Mak 6 - RUAC KUƆTH IN RƐL RƆ

Lo̱k Yecu kä Na-dha-rɛth

¹ Ci Yecu jiɛɛn ɛn wi̱ni. Cuɛ wä wi̱i̱diɛn, kä cu ji̱ kɔaarɛ jɛ guɔ̱ɔ̱r.

² Kä kɛ cäŋ lɔ̱ŋä ji̱ Juudh cuɛ jɛ tok kɛ mi ŋi̱i̱cɛ naath guäth dolä ji̱ Juudh. Kä cu nɛy ti ŋuan tëë ca jɛ liŋ ga̱a̱c, wäkɛ i̱, “Wut ɛmɛ jekɛ ruaacni ti̱ti̱ winith? Kä ɛ pɛl ŋukä ɛnɔ ca ka̱m jɛ mɔ? Kä lätdɛ lät ti buɔ̱m buɔ̱ɔ̱m ti ga̱ykɛ naath ti!

³ /Ciɛ jɛn ŋäät jiɛn, in la gat Mɛri däman Je-mɛth, kɛnɛ Jo-thɛth, kɛ Ju-däth, kɛ Thay-mɔn, kä /ci nyimani tekɛ kɔn kɛɛl ɛn wanɛ mɛ?” Kä cukɛ jɛ lo̱k.

⁴ Cu Yecu kɛ jiök i̱, “Luɔ̱thkɛ gök gua̱thni diaal, ɛ ni wecdiɛn lökɛ jɛ thi̱n ɔ ɛ nɛɛkɛ pa̱ny.”

⁵ Cuɛ thil lät ti bum ti cuɛ la̱t ɛn wi̱ni, kä ɛni ɣöö cuɛ tetkɛ la̱th pua̱nyni ji̱ jua̱thni ti tɔt, kä cuɛ kɛ jakä gɔw.

⁶ Kä cuɛ ga̱a̱c kɛ thil ŋäthädiɛn. Cu Yecu wä rɛy ciëëŋni ŋi̱i̱cɛ naath.

Jäkni Yecu kɛ jaak da̱ŋ wäl rɛw

⁷ /Cuɛ jaakɛ da̱ŋ wäl rɛw cɔl, kä cuɛ jɛ tok kɛ mi jäkɛ kɛ kä raar, rɛw kɛɛl, rɛw kɛɛl. Cuɛ kɛ ka̱m lua̱ŋ mi wuɔc kɛ ni yiey ti jiäk.

⁸ Cuɛ kɛ la̱r ɣöö thilɛ duɔ̱ɔ̱r mi bi kɛn ɛ naŋ kɛ kui̱ ja̱liɛn ɛ ni mi ɛ kɛɛt kärɔa, thilɛ juray, kiɛ gök kiɛ yio̱w rɛy lääkiɛn,

⁹ kä a ramɔ tekɛ wa̱a̱ri ciöknikɛ, kä /cikɛ bi cieŋ kɛ bieyni rɛw.

¹⁰ Kä cuɛ kɛ jiök i̱, “Guäth ɔ cia wä thi̱n ɔ, ta̱yɛ thi̱n amäni mi cia jiɛɛn ɛn guäth ɛmɔ.

¹¹ Mi wëë wä tekɛ ciëŋ mi /ca yɛ bi nyuɔ̱ɔ̱r thi̱n agɔaa, kä lökɛ ɣöö bikɛ ruacdun liŋ, mi jiɛn yɛn, tɛ̈ŋɛ tur ciöknikun ala nyuuth mi jiääk kä kɛ.”

¹² Cu jaakɛ jiɛɛn, kä cukɛ naath wä la̱t ɣöö bikɛ rɔ ri̱t dueerikiɛn.

¹³ Cukɛ kuth ti jiäk ti ŋuan tuɔ̱k raar pua̱nyni nath, kä cukɛ nɛy ti ŋuan ti tekɛ jua̱th yi̱r kɛ yieer, a cukɛ kɛ jakä gɔw.

