Mɛ̈t 20 - RUAC KUƆTH IN RƐL RƆ

Cäät la̱a̱tni rɛy kakä wal kɛ kui̱ kɔaŋ

¹ “Ce̱t ciaŋ kuäärä nhial kɛ gua̱n ciëŋ mi ci looth kɛ runwaŋ, wëë ji̱ la̱t kɔk kɛ kui̱ kakä walkɛ kɛ kui̱ kɔaŋ.

² Kä kɛ kɔr kä mëë ci ruacdiɛn mat kɛ min bɛ kɔk nikɛ kɛ cäŋ kɛl, cuɛ kɛ jäkä rɛy kakä walkɛ kɛ kui̱ kɔaŋ.

³ Kä min cɛ wä raar kɛ gua̱a̱th thaak bäŋuan, cuɛ nɛy kɔ̱kiɛn nɛn cuŋä baaŋ guäth ko̱kä,

⁴ kä cuɛ kɛ jiök i̱, ‘Yɛn bä, wiaa rɛy kakä wal kɛ kui̱ kɔaŋ, bä yɛ moc mi ro̱ŋ kɛ la̱tdun.’ Kä cukɛ wä.

⁵ Kä min cɛ wä raar kɛ cäŋ däär kɛnɛ bua̱k ca̱ŋ, cuɛ la̱t ni mi ce̱tkɛ nɔ.

⁶ Cuɛ lɛni wä raar kɛ thaak dhieec, kä cuɛ nɛy kɔ̱kiɛn jek cuŋä. Cuɛ kɛ jiök i̱, ‘Ɛŋu cuɔ̱ŋɛ wanɛ mɛ baaŋ kɛ cäŋ kɛɛliw ɔ?’

⁷ Cukɛ jɛ loc i̱, ‘Kɛ ɣöö thilɛ ram mi ci kɔ ciöl la̱t.’ Kä cuɛ kɛ jiök i̱, ‘Yɛn bä, wiaa kakä wal kɛ kui̱ kɔaŋ.’

⁸ Kä mëë ci ɣɔw kua̱ thiaŋ cu gua̱n kakä wal kɛ kui̱ kɔaŋ kuäär la̱a̱tnikɛ jiök i̱, ‘Cɔl la̱a̱t, kä kämnikɛ yio̱o̱kiɛn tokɛ kä nɛy tin bëë kɛ jɔak amäni nɛy tin bä kɛ nhiam.’

⁹ Kä mëë ci la̱a̱t tëë bëë kɛ thaak dhieec ben, cu ramɔ pek yio̱o̱ni ca̱ŋ kɛl jek.

¹⁰ Täämɛ mëë ci la̱a̱t tëë bä kɛ nhiam ben, cukɛ jɛ car ɛn ɣöö dɔ̱ŋ bi ŋuan ni yio̱o̱kiɛn. Duundɛ ɣöö cu ramɔ jek ni yio̱w ca̱ŋ kɛl.

¹¹ Kä min ci kɛn kɛ ka̱n, cukɛ guɔɔr kɛ gua̱n ciëŋ,

¹² wäkɛ i̱, ‘Kɛn la̱a̱t tin jɔak ti̱ti̱ cikɛ lät kɛ gua̱a̱th mi tɔt, kä cikɛ pa̱a̱r kɛ kɔ, kɔn nɛy tin cakɔ rɔ̱ cuc kɛ la̱t kɛ cäŋ kɛɛliw kɛnɛ lëthdɛ.’

¹³ Cuɛ jɛ luɔ̱c ram kɛl kä kɛ i̱, ‘Määthdä, ɣän thilɛ duer mi cä lät kä ji̱. /Ka̱nɛ ruacdan mat kɛ yio̱w ca̱ŋ kɛl?

¹⁴ Käni mɔ la duŋdu mɔ, kä wër. Mɛɛkɛ ɣän ɛn ɣöö bä läät in bëë kɛ jɔak ka̱m mi päär kɛ min cä ka̱m ji̱.

¹⁵ Ɣän /cä dee lät kɛ nyinkä ce̱tkɛ pek lɔaacdä? Kiɛ ti kɛ tiɛɛl kɛ ɣöö lɔr tetdä?’

¹⁶ Kä inɔ nɛy tin jɔak bikɛn a nɛy tin nhiam, kä nɛy tin nhiam bikɛn a nɛy tin jɔk.”

Diɔ̱ɔ̱k lärä Yecu kɛ lia̱a̱dɛ kɛnɛ jiëcdɛ li̱th

¹⁷ Kä mëë wä Yecu kä Jɛ-ru-tha-lɛm, cuɛ ji̱ kɔaarɛ da̱ŋ wäl wi̱cdɛ rɛw cɔal guäth, kä min tekɛ dup cuɛ kɛ jiök i̱,

¹⁸ “Nɛnɛ jɛ, wä kɔn kä Jɛ-ru-tha-lɛm, kä ba Gat Ran la̱th tetni bööthni palä tin di̱t kɛnɛ ji̱ gɔ̱rä, kä bikɛ jɛ kuɛ̈th li̱th.

