Mɛ̈t 13 - RUAC KUƆTH IN RƐL RƆ

Cäätni kɛ kui̱ pi̱thä

¹ Kɛ jɛn cäŋ ɛmɔ cu Yecu wä raar dueel, cuɛ wä nyuur gekä baar.

² Kä cu bua̱n nath ti ŋuan wä kä jɛ. Kä cuɛ wä rɛy ria̱a̱y, kä cuɛ nyuur thi̱n, kä cu buɔ̱n kɛɛliw cuɔ̱ŋ wi̱i̱ po̱mä.

³ Kä cu Yecu kɛ la̱t ŋɔaani ti ŋuan kɛ cäätni, wëë i̱, “Cu pi̱i̱th wä pi̱eth a kithɛ kuay.

⁴ Min pi̱thɛ cu tha̱a̱ŋ kuayni pɛn dup kä cu diit kɛ ben cam.

⁵ Kä cu tha̱a̱ŋkiɛn pɛn guäth päämni mi thil mun mi di̱i̱t, cukɛ mal do̱ny kɛ ɣöö kuiy mundɛ.

⁶ Kä mëë ci cäŋ lɛ̈p cukɛ rɔɔl, kä cukɛ kööt, kɛ ɣöö thilɛ kɛ mɛy ti gɔw.

⁷ Cu tha̱a̱ŋkiɛn pɛn rɛy jiɛn kuiyni, kä mëë ci jiɛn piith, cua kɛ miɛt.

⁸ Cu tha̱a̱ŋkiɛn pɛn muun mi gɔaa, kä cukɛ tekɛ wuɔ̱th ti gɔw cu tha̱a̱ŋkiɛn rɔ̱ rep nikä kuɔ̱r, kä cu tin kɔ̱ŋ rɔ̱ rep nikɛ jiɛn bäkɛl, kä cu tha̱a̱ŋkiɛn rɔ̱ rep nikɛ jiɛn diɔ̱k.

⁹ Ram mi tekɛ ji̱th a jɛ li̱ŋ!”

Luɔt cäätni

¹⁰ Kä cu ji̱ kɔaarɛ ben thiëckɛ jɛ wäkɛ i̱, “Ɛŋu ruaci kɛ kɛ, kɛ cäätni mɔ?”

¹¹ Kä cuɛ kɛ loc i̱, “Cä mɛmɛ ka̱m yɛ ɛn ɣöö bia tɛ̱̈ɛ̱̈ni kuäärä nhial ŋa̱c, kä /ka̱n jɛ ka̱m kɛ.

¹² Kɛ ɣöö ram mi tekɛ duɔ̱ɔ̱r ba nyinkɛ rep, kä bikɛ ŋuan, kä ram mi thil ŋu ba mi tɔt mi tekɛ jɛ woc.

¹³ Ɛ jɛn luɔt kä min ruacä kɛ kɛ, kɛ cäätni, ɛ ɣöö cäŋ gui̱ckɛ, /cikɛ nɛn, kä cäŋ li̱ŋkɛ, /cikɛ li̱ŋ, kä /cɛ cup lɔɔcdiɛn.

¹⁴ Cu ruac go̱kä ni I-ca-yaa a thuɔ̱k kä kɛ, mëë wëë i̱, ‘Bi yɛn ɛ dhil kɛ li̱eŋ, kä /cia luɔtdɛ bi met jek. Kä bia dhil guic, kä /cia bi met nën.

¹⁵ Kɛ ɣöö te ni dɔ̱ɔ̱r lɔɔc nɛɛni ti̱ti̱, kä ji̱thkiɛn cikɛ li̱ŋ agɔaa, kä cikɛ nyinkiɛn kum, kɛ ɣöö /cikɛ dee gui̱c kɛ kɛ nyinkiɛn, kä /cikɛ dee lɛ liɛŋ kɛ ji̱thkiɛn, kä cɛ dee lɛ cop lo̱cnikiɛn, a dee kɛ rɔ̱ riet ɣä, a bäkɛ jakä gɔw.’

