Mɛ̈t 10 - RUAC KUƆTH IN RƐL RƆ

Jaak Yecu da̱ŋ wäl rɛw

¹ Kä cu Yecu jaakɛ da̱ŋ wäl wi̱cdɛ rɛw cɔl, kä cuɛ kɛ moc lua̱ŋ mi bikɛ kuth tin jiäk tuɔ̱k raar kɛ jɛ, kä bikɛ liaw diaal jakä gɔw kɛnɛ jua̱th diaal.

² Ciööt jaaknikɛ da̱ŋ wäl wi̱cdɛ rɛw ti̱n, jio̱liɛn ɛ Thay-mɔn min cɔali Pi-tɔr, kɛ däman ni An-dɛ-röw, kɛ Je-mɛth, gat Dhɛ-ba-dii, kɛnɛ däman ni Jɔ̱ɔ̱n.

³ Kɛ Pi-lip kɛnɛ Bar-tho-lo-miw, kɛ Tɔ-mäth kɛnɛ Mɛ̈-thiw, min la thuul tho̱lbo̱kä, kɛ Je-mɛth gat Ɛ̈l-pi-uth, kɛ Thɛ̈-diäth.

⁴ Kɛ Thay-mɔn raan Kɛ-naan, kɛ Ju-däth Ith-kɛ̈-ri-ɔt, ram ëë ci jɛ kɔak.

Jäkni Yecu kɛ jaak da̱ŋ wäl rɛw

⁵ Cu Yecu jaak da̱ŋ wäl wi̱cdɛ rɛw ti̱ti̱ jäkä raar, kä lueekɛ kɛ i̱, “/Cuarɛ wä rɛy juri, kä /cuarɛ wä rɛy ciëëŋni ji̱ Tha-mɛ-ria,

⁶ kä wiaa kä det tin ci bath thok duëël I-thɛ-rɛl.

⁷ Kä gua̱a̱thɔ wiaa thi̱nɔ latdɛ ruac Kuɔth, kä wiaa i̱, ‘Ci ciaaŋ kuäärä nhial thia̱k.’

⁸ Jakɛ ji̱ jua̱thni kä gɔw, kä jiacɛ nɛy tin ci li̱w, jakɛ ji̱ dhɔapni kä gɔw, kä tuɔ̱kɛ kuth ti jiäk. Cia jek baaŋ, lɛnɛ jɛ muɔc baaŋ.

⁹ Thilɛ yio̱w ti bia rɔm kɛ jiɛpnikun,

¹⁰ kiɛ gök kɛ kui̱ ja̱lun, kiɛ bieyni rɛw, kiɛ wa̱a̱ri, kiɛ kɛɛt, kɛ ɣöö ji̱ läätdä bakɛ ka̱m min görkɛ.

¹¹ Kä wec kiɛ ciëŋ ɔ bia wä thi̱n ɔ, go̱r ram mi gɔaa rɛydɛ, kä kua te kɛɛl amäni mi wi̱i̱ jiɛɛn.

¹² Mi cuɔthɛ dueel, nërɛ naath.

¹³ Kä mi gɔw ji̱kɛ, a malun wä kä kɛ, kä mi /cikɛ gɔw, a malun luny kä yɛ.

¹⁴ Kä mi tëë kɛ ram mi /ci yɛ bi nyuɔ̱ɔ̱r agɔaa, kiɛ cɛ ruaacnikun bi liŋ, tɛ̈ŋɛ tur ciöknikun mi jiayɛ dueel kiɛ wec ɛmɔ.

¹⁵ Ɛpuc, ɣän la̱rä jɛ yɛ kɛ cäŋ luɔ̱k in di̱i̱t bi gɔaa ni rɛk Thɔ-dɔm kɛnɛ Go-mo-ra, kä jɛn rɛk ɛmɔ.”

Ben ciɛŋni jiäkni

¹⁶ “Kä ɣän ja̱kä yɛ kä raar ce̱tkɛ det ti rɔɔm rɛy jio̱o̱kni nyapëc, kä inɔ, a wuɔ̱thkun te cuŋä ce̱tkɛ thɔ̱ɔ̱l, kä kɔ̱a̱cɛ ce̱tkɛ guɔ̱kni.

¹⁷ Niɛkɛ rɔ̱ kɛ kɛ, kɛ ɣöö bikɛ yɛ naŋ gua̱a̱th luɔ̱k, kä bikɛ yɛ duäc rɛy gua̱thni palikiɛn,

¹⁸ kä ba yɛ yɔ̱a̱c nhiam ruëëcni kɛnɛ kua̱r kɛ kui̱dä. Kä bi nɛmɛ a ruac nenä kä kɛ kɛnɛ nhiam ji̱ ɣɔaa.

¹⁹ Mi naŋkɛ yɛ, /cuarɛ diɛɛr kɛ mi bia lat kiɛ mi bia lar, kɛ ɣöö mi bia lar ba jɛ ka̱m yɛ kɛ jɛn gua̱a̱th ɛmɔ.

²⁰ Kä kɛ ɣöö /ciɛ yɛn kɛn tin bi ruac ɔ, ɛ Yiëë Guurun ɛnɔ ruac rɛydun ɔ.

