Mɛ̈t 12 - RUAC KUƆTH IN RƐL RƆ

Gɔny ji̱ Pa-ri-thii kɛ Yecu kɛ to̱l ŋuɔ̱tni ca̱ŋ lɔ̱ŋä

¹ Kä ɛn ni̱ni tɔ̱tɔ̱ cu Yecu rët kɛ rɛy ka̱a̱kni bɛɛl kɛ cäŋ lɔ̱ŋä. Kä näk buɔth ji̱ kɔaarɛ, kä cukɛ jɛ tok kɛ to̱li wuɔ̱thni bɛɛl, kä muanykɛ kɛ.

² Kä mëë ci ji̱ Pa-ri-thii ɛ nɛn, cukɛ Yecu jiök i̱, “Guic jaaku, la̱tkɛ mi /ci rɔ lot kɛ cäŋ lɔ̱ŋä.”

³ Kä cuɛ kɛ jiök i̱, “/Ka̱nɛ mëë ci Dee-bid ɛ la̱t kuɛn, mëë ci buɔth ɛ näk kɛnɛ nɛy tëë tekɛ jɛ kɛɛl?

⁴ Cuɛ wä rɛy luaak Kuɔth cuɛ juray nhiam Kuɔth cam, min /ci ro̱ŋ kɛ ɣöö derɛ jɛ cam, kɛnɛ nɛy tin jäl kɛ jɛ kɛɛl, ɛ ni bööth palä kärɔ dee jɛ cam ɔ.

⁵ Kiɛ /ka̱nɛ jɛ kuɛn rɛy ŋuɔ̱tni Muthɛ, ɛn ɣöö kɛ cäŋ lɔ̱ŋä cu bööth palä rɛy luaak Kuɔth cäŋ lɔ̱ŋä ya̱r, kä thilɛ kɛ duer?

⁶ Kä ɣän la̱rä jɛ yɛ, duɔ̱ɔ̱r mi di̱t ni jɛn kä luaak Kuɔth a wa̱nɛ.

⁷ Duŋ mi ŋa̱cɛ luɔt kä mɛmɛ i̱, ‘Ɣän göörä ni kɔ̱a̱c lɔaac, a /ci mɔ a muc,’ /cia nɛy ti thil duer dee kuɛth.

⁸ Kɛ ɣöö Gat Ran ɛ kuäär ca̱ŋ lɔ̱ŋä.”

Jak Yecu kɛ tet raam mi cɛ niŋ kä gɔaa

⁹ Kä cu Yecu gua̱a̱th ɛmɔ ba̱ny piny. Cuɛ wä guäth palädiɛn.

¹⁰ Kä nɛnɛ, tëë kɛ wut mi cɛ tetdɛ niŋ. Kä cukɛ jɛ thiec i̱, “Ɛ ŋuɔ̱t ɛn ɣöö ba raan jakä gɔaa kɛ cäŋ lɔ̱ŋä?” Kɛ ɣöö dee kɛ jɛ gɔany.

¹¹ Kä cu Yecu kɛ jiök i̱, “Ɛŋadun mi tekɛ rɔam kɛl mi ci pɛn rɛy jiɛw kɛ cäŋ lɔ̱ŋä, /cɛ jɛ dee ka̱m raar?

¹² Kä raan lenyɛ rɔam kɛ pek mi ni̱n di? Kä inɔ lotdɛ rɔ ɛn ɣöö ba mi gɔaa la̱t kɛ cäŋ lɔ̱ŋä.”

¹³ Kä cuɛ wut jiök i̱, “Ri̱c tetdu.” Kä cu wut ɛ ri̱c, kä cuɛ cu gɔaa, kä cuɛ pa̱a̱r kɛ tet in dɔ̱ŋ.

¹⁴ Kä cu ji̱ Pa-ri-thii wä raar, kä mat kɛ rɔ̱ kɛ kui̱dɛ i̱ ba jɛ näk.

Yecu ɛ läät Kuɔth mi cɛ mɛk

¹⁵ Kä mëë ci Yecu mɛmɛ ŋa̱c, cuɛ jiɛɛn ɛn wi̱ni. Kä cu nɛy ti ŋuan ɛ guɔ̱ɔ̱r, kä cuɛ kɛn diaal jakä gɔw.

¹⁶ Kä cuɛ kɛ gok, i̱ /ca jɛ bi jakä ŋa̱ckɛ.

