Mɛ̈t 19 - RUAC KUƆTH IN RƐL RƆ

Ŋi̱i̱c kɛ kui̱ da̱k mään

¹ Kä mëë ci Yecu thuɔ̱k kɛ lat kä ti̱ti̱, cuɛ jiɛɛn kä Gɛ̈-lɛ-li, kä cuɛ wä ro̱o̱l Ju-dia kui̱c Kiɛɛr Jɔr-dɛn.

² Kä cu bua̱n nath ti di̱t jɛ guɔ̱ɔ̱r, kä cuɛ kɛ jakä gɔw ɛn wi̱ni.

³ Cu tha̱a̱ŋ ji̱ Pa-ri-thii ben kä jɛ, kä cukɛ jɛ ɣɔ̱n cu kɛ thieci, “Ɛ cuɔ̱ɔ̱ŋ ɛn ɣöö bi wut ciekdɛ däk kɛ kui̱ kä duɔ̱ɔ̱r?”

⁴ Cuɛ jɛ loc i̱, “/Ken yɛn ɛ kuɛn, ɛn ɣöö jɛn ram ëë cak naath ni tukä ɣɔaa, cɛ kɛ cak ala tuut kɛnɛ ŋuɔ̱ɔ̱t,

⁵ kä cuɛ wee i̱, ‘Kɛ kui̱c ɛmɔ bi wut gua̱n kɛnɛ man ba̱ny piny, kä ba jɛ mat kɛnɛ ciekdɛ, kä bi kɛn da̱ŋ rɛw a puɔ̱ny kɛl?’

⁶ Kä inɔ /cikɛ lɛ ŋot ala rɛw, kɛ kɛl. Kɛ kui̱c ɛmɔ mɔ ci Kuoth ɛ mat kɛɛl ɔ, a thil ram mi dääk jɛ.”

⁷ Cukɛ Yecu thiec i̱, “Kä ɛŋu ci Muthɛ jɛ la̱t kɔ mɔ, i̱ ba ciek ka̱m warɛgak lotdä däkädɛ, kä ba jɛ jakä wä?”

⁸ Cu Yecu kɛ jiök i̱, “Ɛ ɣöö bum wuɔ̱thkun, cu Muthɛ yɛ cu pa̱l ɣöö bia mänkun däk, duundɛ ɣöö /cɛ te inɔ ni tukä ɣɔaa.

⁹ Kä ɣän la̱rä jɛ yɛ, ram mi wä ciekdɛ däk a /ciɛ kɛ kui̱ leerä, kä kuɛnɛ ciek dɔ̱diɛn lätdɛ nyin leerä.”

¹⁰ Cu ji̱ kɔaarɛ jɛ jiök i̱, “Mi ɛ jɛn ciaŋ wutdä kɛnɛ ciekdɛ, dee gɔaa ni ɣöö /ci raan dee kuɛɛn.”

¹¹ Kä cuɛ kɛ jiök i̱, “/Cikɛ nɛy diaal dee ŋi̱i̱c ɛmɛ nhɔk ɔ, ɛ ni nɛy tin ca ka̱mkɛ kärɔ̱.

¹² Kɛ ɣöö te ɣöwni thi̱n ni däpädiɛn, kä te jiöwni thi̱n ti ca kuit ɛ nɛy kɔ̱kiɛn, kɛ jiöwni kɔ̱kiɛn tin ca rɔ̱ jakä jiöwni kɛ kui̱ kuäärä nhial. Ɛ ram mi nhɔk ŋi̱i̱c ɛmɛ, lät jɛ.”

Puɔ̱th Yecu kɛ gaat ti tiɛtni

¹³ Kä cua gaat nöŋ jɛ kɛ ɣöö derɛ tetkɛ la̱th wuɔ̱thnikiɛn, kä bɛ pal kɛ kui̱diɛn. Cu ji̱ kɔaarɛ naath tin nööŋkɛ kɛ yɔ̱r,

¹⁴ kä cu Yecu wee i̱, “A gaat bëë kä ɣä, kä /cuarɛ kɛ pen ben kɛ ɣöö kuäär nhial ɛ duŋ nɛɛni ti ce̱tkɛ kɛ.”

