Mak 4 - RUAC KUƆTH IN RƐL RƆ

Cäät kɛ kui̱ pi̱thä

¹ Cu Yecu ŋi̱i̱c nath nyɔk kɛ tuk gekä baar. Cu buɔ̱n nath mi di̱i̱t ɛlɔ̱ŋ rɔ dol gekädɛ kä cuɛ wä rɛy murkäbä, kä cuɛ nyuur thi̱n. Kä cu buɔ̱n nath cuɔ̱ŋ raar po̱mä.

² Cuɛ kɛ ŋi̱eec kɛ ti ŋuan kɛ cäätni, rɛy ŋi̱i̱cädɛ cuɛ kɛ jiök i̱,

³ “Liɛŋɛ jɛ, ci pi̱i̱th wä pi̱eth a kithɛ kuay.

⁴ Kä min pi̱thɛ, cu tha̱a̱ŋ kuayni pɛn dup, kä cu diit kɛ ben cam.

⁵ Cu tha̱a̱ŋkiɛn pɛn guäth päämni mi thil mun mi di̱i̱t, kä cukɛ mal do̱ny kɛ ɣöö kuiy mundɛ.

⁶ Kä mëë ci cäŋ lëp, cukɛ rɔɔl kä cukɛ kööt, kɛ ɣöö thilɛ kɛ mɛy ti gɔw.

⁷ Cu tha̱a̱ŋkiɛn pɛn rɛy jiɛn kuiyni, kä mëë ci jiɛn piith, kä cua kɛ miɛt, kä cukɛ thil dɛy.

⁸ Kä cu tha̱a̱ŋkiɛn pɛn mun mi gɔaa, cukɛ tekɛ wuɔ̱th ti gɔw. Cukɛ rɔ̱ rep kɛ jiɛn diɔ̱k, kɛ jiɛn bäkɛl, amäni kuɔ̱r.”

⁹ Kä cu Yecu kɛ jiök i̱, “Ram mi tekɛ ji̱th ti li̱ŋ kɛ jɛ, a jɛ li̱ŋ.”

Luɔt Cäätni

¹⁰ Mëë te Yecu kärɔa, cu tha̱a̱ŋ nath ti te gekädɛ kɛɛl kɛnɛ ji̱ kɔaarɛ da̱ŋ wäl rɛw jɛ thiec kɛ luɔt cäätni.

¹¹ Kä cuɛ kɛ jiök i̱, “Ca yɛ ka̱m tɛ̱̈ɛ̱̈ni kuäärä Kuɔth, duundɛ ɣöö kɛ kui̱ nɛɛni tin kɔ̱kiɛn bakɛ la̱t ŋɔak kɛ cäätni,

¹² kɛ ɣöö ‘Dee kɛ guic, kä /ci kɛn luɔtdɛ bi jek, kä dee kɛ liɛŋ, kä /cɛ bi cop lo̱cnikiɛn, kɛ ɣöö dɔ̱ŋ dee kɛ rɔ̱ ri̱t dueeri, a ba kɛ pälikä.’ ”

¹³ Kä cuɛ kɛ thiec i̱, “/Ken ruac cäätdä nɛmɛ cop lɔɔcdun? Kä bia cäätni diaal kulɛ cop lo̱cnikun i̱di?

¹⁴ Ci pi̱i̱th pith ni ruac Kuɔth.

¹⁵ Kä ce̱t tha̱a̱ŋ nath kɛ kuay tin ci pɛn dup, gua̱a̱th in ca riet piɛth. Kä niɛ guäth in ca ruac liŋ, cu Cɛy-tan ben, cuɛ ruac in ca piɛth rɛydiɛn ben woc.

¹⁶ Kä ce̱t nɛy tin kɔ̱ŋ kɛ, kuay tin ci pɛn muun päämni, kä cua ruac Kuɔth liŋ, kä pɛ̈th cu kɛn ɛ käp kɛ tɛ̈th lɔaac.

¹⁷ Kä duundɛ ɣöö min /ken riet rɔ yiath piny, bikɛ te rɛydiɛn kɛ gua̱a̱th mi tɔt. Kä mi wä rik kɛnɛ ti bɛ̈c bɛ̈ɛ̈c wä ben kɛ kui̱ ruac Kuɔth, ni ɛn guäth ɛmɔ cukɛ kac jɔk.

¹⁸ Kä ce̱t kuay tin ci pɛn rɛy jiɛn kuiyni kɛ nɛy tin ca ruac liŋ,

¹⁹ kä duundɛ ɣöö cu diɛɛr kɛ kui̱ nyinä wec muɔ̱ɔ̱n kɛnɛ gör riäŋä ɣɔaa, amäni di̱t lɔaac kɛ ŋɔaani kɔ̱kiɛn ben, cukɛ ruac Kuɔth ben miɛt, kä cukɛ thil dɛy ti cua kuir.

²⁰ Kä ce̱t kuay tin ci pɛn muun mi gɔaa kɛ nɛy tin ca ruac liŋ, kä ka̱pkɛ jɛ kɛ lo̱ckiɛn kä kuiɛrkɛ dɛy. Kä cukɛ rɔ̱ rep kɛ jiɛn diɔ̱k, kɛ jiɛn bäkɛl, amäni kuɔ̱r kɛl.”

