Mak 2 - RUAC KUƆTH IN RƐL RƆ

Jak Yecu kɛ ram mi cɛ nuäŋ kä gɔaa

¹ Mëë cɛ loc kä Ka-pɛr-ni-äm kɛ kɔr ni̱ni ti tɔt, cu ruac wä raar ɛn ɣöö te Yecu cieŋ.

² Kä cu nɛy ti ŋuan rɔ̱ duɔ̱l jɛ a cuɛ thil gua̱a̱th ni cu duɔth kɛ kui̱ nɛɛni tin kɔ̱ŋ amäni thok duëël. Kä lät Yecu kɛ ruaacni Kuɔth.

³ Cu tha̱a̱ŋ nath ben, nöŋkɛ jɛ wut mi cɛ nuäŋ, kapkɛ jɛ ɛ wutni da̱ŋ ŋuan.

⁴ Kä min /cikɛ jɛ dee luäŋ kɛ naŋ gekädɛ kɛ kui̱ rilä nath, cukɛ wi̱c duëël puɔth. Kä mëë cikɛ gua̱a̱th lɛp wi̱i̱dɛ, cukɛ wut in cɛ nuäŋ luay piny kɛ galɛ.

⁵ Kä mëë ci Yecu ŋa̱thdiɛn nɛn, cuɛ wut in cɛ nuäŋ jiök i̱, “Gatdä, ca dueerku päl.”

⁶ Täämɛ, te tha̱a̱ŋ ji̱ gɔ̱rä nyuurä dueel, cärkɛ kɛ lo̱ckiɛn i̱,

⁷ “Ɛŋu ruac wut ɛmɛ inɔ mɔ? Kuethɛ ni Kuoth! Ɛŋa mi dee dueer pälikä, /ciɛ ni Kuoth kärɔa?”

⁸ Kä niɛ min ci Yecu ɛ ŋa̱c kɛ yiëëdɛ ɛn ɣöö thiëckɛ rɔ̱ kamnikiɛn, cuɛ kɛ jiök i̱, “Ɛŋu thiëcɛ rɔ̱ inɔ mɔ kɛ lo̱ckun?

⁹ Thia̱k ni mith, ɛ ɣöö ba wut ɛ cɛ nuäŋɛ jiök i̱, ‘Ca dueerku päl’ kiɛ ɛ ɣöö ba jɛ jiök i̱, ‘Jiɛc rɔ, käni ko̱lu, kä jäli’?

¹⁰ Kä ɛ ɣöö bia jɛ ŋa̱c i̱ te Gat Ran kɛ lua̱ŋ wi̱i̱ muɔ̱ɔ̱n kɛ ɣöö bɛ dueer päl.” Kä cuɛ wut ëë cɛ nuäŋ jiök i̱,

¹¹ “Ɣän la̱rä jɛ ji̱, jiɛc rɔ, kä käni ko̱lu, kä wër dhɔru.”

¹² Cuɛ rɔ jiɛc, kä niɛ guäth ɛmɔ cuɛ ko̱lɛ kap, kä cuɛ wä raar nhiamdiɛn diaal, kä cu kɛn diaal ma̱a̱r. Cukɛ Kuoth liak wäkɛ, i̱ “/Ken nɛy mi ce̱tkɛ nɛmɛ met nɛn!”

Ciöt Yecu kɛ Lii-bay

¹³ Cu Yecu lɛni wä ja̱l gekä baar. Cu naath diaal rɔ̱ duɔ̱l jɛ, kä cuɛ kɛ ŋi̱eec.

¹⁴ Kä min jälɛ, cuɛ Lii-bay gat Ɛ̈l-pi-uth nɛn, nyuurɛ gua̱th thandukä tho̱lbo̱kä, kä cuɛ jɛ jiök i̱, “Guuri ɣä.” Cuɛ rɔɔdɛ jiɛc, kä cuɛ jɛ guɔ̱ɔ̱r.

¹⁵ Kä min nyuurɛ guäth mi̱eth dueel Lii-bay, te thuɔ̱ɔ̱l tho̱lbo̱kä kɛnɛ ji̱ dueeri ti ŋuan nyuurä kɛɛl kɛ Yecu kɛnɛ ji̱ kɔaarɛ, kɛ ɣöö guɔ̱ɔ̱rkɛ jɛ ɛ nɛy ti ŋuan.