¹⁶ Kä ca wäŋkun poth, kɛ ɣöö gui̱ckɛ, kä ca ji̱thkun poth, kɛ ɣöö li̱ŋkɛ.

¹⁷ Ɛpuc, ɣän la̱rä jɛ yɛ, ci göök ti ŋuan kɛnɛ ji̱ cuŋni jɛ go̱r ɛn ɣöö ba min ci yɛn ɛ nɛn guic, kä /ken kɛn ɛ nɛn, kä görkɛ li̱eŋ kä min liɛŋɛ, kä /ken kɛn ɛ liŋ.

Lät Yecu ji̱ kɔaarɛ luɔt cäätdä pi̱thä

¹⁸ “Kä inɔ, liɛŋɛ cäät pi̱i̱thä agɔaa.

¹⁹ Mi ci raan ruac kuäärä Kuɔth liŋ, kä /kenɛ cop lɔɔcdɛ, bi gua̱n jiäkni ben, bɛ min ca piɛth lɔɔcdɛ ben pɛc. Mɔmɔ ce̱tdɛ kɛ kuay tin ca piɛth dup.

²⁰ Kä kɛ kui̱ kä tin ca piɛth guäth päämni, ɛ jɛn ram min ci ruac liŋ, kä cɛ jɛ mal nhɔk kɛ tɛ̈th lɔaac.

²¹ Jɛn ram ɛmɔ ce̱tdɛ kɛ beel mi thil mɛy, kä bɛ li̱p thi̱n kɛ gua̱a̱th mi tɔt, kä mi bä ti bɛc bɛc kɛnɛ riɛk kɛ kui̱ ruac Kuɔth, niɛ guäth ɛmɔ bi ruac Kuɔth jiɛɛn kä jɛn ram ɛmɔ.

²² Kä kɛ kui̱ kä tin ca piɛth rɛy jiɛn kuiyni ce̱tkɛ kɛ ram mi liŋ ruac, kä miɛtkɛ ruac Kuɔth in tekɛ jɛ ɛ gör nyinä ɣɔaa kɛnɛ tɛth lɔaac riäŋä, kä thilɛ jɛ dɛy.

²³ Kä kɛ kui̱ kä tin ca piɛth muun mi gɔaa, ce̱tkɛ kɛ ram mi liŋ ruac kä jekɛ jɛ kɛ lɔcdɛ, jɛn tëë kɛ dɛy ti gɔw kä kuiirɛ dɛy ti kuɔ̱r, kä kɛ gua̱a̱th in dɔ̱ŋ kuiirɛ dɛy ti jiɛn bäkɛl, kɛ gua̱a̱th in dɔ̱ŋ kuiirɛ dɛy ti jiɛn diɔ̱k.”

Cäät juɔl rɛy bɛɛl

²⁴ Kä cu Yecu kɛ la̱t ruac cäätdä dɔ̱diɛn wëë i̱, “Ce̱t ciaŋ kuäärä nhial kɛ ram mi ci kuay ti gɔw piɛth kakädɛ,

²⁵ kä mëë te naath ni̱n, cu gua̱n tɛ̈rɛ ben, cuɛ jol ben piɛth rɛy bɛɛl, kä cuɛ jiɛɛn.

²⁶ Kä inɔ, mëë ci bɛl do̱ny a cikɛ jua̱k, cu jol päl bä.

²⁷ Kä cu nɛy tin lät kɛ gua̱n ciëŋ ben, cukɛ jɛ thiec i̱, ‘Kuäär, /keni piɛth ni kuay ti gɔw rɛy kakädu? Kä jol ɛmɛ bëë nikä?’

²⁸ Cuɛ kɛ loc i̱, ‘Ɛ gua̱n tɛ̈r ɛnɔ ci mɔmɔ la̱t ɔ.’ Kä cu ji̱ läätdä jɛ jiök i̱, ‘Go̱o̱ri jɛ ɛn ɣöö bakɔ wä bakɔ jol wä pur?’

²⁹ Kä cuɛ wee i̱, ‘Ëëy, mi wiaa jol wä pur bia ciök bɛɛl pur kɛ kɛ kɛɛl.