Lia̱a̱ Jɔ̱ɔ̱n in la Lääk

¹⁴ Cu kuäär ni Ɣɛ-rod mɛmɛ liŋ, kɛ ɣöö ca ciöt Yecu këëk ɛ naath. Cu tha̱a̱ŋ nath wee i̱, “Ca Jɔ̱ɔ̱n in la lääk jiɛc li̱th, kɛ kui̱ ɛmɔ lät luäŋ ti̱ti̱ kä jɛ.”

¹⁵ Kä cu tha̱a̱ŋ nath ɛ lar i̱, “Ɛ E-li-yaa,” kä ɛ tha̱a̱ŋ nath i̱, “Ɛ gök mi ce̱tkɛ gök kɛl kä göök tëë wal.”

¹⁶ Kä mëë ci Ɣɛ-rod ɛ liŋ, cuɛ wee i̱, “Ca Jɔ̱ɔ̱n mëë cä ŋot jiɛc li̱th.”

¹⁷ Kɛ ɣöö mëëdan ci Ɣɛ-rod ruac ja̱k, kä cua Jɔ̱ɔ̱n wä käp, kä cuɛ jɛ kɔn la̱th dueel yieenä kɛ kui̱ Ɣɛ-ro-diäth in la ciek däman ni Pi-lip, kɛ ɣöö cɛ jɛ kuɛn.

¹⁸ Kɛ ɣöö ci Jɔ̱ɔ̱n Ɣɛ-rod jiök i̱, “/Ciɛ cuɔ̱ɔ̱ŋ kä ji̱ ɛn ɣöö bi ciek dämuɔɔr kuɛn.”

¹⁹ Kä ɛnɔ cu Ɣɛ-ro-diäth tekɛ tiɛɛl kɛ jɛ, kä go̱o̱rɛ näkdɛ, kä cuɛ thil gua̱a̱th.

²⁰ Kɛ ɣöö dual Ɣɛ-rod kɛ Jɔ̱ɔ̱n, kɛ ɣöö ŋäcɛ jɛ i̱ ɛ gua̱n cuŋni mi rɛl rɔ, kä cuɛ jɛ gaŋ. Kä la nhɔkɛ ɣöö bɛ Jɔ̱ɔ̱n liŋ, a cäŋ ni min la gakɛ kɛ li̱eŋ ruaacnikɛ.

²¹ Kɛ jɔak cu Ɣɛ-ro-diäth gua̱a̱th jek kɛ cäŋ ti̱mä däpä Ɣɛ-rod mëë cɛ mi̱th la̱t kɛ kui̱ bööthni kumɛkädɛ kɛnɛ bööth rɛ̈m kɛ bööth wec ji̱ Gɛ̈-lɛ-li.

²² Kä mëë ci nya Ɣɛ-ro-diäth ben duth nhiam nath, cuɛ lɔc Ɣɛ-rod kɛnɛ ja̱a̱lkɛ jakä tɛth. Kä cu kuäär nyam ɛmɔ jiök i̱, “Thiec ɣä kɛ mɔ go̱o̱ri mɔ, bä jɛ ka̱m ji̱.”

²³ Cuɛ rɔ yac kɛ thuɔ̱k i̱, “Mɔ bi thiec kä ɣä mɔ, bä jɛ ka̱m ji̱, a cäŋɛ ni tha̱a̱ŋ kuäärädä.”

²⁴ Kä cuɛ wä raar; cuɛ man wä thiec i̱, “Ɛ leeŋu mɔ bä thiec ɔ?” Kä cu man ɛ loc i̱, “Thiecɛ kɛ wi̱c Jɔ̱ɔ̱n in la lääk.”

²⁵ Niɛn guäth ɛmɔ cuɛ loc jɔk kɛ pɛ̈th kä kuäär, kä cuɛ jɛ jiök i̱, “Ɣän göörä ɣöö bi ɣä ka̱m wi̱c Jɔ̱ɔ̱n in la lääk rɛy thaak.”

²⁶ Cu kuäär lɔcdɛ jiath ɛlɔ̱ŋ, kä kɛ kui̱ yäcädɛ min cɛ yac nirɔ, kɛnɛ ja̱a̱lkɛ ti tekɛ jɛ kɛɛl, /kenɛ jɛ nhɔk ɛn ɣöö derɛ ruacdɛ kɛ nyal nyɔk.

