̱l dɔ̱diɛn.

³⁴ Mëë ci gua̱a̱th ŋër cop, cuɛ la̱a̱tkɛ jäk kä pi̱eeth kakä, kɛ ɣöö ba dɛy walkɛ wä nööŋ.

³⁵ Cu pi̱eeth la̱a̱tkɛ käp, cukɛ kɛl duäc, kä cukɛ min dɔ̱ŋ näk, kä cukɛ min dɔ̱ŋ bök.

³⁶ Cuɛ la̱a̱t kɔ̱kiɛn ti ŋuan ni kɛn kä tëë nhiam nyɔk kɛ jäkni, kä cukɛ kɛ la̱t ce̱tkɛ nɛy tëë kɔn.

³⁷ Kɛ kɔrɛ, cuɛ gatdɛ jäk kä kɛ, wëë i̱, ‘Bikɛ gatdä luɔ̱th.’

³⁸ Kä mëë ci pi̱eeth gatdɛ nɛn, cukɛ ruac kärɔ̱ i̱, ‘Mɛmɛ ɛ jɛn gatdɛ min bi nyinkɛ guäl, bia, kuanɛ jɛ näk, kɛ ɣöö banɛ nyinkɛ cu ka̱n.’

³⁹ Cukɛ jɛ käp, cukɛ jɛ yuɔr raar rɛy kakä wal kɛ kui̱ kɔaŋ, kä cukɛ jɛ näk.

⁴⁰ Kɛ kui̱ ɛmɔ mëë wä gua̱n kakä wal kɛ kui̱ kɔaŋ ben, bɛ ŋu lät kä ji̱ pi̱thä tɔ̱tɔ̱?”

⁴¹ Cukɛ jɛ loc i̱, “Jɛn bɛ kɛn nɛy tɔ̱tɔ̱ näk kɛ lia̱a̱ mi bɛc, kä bɛ kak gua̱l pi̱eeth kɔ̱kiɛn ti ba jɛ ka̱m bɛl kɛ gua̱a̱th ŋër.”

⁴² Cu Yecu kɛ jiök i̱, “/Ka̱nɛ jɛ met kuɛn rɛy ruaacni Kuɔth i̱, ‘Päm ëë ca lo̱kɛ ɛ ta̱a̱th duëli ɛ jɛn ci ben a päm gɔŋtɔtdä mɔ. Mɛmɛ ɛ la̱t Kuäär ni Kuoth, kä ɛ mi gääy nëndɛ naath’?

⁴³ Kɛ kui̱ ɛmɔ ɣän la̱rä jɛ yɛ, ba kuäär Kuɔth ka̱n kä yɛ, kä ba jɛ ka̱m nɛy kɔ̱kiɛn ti ba dɛy ciëŋ kuäärä kuir. [

⁴⁴ Kä ram mi wä tɛth ɛn pääm ɛmɛ bɛ tiath, kä mi wëë wä pɛn wi̱i̱ ran, bɛ ram ɛmɔ riac.”]

⁴⁵ Mëë ci bööth palä tin di̱t kɛnɛ ji̱ Pa-ri-thii cäätnikɛ liŋ, cukɛ jɛ ŋa̱c ɛn ɣöö ruacɛ kɛ kui̱diɛn.

⁴⁶ Kä cukɛ jɛ go̱r i̱ dëë yiɛn, duundɛ ɣöö cukɛ dual kɛ naath, kɛ ɣöö carkɛ jɛ i̱ ɛ gök.