Mak 8 - RUAC KUƆTH IN RƐL RƆ

Mi̱i̱th bathdɔɔri ŋuaan

¹ Kä ɛn ni̱ni tɔ̱tɔ̱ mëë ci buɔ̱n mi di̱i̱t lɛni duɔl, kä thilɛ kɛ mi camkɛ, cu Yecu ji̱ kɔaarɛ cɔl, kä cuɛ kɛ jiök i̱,

² “Go̱o̱r lɔcdä luäk nɛɛni ti̱ti̱, kɛ ɣöö täämɛ cikɛ jääny kɛ ɣä kɛɛl kɛ ni̱n da̱ŋ diɔ̱k, kä thilɛ mi ba cam.

³ Kä mi dëë kɛ jak kä wä ciëëŋnikiɛn a näk buɔthkɛ, dee kɛ wä muɔ̱n däärɔ, kɛ ɣöö bä tha̱a̱ŋkiɛn gua̱thni ti nɔ̱a̱n.”

⁴ Cu ji̱ kɔaarɛ jɛ loc, “Kä dee raan nɛy diaal ti̱ti̱ moc kɛ mi̱eth rɛy dɔaar ɛmɛ i̱di?”

⁵ Cuɛ kɛ thiec i̱, “Ta̱yɛ kɛ jurayni da̱ŋ?” Cukɛ wee i̱, “Kɛ bärɔw.”

⁶ Cuɛ ruac la̱t buɔ̱n ɛn ɣöö bikɛ nyuur piny. Kä cuɛ jurayni da̱ŋ bärɔw ka̱n, mëë cɛ Kuoth la̱r tɛ̈th lɔaac, cuɛ kɛ puɔ̱ny, kä cuɛ kɛ ka̱m ji̱ kɔaarɛ kɛ ɣöö bikɛ kɛ wä dääk kä naath. Kä cukɛ kɛ dääk kä buɔ̱n.

⁷ Kä tekɛ kɛ rɛc ti tiɛtni bä, kä mëë cɛ kɛ poth, cuɛ jɛ lar bä ɛn ɣöö bakɛ da̱a̱k.

⁸ Cu naath mi̱th a cukɛ ria̱ŋ. Kä cukɛ duɔthkiɛn kuany a cukɛ diënyni da̱ŋ bärɔw thiäŋ.

⁹ Kä mat nɛɛni diaal kɛ bathdɔɔri da̱ŋ ŋuan. Cuɛ kɛ jak kä wä.

¹⁰ Kä ni ɛn guäth ɛmɔ cuɛ wä rɛy murkäbä kɛɛl kɛnɛ ji̱ kɔaarɛ, kä cukɛ wä ro̱o̱l Dal-ma-nu-tha.

Thiec ji̱ Pa-ri-thii kɛ Nyuuth

¹¹ Cu ji̱ Pa-ri-thii ben kä jɛ, kä cukɛ ŋaknɔm tok kɛ jɛ. Kɛ ɣöö görkɛ käpdɛ, cukɛ jɛ thiec kɛ nyuuth mi bɛ la̱t nhial.

¹² Cuɛ yiëë mi di̱i̱t ŋɔk, kä cuɛ wee i̱, “Kä ɛŋu go̱o̱r ri̱c ɛmɛ ni nyuuth ɔ? Ɛpuc ɣän la̱rä jɛ yɛ, thilɛ nyuuth mi ba ka̱m ɛn ri̱c ɛmɛ.”

¹³ Cuɛ kɛ ba̱ny piny, cuɛ loc rɛy murkäbä, kä cuɛ wä kui̱c.

Thuɔp ji̱ Pa-ri-thii kɛnɛ Ɣɛ-rod

¹⁴ Ɛn guäth ɛmɔ cu ji̱ kɔaarɛ jɛ pa̱l ruëëc ɛn ɣöö bikɛ jurayni naŋ kɛ rɔ̱ kɛɛl. Tekɛ kɛ juray kɛl kärɔa mi ca naŋ rɛy murkäbä.

¹⁵ Cu Yecu kɛ luek, wëë i̱, “Niɛkɛ rɔ̱ kɛ thuɔp ji̱ Pa-ri-thii kɛnɛ thuɔp Ɣɛ-rod.”

¹⁶ Cukɛ ruac kä rɔ̱ wäkɛ i̱, “Ɛ ɣöö thilɛ kɔn juray.”

¹⁷ Mëë ci Yecu mɛmɛ ŋa̱c, cuɛ kɛ thiec i̱, “Kä ɛŋu ruac yɛn ɔ i̱ ɛ ɣöö thilɛ yɛ juray? Ŋotdɛ /ka̱nɛ jɛ ni mir, kä /kenɛ ni cop lɔɔcdun? A ku lo̱ckun buɔ̱m?

¹⁸ Ta̱yɛ kɛ wäŋ, kä, /ci yɛn gui̱c? Kä ta̱yɛ kɛ ji̱th, kä /ci li̱ŋ? Kä /ci yɛn ŋɔaani tit?

¹⁹ Mëë cä jurayni dhieec puɔ̱ny kɛ kui̱ nɛɛni ti bathdɔɔri da̱ŋ dhieec, cia diënyni da̱ŋ di kuany tëë ci thia̱a̱ŋ kɛ duɔth?” Cukɛ jɛ jio̱k i̱, “Kɛ diënyni da̱ŋ wäl wi̱cdɛ rɛw.”

