Mak 15 - RUAC KUƆTH IN RƐL RƆ

Yecu nhiam Pay-lɛt

¹ Mëë ci ɣɔw a runwaŋ, cu bööth palä tin di̱t kɛnɛ di̱t, kɛ ji̱ gɔ̱rä kɛ kua̱r luɔ̱ɔ̱kni diaal rɔ̱ dol kɛ ruac. Cukɛ Yecu yiɛn, cu kɛn ɛ naŋ, cua jɛ wä ka̱m kuäär ni Pay-lɛt.

² Cu Pay-lɛt Yecu thiec i̱, “Ɛ ji̱n Kuäär ji̱ Juudh?” Kä cuɛ jɛ loc i̱, “Ɣɔ̱ɔ̱n, ci jɛ lar.”

³ Kä cu bööth palä tin di̱t jɛ gɔany kɛ ti ŋuan.

⁴ Cu Pay-lɛt Yecu nyɔk kɛ thiec i̱, “Thilɛ mi looci? Nɛn ŋɔaani ti ŋuan ti gɔanykɛ ji̱ ti.”

⁵ Kä cuɛ thil mi dɔ̱ŋ mi cu Yecu ɛ loc. Kä ɛnɔ cu Pay-lɛt ga̱a̱c.

Kuɛth Yecu Li̱th

⁶ Täämɛ, kɛ cäŋ ti̱mä Bälä la Pay-lɛt ram kɛl kä ji̱ yieenä mi ca thiec ɛ naath a luny kɛ.

⁷ Kä tëëkɛ wut mi cɔal i̱ Bä-ra-bäth mi te yieenä, kɛ ɣöö cɛ raam näk rɛy rɔlä.

⁸ Cu buɔ̱n ben kä Pay-lɛt kä cukɛ jɛ tok kɛ thiec kɛ ɣöö bɛ kɛ lät kä min la lätdɛ ni wen.

⁹ Cu Pay-lɛt kɛ loc i̱, “Go̱o̱rɛ yɛn ɣöö bä yɛ luɔ̱ny Kuäär ji̱ Juudh?”

¹⁰ Kɛ ɣöö ci Pay-lɛt ɛ ŋa̱c ɛn ɣöö no̱o̱ŋ bööth palä tin di̱t nhiamdɛ kɛ kui̱ tiilä.

¹¹ Kä cu bööth palä tin di̱t buɔ̱n nath com, ɛn ɣöö ba luɔ̱ny ni kɛ Bä-ra-bäth a /ci mɔ a Yecu.

¹² Cu Pay-lɛt kɛ nyɔk kɛ jiök i̱, “Kä bä ŋu lät kä jɛ ɛn ram in la yɛn ɛ a cɔɔl i̱ Kuäär ji̱ Juudh?”

¹³ Kä cukɛ rɔal kɛ jɔw mi di̱i̱t i̱, “Pua̱tdɛ jɛ jiaath!”

¹⁴ Cu Pay-lɛt kɛ thiec i̱, “Ɛ kui̱ ŋukä? Kä ɛ mi jiääk ŋukä cɛ la̱t ɔ?” Kä cukɛ rɔal ɛlɔ̱ŋ wäkɛ i̱, “Pua̱tdɛ jɛ jiaath!”

¹⁵ Kɛ ɣöö go̱o̱r Pay-lɛt ɣöö bi buɔ̱n lɔcdɛ tɛɛth, cuɛ kɛ luɔ̱ny Bä-ra-bäth. Kä kɛ kɔr kä mëë cɛ Yecu duäc, cuɛ jɛ ka̱m kɛ, kɛ ɣöö ba jɛ wä pua̱t jiaath.

Buɔ̱y lathkëëri kɛ Yecu

¹⁶ Cu lathkëëri Yecu naŋ rɛy kal dhɔaar kua̱r. Cukɛ rɔ̱ cɔl kɛn diaal.

¹⁷ Cukɛ Yecu rony kɛ bi̱i̱ mi bäär mi mɛr, kä mëë ca kum kuiyni tak, cukɛ jɛ la̱th wi̱cdɛ.

