Mak 3 - RUAC KUƆTH IN RƐL RƆ

Wut mi cɛ tetdɛ Niŋ

¹ Cu Yecu lɛni wä rɛy duëël dolä ji̱ Juudh, kä te wut mi cɛ tetdɛ niŋ thi̱n.

² Cu nɛy diaal Yecu di̱el guec kɛ ɣöö görkɛ jɛ bikɛ jɛ gɔany mi derɛ tetdɛ jakä gɔaa kɛ cäŋ lɔ̱ŋä.

³ Kä cuɛ wut in cɛ tetdɛ niŋ jiök i̱, “Bër wanɛ mɛ.”

⁴ Kä cuɛ kɛ thiec i̱, “Ɛ mith la cuɔ̱ɔ̱ŋ ɔ, ɛn ɣöö ba la̱t mi gɔaa la̱t kɛ cäŋ lɔ̱ŋä, kiɛ la̱t mi jiääk? Gɔaa ni ɣöö ba raan tek, kiɛ gɔaa ni lia̱a̱dɛ?” Kä cukɛ biɛt.

⁵ Cuɛ kɛ guic kɛ waŋ lɔaac, kä cu lɔcdɛ jiath kɛ buɔ̱m wecdiɛn. Kä cuɛ wut indaan jiök i̱, “Riny tetdu!” Cuɛ jɛ riny, kä cu tetdɛ cu gɔaa.

⁶ Cu ji̱ Pa-ri-thii wä raar, kä ɛn guäth ɛmɔ cukɛ wä ruac kɛ ji̱ Ɣe-ro-diɛn kɛ kui̱dɛ, kɛ ɣöö görkɛ näkdɛ.

Bun nath gekä Yiëër

⁷ Cu Yecu jiɛɛn kɛnɛ jaakɛ, wädiɛn baar, kä cu nɛy ti ŋuan jɛ guɔ̱ɔ̱r kä Gɛ̈-lɛ-li.

⁸ Cu nɛy ti ŋuan ti bëë kä Ju-dia, kɛnɛ Jɛ-ru-tha-lɛm, kɛ I-du-mia, kɛ kui̱c Jɔr-dɛn amäni Dhor kɛnɛ Dhi-don ben kä jɛ, kɛ ɣöö cikɛ lätkɛ ti di̱t diaal tin cɛ la̱t liŋ.

⁹ Kä cuɛ ruac kɛ ji̱ kɔaarɛ kɛ ɣöö dëë murkäb rialikä, kɛ kui̱dɛ, kɛ ɣöö ci buɔ̱n di̱t a lo̱kɛ ɣöö dëë jɛ miɛɛt däär,

¹⁰ kɛ ɣöö cɛ nɛy ti ŋuan jakä gɔw. Kɛ kui̱ ɛmɔ cu ji̱ jua̱thni jɛ kok, kɛ ɣöö görkɛ ɣöö bɛ kɛ thiap.

¹¹ Gua̱thni diaal mɔ ci yiey ti jiäk jɛ nɛn ɔ, la kɛn rɔ̱ a yor piny nhiamdɛ, kä bikɛ cu rɔal i̱, “Ɛ ji̱n Gat Kuɔth!”

¹² Kä cuɛ kɛ dhil gok a bum kɛ ɣöö, kɛ ɣöö /cikɛ jɛ bi jak kä ŋa̱ckɛ.

Ciöt Yecu kɛ jaak da̱ŋ wäl rɛw

¹³ Kä cu Yecu wä wi̱i̱ pa̱a̱m, kä cuɛ nɛy tin go̱o̱rɛ cɔl, kä cukɛ ben kä jɛ.

¹⁴ Cuɛ nɛy da̱ŋ wäl rɛw kuany tin cɔɔlɛ bä i̱ jaak, kɛ ɣöö bikɛ te kɛɛl kɛ jɛ. Kä cuɛ kɛ jäkä raar kɛ ɣöö ba ruac Kuɔth wä lat,

¹⁵ kɛnɛ ɣöö bikɛ tekɛ lua̱ŋ mi wuɔckɛ kuth ti jiäk.