²⁰ “Kä mëë cä jurayni da̱ŋ bärɔw puɔ̱ny kɛ kui̱ nɛɛni ti bathdɔɔri da̱ŋ ŋuan, cia diënyni da̱ŋ di kuany tëë ci thia̱a̱ŋ kɛ thuɔr thuɔɔri?” Cukɛ jɛ jiök i̱, “Kɛ diënyni da̱ŋ bärɔw.”

²¹ Cuɛ kɛ jiök i̱, “Ŋotdɛ /kenɛ ni cop lɔɔcdun?”

Jak Yecu cɔr kä gui̱c kä Beth-the-da

²² Cukɛ ben kä Beth-the-da, kä cu naath Yecu nöŋ wut mi cɔr, kä cu naath jɛ läŋ kɛ ɣöö bɛ jɛ thiap.

²³ Cuɛ cɔr käp tetdä, kä cuɛ jɛ naŋ raar rɛy wec. Kä mëë cɛ nyinkɛ ŋuɔ̱l ruɛy, cuɛ tetkɛ la̱th puɔ̱nydɛ, kä cuɛ jɛ thiec i̱, “Ti̱i̱ kɛ mi nɛɛni?”

²⁴ Kä cu wut waŋdɛ kap nhial, kä cuɛ wee i̱, “Guɛcä naath, duundɛ ɣöö ce̱tkɛ kɛ jiɛn ti jäl.”

²⁵ Kä cu Yecu tetkɛ nyɔk kɛ läth wäŋnikɛ. Kä cuɛ guic agɔaa, kä cu wäŋkɛ cu gɔw. Cuɛ ŋɔak diaal guic a thil diw.

²⁶ Kä cuɛ jɛ jakä wä dhɔrɛ, jio̱kɛ jɛ i̱, “A cäŋɛ ni wec, /cu wä thi̱n.”

Lat Pi-tɔr ŋäcdɛ kɛ Yecu

²⁷ Kä cu Yecu wä nhiam kɛnɛ ji̱ kɔaarɛ, wäkɛ rɛy ciëëŋni Thɛ-tha-ria kä Pi-li-pi. Kä min ŋotkɛ dup cuɛ ji̱ kɔaarɛ thiec i̱, “Täämɛ, laar naath ɛ i̱ ɛ ɣän ŋa?”

²⁸ Cukɛ jɛ loc i̱, “Laar kɛn ɛ i̱ ɛ ji̱n Jɔ̱ɔ̱n in la lääk, kä ɛ tha̱a̱ŋkiɛn i̱ ɛ ji̱n E-li-yaa, kä larkɛ jɛ ɛ tha̱a̱ŋ nath i̱ ɛ ji̱n ram kɛl kä göök.”

²⁹ Kä cu Yecu kɛ thiec i̱, “Kä laar yɛn ɛ i̱ ɛ ɣän ŋa?” Cu Pi-tɔr ɛ loc i̱, “Ɛ ji̱n Mɛ-thia.”

³⁰ Kä cuɛ kɛ gok ɛ bum kɛ ɣöö, /ca ruac ɛmɔ bi la̱r radɔ̱diɛn.

Ma̱r Yecu kɛ lia̱a̱dɛ kɛnɛ jiëcdɛ li̱th

³¹ Cuɛ Yecu ɛ tok kɛ mi ŋi̱i̱cɛ kɛ, wëë i̱, “Bi Gat Ran ti bɛ̈c bɛ̈ɛ̈c ti ŋuan yi̱k rut, kä ba jɛ lo̱k ɛ di̱t kɛnɛ bööth palä tin di̱t amäni ji̱ gɔ̱rkä. Kä ba jɛ näk, kä kɛ kɔr ni̱ni da̱ŋ diɔ̱k bɛ rɔ jiɛc li̱th.

³² Cuɛ ruac ɛmɔ la̱t kɛ a jɔc. Kä cu Pi-tɔr jɛ naŋ gekä, kä cuɛ jɛ tok kɛ mi lueekɛ jɛ.

³³ Kä cu Yecu rɔ ri̱t, kä cuɛ ji̱ kɔaarɛ guic, kä cuɛ Pi-tɔr luek, cuɛ jɛ jiök i̱, ‘Woc rɔɔdu kä ɣä, Cɛy-tan, kɛ ɣöö /ci car ni ti bä kä Kuoth pa̱ny, kä cäri kɛ cär nath.’ ”

³⁴ Cuɛ buɔ̱n kɛnɛ jaakɛ cɔl, kä cuɛ kɛ jiök i̱, “Mi go̱o̱r raan ɣöö bɛ ɣä guɔ̱ɔ̱r, a jɛ jay rɔɔdɛ, kä a jɛ kap jiathdɛ, kä bɛ ɣä guɔ̱ɔ̱r.

³⁵ Kɛ ɣöö ram mi wä tëkdɛ yop, bɛ jɛ bath. Kä ram mi wä tëkdɛ thöp, kɛ kui̱ cio̱tädä kɛnɛ kui̱ thukni ti gɔw bɛ jɛ kän.

³⁶ Bi gɔɔydɛ a ŋu mi ci raan ɣɔw kɛɛliw jek ala duŋdɛ, kä bi tëkdɛ bath?

³⁷ Kä dee raan ŋu thöp ala luël kɛ kui̱ tëkdɛ?

³⁸ Kɛ ɣöö mi wä raan pöc kɛ ɣä kɛnɛ ruaacnikä rɛy ri̱cä mɛ jiääk ɛmɛ mɛ thil ŋa̱th, bi Gat Ran pöc kɛ jɛ bä, mi wëë wä ben kɛ gɔɔy puɔnyä Gua̱n kɛɛl kɛ ja̱a̱k nhial tin rɛl gɔɔydiɛn rɔ.”