Mɛ̈t 18 - RUAC KUƆTH IN RƐL RƆ

Di̱t ni ŋa ɛlɔ̱ŋ?

¹ Kä ɛn guäth ɛmɔ cu ji̱ kɔaar Yecu ben kä jɛ, kä cukɛ kɛ thiec i̱, “Ɛŋa mi di̱t ni jɛn kä nɛy diaal rɛy ciëŋ kuäärä nhial?”

² Kä cu Yecu gat cɔl, cuɛ jɛ la̱th dääriɛn,

³ kä cuɛ wee i̱, “Ɛpuc, ɣän la̱rä jɛ yɛ, mi /cia rɔ̱ bi loc ɛ bia ce̱tkɛ gaat, /cia bi met wä rɛy kuäärä nhial.

⁴ Kä ram mɔ bi rɔ jak kä kuiy ce̱tkɛ gat ɛmɛ ɔ, ɛ jɛn ram in bi di̱t ni jɛn rɛy ciëŋ kuäärä nhial.

⁵ Kä ram ɔ bi gat kɛl mi ce̱tkɛ gat ɛmɛ ɔ nyuɔ̱ɔ̱r kɛ ciötdä, nyuurɛ ni ɣä.”

Tin ɣɔamkɛ naath dui̱r

⁶ “Kä mi wëë wä tekɛ ram kɛl mi wä gat kɛl mi tɔt mi ŋääth ɣä jak kä dui̱r, gɔaa ni ɣöö ba päm gua̱r bɛɛl mi di̱i̱t yian ŋuääkdɛ, kä bɛ cu mua däär bar mi lueŋ.

⁷ Riɛk akɛ ɣɔw kɛ kui̱ ŋɔaani tin jakɛ jɛ kä dui̱r. Kɛ ɣöö ɣɔ̱ɔ̱ni bäkɛ pa̱ny, kä riɛk akɛ ram mɔ bikɛ ben kä jɛ mɔ.

⁸ “Kä mi jak tetdu kiɛ cio̱o̱kdu ji̱ kä dui̱r, tɛm ɛ kä yäk ɛ. Gɔaa ni jɛn kɛ ji̱ ɛn ɣöö bi wä teekä mi thil pek a ti̱i̱ kɛ buɔ̱t kiɛ ŋɔl, kä ɣöö ba ji̱ yoru guäth maac mi thil pek, a ti̱i̱ kɛ tetku da̱ŋ rɛw kɛnɛ ciöku da̱ŋ rɛw.

⁹ Kä mi jak waŋdu ji̱ kä dui̱r, lɔlɛ kä yäk ɛ, kɛ ɣöö gɔaa ni jɛn kɛ ji̱ ɛn ɣöö bi wä teekä mi do̱raar kɛ waŋ kɛl, kä yoru guäth maac mi thil pek a ti̱i̱ kɛ wäŋ da̱ŋ rɛw.”

Cäät kɛ dɛl mi ci bath

¹⁰ “Niɛkɛ rɔ̱ ɛn ɣöö /cia gat kɛl kä kɛn nyin tiɛtni ti̱ti̱ bi cany, kɛ ɣöö ɣän la̱rä jɛ yɛ, rɛy ciëŋ nhial ja̱a̱kiɛn tekɛ nhiam Gua̱a̱r in te nhial ni ciaŋ. [

¹¹ Kɛ ɣöö ci Gat Ran ben kɛ ɣöö bɛ nɛy tin ci bath ben kän.]

¹² Ɛŋu mi carɛ? Mi te raan kɛ rɔɔm ti kuɔ̱r, kä ci kɛl bath thi̱n, /cɛ jiɛn bäŋuan wi̱cdɛ bäŋuan a bänyɛ wi̱i̱ päämni, kä wëë kɛl in ci bath go̱r?

¹³ Ɛpuc, ɣän la̱rä jɛ yɛ, mi wee jɛ jek, bi lɔcdɛ tɛɛth ɛlɔ̱ŋ kɛ kui̱dɛ kɛ tɛ̈th lɔaac mi leny ni tɛ̈th lɔaacdɛ kɛ kui̱ deet tin jiɛn bä ŋuan tin /ken bath.

¹⁴ Inɔ /ciɛ ruac Guurun in te nhial ɛn ɣöö bi ram kɛl bath kä kɛn nɛy ti̱ti̱.”

Lui̱k raam mi ci duer

¹⁵ “Mi ci ram kɛl kä dämuɔɔr ji̱ duer duer, wër läri jɛ duerɛ, kamdun yɛn da̱ŋ rɛw kärɔ̱. Kä mi wëë ruacdu liŋ, ci dämuɔɔr luɔ̱c jɔk.

¹⁶ Kä mi /cɛ ruacdu liŋ, naŋ ram kɛl kiɛ nɛy da̱ŋ rɛw kɔ̱kiɛn kɛ ji̱ kɛɛl, kɛ ɣöö bɛ ruaacni diaal tëë cia lat ŋa̱c a thil diw kɛ li̱eŋ nɛɛni da̱ŋ rɛw kiɛ diɔ̱k.