¹⁹ Kä bikɛ jɛ ka̱m ji̱ ɣɔaa, kɛ ɣöö ba jɛ buy, kä ba jɛ duäc, kä ba jɛ pua̱t wi̱i̱ jiaath. Kä kɛ diɔ̱ɔ̱k ni̱ni ba jɛ jiɛc li̱th.”

Thiec man Je-mɛth kɛnɛ Jɔ̱ɔ̱n kɛ Yecu

²⁰ Kä cu man gan Dhɛ-ba-dii ben kä Yecu kɛnɛ gaatkɛ, kä cuɛ rɔ ka̱m mua̱a̱l nhiamdɛ, cuɛ jɛ thiec kɛ duɔ̱ɔ̱r.

²¹ Kä cu Yecu jɛ thiec, “Ɛŋu mi go̱o̱ri?” Cuɛ jɛ loc i̱, “Jakni gaatkä da̱ŋ rɛw ti̱ti̱ kä nyuur rɛy kuäärädu a te kɛl cueecdu kɛ kɛl caamdu.”

²² Kä cu Yecu ɛ loc i̱, “Kuecɛ min thiëcɛ. Dërɛ jɛ luäŋ ɛn ɣöö bia maath kɛ liɛɛr in bä maath kɛ jɛ?” Cukɛ jɛ loc i̱, “Lua̱ŋkɔ rɔ̱.”

²³ Cuɛ kɛ jiök i̱, “Bia maath kɛ liɛɛrä. Kä nyuur cueecdä kɛnɛ camdä, /ciɛ ɣän ɛn in tho̱p jɛ. Kä ɛ gua̱a̱th nɛɛni tin ca rialikä kɛ kui̱diɛn ɛ Gua̱a̱r.”

²⁴ Kä mëë ci jaak da̱ŋ wäl ɛ liŋ, cuɛ lo̱ckiɛn waŋ kɛ gaat Dhɛ-ba-dii da̱ŋ rɛw.

²⁵ Kä cu Yecu kɛ ciöl rɔ wee i̱, “Ŋa̱cɛ jɛ ɛn ɣöö ruëëc juri ruackɛ naath kɛ buɔ̱m, kä nɛɛkiɛn tin di̱t kuɔkɛ naath kɛ buɔ̱mdiɛn.

²⁶ Kä /cɛ bi te nɔ rɛydun. Ram mi go̱o̱r ɣöö bɛ di̱t rɛydun ba läätdun.

²⁷ Kä ram mi go̱o̱r ɣöö ba bo̱o̱th rɛydun ba kuanydun.

²⁸ Ce̱tkɛ ɣöö /ken Gat Ran ben kɛ ɣöö ba jɛ lätikä, bëë kɛ ɣöö bɛ naath lätikä, kä bɛ tëkdɛ thöp ala lueel kɛ kui̱ nɛɛni ti ŋuan.”

Lëp Yecu kɛ wäŋ ciööri da̱ŋ rɛw

²⁹ Kä min wäkɛ raar kä Jɛ-ri-ko, cu buɔ̱n nath mi di̱i̱t jɛ guɔ̱ɔ̱r.

³⁰ Kä nɛnɛ, tëë kɛ wutni ti ciöör da̱ŋ rɛw ti te nyuurä gekä duɔ̱p. Mëë cikɛ jɛ liŋ ɛn ɣöö ret Yecu kɛ jɛn gua̱a̱th ɛmɔ, cukɛ rɔal i̱, “A lɔcdu kɔ̱c kɛ kɔ, Gat Dee-bid!”

³¹ Kä cu buɔ̱n nath kɛ yɔ̱r, jiökɛ kɛ i̱ biɛtdɛ. Kä cu ku tuɔ̱l nikɛn kɛ rɔal i̱, “Kuäär ni Kuoth, ni Gat Dee-bid, a lɔcdu kɔ̱c kɛ kɔ!”

³² Kä cu Yecu cuɔ̱ŋ, cuɛ kɛ cɔl, wee i̱, “Ɛŋu mi görɛ i̱ bä lät kä yɛ?”

³³ Cukɛ jɛ jiök i̱, “Kuäär ni Kuoth, lɛp wäŋkɔ.”

³⁴ Kä cu Yecu luäkdiɛn go̱r, kä cuɛ wäŋkiɛn thiëëp, kä cukɛ guic ni kä kɛɛl, kä cua guɔ̱ɔ̱r jɛ.