³⁰ A kɛn diaal pith kɛɛl amäni gua̱a̱th ŋër. Kä mi wä gua̱a̱th ŋër cop, bä ji̱ ŋër jiök i̱, “Kɔanɛ ka̱m ni jol raar kä yianɛ jɛ tuɔthni, kɛ ɣöö ba jɛ waŋ, kä duɔlɛ bɛl luaakdä.” ’ ”

Cäät kuaayä mi tɔt

³¹ Kä cu Yecu ruac cäätdä dɔ̱diɛn la̱t kɛ, wëë i̱, “Ce̱t ciaŋ kuäärä nhial kɛ kuɛ̈ɛ̈ mi tɔt mi ci raan ɛ ka̱n, kä cuɛ jɛ piɛth rɛy kakädɛ.

³² Ɛ kuɛ̈ɛ̈ in kuiy ni jɛn kä kuay diaal, kä mëë cɛ piith, cu di̱t ni jɛn kä juaac diaal kä cua jiath, kɛ ɣöö bi diit duëlkiɛn la̱t nɔa̱a̱knikɛ.”

Cäät thopä

³³ Cuɛ kɛ lɛ la̱t cäät dɔ̱diɛn i̱, “Ce̱t ciaŋ kuäärä nhial kɛ thuɔp, mi ci ciek ɛ wac, kä liɔmɛ jɛ rɛy theemni nuɔ̱p da̱ŋ diɔ̱k, amäni mëë cɛ pua̱a̱r kɛɛliw.”

Luɔt ruac Yecu kɛ cäätni

³⁴ Cu Yecu ti̱ti̱ diaal la̱t naath kɛ cäätni, thilɛ mi lätdɛ kɛ a thil cäät.

³⁵ Ɛn nɛmɛ ɛ ɣöö bi mëë ca lar ɛ gök a thuɔ̱k i̱, “Ɣän bä thokdä lɛp kɛ ɣöö bä ruac kɛ cäätni, kä bä tëë ca tɛ̱̈ɛ̱̈ ni tukä ɣɔaa nyoth.”

Lat Yecu kɛ luɔt cäätdä juɔl rɛy bɛɛl

³⁶ Kä cu Yecu buɔ̱n ba̱ny piny, cuɛ wä dueel. Kä cu ji̱ kɔaarɛ ben kä jɛ, cukɛ wee i̱, “Lätni kɔ luɔt cäätdä juɔl rɛy kakä.”

³⁷ Cuɛ kɛ loc i̱, “Ram mi piith kuay ti gɔw ɛ jɛn Gat Ran.

³⁸ Kä kak ɛ jɛn ɣɔw, kä kuay ti gɔw kɛ kɛn gaat kuäärä nhial. Kä jol kɛ kɛn gaat gua̱n jiäkni.

³⁹ Kä gua̱n tɛ̈r in ci jol pith ɛ jɛn gua̱n jiäkni. Kä gua̱a̱th ŋër ɛ jɛn guut ɣɔaa, kä ji̱ ŋër kɛ kɛn ja̱a̱k Kuɔth nhial.

⁴⁰ Ce̱tkɛ min la jol a duɔlkɛ kä waŋkɛ jɛ kɛ mac, bɛ te inɔ guutdä ɣɔaa.

⁴¹ Bi Gat Ran ja̱a̱kɛ ja̱k, kä bikɛ ŋɔak diaal tin nööŋkɛ duer kuany raar cieŋ kuäärädɛ kɛnɛ la̱a̱t dueeri diaal,

⁴² kä ba kɛ yuɔr maac. Ɛn wi̱ni bɛ tekɛ lul kɛnɛ muɔ̱th lɛc.

⁴³ Kä bi ji̱ cuŋni ku buay ce̱tkɛ cäŋ rɛy kuäärä Gua̱ndiɛn in te nhial. Ram mi tekɛ ji̱th a jɛ li̱ŋ!”