²¹ Bɛ tekɛ nɛy ti bi dämani gɔany li̱th, kɛnɛ wutni ti ba gaatkiɛn luɔm. Kä bi gaat tekɛ tɛ̈r kɛ diëëthkiɛn, kä bikɛ gua̱ni jakä li̱w.

²² Kä ba yɛ nyir ɛ nɛy diaal kɛ kui̱ cio̱tädä. Kä ba ram mi tee dhieel amäni pek teekädɛ kän.

²³ Kä mi muɔckɛ yɛ riɛk rɛy wec kɛl, barɛ rɔ̱ rɛy cieŋ in dɔ̱diɛn, kɛ ɣöö ɣän la̱rä jɛ yɛ, /cia bi wä rɛy ciëëŋni I-thɛ-rɛl diaal, a /ken Gat Ran ben.

²⁴ “Ram mi ŋi̱eeckɛ /ci di̱tni jɛn kä ram in ŋi̱i̱c jɛ, kä /ci di̱t ni raan läätdä kä kuäärɛ.

²⁵ Ro̱ŋɛ kɛ ram in ŋi̱eeckɛ ɛn ɣöö derɛ ce̱tkɛ ram in ŋi̱i̱c jɛ, kä raan läätdä ce̱tdɛ kɛ kuäärɛ. Kä mi cɔalkɛ kuäär thuɔk duëël i̱ Beel-dhi-bul, bi ba̱l ni jiääk cio̱tdä ji̱ gɔaalɛ.”

Ram in dee naath dual kɛ jɛ

²⁶ “Kä inɔ /cuarɛ dual kɛ naath, kɛ ɣöö thilɛ mi ca kum mi /ca bi nyoth, kiɛ mi ca tɛ̱̈ɛ̱̈ mi /ca bi ŋa̱c.

²⁷ Mi cä la̱t yɛ rɛy muɔ̱th, latdɛ jɛ rɛy buɔyä, kä mi cia liŋ kɛ mua̱th mua̱th, latdɛ jɛ wi̱i̱ duëël.

²⁸ Kä /cuarɛ dual kɛ nɛy tin na̱kɛ ni puɔ̱ny kä /cikɛ tiey dee näk. Kä dualɛ kɛ ram min dee tiey kɛnɛ puɔ̱ny näk guäth maac in thil pek.

²⁹ /Ca kɛc da̱ŋ rɛw kɔk kɛ tarip? Kä thilɛ kɛl kä kɛ mi dee li̱w a kui̱c Guurun ɛ.

³⁰ A cäŋɛ ni mi̱em wuɔ̱thnikun diaal ca kɛ kuɛn.

³¹ Kɛ kui̱ ɛmɔ, /cuarɛ dual, di̱t ni kökdun kä kɛc ti nyin ŋuan.

Lätni ŋa̱thdu naath

³² “Kɛ kui̱ ɛmɔ nɛy diaal tin latkɛ ŋa̱thdiɛn nhiam nath, ɣän bäkɛ ŋa̱c bä nhiam Gua̱a̱r in te nhial.

³³ Kä ram mi gaak ɣä nhiam nath, bä jɛ gak bä nhiam Gua̱a̱r in te nhial.”

Thilɛ mal duundɛ ɣöö ɛ ko̱r

³⁴ “/Cuarɛ jɛ car i̱ cä ben kɛ ɣöö bä mal nööŋ wi̱i̱ muɔ̱ɔ̱n, ɣän /ka̱n ben kɛ ɣöö nööŋä ni mal, duundɛ ɣöö nööŋä ni mut.

³⁵ Ba̱a̱ kɛ ɣöö bä raan kuɔ̱ɔ̱th kɛnɛ gua̱n, kɛ nyal kɛnɛ man, ciek gatdä kɛnɛ manthudɛ.

³⁶ Kä ji̱ tɛ̈r ran, bikɛ a ji̱ gɔaalɛ.

³⁷ Ram mi nhɔk ni gua̱n kiɛ man a lenyɛ jɛ ɣä, /cɛ ro̱ŋ kɛ ɣä. Kä ram mi nhɔk ni gatdɛ kiɛ nyaadɛ a lenyɛ jɛ ɣä, /cɛ ro̱ŋ kɛ ɣä.

³⁸ Kä ram mi /ci jiathdɛ bi kap kä bɛ guɔ̱ɔ̱r ni ɣä, /cɛ ro̱ŋ kɛ ɣä.

³⁹ Ram mi jek tëkdɛ bɛ jɛ bath, kä ram mi bath tëkdɛ kɛ kui̱dä bɛ jɛ jek.”

Bi Kuoth nɛy tin nyuɔ̱ɔ̱rkɛ ja̱a̱ŋkɛ thöp muc

⁴⁰ “Ram mi nyuur yɛ nyuurɛ ni ɣä, kä ram mi nyuur ɣä, nyuurɛ ni ram ëë jäk ɣä.

⁴¹ Ram mi nyuur gök kɛ ɣöö ɛ gök, bɛ muc go̱kä jek, kä ram mi nyuur gua̱n cuŋni kɛ ɣöö ɛ gua̱n cuŋni, bɛ muc gua̱n cuŋni jek.

⁴² Ɛpuc ɣän la̱rä jɛ yɛ, ram mi mooc ram mi tɔt kä nɛy ti̱ti̱ kɛ pi̱ ti kɔ̱c kɛ ɣöö ɛ raan kɔaar Yecu, /ci mucdiɛn bi bath.”