Lɛmbär piny diëny

²¹ Kä cu Yecu kɛ jiök i̱, “Ci raan lɛmbär mi pɛt kɔŋ nööŋ rɛc kä bɛ jɛ kuɔ̱m piny kɛ di̱eny, kiɛ derɛ jɛ la̱th thaar dhaŋä, a /cɛ jɛ dee la̱th nhial wi̱i̱ kä duɔ̱ɔ̱r?

²² Kɛ ɣöö thilɛ duɔ̱ɔ̱r mi ca tɛ̱̈ɛ̱̈, mi /ci bi jɔɔc, kä thilɛ mi ca kum, mi /ca bi ŋa̱c.

²³ A ram mi tekɛ ji̱th ti li̱ŋ kɛ jɛ, a jɛ li̱ŋ!”

²⁴ Kä cuɛ kɛ jiök i̱, “Tiɛtdɛ rɔ̱ kɛ tin yɛn kɛ, kɛ ɣöö pek theemä min la yɛ a them naath, ba jɛ thëm yɛ, kä ba yɛ rep kɛ ti ŋuan.

²⁵ Kɛ ɣöö ram mi tekɛ duɔ̱ɔ̱r, ba jɛ ma̱t ti ŋuan, kä ram mi thil duɔ̱ɔ̱r, a cäŋɛ min tɔt in tekɛ jɛ, ba jɛ ka̱n kä jɛ.”

Cäät kuɛɛkä mi ci piith

²⁶ Kä cu Yecu wee i̱, “Ce̱t ciaŋ kuäärä Kuɔth kɛ ram mi ci kuay kiɛth rɛy kakä,

²⁷ La tɔ̱ɔ̱cɛ kɛ wäär, kä bɛ keer kɛ runwaŋ, kä cu kuay do̱ny kä cikɛ piith, kä kui̱cɛ jɛ pithkɛ i̱di.

²⁸ Ɛn mun puɔ̱nydɛ cuɛ kɛ jak kä do̱ny kä cukɛ tekɛ dɛy. Kɛ nhiam cu kɔŋ jɔɔc ni taŋdɛ, kä cu ji̱thkɛ jɛ guɔ̱ɔ̱r, kä cu wäŋkɛ cu ben.

²⁹ Kä min cikɛ ciɛk, ni ɛn guäth ɛmɔ, cuɛ ŋɔ̱mdɛ ka̱n, kɛ ɣöö ci gua̱a̱th ŋër cop.”

Cäät kuɛɛkä mi tɔt

³⁰ Cu Yecu kɛ thiec, “Dëë ciaŋ kuäärä Kuɔth pa̱a̱r kɛ ŋu? Kiɛ ɛ cäät in mith dënɛ lat kɛ kui̱dɛ mɔ?

³¹ Ce̱tdɛ kɛ kuɛ̈ɛ̈ mi duŋ tiit, mi kuiy ni jɛn kä kuay diaal tin piɛthkɛ wi̱i̱ muɔ̱ɔ̱n.

³² Kä mɔ ca jɛ pithɔ, bɛ di̱t a bɛ buɔ̱tbuɔ̱ɔ̱tni diaal leny, a bɛ tekɛ kar ti di̱t ti dee diit nhial duëlkiɛn la̱t ti̱pädɛ.”

³³ Cuɛ ruac Kuɔth la̱t naath kɛ cäätni ti ce̱tkɛ ti̱ti̱, cuɛ la̱tkɛ ce̱tkɛ min dee kɛnɛ liŋ.

³⁴ Jɛn /cɛ ruac kɛ kɛ a /ci mɔ a cäätni. Kä cuɛ ti diaal la̱t jaakɛ, mëë tekɛ kärɔ̱.

Guɔ̱k Yecu kɛ Jiɔm

³⁵ Kä kɛ cäŋ ɛmɔ kɛ thiaŋ cuɛ jaakɛ jiök i̱, “Wanɛ kui̱ci.”

³⁶ Kä cukɛ buɔ̱n nath ba̱ny piny, cukɛ rɛy murkäbä min te Yecu nyuurä thi̱n, kä cukɛ jɛ naŋ kɛɛl kɛ kɛ, kä te tha̱a̱ŋ murkäbni kɔ̱kiɛn thi̱n bä.

³⁷ Cu thul mi di̱i̱t puɔ̱t, kä cu muaŋ murkäb yɔ̱k, a cu murkäb dee thia̱a̱ŋ kɛ pi̱.

³⁸ Kä te Yecu ni̱n thaar murkäbä a cɛ ca̱k kɛ cääk. Kä cukɛ jɛ wä ker, wäkɛ i̱, “Ŋi̱i̱c, ji̱n /ci riɛk kɛ lia̱a̱da?”

³⁹ Cu Yecu keer, kä cuɛ jiɔm luek, kä cuɛ muaŋ jiök i̱, “Käpni rɔ cuɔ̱ŋ!” Cu jiɔm cuɔ̱ŋ, kä cuɛ piny käp ɛ kur.

⁴⁰ Kä cuɛ ji̱ kɔaarɛ jiök i̱, “Ɛŋu dual kɛ yɛ mɔ? Ŋot yɛn thilɛ yɛ ŋa̱th?”

⁴¹ Cukɛ dual ɛlɔ̱ŋ, kä cukɛ ruac kärɔ i̱, “Ɛŋa ɛ nɛ, a cäŋɛ ni jiɔm kɛnɛ muaŋ, liŋ kɛn ruacdɛ?”