¹⁸ Cukɛ jɛ tok kɛ ner, wäkɛ i̱, “Malɛ Kuäär ji̱ Juudh!”

¹⁹ Cukɛ wi̱cdɛ yɔ̱t kɛ kɛɛt, kä cukɛ jɛ ŋul kä ruɛy, kä cukɛ rɔ̱ ka̱m mua̱a̱l ce̱tkɛ mi luɔ̱thkɛ ni jɛ.

²⁰ Mëë ci kɛn ɛ buy, cukɛ bi̱i̱ in mɛr woc puɔ̱nydɛ. Kä cukɛ jɛ rony kɛ bieynikɛ. Cukɛ jɛ naŋ raar kɛ ɣöö ba jɛ wä pua̱t jiaath.

Puɔ̱t Yecu Jiaath

²¹ Mëë cikɛ röm kɛ jääl mi cɔal i̱ Thay-mɔn, raan rööl Thay-rin, mi la gua̱n A-lek-dhan-der kɛnɛ Ru-päth, cukɛ jɛ kok i̱ bɛ jiath in wa Yecu puɔ̱t thi̱n kap.

²² Cukɛ Yecu nööŋ guäth mi cɔal i̱ Gɔl-gö-tha, (min luɔtdɛ ɣöö gua̱a̱th po̱o̱rä).

²³ Cukɛ jɛ ka̱m kɔaŋ mi ca liɔm kɛ wäl mi kɛ̈c kɛ̈ɛ̈c, kä cuɛ kɛ lo̱k.

²⁴ Cukɛ jɛ pua̱t jiaath, kä cukɛ bieynikɛ da̱a̱k kamnikiɛn kɛ kɛ yor gaakni, kɛ ɣöö ba min bi ramɔ jɛ ka̱n ŋa̱c.

²⁵ Kä ɛn guäth ɛmɔ kɛ runwaŋ cukɛ jɛ pua̱t jiaath a /ken thɔal ca̱ŋ ni cop.

²⁶ Kä cukɛ cio̱o̱k kä min gɔanykɛ ni jɛ gɔ̱r i̱, “Kuäär ji̱ Juudh.”

²⁷ Kä cua wutni ti ma̱a̱c nath da̱ŋ rɛw pua̱t kɛ jɛ kɛɛl, ca kɛl pua̱t cueecdɛ, kɛ kɛl caamdɛ. [

²⁸ Kä ɛnɔ cu ruaacni Kuɔth ti ca gɔ̱r a thuɔ̱k, tin wee i̱, “Cua jɛ mat kɛɛl kɛ ji̱ dueeri.”]

²⁹ Kä cu nɛy tin jäl kɛ duɔ̱ɔ̱p jɛ buy, tɛ̈ŋkɛ wuɔ̱thkiɛn wäkɛ i̱, “Aɣ, ji̱n ram mi dee luaak Kuɔth däk, kä cuuŋi jɛ kɛ ni̱n da̱ŋ diɔ̱k.

³⁰ Ji̱n, kän rɔɔdu, kä bër piny wi̱c jiaath!”

³¹ Kä kɛ jɛn duɔ̱ɔ̱p ɛmɔ cu bööth palä tin di̱t kɛnɛ ji̱ gɔ̱rä jɛ buy kamnikiɛn wäkɛ i̱, “Cɛ nɛy kɔ̱kiɛn kän, kä /cɛ rɔɔdɛ luäŋ kɛ ka̱n.

³² A Mɛ-thia, Kuäär ji̱ I-thɛ-rɛl, ku ben piny täämɛ wi̱c jiaath, kɛ ɣöö mi dëë kɔ jɛ nɛn kä dëëkɛ jɛ ŋäth.” Kä cu nɛy tin ca pua̱t kɛ jɛ kɛɛl jɛ yäp bä.

Lia̱a̱ Yecu

³³ Mëë ci ɣɔw a cäŋ däär, cu ɣɔw cuɔl kɛɛliw cu mäni thaak diɔ̱k.

