Mɛ̈t 17 - RUAC KUƆTH IN RƐL RƆ

Luɔ̱c pua̱ny Yecu kɛ rɔ

¹ Kä mëë ci ni̱n bäkɛl kɔ̱kiɛn thuɔ̱k, cu Yecu Pi-tɔr kɛ Je-mɛth kɛnɛ däman ni Jɔ̱ɔ̱n naŋ guäthdiɛn kärɔ̱ wi̱i̱ pa̱a̱m mi bäär.

² Kä min tekɛ gui̱c, cu ta̱a̱ Yecu rɔ ri̱t, cu nhiamdɛ riaaw ce̱tkɛ cäŋ, kä cu bieynikɛ buay ɛlɔ̱ŋ.

³ Kä nɛnɛ, cu Muthɛ kɛnɛ E-li-yaa päl kä kɛ, kä cukɛ ruac kɛ Yecu.

⁴ Kä cu Pi-tɔr Yecu jiök i̱, “Kuäär ni Kuoth, gɔaaɛ ɛn ɣöö ta̱kɔ wanɛ mɛ. Mi go̱o̱ri jɛ, bä bi̱lɛni da̱ŋ diɔ̱k la̱t wanɛ mɛ, bi kɛl a duŋdu, kä bi kɛl a duŋ Muthɛ, kä bi kɛl a duŋ E-li-yaa.”

⁵ Min ŋotdɛ kɛ ruac, cu pua̱r mi bo̱r kɛ kuɔ̱m piny, kä ruac jɔw rɛy puɔ̱rä wëë i̱, “Nɛmɛ ɛ jɛn Gatdä min nhɔakä, min tɛth lɔcdä kɛ jɛ ɛlɔ̱ŋ. Liɛŋɛ ruacdɛ.”

⁶ Mëë ci ji̱ kɔaarɛ jɔw liŋ, cukɛ dual ɛlɔ̱ŋ, kä cukɛ rɔ̱ yuɔr piny buupä.

⁷ Kä cu Yecu ben cuɛ kɛ ben thiap, jio̱kɛ kɛ i̱, “Jiacɛ rɔ̱, kä /cuarɛ dual.”

⁸ Kä min cikɛ nhial liɛc, cuɛ thil radɔ̱diɛn mi cu kɛn ɛ nɛn, ɛ ni Yecu kärɔaadɛ.

⁹ Kä min bäkɛ piny wi̱i̱ pa̱a̱m, cu Yecu kɛ gok i̱, “Thilɛ ram mi bi yɛn ɛ la̱t nyuuth ɛmɛ, amäni mi wa Gat Ran jiɛc li̱th.”

¹⁰ Kä cu ji̱ kɔaarɛ jɛ thiec i̱, “Kä ɛŋu laar gɔa̱a̱r ɛmɔ i̱ bi E-li-yaa dhil ben kɛ nhiam?”

¹¹ Cuɛ jɛ loc i̱, “E-li-yaa bëë pa̱ny, kä bɛ ŋɔaani diaal luɔc gɔɔyä.

¹² Duundɛ ɣöö ɣän la̱rä jɛ yɛ, ɛn ɣöö E-li-yaa cɛ ben, kä /ken kɛn ɛ ŋa̱c, kä cukɛ jɛ lät kä min görkɛ. Kä inɔ bä, ci Gat Ran thia̱k kɛ ɣöö bɛ cuuc tetnikiɛn.”

¹³ Kä cuɛ cop lɔɔc ji̱ kɔaar Yecu ɛn ɣöö latdɛ ti̱ti̱ kɛ kui̱ Jɔ̱ɔ̱n in la lääk.

Jak Yecu kɛ dhɔl mi tekɛ yiëë mi jiääk kä gɔaa

¹⁴ Mëë cikɛ luny kä buɔ̱n, cu ram kɛl ben, kä cuɛ rɔ ka̱m mua̱a̱l nhiam Yecu,

¹⁵ kä cuɛ wee i̱, “Kuäär ni Kuoth, a lɔcdu kɔ̱c kɛ gatdä, kɛ ɣöö tëë kɛ nok, cɛ jɛ cuc ɛlɔ̱ŋ, cɛ tɛth maac kä ti nyin ŋuan amäni rɛy pi̱i̱ni bä.

