Mak 7 - RUAC KUƆTH IN RƐL RƆ

Ŋi̱i̱cä gua̱ndɔɔŋni ji̱ Juudh

¹ Täämɛ mëë ci ji̱ Pa-ri-thii kɛnɛ tha̱a̱ŋ ji̱ gɔ̱rkä ti bä kä Jɛ-ru-tha-lɛm rɔ duɔ̱l jɛ,

² kä cikɛ jɛ nɛn ɛn ɣöö ci tha̱a̱ŋ ji̱ kɔaar Yecu mi̱th kɛ tet ti jiäk, ti /ka̱n lak.

³ Kɛ ɣöö ji̱ Pa-ri-thii kɛnɛ ji̱ Juudh diaal /cikɛ a mi̱thkɛ a /ka̱n tetkiɛn kɔn lak agɔaa, kɛ ɣöö tiɛtkɛ ciaŋ ŋuɔ̱tni di̱tnikiɛn.

⁴ Kä /cikɛ mi nööŋkɛ guäth ko̱kä, /cikɛ mi̱th, ɛ ni mi cikɛ kɔŋ lak. Kä tekɛ kɛ ciɛŋ kɔ̱kiɛn ti nyin ŋuan ti guɔ̱ɔ̱rkɛ ɛ kɛn, ce̱tkɛ la̱k lieeri kɛ dha̱a̱ri kɛnɛ took la̱ŋni.

⁵ Cu ji̱ Pa-ri-thii kɛnɛ ji̱ gɔ̱rkä jɛ thiec, “Ɛŋu /ci ji̱ kɔaaru cieŋ kɛ ciaŋ di̱tnikɔn ɔ, kɛ ɣöö mi̱thkɛ a /ka̱n tet ti ci jiäk lak?”

⁶ Kä cuɛ kɛ jiök i̱, “Ci gök ni I-ca-yaa ruac in thuɔ̱k lat kɛ kui̱dun, yɛn ji̱ mɛtdä, mëë cɛ gɔ̱r i̱, ‘Nɛy ti̱ti̱ luɔ̱thkɛ ɣä kɛ lëëpkiɛn, kä na̱n lo̱ckiɛn kɛ ɣä.

⁷ Palkɛ ɣä baaŋ, kä ŋi̱eeckɛ ni cär nath ala ŋuɔ̱t Kuɔth.’

⁸ Päl yɛn ciaŋ ŋutdä Kuɔth, kä ka̱pɛ ciaŋ nath a bum.”

⁹ Kä cu Yecu kɛ jiök i̱, “Ta̱yɛ kɛ ca̱p mi gɔaa mi lökɛ ni ŋut Kuɔth, kɛ ɣöö bia ni käp ciaŋ ŋutädun.

¹⁰ Kɛ ɣöö ci Muthɛ jɛ lar i̱, ‘Luthni guur kɛnɛ muɔ̱ɔ̱r,’ kä, ‘Ram mi bi ruac a jiäk kɛ gua̱n kiɛ man bɛ dhil li̱w.’

¹¹ Duundɛ ɣöö ruac yɛn ɛn ɣöö dee raan gua̱n kiɛ man jiök i̱, ‘Min deri jek kä ɣä ɛ jɛn Kor-bɛ̈n’ (min lot ni ɣöö ɛ duŋ Kuɔth).

¹² Kɛ kui̱ ɛmɔ cia ram ɛmɔ pën min derɛ lät kä gua̱n kɛnɛ man.

¹³ Kä ɛnɔ woc yɛn ni ruac Kuɔth kɛ ciaaŋdun min nyuth yɛn ɛ naath. Kä la̱tdɛ ni ŋɔaani ti ŋuan tin ce̱tkɛ ti̱ti̱.”

Tin jakä raan kä jiäk

¹⁴ Kä cu Yecu naath lɛni cɔl, kä cuɛ kɛ jiök i̱, “Liɛŋɛ ɣä, yɛn diaal, kä a jɛ cup lo̱cnikun.

¹⁵ Thilɛ duɔ̱ɔ̱r mi te raar, kä wä jic ran mi dee jɛ jakä jiäk.

¹⁶ Kä duundɛ ɣöö ŋɔak diaal tin bä raar rɛy ran kɛn tin ya̱rkɛ jɛ.” [Kä ɛ ram mi tekɛ ji̱th ti li̱ŋ kɛ jɛ, a jɛ li̱ŋ.]

¹⁷ Mëë cɛ naath ba̱ny piny, kä cɛ wä dueel, cu jaakɛ jɛ thiec kɛ luɔt cäätdä ɛmɔ.

¹⁸ Cuɛ kɛ jiök i̱, “Kä /kenɛ cop lɔcdun bä? /Ken yɛn ɛ ŋa̱c ɛn ɣöö /ciɛ duɔ̱ɔ̱r mi te raar kä wä jic ran ɛn min dee jɛ ya̱r?

