Mɛ̈t 15 - RUAC KUƆTH IN RƐL RƆ

Ruac yecu kɛ kui̱ ŋi̱i̱cä gua̱ndɔɔŋni ji̱ Juudh

¹ Kä cu ji̱ Pa-ri-thii kɛnɛ ji̱ gɔ̱rä jiɛɛn kä Jɛ-ru-tha-lɛm, cukɛ ben kä Yecu, kä cukɛ wee i̱,

² “Ɛŋu to̱l jaaku ni ciaaŋ di̱tni mɔ? Kɛ ɣöö /cikɛ tetkiɛn lak a /kenkɛ ni mi̱th.”

³ Kä cuɛ kɛ loc i̱, “Kä ɛŋu tölɛ ŋuɔ̱t Kuɔth kɛ kui̱ ciɛŋädun ɔ?

⁴ Kɛ ɣöö ci Kuoth wee i̱, ‘Luthni guur kɛnɛ muɔɔr,’ kɛnɛ ɣöö, ‘Ram ɔ bi ruac a jiäk kɛ gua̱n kiɛ man ɔ bɛ dhil li̱w pa̱ny.’

⁵ Kä la yɛn guuri kiɛ muɔɔri a jiök i̱, ‘Min dëë ka̱m ji̱, cä jɛ thöp Kuoth, jɛn ram ɛmɔ /cɛ luth gua̱n go̱r.’

⁶ Kä ɛnɔ cu yɛn ruac Kuɔth jakä baŋ kɛ kui̱ ciɛŋnikun.

⁷ Yɛn ji̱ mɛɛtdä, ci I-ca-yaa yɛ la̱t ruac go̱o̱kä mi thuɔ̱k, mëë cɛ wee i̱,

⁸ ‘Nɛy ti̱ti̱ luɔ̱thkɛ ɣä kɛ lëëpkiɛn, kä lo̱ckiɛn nɔ̱a̱nkɛ kɛ ɣä.

⁹ Paliɛn kɛ ɣä ɛ baŋ, kɛ ɣöö ŋi̱i̱c kɛn ni cär nath ala ŋuɔ̱t.’ ”

Tin ya̱rkɛ raan

¹⁰ Kä cuɛ naath cɔl, cuɛ kɛ jiök i̱, “Li̱eŋɛ, kä a wä lɔɔcdun.

¹¹ /Ciɛ mi wä thok ran ɛn nɔ yär raan ɔ, ɛ ni min bä raar thok ran ɛn nɔ yär raan ɔ.”

¹² Kä cu ji̱ kɔaarɛ ben kä jɛ, cukɛ jɛ jiök i̱, “Ŋäci jɛ ɛn ɣöö ci lo̱c ji̱ Pa-ri-thii jiääk, mëë cikɛ mëë ci lat liŋ?”

¹³ Cuɛ jɛ loc i̱, “Wal diaal tin /ci pith Gua̱a̱r in te nhial, ba kɛ yut.

¹⁴ Palɛ kɛ kä rɔ̱, kɛ bööth ciööri ti ciöör. Kä mi buɔth cɔr cɔr dɔ̱diɛn, bi kɛn da̱ŋ rɛw pɛn kɔ̱k.”

¹⁵ Kä cu Pi-tɔr ɛ jiök i̱, “Lätni nɛy luɔt cäätdä nɛmɛ.”

¹⁶ Kä cuɛ wee i̱, “Amäni yɛn bä ŋuɔ̱tdɛ /kenɛ ni cop lɔɔcdun?

¹⁷ /Cia jɛ nɛn ɛn ɣöö ti diaal tin wä thok ran palkɛ jic, kä wäkɛ raar?

¹⁸ Kä tin bëë raar thok ran bäkɛ raar lɔɔc, kä kɛ kɛn tin ya̱rkɛ raan.

¹⁹ Kɛ ɣöö cär ti jiäk ti̱ti̱ bäkɛ raar lɔɔc ran, luc nath, dhöm kɛnɛ leer, kuël, nën kacä, kɛnɛ guer.

²⁰ Ti̱ti̱ kɛ kɛn tin ya̱rkɛ raan. Kä mi̱eth kɛ tet ti /ka̱n lak /cɛ raan yär.”

Jak yecu kɛ nya ciëk Kɛ-naan kä gɔaal

²¹ Kä cu Yecu jiɛɛn ɛn wi̱ni, cuɛ wä ro̱o̱l Dhor kɛnɛ Dhi-don.

²² Kä nɛnɛ, cu ciek ji̱ Kɛ-naan ben, cuɛ rɔal i̱, “A lɔcdu kɔ̱c kɛ ɣä, Kuäär ni Kuoth, Gat Dee-bid, kɛ ɣöö nyaadä tëë kɛ yiëë mi jiääk mi ci jɛ käp.”