¹⁶ Kä cua̱ jɛ nöŋ jaaku, kä /ken kɛn ɛ jak kä gɔaa.”

¹⁷ Kä cu Yecu ɛ loc i̱, “Yɛn, ri̱c mi thil ŋa̱th kä ca̱a̱p jiäkni, ɣän bä te kɛɛl kɛ yɛ kɛ gua̱a̱th mi ni̱n di? Kä ɛ gua̱a̱th mi ni̱n di mi bä rut ni yɛ? Nöŋɛ jɛ ɣä wanɛ mɛ.”

¹⁸ Kä cu Yecu yiëë in jiääk la̱t ruac, kä cu yiëë in jiääk ben raar puɔ̱ɔ̱ny dhöl, kä cu dhɔl cu gɔaa nikä kɛɛl.

¹⁹ Kä cu jaak ben kä Yecu kɛ tɛ̱̈ɛ̱̈ kä cukɛ wee i̱, “Ɛŋu /ka̱n kɔ jɛ luäŋ kɛ käm raar ɔ?”

²⁰ Kä cuɛ kɛ jiök i̱, “Ɛ ɣöö kuiy ŋa̱thdun. Kä ɛpuc ɣän la̱rä jɛ yɛ, mi te yɛn kɛ ŋa̱th mi ce̱tkɛ kuɛ̈ɛ̈ mi tɔt, dërɛ päm ɛmɛ jiök i̱, ‘Woc rɔ wanɛ mɛ, kä wër wi̱ni mi,’ kä bɛ wä, kɛ ɣöö thilɛ mi bi yɛ dhal. [

²¹ Kä duɔ̱ɔ̱r mi ce̱tkɛ mɛmɛ /cɛ bä raar baaŋ ɛ ni pal kɛnɛ thëk mi̱thni.”]

Nyɔak Yecu kɛ lat li̱ethdɛ

²² Kä mëë ci jaakɛ rɔ̱ mat kä Gɛ̈-lɛ-li, cu Yecu kɛ jiök i̱, “Ba Gat Ran kɔak tetni nath,

²³ bikɛ jɛ näk, kä ba jɛ jiɛc li̱th kɛ diɔ̱ɔ̱k ni̱ni.” Kä cukɛ gaak ɛlɔ̱ŋ.

Ruac Yecu kɛ kui̱ tho̱lbo̱kä Luaak Kuɔth

²⁴ Mëë cikɛ cop kä Ka-pɛr-ni-äm, cu thuɔ̱ɔ̱l tho̱lbo̱kä kɛ kui̱ luaak Kuɔth ben kä Pi-tɔr, kä cukɛ jɛ thiec i̱, “/Ci ŋi̱i̱cdu tho̱lbo̱k Luaak Kuɔth thöp?”

²⁵ Kä cuɛ wee i̱, “La tho̱pɛ jɛ.” Kä mëë ci Pi-tɔr ben cieŋ, cu Yecu ruac kɛ jɛ kɛ nhiam, wëë i̱, “Thay-mɔn, ɛŋu caari mɔ kɛ mɛmɛ? Kä ɛŋa jek kua̱r wec muɔ̱ɔ̱n tho̱lbo̱k kɛnɛ jumruk kä kɛ ɔ? Jek kɛn kɛ kä gaatkiɛn kiɛ kä nɛy tin kɔ̱kiɛn?”

²⁶ Kä mëë ci Pi-tɔr wee i̱, “Kä nɛy kɔ̱kiɛn,” cu Yecu jɛ jiök i̱, “Kä inɔ ci gaat kua̱r tho̱lbo̱k bi thöp.

²⁷ Kä duundɛ ɣöö /ci kɔn lo̱c nɛɛni tɔ̱tɔ̱ bi jak kä jiäk, wër yori cibat bar, kä käni rec in kɔŋni käp ni jɛ, kä mi wi̱i̱ thokdɛ wä lɛp, bi yiëth jek thi̱n, käni jɛ kä tho̱pni jɛ kɛ kui̱dä kɛnɛ kui̱du.”