¹⁷ Kä mi lo̱kɛ ruacdiɛn, läri jɛ ji̱ duëël Kuɔth, kä mi lo̱kɛ li̱eŋ ruaacni ji̱ duëël Kuɔth bä, a jɛ ce̱tkɛ juɔ̱r kɛnɛ thuul tho̱lbo̱kä kä ji̱.

¹⁸ Ɛpuc, ɣän la̱rä jɛ yɛ, mi wiaa yiɛn wi̱i̱ muɔ̱ɔ̱n ba jɛ yiɛn cieŋ nhial, kä mi wiaa lony wi̱i̱ muɔ̱ɔ̱n ba jɛ lony cieŋ nhial.

¹⁹ Kä ɣän la̱rä yɛ mi dɔ̱diɛn bä, mi mät nɛy da̱ŋ rɛw kä yɛn ji̱ wec muɔ̱ɔ̱n kɛ thiec kä duɔ̱ɔ̱r, ba jɛ lät kä yɛ ɛ Gua̱a̱r in te nhial.

²⁰ Kɛ ɣöö gua̱a̱th ɔ bi nɛy da̱ŋ rɛw kiɛ diɔ̱k mat thi̱n ɔ kɛ ciötdä, bä te rɛydiɛn.”

Cäät kɛ kui̱ läätdä mi thil pälikä

²¹ Kä cu Pi-tɔr ben kä Yecu, kä cuɛ jɛ thiec i̱, “Kuäär ni Kuoth, dëë dämaar mi ci ɣä duer duer pälikä nikä di? Dëë jɛ pälikä nikä bärɔw?”

²² Cu Yecu jɛ loc i̱, “/Ciɛ nikä bärɔw kärɔ̱, ɣän bä jɛ la̱r ji̱ nikä jiɛn bärɔw kä bärɔw.

²³ “Kɛ kui̱ ɛmɔ dee ciaŋ kuäärä nhial pa̱a̱r kɛ kuäär mi di̱i̱t mi go̱o̱r ɣöö bɛ nyinkɛ ŋa̱c kä la̱a̱tkɛ.

²⁴ Min tookɛ jɛ, cua jɛ nöŋ läätdɛ kɛl mi go̱rɛ yio̱w dääpä ti bathdɔɔri wäl kä jɛ.

²⁵ Kä kɛ ɣöö thilɛ jɛ yio̱w ti derɛ thöp, cu kuäärɛ ruac lat i̱ ba jɛ kɔak, kɛnɛ ciekdɛ kɛ gaatkɛ amäni nyinkɛ diaal, kɛ ɣöö ba yio̱o̱kɛ col.

²⁶ Kä ɛnɔ, cu läätdɛ rɔ yuɔr piny nhiamdɛ, palɛ jɛ i̱, ‘Lip ɣä, bäkɛ ka̱m ji̱ kɛn diaal.’

²⁷ Kä mëë ci kuäär tekɛ jiath lɔaac kɛ läät ɛmɔ, cu jɛ lony, kä cuɛ jɛ pa̱l yio̱w.

²⁸ Kä jɛn läät ɛmɔ min wëë raar, cuɛ röm kɛ läät mi lät kɛɛl kɛ jɛ, mi go̱o̱rɛ yio̱w ti pekdiɛn kuɔ̱r kä rɔ̱. Kä cuɛ jɛ käp ro̱o̱lɛ, cuɛ jɛ jiök i̱, ‘Kämni ɣä yio̱wkä tin göörä kä ji̱!’

²⁹ Kä cu raan la̱t kɛ̈ɛ̈l kɛ jɛ rɔ yuɔr piny kä palɛ jɛ i̱, ‘Lip ɣä, kä bäkɛ cuɔ̱l ji̱.’

³⁰ Cuɛ jɛ lo̱k, kä cuɛ jɛ naŋ dueel yieenä amäni mi wëë ŋua̱l col.

³¹ Mëë ci ji̱ la̱t kɛ̈ɛ̈l kɛ jɛ min ci tuɔɔk nɛn, cukɛ gaak ɛlɔ̱ŋ, kä cukɛ wä kɛ ɣöö ba tëë diaal tëë ci tuɔɔk wä la̱r kuääriɛn.

³² Kä cu kuäär läätdɛ cɔl, kä cuɛ jɛ jiök i̱, ‘Ɛ ji̱n, läät mi jiääk! Cä ji̱ pälikä kɛ yio̱w diaal tin göörä kä ji̱, kɛ ɣöö ci ɣä pal.

³³ Kä dee gɔaa ni mi ci lɔcdu kɔ̱a̱c kɛ raan la̱t kɛ̈ɛ̈l kɛ ji̱, ce̱tkɛ mëë ci lɔcdä kɔ̱a̱c kɛ ji̱.’

³⁴ Kä cu kuäärɛ jɛ ka̱m nɛy tin la yiankɛ naath, amäni mi wëë yio̱wkɛ diaal col.

³⁵ Kä inɔ bä, bi Gua̱a̱r in te nhial ɛ lät kä yɛn diaal, mi /cia dämuɔɔrikun bi pälikä kɛ lo̱ckun.”