Mɛ̈t 14 - RUAC KUƆTH IN RƐL RƆ

Lia̱a̱ Jɔ̱ɔ̱n in la lääk

¹ Ɛn guäth ɛmɔ cu kuäär ni Ɣɛ-rod kɛ̈k Yecu liŋ,

² kä cuɛ la̱a̱tkɛ jiök i̱, “Mɛmɛ ɛ jɛn Jɔ̱ɔ̱n in la lääk ca jɛ jiɛc li̱th. Kɛ kui̱c ɛmɔ lät luäŋ ti̱ti̱ kä jɛ.”

³ Kɛ ɣöö ci Ɣɛ-rod Jɔ̱ɔ̱n käp, kä cɛ jɛ yian, a tëë dueel yieenä, kɛ kui̱ Ɣɛ-ro-diäth in la ciek däman ni Pi-lip,

⁴ kɛ ɣöö ci Jɔ̱ɔ̱n ɛ jiök i̱, “/Ciɛ cuɔ̱ɔ̱ŋ ɛn ɣöö deri Ɣɛ-ro-diäth kuɛn.”

⁵ Cu Ɣɛ-rod ɛ go̱o̱ri derɛ jɛ näk, duundɛ ɣöö cuɛ dual kɛ buɔ̱n nath, kɛ ɣöö cɔalkɛ Jɔ̱ɔ̱n i̱ ɛ gök.

⁶ Kä mëë ci cäŋ ti̱mkä däpkä Ɣɛ-rod cop, cu nya Ɣɛ-ro-diäth duth nhiam nath, kä cu lɔc Ɣɛ-rod tɛɛth

⁷ ɛlɔ̱ŋ a bɛ rɔ yac ɛn ɣöö bɛ jɛ ka̱m mɔ bɛ thiec ɔ.

⁸ Kä kɛ ruac man cuɛ wee i̱, “Ka̱mɛ ɣä wi̱c Jɔ̱ɔ̱n wanɛ mɛ rɛy thaak.”

⁹ Kä cu lɔc kua̱r jiath, kä kɛ ɣöö cɛ ruac lar kɛnɛ kui̱ ja̱a̱li cuɛ jɛ la̱r la̱a̱t i̱ ba jɛ ka̱m jɛ.

¹⁰ Cuɛ ruac ja̱k kɛ ɣöö ba wi̱c Jɔ̱ɔ̱n tɛm dueel yieenä.

¹¹ Kä cua wi̱c Jɔ̱ɔ̱n nööŋ kɛ thak, cua jɛ ka̱m nyal, kä cuɛ jɛ nöŋ man.

¹² Cu ji̱ kɔaarɛ ben cua puɔ̱nydɛ wä kony. Kä cukɛ jɛ wä la̱r Yecu.

Mi̱i̱th bathdɔɔri da̱ŋ dhieec

¹³ Täämɛ mëë ci Yecu mɛmɛ liŋ kɛ kui̱ Jɔ̱ɔ̱n, cuɛ jiɛɛn ɛn wi̱ni cuɛ wä rɛy ria̱a̱y cuɛ wä guäthdɛ kärɔa. Kä mëë ci bua̱n nath gua̱a̱th ëë te Yecu thi̱n liŋ, cukɛ jɛ guɔ̱ɔ̱r kɛ ciök wi̱c.

¹⁴ Kä min wëë raar thok waath, cuɛ buɔ̱n mi di̱i̱t nɛn, kä cu lɔcdɛ luäkdiɛn go̱r, kä cuɛ ji̱ jua̱thnikiɛn jakä gɔw.

¹⁵ Mëë ci ɣɔw a thiaŋ, cu ji̱ kɔaarɛ ben kä Jɛ, cukɛ wee i̱, “Gua̱a̱th ɛmɛ ɛ dɔr, kä ci cäŋ kony, jakni naath kä wä wi̱c, kɛ ɣöö bikɛ rɔ̱ wä kök mi̱th.”

¹⁶ Kä cu Yecu kɛ jiök i̱, “/A kɛ /ci jiɛy, yɛn muɔcɛ kɛ kɛ mi ba cam.”

¹⁷ Kä cukɛ jɛ jiök i̱, “Kɔn ta̱kɔ kɛ jurayni da̱ŋ dhieec kɛ rɛc da̱ŋ rɛw kärɔ̱.”

¹⁸ Kä cuɛ wee i̱, “Nöŋɛ kɛ ɣä wanɛ mɛ.”