²⁷ Kä ni ɛn guäth ɛmɔ cuɛ lathkëëri mi gaŋ jɛ ja̱k, kɛ ɣöö bɛ wi̱c Jɔ̱ɔ̱n wä nööŋ. Cuɛ wä, kä cuɛ wi̱c Jɔ̱ɔ̱n wä ŋok rɛy duëël yieenä.

²⁸ Cuɛ wi̱cdɛ nööŋ kɛ thak, kä cua jɛ ka̱m nyal, kä cu nyal wä ka̱m man.

²⁹ Mëë ci jaak Jɔ̱ɔ̱n liŋ, cukɛ ben, cukɛ puɔ̱nydɛ naŋ, kä cukɛ jɛ wä kony.

Mi̱i̱th Bathdɔɔri Dhieec

³⁰ Cu jaak Yecu luny jɔk, kä cukɛ jɛ la̱t ŋɔak diaal tëë cikɛn kɛ la̱t kä ca ŋi̱eec.

³¹ Kä cuɛ kɛ jiök i̱, “Yɛn pua̱nykun bia rɛy dɔaar, guäth mi thil naath, kä lɔ̱a̱ŋɛ kä mi tɔt.” Kɛ ɣöö tëëkɛ nɛy ti ŋuan tin wëë kä bëë, kä thilɛ kɛ gua̱a̱th mi dee mi̱th kɛ kɛ.

³² Cukɛ wä rɛy murkäbä wäkɛ rɛy dɔaar guäthdiɛn kärɔ̱.

³³ Kä cu nɛy ti ŋuan kɛ nɛn wäkɛ, cukɛ kɛ ŋic, kä cukɛ riŋ ɛn wi̱ni kɛ pɛ̈th kɛ ciökiɛn rɛy ciëëŋni diaal, kä cu kɔŋ cop ni naath.

³⁴ Min wä Yecu piny rɛy ria̱a̱y, cuɛ buɔ̱n mi di̱i̱t nɛn, kä cu lɔcdɛ luäkdiɛn go̱r, kɛ ɣöö ce̱tkɛ kɛ det ti thil yieen. Kä cuɛ kɛ tok kɛ ŋi̱i̱c kɛ ŋɔaani ti ŋuan.

³⁵ Mëë ci cäŋ kuɛ̈ɛ̈, cu ji̱ kɔaarɛ ben kä jɛ. Cukɛ jɛ jiök i̱, “Gua̱a̱th ɛmɛ ɛ dɔr mi thil naath, kä ci cäŋ kuɛ̈ɛ̈.

³⁶ Jakni naath kä wä rɛy ciëëŋni ti thia̱k, kɛ ɣöö bikɛ rɔ̱ wä kök mi̱th te ba cam.”

³⁷ Kä cuɛ kɛ loc i̱, “Muɔcɛ kɛ kɛ mi ba cam.” Cukɛ jɛ jiök i̱, “Dëëkɔ wä a bakɔ yio̱w ti kur rɛw wä kɔk ni jurayni ti bikɛn kɛ cam?”

³⁸ Kä cuɛ kɛ thiec, “Ta̱yɛ kɛ jurayni da̱ŋ di? Wiaa, guelɛ kɛ.” Kä mëë cikɛ pekdiɛn ŋa̱c, cukɛ wee i̱, “Kɛ jurayni da̱ŋ dhieec kɛnɛ rɛc da̱ŋ rɛw.”

³⁹ Cuɛ kɛ jiök i̱ a nɛy diaal nyuur piny bua̱a̱ni rɛy juaacni tin tɔ̱ɔ̱c.

⁴⁰ Kä cukɛ nyuur bua̱a̱ni, nɛy ti kuɔ̱r kɛl kɛɛl kɛ nɛy ti jiɛn dhieec kɛɛl.

