Mɛ̈t 11 - RUAC KUƆTH IN RƐL RƆ

Nɛy ti ca jäk kä Yecu ɛ Jɔ̱ɔ̱n in la lääk

¹ Kä mëë ci Yecu ji̱ kɔaarɛ da̱ŋ wäl rɛw thuk kɛ lät ŋɔaani, cuɛ wä nhiam, wëë naath ŋi̱eec kä lätdɛ kɛ ruaacni kɛ rɛy wi̱i̱nikiɛn.

² Täämɛ mëë ci Jɔ̱ɔ̱n tëë lät Yecu kɛ liŋ dueel yieenä, cuɛ ruac ja̱k kɛ ji̱ kɔaarɛ,

³ wëë i̱, “Ɛ jɛn ji̱n ram in dee ben, kiɛ bakɔ radɔ̱diɛn lip?”

⁴ Kä cu Yecu kɛ loc i̱, “Wiaa la̱rɛ Jɔ̱ɔ̱n ŋɔaani tin cia liŋ kɛnɛ tin cia nɛn,

⁵ ɛn ɣöö ciöör gui̱ckɛ, kä ŋöt jälkɛ, kä ji̱ dhɔpni gɔwkɛ, kä mi̱eeŋ li̱ŋkɛ, kä ca nɛy ti ci li̱w jiɛc li̱th, kä ca thuk ti gɔw nöŋ nɛy tin can.

⁶ Puɔ̱th akɛ ram mi thil mi lo̱kɛ kä ɣä.”

⁷ Min ci ja̱a̱k Jɔ̱ɔ̱n jiɛɛn, cu Yecu ruac tok kɛ buɔ̱n kɛ kui̱ Jɔ̱ɔ̱n i̱, “Cia ŋu wä nɛn däär dɔaar? Ɛ ruɔ̱ɔ̱r mi yɔ̱k jiɔam ɛ?

⁸ Kä ɛŋu görɛ nëndɛ raar ɔ? Ɛ ɣöö bia ram mi ciɛŋ bieyni ti kɔ̱a̱c kɔa̱a̱c wä guic? Nɛnɛ, nɛy tin ciaŋkɛ bieyni ti kɔ̱a̱c kɔa̱a̱c tekɛ rɛy duëli kua̱ri ti di̱t.

⁹ Kä ɛŋu cia wä la̱t raar ɔ, ɛ ɣöö bia gök wä nɛn? Ɣɔ̱ɔ̱n, ɣän la̱rä jɛ yɛ, ɛ mi leny gök.

¹⁰ Kä nɛmɛ ɛ jɛn ram in ca nɛmɛ gɔ̱r kɛ kui̱dɛ i̱, ‘Nɛnɛ, ɣän ja̱kä jääkdä kä nhiamdu, min bi duɔ̱ɔ̱pdu rialikä nhiamdu.’

¹¹ Ɛpuc ɣän la̱rä jɛ yɛ, rɛy nɛɛni diaal tin ca dap ɛ män, thilɛ ram mi ci jɔɔc mi di̱t ni jɛn kä Jɔ̱ɔ̱n in la lääk. Kä ram mi kuiy ni jɛn kä nɛy diaal rɛy kuäärä nhial di̱t ni jɛn kä jɛ.

¹² Nikä ni̱n Jɔ̱ɔ̱n in la lääk amäni täämɛ, ci ciëŋ kuäärä nhial cuuc kɛ gak, kä ci ji̱ gak jɛ käp kɛ buɔ̱m.

¹³ Kɛ ɣöö ruaacni göökni diaal kɛnɛ ŋut cikɛ ruac kɛ kui̱ kuäärä amäni ben Jɔ̱ɔ̱n.

¹⁴ Kä mi nhɔakɛ jɛ, ɛ jɛn E-li-yaa in ɛ wa bi ben.

¹⁵ Ram mi tekɛ ji̱th, a jɛ li̱ŋ.

¹⁶ “Kä bä ri̱c ɛmɛ kulɛ pa̱a̱r kɛ ŋu? Ce̱t ri̱c ɛmɛ kɛ gaat ti nyuur guäth ko̱kä, kä cɔalkɛ ji̱ ŋarädiɛn i̱,

¹⁷ ‘Cakɔ yɛ pua̱t thom, kä /ka̱nɛ duth. Cakɔ wiee, kä /ka̱nɛ pa̱r.’