¹⁹ Kä cuɛ bua̱n jakä nyuur wi̱i̱ juaacni. Kä mëë cɛ jurayni da̱ŋ dhieec kɛnɛ rɛc da̱ŋ rɛw ka̱n, cuɛ nhial liɛc, kä cuɛ kɛ poth. Cuɛ kɛ puɔ̱ny, kä cuɛ kɛ ka̱m ji̱ kɔaarɛ, kä cu ji̱ kɔaarɛ kɛ dääk kä bua̱n nath.

²⁰ Kä cu kɛn diaal mi̱th a cukɛ ria̱ŋ. Kä cukɛ duɔthkiɛn kuany, a cukɛ diënyni da̱ŋ wäl wi̱cdɛ rɛw thiäŋ.

²¹ Kä ce̱t pek nɛɛni tin ci mi̱th kɛ wutni ti bathdɔɔri da̱ŋ dhieec, a /ci män kɛnɛ gaat te thi̱n.

Ja̱l Yecu wi̱i̱ pi̱i̱ni

²² Kä cu Yecu ji̱ kɔaarɛ jakä wä rɛy ria̱a̱y kɛ ɣöö bikɛ wä nhiam kui̱ci, kä cuɛ naath jakä däk piny.

²³ Mëë cɛ naath jakä jiɛy, cuɛ wä wi̱i̱ pa̱a̱m kärɔa wëë pal. Mëë ci ɣɔw a thiaŋ, tëë wi̱ni kärɔa.

²⁴ Kä ɛn guäth ɛmɔ na̱n riey kɛ raar, kä yɔ̱a̱kɛ jɛ ɛ muaŋ, kɛ ɣöö luɔr kɛ ni jiɔam.

²⁵ Mëë ŋot ɣɔw /kenɛ ni baak, cu Yecu ben kä kɛ, a jälɛ wi̱i̱ pi̱i̱ni.

²⁶ Kä mëë ci ji̱ kɔaarɛ jɛ nɛn jälɛ wi̱i̱ pi̱i̱ni, cukɛ dual ɛlɔ̱ŋ, wäkɛ i̱, “Ɛ jɔak!” Kä cukɛ wiee kɛ dual.

²⁷ Kä niɛ guäth ɛmɔ cu Yecu kɛ jiök i̱, “A lo̱ckun bum, ɛ ɣän, /cuarɛ dual.”

²⁸ Cu Pi-tɔr jɛ loc i̱, “Kuäär ni Kuoth, mi ɛ ji̱n puɔ̱nydu, cɔl ɣä bä ben kä ji̱ wi̱i̱ pi̱i̱ni.”

²⁹ Kä cuɛ jɛ jiök i̱, “Bër.” Kä inɔ, cu Pi-tɔr wä raar rɛy ria̱a̱y, cuɛ ja̱l wi̱i̱ pi̱i̱ni, wëë kä Yecu.

³⁰ Kä mëë cɛ jiɔam nɛn cɛ di̱t, cuɛ dual, kä cuɛ jɛ tok kɛ mi di̱ŋɛ cuɛ ciöt i̱, “Kuäär ni Kuoth, luäk ɣä!”

³¹ Niɛ guäth ɛmɔ cu Yecu tetdɛ riny, kä cuɛ jɛ käp wëë i̱, “Ji̱n ram mi kuiy ŋa̱thdɛ, ɛŋu ti̱i̱ kɛ diw ɔ?”

³² Mëë cikɛ wä rɛy ria̱a̱y, cu jiɔam cuɔ̱ŋ.

³³ Cu nɛy tin te rɛy ria̱a̱y jɛ pal, wäkɛ i̱, “Ɛ ji̱n Gat Kuɔth ɛpuc.”

Jak Yecu raan kä gɔaa kä Gɛ-nɛ-tha-rɛt

³⁴ Mëë cikɛ cop kui̱ci, cukɛ käny raar kä Gɛ-nɛ-tha-rɛt.

³⁵ Kä mëë ci ji̱ dhɔaar ɛmɔ jɛ ŋic, cukɛ ruac jäk kä rɛy rööl ɛmɔ kɛɛliw, kä cukɛ jɛ nöŋ ji̱ jua̱thni diaal.

³⁶ Kä cukɛ jɛ läŋ kɛ ɣöö deekɛ thiap ni thok bieydɛ kärɔa. Kä cu nɛy diaal tëë ca jɛ thiap gɔw.