Mak 14 - RUAC KUƆTH IN RƐL RƆ

Ca̱p go̱rä na̱k Yecu

¹ A ŋot ni̱n da̱ŋ rɛw jɔ̱ɔ̱r kɛ ɣöö bi Cäŋ Bälä cop, kɛnɛ cäŋ ti̱mä mi̱eth mi thil thuɔp. Cu bööth pälä tin di̱t kɛnɛ ji̱ gɔ̱rkä gua̱a̱th mi dëë käp ni Yecu go̱r kɛ tɛ̱̈ɛ̱̈, kɛ ɣöö deekɛ jɛ näk.

² Kä cukɛ wee i̱, “/Canɛ jɛ bi käp ɛn guäth ti̱mkä nɔmɔ, amäni mi dɔ̱ŋ dee rɔal tuɔɔk kam ni nath.”

Yi̱er Yecu kä Beth-ani

³ Mëë te Yecu kä Beth-ani dueel Thay-mɔn mi tekɛ dhɔp, min tëë nyuurä guäth mi̱eth, cu ciek ben kä jɛ, kɛ cuk mi tekɛ yi̱eer mi ŋuäny kä di̱t kökdɛ ɛlɔ̱ŋ. Cuɛ kuum cukä lɛp, kä cuɛ yi̱eer tiɛth wi̱c Yecu.

⁴ Kä te tha̱a̱ŋ nath thi̱n ti cu gaak kamdiɛn, wäkɛ i̱, “Ɛŋu ŋarkɛ yi̱eer ɛmɛ ŋarɔ i̱ nɔ mɔ?

⁵ Kɛ ɣöö dëë yi̱eer ɛmɔ kɔak kɛ yio̱w ti la̱nykɛ yio̱w ti kur diɔ̱k, kä dëë kɛ ka̱m can.” Kä cukɛ ciek ya̱a̱m ɛlɔ̱ŋ.

⁶ Cu Yecu kɛ jiök i̱, “Pa̱lɛ jɛ. Ɛŋu jut yɛn ɛ mɔ? Jɛn cɛ ɣä lät kä mi gɔaa ɛlɔ̱ŋ.

⁷ Ta̱yɛ kɛɛl kɛ nɛy ti can ni ciaŋ, kä dërɛ kɛ lät kä ti gɔw kɛ gua̱a̱th ɛ cia go̱rɔ, kä /ci ɣän bi te kɛɛl kɛ yɛ ni ciaŋ.

⁸ Ci ciek ɛmɛ la̱t ni min derɛ la̱t, kɛ ɣöö cɛ puɔ̱nydä yi̱r a ŋuɔtdä /ka̱n ɣä ni kony.

⁹ Kä ɛpuc ɣän la̱rä jɛ yɛ, gua̱th diaal tɔ̱ ba thuk Kuɔth ti gɔw lat thi̱n ɔ rɛy ɣɔaa kɛɛliw, ba mɛ ci ciek ɛmɛ jɛ la̱t ɛ lat kɛ kui̱ ti̱mädɛ.”

Nhök Ju-däth kɛ ɣöö bɛ Yecu kɔak

¹⁰ Kä cu Ju-däth Ith-kɛ̈-ri-ɔt, ram kɛl kä jaak da̱ŋ wäl rɛw, wä kä bööth palä tin di̱t, kɛ ɣöö bɛ Yecu wä kök kɛ.

¹¹ Mëë cikɛ jɛ liŋ, cu lo̱ckiɛn tɛɛth, kä cukɛ jɛ lar ɛn ɣöö ba jɛ moc yio̱w. Kä cu Ju-däth gua̱a̱th go̱r kɛ ɣöö bɛ jɛ kɔak.

Ca̱m Yecu kɛ mi̱eth Ca̱ŋ Bälä kɛnɛ ji̱ kɔaarɛ

¹² Kɛ cäŋ in jio̱l kɛ gua̱a̱th ti̱mä mi̱eth mi thil thuɔp, cäŋ ëë na̱kɛ rueeth deet Cäŋ Bälä, cu jaakɛ jɛ thiec i̱, “Ɛ gua̱a̱th in mi̱th go̱o̱ri mɔ i̱ bakɔ mi̱eth Ca̱ŋ Bälä wä rialikä kɛ kui̱du thi̱n ɔ?”

¹³ Cuɛ jaakɛ da̱ŋ rɛw ja̱k, cuɛ kɛ jiök i̱, “Wiaa wi̱c, kä bia röm kɛ wut mi kap pi̱w kɛ dhaar, guɔ̱ɔ̱rɛ jɛ.