³⁴ Kä mëë ci cäŋ rɔ buɔ̱k, cu Yecu ciöt kɛ jɔw mi di̱i̱t i̱, “Ɛloi, Ɛloi, lama thabakthanay?” mi lot ni ɣöö, “Kuothdä, Kuothdä, ɛŋu ci ɣä ba̱ny piny ɔ?”

³⁵ Mëë ci tha̱a̱ŋ nath ti te cuŋä jɛ liŋ, cukɛ wee i̱, “Liɛŋɛ jɛ, cɔlɛ ni E-li-yaa.”

³⁶ Cu ram kɛl riŋ, cuɛ li̱pa mi ci thia̱ŋ kɛ kɔaŋ mi kɛc wä nööŋ, cuɛ jɛ kuëŋ wi̱i̱ taŋ, cuɛ jɛ ka̱m ɛ, kɛ ɣöö bɛ jɛ lot. Cukɛ wee i̱, “Li̱epɛ, guɛcnɛ jɛ mi bi E-li-yaa jɛ ben ka̱p piny.”

³⁷ Kä cu Yecu wak kɛ jɔw mi di̱i̱t, cuɛ yiëëdɛ min jɔak cu ŋök raar.

³⁸ Kä cu bi̱i̱ luaak Kuɔth in di̱i̱t rɛ̈ɛ̈t ni däär, ni wi̱i̱dɛ amäni piny.

³⁹ Kä mëë ci kuäär rɛ̈m ëë te cuŋä nhiam Yecu jɛ nɛn i̱ cɛ muɔn, cuɛ wee i̱, “Ɛpuc, wut ɛmɛ ɛ Gat Kuɔth!”

⁴⁰ Kä te män thi̱n bä ti gui̱c ɛ na̱n. Te Mɛri raan Mag-da-la thi̱n, kɛnɛ Mɛri man Je-mɛth gatdɛ in tɔtdiɛn, kɛnɛ Jo-thɛth, kɛ Tha-lo-mi.

⁴¹ Kɛ kɛn män tëë guɔ̱ɔ̱rkɛ Yecu kä Gɛ̈-lɛ-li, kä cukɛ jɛ lätikä, kä te män ti ŋuan kɔ̱kiɛn thi̱n bä tëë ci wä kä Jɛ-ru-tha-lɛm kɛ jɛ kɛɛl.

Kuɔ̱ny Yecu

⁴² Mëë ci ɣɔw a thiaŋ, kɛ ɣöö ɛ cäŋ mi rialkɛ ŋɔak ikä kɛ jɛ, min la cäŋ in nhiam a /ken cäŋ lɔ̱ŋä ni ben,

⁴³ cu Jo-thɛp, raan A-ri-ma-thia mi la raan luɔ̱ɔ̱kni kä luɔ̱thkɛ ɛ naath wä kä Pay-lɛt a thil dual, mi liip ben kuäärä Kuɔth. Cuɛ puɔ̱ny Yecu wä thiec kä Pay-lɛt.

⁴⁴ Kä cu Pay-lɛt ga̱a̱c kɛ ɣöö ci Yecu ku thuŋ li̱w. Kä cuɛ kuäär rɛ̈m cɔl, cuɛ jɛ thiec mi ci Yecu ku thuŋ li̱w.

⁴⁵ Kä mëë cɛ jɛ jek kä kuäär rɛ̈m ɛn ɣöö ci Yecu li̱w, cuɛ puɔ̱nydɛ ka̱m Jo-thɛp.

⁴⁶ Cu Jo-thɛp bi̱i̱ mi puɔth mi gɔaa kɔk. Kä cuɛ puɔ̱ny Yecu ka̱p piny, kä cuɛ jɛ rith kɛ bi̱i̱ mi gɔaa. Kä cuɛ jɛ wä tɔa̱a̱c rɛy kɔ̱kä mi ca guaŋ puɔ̱ɔ̱ny pa̱a̱m ni wen. Kä cuɛ thok kɔ̱kä dil kɛ päm.

⁴⁷ Kä cu Mɛri raan Mag-da-la, kɛnɛ Mɛri man Jo-thɛth, gua̱a̱th ëë ca jɛ tɔa̱a̱c thi̱n nɛn.