¹⁹ Kɛ ɣöö /ci wä rɛy lɔaacdɛ, wëë jic ran kä wëë kɛ wä raar.” (Kä inɔ cuɛ jɛ lat ɛn ɣöö mi̱th diaal gɔwkɛ.)

²⁰ Kä cuɛ wee i̱, “Min bä raar rɛy ran ɛ jɛn yär jɛ mɔ.

²¹ Kɛ ɣöö bëëkɛ raar rɛy lɔaacdɛ, kɛn cär ti jiäk, ciaŋ leerä, kuël, luc nath,

²² Dhöm di̱t lɔaac ŋɔaani, la̱t jiäkni, mët nath, la̱t nyuɔɔni, tiɛɛl, guer, kɛ liak kɛnɛ dɔ̱ɔ̱r.

²³ Jiäk diaal ti̱ti̱ bäkɛ raar lɔɔc ran kä ya̱rkɛ jɛ.”

Ŋa̱th ciëk

²⁴ Cu Yecu jiɛɛn ɛn thɔ̱ŋɔ wëë ro̱o̱l Dhor kɛnɛ Dhi-don. Kä cuɛ coth dueel, kä go̱o̱rɛ jɛ i̱ /ca jɛ bi ŋa̱c ɛ raan ɛn ɣöö tëë ɛn wani, kä /kenɛ rɔ luäŋ kɛ teey.

²⁵ Kä ni ɛn guäth ɛmɔ cu ciek mi te nyaadɛ mi tɔt kɛ yiëë mi jiääk ben kä jɛ, kɛ ɣöö cɛ kɛ̈kdɛ liŋ, kä cuɛ rɔ yuɔr piny ciöknikɛ.

²⁶ Täämɛ, jɛn ciek ɛ ciek Gu-rith mi ca dap ro̱o̱l Thay-ro-po-ni-cia rɛy Thi-ri-ya. Cuɛ Yecu läŋ kɛ ɣöö bɛ yiëë in jiääk in te puɔ̱ny nyaadɛ woc.

²⁷ Kä cu Yecu jɛ jiök i̱, “A gaat kɔn ria̱ŋ, kɛ ɣöö /cɛ gɔaa ɛn ɣöö ba mi̱eth dho̱li ka̱n, kä ba jɛ yuɔ̱r jio̱o̱k.”

²⁸ Kä cuɛ jɛ loc i̱, “Ɣɔ̱ɔ̱n, Kuäär, kä cäŋɛ jɛn inɔ la jio̱o̱k tin ci duɔth guäth mi̱eth dho̱li a cam.”

²⁹ Kä cuɛ ciek ɛmɔ jiök i̱, “Kɛ ɣöö ci jɛ loc inɔ, locni jɔk, ci Yiëë in jiääk jiɛɛn puɔ̱ny nyaadu.”

³⁰ Cu ciek ɛmɔ loc dhɔrɛ, kä cuɛ nyaadɛ jek tɔ̱ɔ̱cä wi̱i̱ dhaŋä, kä ci yiëë in jiääk jiɛɛn.

Jak Yecu kɛ miŋ kä gɔaa

³¹ Kä cu Yecu jiɛɛn ro̱o̱l Dhor kä cuɛ wä kɛ duɔ̱ɔ̱p Dhi-don wëë Bar Gɛ̈-lɛ-li ro̱l Wi̱i̱ni da̱ŋ Wäl.

³² Cukɛ jɛ nöŋ wut mi cɛ di̱w mi /ci ruac agɔaa, kä cukɛ jɛ läŋ kɛ ɣöö bɛ tetdɛ kuëŋ puɔ̱nydɛ.

³³ Kä cuɛ jɛ woc raar bunä, kä cuɛ jɛ naŋ guäthdɛ kärɔa. Kä cuɛ yiɛtkɛ la̱th ji̱thnikɛ, cuɛ ruɛy ŋol, kä cuɛ lɛpdɛ thiap.

³⁴ Mëë cɛ nhial liɛc, cuɛ yiëë ŋɔk a di̱t, kä cuɛ wut jiök i̱, “Ɛ-pa-tha”, mi lot ni ɣöö, “Lɛprɔ.”

³⁵ Ni ɛn wanɔ cu ji̱thkɛ rɔ̱ lɛp, kä cua lɛpdɛ lony, kä cuɛ ruac agɔaa.

³⁶ Cuɛ Yecu kɛ gok a bum, ɛn ɣöö thilɛ radɔ̱diɛn mi bia la̱r mɛmɛ. Kä mɔ cɛ kɛ luek ɔ, ku kɛn a lat ni jɛ ɛlɔ̱ŋ.

³⁷ Cu naath ga̱a̱c kɛ ga̱a̱c mi di̱i̱t i̱, “Cɛ ŋɔak diaal la̱t agɔaa! A cäŋɛ ni mi̱eeŋ cɛ kɛ jakä li̱ŋ, kä tin cɛ di̱w cikɛ ruac.”