¹⁴ Kä duel in bɛ wä thi̱n, jiökɛ gua̱ndɛ ɛn ɣöö, ‘Ci Ŋi̱i̱c thiec i̱, “Duel ja̱a̱li anikä, min dëë mi̱eth Ca̱ŋ Bälä wä cam thi̱n kɔnɛ jaakä?” ’

¹⁵ Bɛ yɛ nyuɔ̱th duel mi di̱i̱t mi te nhial, mi ca rialikä. Ɛn gua̱a̱th ɛmɔ bia ŋɔaani rialikä thi̱n.”

¹⁶ Cu jaak tɛth piny, cukɛ ben wi̱c, kä cu kɛn ɛ jek ce̱tkɛ min ca la̱rkɛ. Cukɛ mi̱eth Ca̱ŋ Bälä rialikä.

¹⁷ Mëë ci ɣɔw a thiaŋ, cuɛ ben kɛnɛ jaak da̱ŋ wäl rɛw.

¹⁸ Kä min cikɛ nyuur kä mi̱thkɛ cu Yecu kɛ jiök i̱, “Ɛpuc, ɣän la̱rä jɛ yɛ, bi ram kɛl kä yɛ ɣä kɔak, ram mi mi̱th kɛ ɣä kɛɛl.”

¹⁹ Cu lo̱ckiɛn jiath ɛlɔ̱ŋ, kä cukɛ jɛ thiec kɛ̈l kɛ̈ɛ̈li i̱, “Ɛ puc /ciɛ ɣän?”

²⁰ Kä cuɛ kɛ jiök i̱, “Ɛ ram kɛl kä yɛn da̱ŋ wäl rɛw, ɛ jɛn ram in jio̱m rɛy tokä kɛ ɣä kɛɛl.

²¹ Kɛ ɣöö wä Gat Ran, ce̱tkɛ min ca gɔ̱r kɛ kui̱dɛ, kä riɛk akɛ ram in bi Gat Ran kɔak! Kä kɛ kui̱dɛ ɛn ram ɛmɔ, dee gɔaa ni mi /ka̱n jɛ dap.”

Mi̱eth Kua̱r ni Kuoth in jɔak

²² Kä min mi̱thkɛ, cuɛ juray ka̱n, cuɛ jɛ poth, kä cuɛ jɛ puɔ̱ny, kä cuɛ jɛ ka̱m jaakɛ wëë i̱, “Ka̱nɛ jɛ, mɛmɛ ɛ puɔ̱nydä.”

²³ Kä cuɛ liɛɛr ka̱n bä, kä cuɛ tɛ̈th lɔaac lar, cuɛ jɛ ka̱m kɛ, kä cu kɛn diaal maath thi̱n.

²⁴ Cuɛ kɛ jiök i̱, “Nɛmɛ ɛ riɛmdä ma̱tdä ruac, mi ci lo̱ny kɛ kui̱ nɛɛni ti ŋuan.

²⁵ Ɛpuc, ɣän la̱rä jɛ yɛ, /cä jɛ bi met nyɔk kɛ ma̱th kɛ jɛn liɛɛr ɛmɛ, amäni mi wä cäŋ ɛmɔ ben min bä nyɔk kɛ ma̱th cieŋ kuäärä Kuɔth.”

Ma̱r Yecu kɛ ga̱k Pi-tɔr kɛ jɛ

²⁶ Mëë cikɛ dit puɔnyä kɛt, cukɛ wä wi̱i̱ Pa̱a̱m Ɔ-lip.

²⁷ Cu Yecu kɛ jiök i̱, “Bi yɛn diaal kac jɔk kä ɣä, kɛ ɣöö ca jɛ gɔ̱r i̱, ‘Ɣän bä yieen deet näk, kä bi rɔɔm cu riaw dɔɔr.’

²⁸ Kä mi wa ɣä jiɛc li̱th, ɣän bä wä kä Gɛ̈-lɛ-li kɛ nhiam kä yɛ.”

²⁹ Cu Pi-tɔr ɛ jiök i̱, “Cäŋ bi kɛn nɛy diaal kac jɔk, /ci ɣän bi kac jɔk.”

³⁰ Kä cu Yecu jɛ jiök i̱, “Ɛpuc ɣän la̱rä jɛ ji̱, ɛn wäär ɛmɛ pa̱ny, a ŋot /ken tuut manpalɛ̈k ni röt kä rɛɛw, bi ɣä gak nikä diɔ̱ɔ̱k.”

³¹ Kä cu Pi-tɔr jɛ jiök i̱, “Cäŋ bä li̱w kɛ ji̱ kɛɛl, /cä ji̱ bi gak.” Kä cu jaak tin kɔ̱kiɛn diaal lat ni mi ce̱tkɛ nɔ.

Pal Yecu kä Gɛ-thɛ-ma-ni

³² Cukɛ wä gua̱a̱th mi cɔal i̱ Gɛ-thɛ-ma-ni, kä cuɛ jaakɛ jiök i̱, “Nyuɔ̱ɔ̱rɛ wanɛ mɛ, wa̱a̱ pal.”

