Mɛ̈l 3 - RUAC KUƆTH IN RƐL RƆ

¹ “Kä nɛ̈nɛ jɛ, ɣän cä jääkdä ja̱k kɛ ɣöö bɛ duɔ̱ɔ̱p wä rialikä nhiamdä. Kä kuäär in go̱rɛ bɛ rɔ pär kɛ ben rɛy luaakdɛ, ɛn jääk in nhɔakɛ, jɛn a bëëni, ruac ni ɣän Kuoth Nhial in la Ruey Ɣɔaa.

² Kä ɛŋa bi cäŋ in bäkɛ jɛ luäŋ kɛ ruɔ̱t ɔ? Kä ɛŋa bi tëk ɔ mi wëë wä cop? “Kɛ ɣöö bɛ ce̱tnikɛ mac ladiitä mi thalkɛ, kɛnɛ thabuuny la̱k mi bum,

³ bɛ nyuur ce̱tkɛ ram mi thaal ciɛk in bo̱r kä lɛɛyɛ jɛ, kä bɛ gaat Lii-bay lɛy ce̱tnikɛ da̱a̱p kɛnɛ ciɛk in bo̱r, amäni mi ca muc mi thuɔ̱k thöp Kuoth Nhial.

⁴ Kä ɛn wa̱nɔ ba gaat Juda kɛnɛ gaat Jɛ-ru-tha-lɛm cu nhɔk ɛ Kuoth Nhial ce̱tnikɛ ni̱n tëë wal, kɛnɛ run tëë ci wä.

⁵ “Inɔ bä cu ben rɛydun kɛ luk, kä kɛ pɛ̈th bä cua̱ neen ji̱ kolaaŋni kɛnɛ dhööm kɛ nɛy tin yackɛ rɔ̱ baaŋ, kɛ nɛy tin mackɛ naath kɛ kökdiɛn, kɛ män jɔɔkni, kɛ gaat ti rɛ̈tni kɛ jur, kɛ ɣöö /ca ɣä luth, ruac ni ɣän Kuoth Nhial in la Ruey Ɣɔaa.

Tho̱p wa̱l wa̱a̱li

⁶ “Kɛ ɣöö ɣän Kuoth Nhial, /cä rɔ gɛr. Kɛ kui̱c ɛ mɔ, yɛn gaat Je-kɔb /ka̱nɛ thuɔ̱k yɛn diaal.

⁷ Nikɛ ni̱n guuri cuarɛ rɔ̱ ri̱t kä ŋuɔ̱tkä /ka̱nɛ kɛ tit. Kä täämɛ luɔ̱nyɛ kä ɣä, kä bä luny kä yɛ, ruac ni ɣän Kuoth Nhial in la Ruey Ɣɔaa. Kä cuarɛ wee i̱, ‘Bakɔ luny jɔk i̱di?’

⁸ “A dee raan Kuoth ku mac? Kä ŋuɔtdɛ mac yɛn ɣä kä cuarɛ wee i̱, ‘Dee nɛy Kuoth mac i̱di?’ Mac yɛnɛ kɛ wa̱l wa̱a̱li kɛnɛ muc.

⁹ Kä ca yɛ lam kɛ ɣöö yɛn do̱r kɛɛliw mac yɛn ɣä.

¹⁰ Nööŋɛ wa̱l wa̱a̱li diaal duëël tɔ̱wä, kɛ ɣöö dee mi̱eth te rɛy luaakdä, ɣɔ̱a̱nɛ ɣä, mi/cä wernyini nhial bi lɛp a bä yɛ wuɔ̱c ti ŋuan ti gɔw nun, ruac ni ɣän Kuoth Nhial in la Ruey Ɣɔaa.

¹¹ Kä cä kɔ̱a̱m bi jak kä camkɛ bɛlkun, kä bi jiɛnkun dɛy kui̱r, ruac ni ɣän Kuoth Nhial in la Ruey Ɣɔaa.

¹² Kä bi döör diaal yɛ cɔli puɔ̱th, kɛ ɣöö bi mundun a mun mi gɔaa, ruac ni ɣän Kuoth nhial in la Ruey Ɣɔaa.”

Lär Kuɔth kɛ pälikä

¹³ “Kä cu Kuoth Nhial wee cia rieet ti bɛ̈c bɛ̈ɛ̈c lat kɛ kui̱dä. Kä cuarɛ ŋot wä yɛn i̱, ‘Cakɔ ruac kɛ kui̱du i̱di?’

¹⁴ Kä cuarɛ wee i̱, ‘Jiäkɛ ɛn ɣöö ba Kuoth lätikä. Ɛŋu gɔaaɔ kä kɔ kɛ ɣöö bi nɛy tin cɛ lar tit kiɛ bakɔ wä nyuɔ̱th ɣöö ca̱kɔ duer nhiam Kuɔth Nhial in la Ruey Ɣɔaa?

¹⁵ Kä täämɛ cɔalkɛ nɛy i̱ ji̱ liakä ti tɛth lɔcdiɛn. Kä nɛy tin la̱tkɛ jiäk /ci gɔw nikɛn kärɔ, mɔ cikɛ Kuoth ɣɔ̱nɔ lakɛn rɔ̱ cua̱ bar.’ ”

¹⁶ Kä nɛy tin luɔ̱thkɛ Kuoth Nhial, ruac ramɔ kɛ ramɔ. Kä la Kuoth Nhial ka liŋ. Kä cua bok ti̱mä gɔ̱r nhiamdɛ kɛ kui̱ nɛɛni tin dual kɛ jɛ kä luɔ̱thkɛ ciötdɛ.

¹⁷ Kä cu Kuoth Nhial in la Ruey Ɣɔaa wee i̱, “Bikɛn a nɛɛkä ti nyinkä kɛ cäŋ in bä la̱t, kä bäkɛ pälikä ce̱tkɛ min la raan gatdɛ mi lät jɛ ikä a pälikä.

¹⁸ Kä bia dääk lɛni nɛn bä kam raam mi tëë cuŋ kɛnɛ ram mi thil cuŋ, kɛnɛ kam raam mi ŋääth Kuoth kɛnɛ ram mi /ci Kuoth ŋäth.”