Mak 16 - RUAC KUƆTH IN RƐL RƆ

Jiëc Yecu Li̱th

¹ Mëë ci cäŋ lɔ̱ŋä ji̱ Juudh thuuk, cu Mɛri, raan Mag-da-la, kɛnɛ Mɛri man Je-mɛth, kɛ Tha-lo-mi wal ti tekɛ ŋuäny mi gɔaa kɔk, kɛ ɣöö dee kɛ puɔ̱ny Yecu wä yi̱r.

² Mëë ruɔ̱n kɛ runwaŋ kɛ cäŋ in jio̱liɛn kä juɔk, cukɛ ben guäth kunykä min ci cäŋ käny.

³ Kä ruackɛ kärɔ̱ wäkɛ i̱, “Ɛŋa mi bi päm wä rial thok kɔ̱kä kɛ kui̱dan?”

⁴ Kä mëë cikɛ gui̱c, cukɛ jɛ nɛn ɛn ɣöö ca päm in di̱i̱t rial thok kɔ̱kä.

⁵ Mëë cikɛ coth guäth kunyä, cukɛ ŋuɛ̈t mi ciɛŋ bi̱i̱ mi bo̱r nɛn, nyuurɛ kui̱c cuëëc, kä cukɛ ga̱a̱c.

⁶ Duundɛ ɣöö cuɛ kɛ jiök i̱, “/Cuarɛ ga̱a̱c. Go̱o̱r yɛn ni Yecu, raan Na-dha-rɛth mëë ca pua̱t jiaath. Ca jɛ jiɛc li̱th, thilɛ jɛ ɛn wanɛ. Guɛcɛ gua̱a̱th ëë ca jɛ tɔa̱a̱c thi̱n.

⁷ Duundɛ ɣöö wiaa jiökɛ ji̱ kɔaarɛ kɛ Pi-tɔr, ɛn ɣöö cɛ wä nhiam kä yɛ cɛ wä kä Gɛ̈-lɛ-li. Bia jɛ wä nɛn ɛn wi̱ni, ce̱tkɛ mëë cɛ la̱r yɛ.”

⁸ Kä cukɛ ben raar, cukɛ rɔ̱ bar guäth kunyä, kɛ ɣöö cɛ kɛ lath kä cikɛ ga̱a̱c. Thilɛ ruac mi cu kɛn ɛ la̱t naath kɛ ɣöö dualkɛ. [

Nyuth Yecu kɛ rɔ Mɛri Mag-da-la

⁹ Täämɛ, mëë ci Yecu rɔ jiɛc li̱th kɛ cäŋ in jio̱l kä juɔk kɛ runwaŋ, cuɛ rɔ nyuɔ̱th Mɛri raan Mag-da-la kɛ nhiam, mëë cɛ yiey da̱ŋ bärɔw ti jiäk woc puɔ̱nydɛ.

¹⁰ Kä jɛn cuɛ mɛmɛ wä la̱t nɛy tëë te kɛɛl kɛ Yecu, kä cuɛ kɛ jek a pärkɛ kä wieekɛ.

¹¹ Kä mëë ci kɛn ɛ liŋ ɛn ɣöö Yecu tëkɛ a ca jɛ nɛn ɛ Mɛri /ken kɛn ɛ ŋäth.

Nyuth Yecu kɛ rɔ jaak da̱ŋ rɛw

¹² Kɛ kɔr kä mɔmɔ cuɛ rɔɔdɛ nyuɔ̱th ji̱ kɔaarɛ da̱ŋ rɛw tëë jäl dup kɛ ta̱a̱ mi dɔ̱diɛn.

¹³ Cukɛ loc jɔk, kä cukɛ jɛ wä la̱r ji̱ kɔaarɛ tin kɔ̱kiɛn, kä /ka̱n ruacdiɛn ŋäth bä.

Nyuth Yecu kɛ rɔ jaak da̱ŋ wälkɛl

¹⁴ Kɛ kɔr kä mɔmɔ, mëë te jaak da̱ŋ wäl wi̱cdɛ kɛl guäth mi̱eth, cuɛ päl nhiamdiɛn. Kä cuɛ kɛ luek kɛ ɣöö thilɛ kɛ ŋa̱th kä bum wuɔ̱thkiɛn, kɛ ɣöö ca ruac nɛɛni tëë ca Yecu nɛn lo̱k, mëë cɛ rɔ jiɛc li̱th.

¹⁵ Kä cuɛ kɛ jiök i̱, “Wiaa rɛy ɣɔaa kɛɛliw kä la̱tdɛ thuk Kuɔth ti gɔw nɛy diaal wi̱i̱ muɔ̱n.

¹⁶ Kä ramɔ ŋääth kɛ mɔ, kä ca lak bɛ kään. Kä ramɔ /cikɛ bi ŋäthɔ, ba jɛ duäc.

¹⁷ Kä bi nyuuthni ti ga̱ykɛ naath ti̱ti̱ ben jɔɔc kɛ ji̱ ŋäthä. Bikɛ kuth ti jiäk woc kɛ ciötdä, kä bikɛ ruac kɛ thuk ti gööl.

¹⁸ Bikɛ thɔ̱ɔ̱l käp, kä mi mathkɛ mi deekɛ luɛŋ, /cikɛ bi li̱w. Bikɛ tetkiɛn kuëŋ pua̱nyni ji̱ jua̱thni, kä bikɛ kɛ jakä gɔw.”

Naŋ Yecu nhial

¹⁹ Mëë ci Kuäär ni Yecu ruac kɛ kɛ inɔ, cua jɛ naŋ nhial, kä cuɛ wä nyuur kui̱c cuëëc Kuɔth.

²⁰ Cukɛ jiɛɛn, kä cukɛ ruac Kuɔth wä lat gua̱thni diaal, kä lät Kuäär ni Kuoth kɛ kɛ kɛɛl, kä nyoothɛ jɛ ɛn ɣöö ruaacni ti̱ti̱ kɛ thuɔ̱ɔ̱k kɛ lätni kä ti ga̱ykɛ naath. Inɔnɔ.]