¹⁵ Kä cuɛ tetkɛ la̱th wuɔ̱thnikiɛn, kä cuɛ wä dupdɛ.

Ŋuɛ̈t mi riäŋ riäŋ

¹⁶ Kä nɛnɛ, cu ram kɛl ben kä Yecu wëë i̱, “Ŋi̱i̱c, ɛŋu mi gɔaa mi bä la̱t, kɛ ɣöö bä tëk mi do̱raar jek?”

¹⁷ Cuɛ jɛ loc i̱, “Ɛŋu mi thieci ɣä kɛ kui̱ kä mi gɔaa? Ɛ ram kɛl kärɔa gɔaa ɔ. Mi go̱o̱ri ɣöö bi te rɛy tee kä, käp ni luëëk.”

¹⁸ Cuɛ Yecu jiök i̱, “Ɛ mi̱th?” Kä cu Yecu wee i̱, “/Cu raan näk, /cu dho̱m, /cu kuel, /cu ruac kacä lat.

¹⁹ Luthni guur kɛnɛ muɔɔr, kä nhɔk gua̱n thieekädu ce̱tkɛ rɔɔdu.”

²⁰ Cu ŋuɛ̈t ɛ jiök i̱, “Cä ti̱ti̱ diaal la̱t, ɛŋu mi ŋot jɔ̱ɔ̱r kä ɣä?”

²¹ Cu Yecu jɛ jiök i̱, “Mi go̱o̱ri ɣöö bi a ram mi gɔaa, wër kɔkni nyinku, kä kämni yio̱w nɛy tin can, kä bi riaŋ jek cieŋ nhial. Kä bër guuri ɣä.”

²² Kä mëë ci ŋuɛ̈t ɛmɔ mɛmɛ liŋ, cuɛ jiɛɛn kɛ jiath lɔaac, kɛ ɣöö tëë kɛ ŋɔak ti ŋuan.

²³ Kä cu Yecu ji̱ kɔaarɛ jiök i̱, “Ɛpuc, ɣän la̱rä jɛ yɛ, bɛ buɔ̱m ɛ tet ɛn ɣöö bi ram mi riäŋ riäŋ coth cieŋ kuäärä nhial.

²⁴ Kä ɣän la̱rä jɛ yɛ bä, i̱ thia̱kni ɣöö bi thɔ̱rɔ̱l cooth kɛ waŋ riɛp kä coth raam mi riäŋ riäŋ cieŋ kuäärä Kuɔth.”

²⁵ Mëë ci ji̱ kɔaarɛ mɛmɛ liŋ, cukɛ ga̱a̱c ɛlɔ̱ŋ, cukɛ wee i̱, “Kä ɛŋa mi dee kään?”

²⁶ Cu Yecu kɛ guic, kä cuɛ wee i̱, “Mɛmɛ /cɛ rɔ dee met luäŋ kä naath, kä ŋɔak diaal lua̱ŋkɛ rɔ̱ kä Kuoth.”

²⁷ Kä cu Pi-tɔr wee i̱, “Nɛnɛ, cakɔ nyinkɔ diaal ba̱ny piny kä guɔ̱rkɔ ji̱. Kä ɛŋu mi bakɔ jek?”

²⁸ Cu Yecu kɛ jiök i̱, “Ɛpuc, ɣän la̱rä jɛ yɛ, mi wä Gat Ran nyuur wi̱i̱ kɔam puɔnyädɛ rɛy ɣɔaa mi pay cak, bi yɛn nɛy tin cia ɣä guɔ̱ɔ̱r nyuur kɔamni kuäärä da̱ŋ wäl rɛw, kä bia döör I-thɛ-rɛl da̱ŋ wäl rɛw luk.

²⁹ Kä ram mi bäny duelɛ piny kiɛ dämani, kiɛ nyimani, kiɛ gua̱n, kiɛ man, kiɛ gaat, kiɛ ka̱a̱k kɛ kui̱ cio̱tädä, bɛ rëëp ti kuɔ̱r jek, kɛnɛ tëk mi do̱raar.

³⁰ Kä bi nɛy ti ŋuan tin te nhiam te jɔk, kä bi nɛy tin jɔak a nɛy tin nhiam.”