Cäät yio̱o̱ni ti ca tɛ̱̈ɛ̱̈

⁴⁴ “Ce̱t ciaŋ kuäärä nhial kɛ yio̱w ti ca tɛ̱̈ɛ̱̈ rɛy kakä. Kä mëë ci raan kɛ jek, cuɛ kɛ nyɔk kɛ mol piny, kä kɛ tɛ̈th lɔaacdɛ cuɛ wä wëë nyinkɛ diaal kɔak, kɛ ɣöö bɛ kak kɔk.”

Cäät dɔ̱a̱kni

⁴⁵ “Kä ce̱t ciaŋ kuäärä nhial kɛ gua̱n ko̱kä mi go̱o̱r dɔ̱a̱kni ti wiɛc wiɛɛc.

⁴⁶ Kä mëë cɛ dɔ̱k kɛl mi wi̱c wi̱c mi di̱t kökdɛ jek, cuɛ wä, cuɛ nyinkɛ diaal wä kɔak, kä cuɛ jɛ ben kɔk.”

Cäät cambakä

⁴⁷ “Kä ce̱t ciaŋ kuäärä nhial kɛ cambak mi ca yuɔr yieer, kä kääpɛ rɛc diaal ti gööl.

⁴⁸ Kä mëë cɛ thia̱a̱ŋ, cu naath ɛ yɔ̱a̱c thok waath, cukɛ nyuur liɛnykɛ rɛc tin gɔw rɛy diënyni, kä ya̱kɛ tin jiäk.

⁴⁹ Kä bɛ te inɔ cäŋ guutdä ɣɔaa. Bi ja̱a̱k nhial ben, ba ji̱ dueeri ben da̱a̱k kɛnɛ ji̱ cuŋni,

⁵⁰ kä ba ji̱ dueeri yuɔr maac. Ɛn wi̱ni bɛ tekɛ lul kɛnɛ muɔ̱th lɛc.”

Thuɔ̱k mi pay tuɔɔk kɛnɛ mëë wal

⁵¹ Kä cu yecu ji̱ kɔaarɛ thiec i̱, “Ci mɛmɛ kɛɛliw cop lɔcdun?” Cukɛ jɛ loc i̱, “Cɛ cop lɔɔcda.”

⁵² Kä cuɛ kɛ jiök i̱, “Kɛ kui̱ ɛmɔ ce̱t gɔ̱ɔ̱r, min ca ŋi̱eec kɛ nyin kuäärä nhial kɛ gua̱n ciëŋ mi käm mi pay nööŋ kiɛ mi dɔaaŋ raar rɛy kuaknikɛ.”

Lo̱k Yecu kä Na-dha-rɛth

⁵³ Mëë ci Yecu thuɔ̱k kɛ lat cäätni ti̱ti̱ cuɛ jiɛɛn.

⁵⁴ Cuɛ ben wi̱i̱diɛn, cuɛ naath tok kɛ ŋi̱i̱c guäth palädiɛn, kä cukɛ ga̱a̱c ɛlɔ̱ŋ, cukɛ wee i̱, “Ci wut ɛmɛ pɛl ɛmɛ kɛnɛ lät ti buɔ̱m buɔ̱ɔ̱m ti̱ti̱ jek nikä?

⁵⁵ /Ciɛ jɛn gat ŋäätdä jiɛn? Kä /ca man cɔl i̱ Mɛri? Kä dämani cikɛ Je-mɛth kɛnɛ Jo-thɛp, kɛ Thay-mɔn kɛnɛ Ju-däth?

⁵⁶ Kä /ci nyimani diaal tekɛ kɔn kɛɛl? Kä ku wut ɛmɛ mɛmɛ lɛ jek nikä?”

⁵⁷ Kä cu kɛn Yecu cu lo̱k. Kä cu Yecu kɛ jiök i̱, “Luɔ̱thkɛ gök gua̱thni diaal, ɛ ni wecdiɛn lökɛ jɛ thi̱n ɔ ɛ nɛɛkɛ pa̱ny.”

⁵⁸ Kä /kenɛ lät ti buɔ̱m buɔ̱ɔ̱m ti ŋuan la̱t ɛn wi̱ni, kɛ kui̱ thil ŋäthädiɛn.