Mak 5 - RUAC KUƆTH IN RƐL RƆ

Jak Yecu kɛ ram mi tekɛ Yiëë mi jiääk kä gɔaa

¹ Cukɛ cop kui̱ci, ro̱o̱l ji̱ Gɛ-ri-thiin.

² Kä min cɛ ben raar rɛy murkäbä, cu wut mi tekɛ yiëë mi jiääk, ben raar guäth kunyä, Yecu päth.

³ Jɛn wut ɛ mɔ cieŋɛ guäth kunyä. Thilɛ ram mi dee jɛ luäŋ kɛ yiën, a cäŋɛ ni kuatni ciikni.

⁴ Kä ca jɛ kɔn yian ɛlɔ̱ŋ kɛ dep kɛnɛ ciik, cuɛ ciik töl, kä cuɛ deep puɔ̱t. Cɛ thil ram mi tekɛ buɔ̱m mi dee jɛ yian.

⁵ Ni ciaŋ la wieeɛ ɛlɔ̱ŋ, kɛ wäär kɛnɛ cäŋ, kä wi̱elɛ gua̱th kunyä kɛnɛ rɛy päämni, kä temɛ rɔ kɛ pääm.

⁶ Kä mëë cɛ Yecu nɛn nänä, cuɛ ri̱i̱ŋ kä jɛ, kä cuɛ rɔ goŋ nhiamdɛ.

⁷ Cuɛ wiee kɛ jɔw mi di̱i̱t wëë i̱, “Ji̱n Yecu, Gat Kuɔth nhial in di̱i̱t, ti kɛ ŋu kɛ ɣä? Ɣän la̱ŋä ji̱ kɛ ciöt Kuɔth, /cu ɣä lät kä mi jiääk.”

⁸ Kɛ ɣöö ci Yecu jɛ jiök i̱, “Bër raar puɔ̱ny wutdä nɛmɛ, ji̱n yiëë mi jiääk!”

⁹ Kä cu Yecu jɛ thiec i̱, “Cɔal ciötdu i̱di?” Kä cuɛ jɛ loc i̱, “Cɔal ciötdä i̱ ti nyin ŋuan, kɛ ɣöö ŋuan kɔ.”

¹⁰ Cuɛ jɛ läŋ kɛ ɣöö /cɛ kɛ bi tuɔ̱k raar ro̱o̱l ɛmɔ.

¹¹ Täämɛ, tëëkɛ buɔ̱n kuɔ̱ndhuɔ̱ɔ̱ri mi di̱i̱t mi läk gekä pa̱a̱m ɛn wi̱ni.

¹² Cu yiey tin jiäk Yecu läŋ i̱, “Jakni kɔ kä wä pua̱nyni kuɔ̱ndhuɔ̱ɔ̱ri, kä a kɔ wa̱kɔ rɛydiɛn.”

¹³ Kä cu Yecu kɛ pa̱l wä. Cu kuth tin jiäk ben raar kä jɛ, cukɛ wä pua̱nyni kuɔ̱ndhuɔ̱ɔ̱ri, kä cu buɔ̱n kɛɛliw riŋ piny po̱mä mi luŋluŋ rɛy yiëër, matdiɛn kɛn diaal kɛ bathdɔɔri da̱ŋ rɛw, kä cukɛ mua rɛy yiëër.

¹⁴ Cu yiëënkiɛn diaal rɔ̱ bar, cukɛ jɛ wä la̱t ji̱ wec kɛnɛ nɛy tin te rɛy rööl ɛmɔ. Kä cu naath ben kɛ ɣöö bikɛ min ci tuɔɔk, ben nɛn.

¹⁵ Cukɛ ben kä Yecu, kä cukɛ wut mi tekɛ yiey ti jiäk nɛn, nyuurɛ ɛn wi̱ni a ci wi̱cdɛ loy, kä ciɛŋɛ bieyni, ɛn wut in ci kɔŋ tekɛ kuth ti ŋuan ti jiäk. Kä cukɛ dual.

¹⁶ Kä cu nɛy tëë ca tëë ci tuɔɔk kä wut in tekɛ kuth kɛnɛ kuɔ̱ndhuɔ̱ɔ̱ri nɛn, cukɛ kɛ la̱t naath.

¹⁷ Kä cukɛ jɛ tok kɛ mi thiëckɛ Yecu kɛ ɣöö bɛ jiɛɛn ro̱o̱liɛn.

¹⁸ Kä min wëë rɛy murkäbä, cu wut in ca käp ɛ kuth ti jiäk jɛ läŋ kɛ ɣöö derɛ te kɛɛl kɛ jɛ.

¹⁹ Kä cu Yecu jɛ lo̱k, cuɛ jɛ jiök i̱, “Wër cieŋdu kä mäthniku, kä läri kɛ mɛ di̱i̱t ɛ ci Kuäär ni Kuoth lät kä ji̱ mɛ, kɛnɛ ɣöö ci lɔcdɛ kɔ̱a̱c kɛ ji̱.”

²⁰ Cuɛ wä, kä cuɛ ŋɔak diaal tëë ci Yecu kɛ lät kä jɛ la̱t ji̱ wi̱i̱ni da̱ŋ wäl. Kä cu naath diaal ga̱a̱c.

Tëk nyaal kɛnɛ jak ciëk kä gɔaa

²¹ Mëë ci Yecu loc kui̱c kɛ murkäb, cu buɔ̱n mi di̱i̱t rɔ duɔ̱l jɛ kä tëë thok waath.