⁴¹ Kä cu Yecu jurayni da̱ŋ dhieec kɛnɛ rɛc da̱ŋ rɛw ka̱n, kä cuɛ nhial liɛc kä cuɛ kɛ poth, kä cuɛ jurayni puɔ̱ny, kä cuɛ kɛ ka̱m ji̱ kɔaarɛ, kɛ ɣöö bikɛ kɛ dääk kä naath. Kä cuɛ rɛc da̱ŋ rɛw da̱a̱k kamnikiɛn diaal.

⁴² Cu kɛn diaal mith a cukɛ ria̱ŋ.

⁴³ Kä cukɛ duɔth jurayni kɛnɛ rɛc kuany, a cu diënyni wäl wi̱cdɛ rɛw thia̱a̱ŋ.

⁴⁴ Kä pek nath diaal tëë camkɛ jurayni kɛ wutni ti bathdɔɔri da̱ŋ dhieec.

Ja̱l Yecu wi̱i̱ Pi̱i̱ni

⁴⁵ Ni ɛn guäth ɛmɔ cuɛ ji̱ kɔaarɛ jak kä wä rɛy murkäbä, kä cukɛ wä kui̱c kä Beth-the-da kɛ nhiam kä jɛ, guäth in cɛ buɔ̱n jak kä wä.

⁴⁶ Kä kɛ kɔr kä min cɛ kɛ la̱r ɣöö kua wä kɛ mal, cuɛ wä wi̱i̱ pa̱a̱m wëë pal.

⁴⁷ Mëë ci ɣɔw a thiaŋ, kä te murkäb däär baar, kä ŋot Yecu raar kärɔa.

⁴⁸ Cuɛ kɛ nɛn tekɛ kɛ riɛk kɛ gër murkäbä, kɛ ɣöö lɔakɛ jɛ ɛ jiɔm, kä a ŋot /ken ɣɔw ni baak, cuɛ ben kä kɛ a jälɛ wi̱i̱ pi̱i̱ni, kä lotdɛ ni ɣöö bëë kä kɛ.

⁴⁹ Mëë cikɛ jɛ nɛn jälɛ wi̱i̱ pi̱i̱ni, cukɛ wak ɛlɔ̱ŋ, kɛ ɣöö car kɛn ɛ i̱ ɛ jɔak.

⁵⁰ Cu kɛn diaal ɛ nɛn, kä cukɛ dual ɛlɔ̱ŋ. Kä ni ɛn guäth ɛmɔ cuɛ ruac kɛ kɛ, kä cuɛ kɛ jiök i̱, “Ka̱pɛ lo̱ckun a bum. Ɛ ɣän, /Cuarɛ dual!”

⁵¹ Mëë cɛ wä rɛy murkäbä kɛ kɛ kɛɛl, cu jiɔm cuɔ̱ŋ, kä cukɛ ga̱a̱c ɛlɔ̱ŋ.

⁵² Kɛ ɣöö /kenɛ cop lɔcdiɛn ɛn mi̱i̱th nɛɛni ti bathdɔɔri da̱ŋ dhieec.

Jak Yecu kɛ raan kä gɔaa kä Gɛ-nɛ-tha-rɛt

⁵³ Mëë cikɛ wä kui̱ci, cukɛ cop kä Gɛ-nɛ-tha-rɛt, kä cukɛ murkäb yiath thok waath.

⁵⁴ Mëë cikɛ wä raar rɛy murkäbä, ni ɛn guäth ɛmɔ cu naath ɛ ŋic.

⁵⁵ Cukɛ riŋ rɛy rööl ɛmɔ kɛɛliw, kä cukɛ ji̱ jua̱thni tok kɛ no̱o̱ŋ kɛ gali, guäth ëë ca jɛ liɛŋ thi̱n.

⁵⁶ Kä guäth diaal tëë ci Yecu wä thi̱n, rɛy ciëëŋni kɛnɛ wi̱i̱ kɛ rɛy ka̱a̱kni, cu naath ji̱ jua̱thni naŋ guäth ko̱kä. Cukɛ Yecu thiec kɛ ɣöö a cäŋ deekɛ thiap ni thok bieydɛ. Kä nɛy diaal tëë ca bi̱i̱dɛ thiap gɔw.