¹⁷ Mɛmɛ ɛ ɣöö bɛ mëë ca lar ɛ gök ni I-ca-yaa jakä thuɔ̱k i̱,

¹⁸ “Mɛmɛ ɛ läätdä mi cä mɛk, nho̱o̱kdä min tɛɛth lɔcdä. Ɣän bä Yiëëdä kuëŋ kä jɛ, kä jɛn bɛ ji̱ Ɣɔaa la̱t cuɔ̱ɔ̱ŋ.

¹⁹ Jɛn /cɛ bi gaak, kä /cɛ bi wiee, kä thilɛ ram mi bi jɔwdɛ liŋ rɛy duɔ̱pni.

²⁰ Jɛn /cɛ ruɔ̱ɔ̱r mi ca duany bi töl, kä /cɛ mac mi wee lia̱a̱ bi yieny, amäni mi cɛ cuɔ̱ɔ̱ŋ jakä tiäm.

²¹ Kä kɛ ciötdɛ bi ji̱ Ɣɔaa ŋa̱th.”

Buɔ̱m Yecu bëë kä Beel-dhi-bul

²² Kä cua ram mi cɔr mi cɛ di̱w, mi tekɛ yiëë mi jiääk nöŋ Yecu, kä cuɛ jɛ jakä gɔaa. Kä inɔ cu ram in cɛ di̱w ruac kä cuɛ gui̱c.

²³ Kä cu nɛy diaal ga̱a̱c ɛlɔ̱ŋ, kä cukɛ wee i̱, “Ɛn nɛmɛ derɛ a Gat Dee-bid?”

²⁴ Kä mëë ci ji̱ Pa-ri-thii jɛ liŋ, cukɛ wee i̱, “Ɛ ni lua̱ŋ Beel-dhi-bul, kuäär kuthni tin jiäk, ɛnɔ tuk wut ɛmɛ jɛ ni kuth ti jiäk raar ɔ.”

²⁵ Kɛ ɣöö ŋäcɛ ca̱riɛn cuɛ wee i̱, “Kä röl diaal tin da̱a̱kɛ rɔ̱ bakɛ däk, kä thilɛ wec kiɛ duel mi dääk rɔɔdɛ mi bi cuɔ̱ŋ.

²⁶ Kä mi tuk Cɛy-tan rɔɔdɛ raar, cɛ rɔɔdɛ da̱a̱k kärɔa, kä bi kuäärɛ kulɛ cuɔ̱ŋ i̱di?

²⁷ Kä mi tuɔ̱kä kuth ti jiäk raar kɛ lua̱ŋ Beel-dhi-bul ɛ buɔ̱m ŋa ɛnɔ tuɔkɛ nikɛ raar ɛ gaatkun ɔ? Kɛ kui̱c ɛmɔ kɛn bikɛ a ji̱ luɔ̱kdun.

²⁸ Kä mi ɛ lua̱ŋ Yieekä Kuɔth ɛnɔ tuɔ̱kä ni kuth ti jiäk raar ɔ, ci kuäär Kuɔth ben kä yɛ.

²⁹ Kä dee raan coth dueel wutdä mi bum bum, kɛ ɣöö bɛ nyinkɛ ka̱n i̱di, mi /kenɛ wut in bum bum kɔŋ yian? Kä ɛ jɛn dëë nyinkɛ kulɛ ka̱n ɔ.

³⁰ Ram mi /ci te kɛɛl kɛ ɣä lo̱kɛ ɣä, kä ram mi /ci ɣä luäk kɛ ma̱t nath jɛn riawɛ ni naath.

³¹ Kɛ kui̱ ɛmɔ ɣän la̱rä jɛ yɛ, dueer diaal kɛnɛ kueth ni Kuɔth ba naath pälikä thi̱n, kä ram mi kueth ni Yiëë Kuɔth /ca jɛ bi pälikä.

³² Kä ram mi ruac a jiäk kɛ Gat Ran ba jɛ pälikä, kä ram mi ruac a jiäk kɛ Yiëë in Gɔaa in Rɛl Rɔ /ca jɛ bi pälikä, ɛn täämɛ kiɛ amäni cäŋ kɛl.”

Jiath kɛnɛ dɛykɛ

³³ “Jakɛ jiath kä gɔaa kɛnɛ dɛykɛ, kiɛ jakɛ jiath kä jiäk kɛnɛ dɛykɛ, kɛ ɣöö jiath ŋa̱ckɛ jɛ kɛ dɛykɛ.

³⁴ Yɛn dɛy thɔ̱ɔ̱li! Dërɛ ruac agɔaa i̱di, mi lapɛ ji̱ jiäkni? Kɛ ɣöö mi te lɔc ran kɛ duɔ̱ɔ̱r, lat thokdɛ jɛ.