²³ Kä /ken Yecu jɛ luɔ̱c riet. Cu ji̱ kɔaarɛ ben kä cukɛ jɛ jiök i̱, “Tuk ɛ, kɛ ɣöö rɔalɛ kɔɔran.”

²⁴ Cuɛ jɛ loc i̱, “Ca ɣä ja̱k kɛ kui̱ deet ti ci bath dhɔr I-thɛ-rɛl kärɔa.”

²⁵ Kä cu ciek rɔ ka̱m mua̱a̱l nhiamdɛ, cuɛ wee i̱, “Kuäär ni Kuoth, luäk ɣä.”

²⁶ Kä cu Yecu ɛ loc i̱, “/Cɛ gɔaa ɛn ɣöö ba mi̱eth gan ka̱n kä ba jɛ yuɔ̱r jio̱o̱k.”

²⁷ Cu ciek wee i̱, “Ɛ jɛn, Kuäär ni Kuoth, kä duundɛ ɣöö cäŋɛ kɛn jio̱o̱k camkɛ tin la pɛn guäth mi̱thni ji̱kiɛn.”

²⁸ Kä cu Yecu jɛ loc i̱, “Ɛ ji̱n ciek mi di̱t ŋa̱thdɛ! A jɛ la̱tkɛ kä ji̱ ce̱tkɛ mi go̱o̱ri.” Kä cu nyaadɛ gɔaa ni kä kɛɛl.

Jak Yecu ji̱ jua̱thni ti ŋuan kä gɔw

²⁹ Kä kɛ kɔrɛ cu Yecu jiɛɛn ɛn wi̱ni, cuɛ wä gekä baar Gɛ̈-lɛ-li, kä cuɛ wä wi̱i̱ pa̱a̱m, cuɛ nyuur ɛn wi̱ni.

³⁰ Kä cu bua̱n nath ti ŋuan ben kä jɛ, nööŋkɛ dua̱nyni, ŋöt, kɛnɛ ciöör, kɛ mi̱eeŋ kɛnɛ nɛy ti ŋuan kɔ̱kiɛn, kä cukɛ kɛ la̱th nhiamdɛ, kä cuɛ kɛ jakä gɔw.

³¹ Kä inɔ cu bua̱n nath ga̱a̱c ɛlɔ̱ŋ, min nɛ̈nkɛ mi̱eeŋ ruackɛ, kä jäl ŋöt kɛnɛ dua̱nyni, kä gui̱c ciöör. Kä cukɛ Kuoth I-thɛ-rɛl liak.

Mi̱i̱th bathdɔɔri da̱ŋ ŋuan

³² Kä cu Yecu jaakɛ cɔl, kä cuɛ kɛ jiök i̱, “Go̱o̱r lɔcdä luäk bunä mɛmɛ, kɛ ɣöö cikɛ tekɛ ɣä kɛɛl kɛ ni̱n da̱ŋ diɔ̱k kä thilɛ mi ci kɛn ɛ cam. /Cä jɛ go̱o̱r ɛn ɣöö bäkɛ jakä wä a näk buɔthkɛ, kä dɔ̱ŋ dee kɛ wä muɔn dup.”

³³ Kä cu ji̱ kɔaarɛ jɛ jiök i̱, “Banɛ mi̱eth mi ro̱ŋ kɛ buɔ̱n ɛ di̱i̱t ɛmɛ jek nikä rɛy dɔaar?”

³⁴ Kä cu Yecu kɛ thiec i̱, “Ta̱yɛ kɛ jurayni da̱ŋ di?” Cukɛ wee i̱, “Ta̱kɔ kɛ jurayni da̱ŋ bärɔw kɛnɛ rɛc ti tɔt ti nyin tiɛtni.”

³⁵ Kä cuɛ buɔ̱n nath jak kä nyuur piny,

³⁶ kä cuɛ jurayni da̱ŋ bärɔw kɛnɛ rɛc ka̱n, kä kɛ kɔr kä mëë cɛ Kuoth la̱r tɛ̈th lɔaac, cuɛ kɛ puɔ̱ny, kä cuɛ kɛ thöp ji̱ kɔaarɛ, kä cu ji̱ kɔaarɛ kɛ dääk kä bua̱n nath.

³⁷ Kä cu kɛn diaal mi̱th a cukɛ ria̱ŋ, Kä cukɛ duɔthkiɛn kuany a cukɛ diënyni da̱ŋ bärɔw thiäŋ.

³⁸ Kä pek wutni tin ci mi̱th kɛ bathdɔɔri da̱ŋ ŋuan, a /ci män kɛnɛ gaat te thi̱n.

³⁹ Kä kɛ kɔr kä min cɛ naath jak kä däk piny, cuɛ wä rɛy ria̱a̱y, kä cuɛ wä ro̱o̱l Ma-ga-dan.