¹⁶ Kä ti̱ti̱ kɛ kɛn nɛy da̱ŋ rɛw tëë cɛ kuany, (Thay-mɔn min cɔal kɛ i̱ Pi-tɔr),

¹⁷ kɛ Je-mɛth kɛnɛ däman ni Jɔ̱ɔ̱n gaat Dhɛ-ba-dii da̱ŋ rɛw ti cɔɔl Yecu kɛ i̱ “Bo-nɛr-ji̱th” min lot ni ɣöö gaat ma̱rä nhial,

¹⁸ kɛ An-dɛ-röw, kɛnɛ Pi-lip, kɛ Bar-tho-lo-miw, kɛ Mɛ̈-thiw kɛnɛ Tɔ-mäth, kɛ Je-mɛth gat Ɛ̈l-pi-uth kɛnɛ Thɛ̈-diäth, kɛ Thay-mɔn raan Kay-nan,

¹⁹ amäni Ju-däth Ith-kɛ̈-ri-ɔt, ëë cu Yecu kɔak.

Yecu kɛnɛ Beel-dhi-bul

²⁰ Kä cu Yecu wä dueel, kä cu buɔ̱n rɔ lɛni nyɔk kɛ ben, a cu Yecu kɛnɛ ji̱ kɔaarɛ thil gua̱a̱th mi dee mi̱th kɛ kɛ.

²¹ Kä mëë ci ciëëŋ mani jɛ liŋ, cukɛ wä kɛ ɣöö bikɛ jɛ wä nööŋ, kɛ ɣöö ruac naath i̱, “Ci wi̱cdɛ nyuɔɔn”.

²² Cu ji̱ gɔ̱rä tëë bä kä Jɛ-ru-tha-lɛm wee i̱, “Ca wut ɛmɛ käp ɛ Beel-dhi-bul, kä jocɛ kuth ti jiäk raar kɛ buɔ̱m kua̱r Kuthni jiäkni”.

²³ Kä cu Yecu kɛ cɔl, kä cuɛ ruac kɛ kɛ kɛ cäätni i̱, “Dee Cɛy-tan, Cɛy-tan tuɔ̱k raar i̱di?

²⁴ Kä mi ci kuäär rɔ da̱a̱k kärɔa a bɛ te tɛr ɛn kuäär ɛmɔ /cɛ dee cuɔ̱ŋ.

²⁵ Kä mi ci gɔl rɔ da̱a̱k a tëë gɛ̈m kärɔa, ɛn gɔl ɛmɔ /cɛ rɔ dee luäŋ kɛ cuɔ̱ŋ.

²⁶ Kä mi ci Cɛy-tan gaak kärɔaadɛ, kä cɛ rɔ da̱a̱k, /cɛ dee cuɔ̱ŋ, derɛ a jɛn guutdɛ.

²⁷ Thilɛ ram mi dee coth dueel raam mi bum bum, a bɛ nyinkɛ wä ka̱n, ɛ ni mi cɛ ram in bum bum kɔŋ yian kɛ nhiam, kɛ kɔrɛ derɛ duelɛ kulɛ pɛc.

²⁸ “Ɛpuc ɣän la̱rä jɛ yɛ, ba naath pa̱l dueerkiɛn diaal kɛnɛ tin jiäk tin ci kɛn kɛ lät kä Kuoth.

²⁹ Kä /ca ram mi kueth Yiëë in Gɔaa in Rɛl Rɔ bi met pälikä. Duundɛ ɣöö cɛ duer kɛ duer mi thil pek.”

³⁰ Cu Yecu nɔmɔ lar kɛ ɣöö cikɛ jɛ lar i̱, “Tëë kɛ yiëë mi jiääk.”

Ciëŋ mani Yecu tin thuɔ̱ɔ̱k

³¹ Cu man Yecu kɛnɛ gaatmani ben, kä cukɛ cuɔ̱ŋ raar, cukɛ jɛ jäk kä raan mi cu jɛ cɔl.

³² Kä te buɔ̱n nath mi di̱i̱t nyuurä gekädɛ. Cukɛ jɛ jiök i̱, “Nɛnɛ, muɔɔr kɛnɛ gaatmuɔɔr a raar, görkɛ ji̱.”

³³ Kä cuɛ kɛ loc i̱, “Ɛŋa la maar ɔ? Kä kɛ ŋaani la gaatmaari tɔ̱?”

³⁴ Kä min guicɛ nɛy ti te gekädɛ, cuɛ wee i̱, “Nɛ̈nɛ jɛ, nɛy ti̱ti̱ kɛ kɛn maar kɛnɛ gaatmaari.

³⁵ Ram ɔ lät ni ruac Kuɔthɔ, ɛ jɛn dämaar kä ɛ nyimaar, kä ɛ maar.”