²² Cu bo̱o̱th dolä ji̱ Juudh kɛl mi cɔal ciötdɛ i̱ Jay-räth ben kä jɛ. Mëë cɛ Yecu nɛn, cuɛ rɔɔdɛ yuɔr piny ciöknikɛ,

²³ Cuɛ jɛ läŋ ɛlɔ̱ŋ, cuɛ wee i̱, “Ci nyaadä thia̱k kɛ lia̱a̱, kä bër, kueŋni tetdu puɔ̱nydɛ kɛ ɣöö dee puɔ̱nydɛ cu gɔaa a bɛ tëk.”

²⁴ Cu Yecu wä kɛ jɛ kɛɛl. Cu buɔ̱n mi di̱i̱t jɛ guɔ̱ɔ̱r kä cu naath ɛ miɛɛt.

²⁵ Kä te rɛydiɛn kɛ ciek mi ci cuuc kɛ löny riɛm kɛ run da̱ŋ wäl wi̱cdɛ rɛw.

²⁶ Cuɛ ti bɛ̈c bɛ̈ɛ̈c rut ɛlɔ̱ŋ kɛ lät ki̱mni ti ŋuan. Cuɛ nyinkɛ diaal thuk kɛ tho̱p, kä /kenɛ gɔaa kä cu ku tuɔ̱l ni jɛn kɛ jiääk.

²⁷ Cuɛ kɛ̈k Yecu liŋ, kä cuɛ ben kɛ jɔkdɛ kɛ rɛy bunä, kä cuɛ bi̱i̱dɛ thiap,

²⁸ kɛ ɣöö carɛ jɛ, “A cäŋ thiapä ni bi̱i̱dɛ, bi puɔ̱nydä gɔaa”.

²⁹ Kä ni ɛn guäth ɛmɔ cu löny riɛmdɛ cu juuc, kä cuɛ jek kɛ puɔ̱nydɛ ɛn ɣöö ci liawdɛ thuuk a cɛ gɔaa.

³⁰ Mëë ci Yecu ɛ jek ɛn ɣöö ci buɔ̱m jiɛɛn kä jɛ, ni ɛn guäth ɛmɔ cuɛ rɔ riet buɔ̱n, kä cuɛ wee i̱, “Ɛŋa ci bi̱i̱dä thiap ɔ?”

³¹ Cu jaakɛ jɛ loc i̱, “Ji̱n /ci buɔ̱n a dhoocɛ ji̱, kä ɛŋu thieci mɔ i̱, ‘Ɛŋa ci ɣä thiap ɔ?’ ”

³² Kä cuɛ guic kui̱cni diaal, go̱o̱rɛ ram in ci mɛmɛ la̱t.

³³ Duundɛ ɣöö min ŋäc ciek min ca lät kä jɛ, cuɛ ben, a dualɛ kä lathɛ jɛ ɛlɔ̱ŋ, cuɛ rɔɔdɛ yuɔr piny nhiamdɛ. Kä cuɛ jɛ la̱r ruac in thuɔ̱k kɛɛliw.

³⁴ Kä cu Yecu jɛ jiök i̱, “Nyaadä, ŋa̱thdu cɛ ji̱ jakä gɔaa, wër kɛ mal, kä a puɔ̱nydu puɔl.”

³⁵ Kä min ŋotdɛ kɛ ruac, cu tha̱a̱ŋ nath ben kä bo̱o̱th indaan ti wee i̱, “Ci nyaadu li̱w. Ɛŋu lɛlni ŋot kɛ mi jutdi ŋi̱i̱c ɔ?”

³⁶ Kä /ken bo̱o̱th rɔ jut kɛ ruacdiɛn, cu Yecu bo̱o̱th dolä ji̱ Juudh jiök i̱, “/Cu dual, a duŋdu la ŋa̱th kärɔa.”

³⁷ Thilɛ ram mi ci Yecu ɛ nhɔk i̱ bi jɛ guɔ̱ɔ̱r, ɛ ni Pi-tɔr, kɛnɛ Je-mɛth, kɛ Jɔ̱ɔ̱n in la däman Je-mɛth.

³⁸ Mëë cikɛ cop dhɔr bo̱o̱thä dolä ji̱ Juudh, cuɛ nuɛ̈ɛ̈n mi di̱i̱t nɛn, nɛy ti wiee kä pärkɛ kɛ jɔw mi di̱i̱t.

³⁹ Mëë cɛ wä rɛc, cuɛ kɛ jiök i̱, “Ɛŋu nuɛɛn yɛn naath ɔ kä pär yɛn ɔ? Nyam mɛ tɔt ɛmɛ /kenɛ li̱w, duŋdɛ ni̱en.”

⁴⁰ Cukɛ jɛ dɔl, kä cu Yecu nɛy diaal tuɔ̱k raar. Cuɛ gua̱n gatdä kɛnɛ man kɛ nɛy ti tekɛ jɛ kɛɛl naŋ, cukɛ wä guäth in te thi̱n.

⁴¹ Kä cuɛ tet gatdä käp, cuɛ jɛ jiök i̱, “Talitha kum,” mi lot ni ɣöö i̱, “Nyam mi tɔt, i̱ jiɛc rɔ!”

⁴² Kä ni ɛn guäth ɛmɔ cu nyal rɔ jiɛc, kä cuɛ ja̱l, (kä ɛn nyal ɛmɔ tëëkɛ run wäl wi̱cdɛ rɛw). Kɛ nɛmɛ cu naath ga̱a̱c ɛlɔ̱ŋ.

⁴³ Kä cuɛ kɛ guɔk a bum i̱ a thil ram mi bi nɛmɛ ŋa̱c, kä cuɛ la̱r kɛ i̱ ba jɛ moc kɛ mi bɛ cam.