¹⁸ Kɛ ɣöö ci Jɔ̱ɔ̱n ben, /cɛ mi̱th kä /cɛ mäth, kä wäkɛ i̱, ‘Jɛn tëë kɛ kuoth mi jiääk.’

¹⁹ Kä ci Gat Ran ben mi̱thɛ kä mäthɛ, kä wäkɛ i̱, ‘Nɛnɛ, ɛ gua̱n da̱r kä ɛ yɔ̱ŋ kɔaaŋni, kä ɛ määth thuɔ̱ɔ̱li tho̱lbo̱kä kɛnɛ ji̱ dueeri.’ Kä pɛl bɛ cuɔ̱ɔ̱ŋ jek kɛ lätkɛ.”

Riɛk akɛ wi̱i̱ ti thil ŋa̱th

²⁰ Kä cuɛ jɛ tok kɛ mi ruacɛ kɛ wi̱i̱ tin cɛ ri̱w lätnikɛ tin ga̱ykɛ naath la̱t thi̱n, kɛ ɣöö /kenkɛ rɔ̱ ri̱t dueeri.

²¹ “Riɛk akɛ yɛ, yɛn ji̱ Ko-rä-dhin, kä riɛk akɛ yɛ, yɛn ji̱ Beth-the-da, kɛ ɣöö mi ca lät tin ga̱ykɛ naath la̱t rɛy Dhor kɛnɛ Dhi-don ce̱tkɛ tëë ca la̱t rɛydun, ce̱t cikɛ rɔ̱ ri̱t dueeri ni wal kɛ läth bieyni cuali kɛnɛ nyuur rɛy ŋɛthä.

²² Kä ɣän la̱rä jɛ yɛ bi gɔaa ni duŋ ji̱ Dhor kɛnɛ Dhi-don kɛ cäŋ luɔ̱k kä yɛ.

²³ Kä yɛn ji̱ Ka-pɛr-ni-äm, ɛ yɛn i̱ ba yɛ kap nhial? Ëëy ba yɛ naŋ ni piny guäth li̱eth! Kɛ ɣöö mi ca lät tin ga̱ykɛ naath la̱t rɛy Thɔ-dɔm ce̱tkɛ tëë ca la̱t rɛydun, dee kɛ ŋot thi̱n amäni wa̱lɛ.

²⁴ Kä ɣän la̱rä jɛ yɛ ɛn ɣöö bi gɔaa ni duŋ rööl Thɔ-dɔm kɛ cäŋ luɔ̱k kä ji̱.”

Bi naath lɔ̱a̱ŋ jek kɛ wädiɛn kä Yecu

²⁵ Kä cu Yecu pal wëë i̱, “Ɣän, Gua̱di̱n, Kuäär nhial kɛnɛ piny, la̱rä ji̱ tɛ̈th lɔaac ɛn ɣöö ci ŋɔaani ti̱ti̱ tëë kä nɛy tin ŋa̱ckɛ ŋɔak kɛnɛ pɛl kä cikɛ nyuɔ̱th ruɔri.

²⁶ Ɣɔ̱ɔ̱n, Gua̱di̱n, kɛ ɣöö ɛn nɛmɛ ɛ jɛn ruacdu mi duŋ gɔaa.

²⁷ Ŋɔaani diaal ca kɛ ka̱m ɣä ɛ Gua̱a̱r, kä thilɛ ram mi ŋäc Gat ɛ ni Gua̱n, kä thilɛ ram mi ŋäc Gua̱n ɛ ni Gat, kɛnɛ ram kɛl mi ci Gat ɛ nhɔk i̱ bɛ jɛ nyoth ɛ.

²⁸ Bia kä ɣä, yɛn nɛy diaal tin ci cuuc kɛ la̱t kä thiɛk ɣa̱cdun, ɣän bä yɛ moc lɔ̱a̱ŋ.

²⁹ La̱thɛ gäkdä ŋua̱knikun, kä ŋi̱eecɛ rɔ kä ɣä, kɛ ɣöö ɛ ɣän ram mi muɔ̱l muɔ̱l mi kɔ̱c lɔcdɛ, kä bia lɔ̱a̱ŋ jek kɛ kui̱ yieeynikun.

³⁰ Kɛ ɣöö gäkdä thia̱kɛ, kä ɣa̱cdä puɔlɛ.”