Mɛ̈t 16 - RUAC KUƆTH IN RƐL RƆ

Thiec ji̱ Pa-ri-thii kɛ nyuuth kä Yecu

¹ Kä cu ji̱ Pa-ri-thii kɛnɛ ji̱ Thɛ̈d-du-thii ben, kä kɛ ɣöö görkɛ ɣɔ̱n Yecu, cukɛ jɛ thiec kɛ nyuuth mi gääy naath nhial.

² Cuɛ kɛ loc i̱, “Mi ɛ thiaŋ, la yɛn ɛ wee bi ɣɔw a duäŋ duäŋ kɛ ɣöö tith pua̱a̱r.

³ Kä mi ɛ runwaŋ, la yɛn ɛ wee i̱, ‘Bɛ tekɛ thul ɛn wa̱lɛ kɛ ɣöö pua̱a̱r tithɛ kä wunɛ.’ Ŋa̱cɛ luɔt tääkä nhial, kä /cia luɔt kä tin tuɔɔk rɛy ɣɔaa ŋäc.

⁴ Ri̱c mi jiääk mi dho̱o̱m go̱o̱rɛ ni nyuuth mi gääy naath, thilɛ nyuuth mi ba ka̱m jɛ ɛ ni nyuuth Jona kärɔa.” Kä inɔ, cuɛ kɛ ba̱ny piny, cuɛ jiɛɛn.

Thuɔp ji̱ Pa-ri-thii kɛ ji̱ Thɛ̈d-du-thii

⁵ Mëë ci ji̱ kɔaarɛ cop kui̱ci, cu wuɔ̱thkiɛn ruëëc kɛ na̱ŋ mi̱thni.

⁶ Cu Yecu kɛ jiök i̱, “Guecɛ agɔaa kä niɛkɛ rɔ̱ kɛ thuɔp ji̱ Pa-ri-thii kɛnɛ Thɛ̈d-du-thii.”

⁷ Kä cukɛ ruac kärɔ̱, wäkɛ i̱, “Ɛ ɣöö thilɛ kɔn juray mi canɛ nööŋ.”

⁸ Kä mëë ci Yecu mɛmɛ ŋa̱c, cuɛ wee i̱, “Yɛn nɛy ti kuiy ŋa̱thdun, ɛŋu ruacɛ kɛ rɔ̱ mɔ ɛn ɣöö thilɛ yɛ mi̱th ɔ?

⁹ Ŋotdɛ /kenɛ ni cop lɔɔcdun? Kä /cia jɛ tim, ɛn ɣöö kɛ jurayni da̱ŋ dhieec cuakɛ cam ɛ nɛy ti bathdɔɔri da̱ŋ dhieec, kä kɛ diënyni da̱ŋ di kɛn tëë cia ruɔ̱ɔ̱l?

¹⁰ Kiɛ /ka̱nɛ jɛ tim, ɛn ɣöö kɛ jurayni da̱ŋ bärɔw kɛn tëë camkɛ ɛ nɛy ti bathdɔɔri da̱ŋ ŋuan, kä kɛ diënyni da̱ŋ di kɛn tëë cia ruɔ̱ɔ̱l?

¹¹ Kä ku yɛn ɛ lɛ kui̱c i̱di ɛn ɣöö /cä ruac kɛ kui̱ jurayä? Niɛkɛ rɔ̱ kɛ thuɔp ji̱ Pa-ri-thii kɛnɛ Thɛ̈d-du-thii!”

¹² Kä inɔ, cukɛ jɛ ŋa̱c ɛn ɣöö /cɛ ruac kɛ kɛ i̱ niɛkɛ rɔ̱ kɛ thuɔp jurayni, kä ruacɛ kɛ kɛ, kɛ ciaaŋ ŋi̱i̱cä ji̱ Pa-ri-thii kɛnɛ Thɛ̈d-du-thii.

Min laar Pi-tɔr ɛ kɛ kui̱ Yecu

¹³ Täämɛ mëë ci Yecu ben rɛy rööl Thɛ-tha-ria kä Pi-li-pi, cuɛ ji̱ kɔaarɛ thiec i̱, “Ɛŋa mi lat naath ɛ i̱ ɛ Gat Ran?”

¹⁴ Kä cukɛ wee i̱, “Laar tha̱a̱ŋ nath ɛ i̱ ɛ Jɔ̱ɔ̱n in la lääk, kä ɛ tha̱a̱ŋkiɛn i̱ ɛ E-li-yaa, kä ɛ tha̱a̱ŋkiɛn i̱ ɛ Yir-mɛ-yaa, kiɛ ram kɛl kä göök.”