³⁵ Kä ram mi gɔaa bɛ ti gɔw nööŋ raar rɛy cärä lɔaacdɛ mi gɔaa. Kä ram mi jiääk bɛ ti jiäk nööŋ raar rɛy cärä lɔaacdɛ mi jiääk.

³⁶ Ɣän la̱rä jɛ yɛ kɛ cäŋ luɔ̱k ba naath thiec kɛ rieetkun diaal tëë ca lat baaŋä.

³⁷ Kɛ ɣöö ba ji̱ moc cuɔ̱ɔ̱ŋ kɛ rieetku, kä ba ji̱ moc duer kɛ rieetku.”

Gör nyuuthä mi gääy naath

³⁸ Kä cu tha̱a̱ŋ ji̱ gɔ̱rä kɛnɛ ji̱ Pa-ri-thii jɛ jiök i̱, “Ŋi̱i̱c, görkɔ ɣöö bakɔ nyuuth nɛn kä ji̱.”

³⁹ Kä cuɛ kɛ loc i̱, “Ri̱c mi jiääk mi thil Kuoth go̱o̱ri ni nyuuth, kä thilɛ mi ba lät kä jɛ ɛ ni nyuuth go̱kä ni Jona.

⁴⁰ Ce̱tkɛ mëë te Jona jic rɛ̱̈c mi di̱i̱t kɛ ni̱n da̱ŋ diɔ̱k, bi Gat Ran tekɛ ni̱n da̱ŋ diɔ̱k piny.

⁴¹ Kä ji̱ Ni-nɛ-be bikɛ rɔ̱ jiɛc kɛ cäŋ luɔ̱k kɛ jɛn ri̱c ɛmɛ kɛɛl, kä bikɛ jɛ moc duer kɛ ɣöö cikɛ rɔ̱ ri̱t kɛ la̱t Jona kɛ ruac Kuɔth, kä nɛnɛ, mi di̱t ni jɛn kä Jona a wa̱nɛ.

⁴² Kä bi kuäär ciek mi bëë kui̱c cuëëc rɔ jiɛc kɛ jɛn ri̱c ɛmɛ kɛɛl, kä bɛ jɛ moc duer, kɛ ɣöö cɛ ben ni peek ɣɔaa bëë pɛl Thɔ-lo-mon ben liŋ. Kä nɛnɛ, mi di̱t ni jɛn kä Thɔ-lo-mon a wa̱nɛ.”

Luny yieekä mi jiääk jɔk

⁴³ “Mëë ci yiëë mi jiääk ben raar puɔ̱ny ran, cuɛ wä wi̱el rɛy dɔaar mi thil pi̱, go̱o̱rɛ gua̱a̱th mi derɛ lɔ̱ɔ̱ŋ thi̱n, kä thilɛ gua̱a̱th mi cɛ jek.

⁴⁴ Kä cu yiëë mi jiääk wee i̱, ‘Ɣän bä loc dueel ëë ba̱a̱ thi̱n.’ Kä mëë cɛ luny jɔk, cuɛ jɛ jek baaŋ a ca jɛ yiɛc, kä ca jɛ rialikä.

⁴⁵ Kä mëë, cɛ loc jɔk, cuɛ yiey da̱ŋ bärɔw ti jiäk ni kɛn kä jɛ nööŋ, kä cu kɛn diaal wä rɛc, kä cukɛ cieŋ thi̱n. Kä cu ta̱a̱ wutdä ɛmɔ ku jiääk ni jɛn kä ta̱a̱dɛ mëë nhiam. Kä bɛ te inɔ bä kɛ jɛn ri̱c ɛ jiääk ɛmɛ.”

Ciëŋ mani Yecu tin thuɔ̱ɔ̱k

⁴⁶ Kä min ŋotdɛ kɛ ruac kɛ naath, te man kɛnɛ dämani cuŋä raar, görkɛ ruac kɛ jɛ.

⁴⁷ Cu ram kɛl Yecu jiök i̱, “Nɛnɛ, muɔɔr kɛnɛ gaatmuɔɔr a cuŋä raar, görkɛ ruac kɛ ji̱.”

⁴⁸ Kä cuɛ ram in ruac kɛ jɛ loc i̱, “Maar ɛŋa? Kä dämaari kɛ ŋaani?”

⁴⁹ Kä cuɛ ji̱ kɔaarɛ nyoth kɛ tetdɛ wëë i̱, “Maar kɛnɛ dämaari ti̱n!

⁵⁰ Kɛ ɣöö ram mi lat ruac Gua̱a̱r in te nhial, ɛ jɛn dämaar, kä ɛ jɛn nyimaar, kä ɛ maar.”