¹⁶ Mëë ci gɔa̱a̱r Pa-ri-thii jɛ nɛn ɛn ɣöö mi̱th Yecu kɛɛl kɛ ji̱ dueeri kɛnɛ thuɔ̱ɔ̱l tho̱lbo̱kä, cukɛ ji̱ kɔaarɛ thiec i̱, “Ɛŋu mi̱th Yecu kɛɛl kɛ thuɔ̱ɔ̱l tho̱lbo̱kä kɛnɛ ji̱ dueeri?”

¹⁷ Mëë ci Yecu mɛmɛ liŋ, cuɛ kɛ jiök i̱, “Nɛy tin puɔl pua̱nykiɛn /cikɛ ki̱m go̱r, kɛ ji̱ jua̱thni görkɛ jɛ mɔ. /Ka̱n ben kɛ ɣöö bä ji̱ cuŋni cɔl, ba̱a̱ kɛ kui̱ ji̱ dueeri.”

Thiec kɛ kui̱ thekä mi̱thni

¹⁸ Ɛn guäth ɛmɔ ji̱ kɔaar Jɔ̱ɔ̱n kɛnɛ ji̱ Pa-ri-thii thɛ̈kɛ mi̱th, kä cu naath ben kä Yecu, kä cua jɛ thiec i̱, “Ɛŋu thek ji̱ kɔaar Jɔ̱ɔ̱n kɛnɛ ji̱ Pa-ri-thii kɛ mi̱thɔ, kä /ci ji̱ kɔaaru mi̱th thɛk?”

¹⁹ Kä cu Yecu kɛ jiök i̱, “A dee ja̱a̱l kuën mi̱th ku thɛk, kä te cɔ nyaal kɛ kɛ kɛɛl? Min ŋot cɔ nyaal kɛ kɛ kɛɛl, /cikɛ mi̱th dee thɛk.

²⁰ Bi ni̱n ben tin ba woc ni cɔ nyaal rɛydiɛn, kä bikɛ mi̱th thɛk ɛn cäŋ ɛmɔ.

²¹ “Thilɛ ram mi dee bi̱i̱ mi pay kɔk, kä /ken rɔ jop, kɔc kɛnɛ bi̱i̱ mi ci dɔŋ. Kä mi cɛ jɛ la̱t inɔ, dee bi̱i̱ in pay kɔk rɔ cuk, a bɛ rɔ rɛt kä bi̱i̱ in dɔaaŋ, a bɛ rɛɛtdɛ jak kä di̱t ɛlɔ̱ŋ.

²² Kä thilɛ ram mi dee kɔaŋ mi pay dhim piɛk rɛy göökni guup ti ci dɔŋ, kɛ ɣöö mi derɛ jɛ la̱t inɔ, dee kɔaŋ göök pät, kä dee kɔaŋ kɛnɛ göök cu jiääk. Kä dëë kɔaŋ in pay dhim piɛk rɛy göökni guup ti pay kɔc.”

Kuäär Ca̱ŋ Lɔ̱ŋä

²³ Kɛ cäŋ lɔ̱ŋä kɛl, cu Yecu rët kɛ rɛy ka̱a̱kni bɛɛl, cu ji̱ kɔaarɛ jɛ tok kɛ mi tölkɛ wuɔ̱th bɛɛl, min wäkɛ kɛ ja̱l.

²⁴ Kä cu ji̱ Pa-ri-thii Yecu thiec i̱, “Nɛnɛ, ɛŋu la̱tkɛ mi /ci rɔ lat ɔ kɛ cäŋ lɔ̱ŋä?”

²⁵ Kä cuɛ kɛ jiök i̱, “A /ken yɛn mëë ca la̱t ɛ Dee-bid ku met kuɛn? Mëë go̱o̱rɛ mi̱eth, mëë ci buɔth ɛ näk, kɛnɛ nɛɛkɛ tëë tekɛ jɛ kɛɛl?

²⁶ Cuɛ wä rɛy luaak Kuɔth, mëë Ɛb-ya-thar ɛ jɛn la bo̱o̱th palä in di̱i̱t, kä cuɛ juray nhiam Kuɔth cam. Min /ci ro̱ŋ kɛ ɣöö dëë cam ɛ naath, ɛ ni bööth palä kärɔ̱ dee jɛ camɔ, kä cuɛ tha̱a̱ŋdɛ ka̱m nɛɛkɛ tëë tekɛ jɛ kɛɛl.”

²⁷ Kä cuɛ kɛ jiök i̱, “Ca cäŋ lɔ̱ŋä la̱t kɛ kui̱ ran, a /ciɛ raan ca la̱t ɔ kɛ kui̱ Ca̱ŋ Lɔ̱ŋä.

²⁸ Kä inɔ Gat Ran ɛ jɛn Kuäär, amäni cäŋ lɔ̱ŋä bä.”