¹⁵ Kä cuɛ kɛ jiök i̱, “Kä laar yɛn ɛ i̱ ɛ ɣän ŋa?”

¹⁶ Cu Thay-mɔn Pi-tɔr ɛ loc i̱, “Ɛ ji̱n Mɛ-thia, Gat Kuɔth in tëk.”

¹⁷ Kä cu Yecu jɛ jiök i̱, “Puɔ̱th akɛ ji̱, Thay-mɔn, gat Jona! Kɛ ɣöö /ciɛ ram mi tekɛ ri̱ŋ kɛnɛ riɛm nyuthɛ ji̱ mɔ, ɛ jɛn Gua̱a̱r in te nhial.

¹⁸ Kä ɣän larä jɛ ji̱, ɛ ji̱n Pi-tɔr, kä wi̱i̱ pa̱a̱m ɛmɛ ɣän bä luaakdä la̱t thi̱n, kä /ci buɔ̱m li̱eth ɛ bi luäŋ kɛ tiëm.

¹⁹ Bä ji̱ ka̱m leepni ciëŋ kuäärä nhial, kä mi wiaa yiɛn wi̱i̱ muɔ̱ɔ̱n ba jɛ yiɛn cieŋ nhial. Kä mi wiaa lony wi̱i̱ muɔ̱ɔ̱n, ba jɛ lony cieŋ nhial.”

²⁰ Kä cuɛ ji̱ kɔaarɛ gok a bum ɛn ɣöö thilɛ ram mi bi kɛn ɛ la̱r ɛ ɛn ɣöö ɛ jɛn Mɛ-thia.

Lär Yecu kɛ lia̱a̱dɛ kɛnɛ jiëcdɛ kɛ rɔ li̱th

²¹ Kɛ jɛn gua̱a̱th ɛmɔ cu Yecu ɛ tok kɛ mi nyuthɛ ji̱ kɔaarɛ, ɣöö bɛ rɔ dhil kɛ wä kä Jɛ-ru-tha-lɛm, kä bɛ ti bɛ̈c bɛ̈ɛ̈c ti ŋuan wä rut kä di̱t ji̱ Juudh kɛnɛ bööth palä tin di̱t amäni ji̱ gɔ̱rä, kä ba jɛ näk, kä ba jɛ jiɛc li̱th kɛ diɔ̱ɔ̱k ni̱ni.

²² Kä cu Pi-tɔr ɛ naŋ gekä, kä cuɛ jɛ tok kɛ lui̱k, wëë i̱, “Bi Kuoth kɛ gaŋ kä ji̱, Kuäär ni Kuoth! Mɛmɛ /cɛ bi met tuɔɔk kä ji̱.”

²³ Kä cuɛ rɔ ri̱t, kä jio̱kɛ Pi-tɔr i̱, “Woc rɔ kä ɣä Cɛy-tan, ɛ ji̱n riɛk dupdä kɛ ɣöö /ci lät ni tin bä kä Kuoth, cärku /cikɛ bä kä Kuoth bäkɛ kä naath.”

²⁴ Kä cu Yecu ji̱ kɔaarɛ jiök i̱, “Mi tee kɛ ram mi go̱o̱r ɣöö bɛ ɣä guɔ̱ɔ̱r, a jɛ jay rɔɔdɛ, kä a jɛ kap jiathdɛ, kä a jɛ guur ɣä.

²⁵ Kɛ ɣöö ram mi go̱o̱r ɣöö bɛ tëkdɛ kän bɛ jɛ bath, kä ram mi tho̱p tëkdɛ kɛ kui̱dä bɛ jɛ jek.

²⁶ Kä ɛŋu mi dee raan ɛ jek mi cɛ ɣɔw kɛɛliw jek, kä cɛ tëkdɛ bath? Kiɛ ɛŋu mi dee raan ɛ thöp kɛ ɣöö bɛ tëkdɛ luɔ̱ɔ̱c jɔk?

²⁷ Kɛ ɣöö bi Gat Ran kɛnɛ ja̱a̱kɛ kɛ gɔɔy puɔnyä Gua̱n ben, kä ɛn guäth ɛmɔ bɛ nɛy diaal culikä kɛ min ci kɛn ɛ la̱t.

²⁸ Ɛpuc, ɣän la̱rä jɛ yɛ, tëë kɛ tha̱a̱ŋ nath ti te cuŋä wanɛ mɛ, ti /ci bi li̱w amäni mi cikɛ Gat Ran nɛn a bëë rɛy kuäärädɛ.”