³³ Cuɛ Pi-tɔr kɛnɛ Je-mɛth kɛ Jɔ̱ɔ̱n naŋ kɛ jɛ kɛɛl, kä cuɛ tok kɛ mi yi̱cɛ wi̱cdɛ kä jiɛth lɔcdɛ.

³⁴ Cuɛ kɛ jiök i̱, “Lɔcdä jiɛthɛ ɛlɔ̱ŋ a näkɛ ɣä. Duɔthɛ wanɛ mɛ, kä ta̱yɛ jinä.”

³⁵ Kä min cɛ wä nhiam kä mi tɔt, cuɛ rɔ yuɔr piny, kä cuɛ pali, mi lotdɛ rɔ /ci cuɔ̱c ɛmɛ dee ben kä jɛ.

³⁶ Kä cuɛ wee i̱, “Abba, Gua̱di̱n, ŋɔak diaal lua̱ŋkɛ rɔ̱ kä ji̱. Woc liɛɛr ɛmɛ kä ɣä, kä /ci mɔ a min göörä, ɛ min go̱o̱ri.”

³⁷ Cuɛ luny jɔk cuɛ kɛ ben jek a ni̱n, kä cuɛ Pi-tɔr jiök i̱, “Thay-mɔn, ti̱i̱ ni̱n? Ji̱n /ci dee ji̱n kɛ thaak kɛl?

³⁸ Jiɛnɛ, kä palɛ kɛ ɣöö /cia bi pɛn rɛy ɣɔmä. Yiëë go̱o̱rɛ la̱tdɛ, kä puɔ̱ny nyuänɛ.”

³⁹ Cuɛ lɛni loc jɔk, kä cuɛ wä la̱ŋ a nyɔkɛ rieet tin wen.

⁴⁰ Kä cuɛ luny jɔk cuɛ kɛ ben jek ni̱n, kɛ ɣöö cɛ wäŋkiɛn kum kɛ ni̱en ɛlɔ̱ŋ, kä cukɛ min dee kɛn ɛ la̱r jɛ kui̱c.

⁴¹ Cuɛ rɔ lɛni nyɔk kɛ ben kä kɛ kɛ diɔ̱ɔ̱kdiɛn. Cuɛ kɛ jiök i̱, “Yɛn ŋuɔtdɛ kɛ ni̱en kä lɔ̱a̱ŋɛ? Cɛ ro̱ŋ! Ci gua̱a̱th cop, kä nɛ̈nɛ jɛ, ca Gat Ran kɔat tetni ji̱ dueeri.

⁴² Jiacɛ rɔ̱, wanɛ. Kä nɛ̈nɛ jɛ, ci ram in kɔk ɣä thia̱k.”

Ka̱p Yecu kɛnɛ Göönykɛ

⁴³ Ni ɛn guäth ɛmɔ pa̱ny, min ŋot Yecu kɛ ruac, cu Ju-däth ram kɛl kä jaakɛ da̱ŋ wäl wi̱cdɛ rɛw ben kɛnɛ buɔ̱n nath ti jäl kɛ thɛpni kɛnɛ kɛtni, ti ca ja̱k ɛ bööth palä tin di̱t, kɛnɛ ji̱ gɔ̱rkä kɛ di̱t.

⁴⁴ Täämɛ cu ram in kɔk jɛ naath nyuɔ̱th ca̱p ɛmɛ, wëë i̱, “Ɛn ramɔ wa̱a̱ cim ɔ, ɛ jɛn, ka̱pɛ jɛ kä buathɛ jɛ raar kä yiënɛ jɛ.”

⁴⁵ Cuɛ ben, kä cuɛ wä kä Yecu nikä kɛɛl, kä cuɛ jɛ ner i̱, “Ŋi̱i̱c,” kä cuɛ jɛ cim.

⁴⁶ Cukɛ jɛ käp a bum kɛ tetkiɛn.

⁴⁷ Kä cu ram kɛl mi te cuŋä gekä Yecu thɛpdɛ guëëth raar, kä min cɛ kuany bööthni palä in di̱i̱t yɔ̱t, cuɛ ji̱thdɛ yup.

⁴⁸ Kä cu Yecu kɛ jiök i̱, “Täämɛ, bä yɛn kɛ thɛpni kɛnɛ kɛtni kɛ ɣöö bia ɣä ben käp, ce̱tkɛ mi ɛ ɣän määc nath?

⁴⁹ Cäŋ ɔ kɛ cäŋ ɔ la ta̱a̱ kɛɛl kɛ yɛ ŋi̱eecä naath rɛy luaak Kuɔth, kä /ken yɛn ɣä käp. Duundɛ ɣöö ɛ ruaacni Kuɔth tëë ca gɔ̱r kua̱ thuɔ̱k.”

⁵⁰ Kä cu ji̱ kɔaarɛ diaal jɛ ba̱ny piny kä cukɛ rɔ̱ bar.

⁵¹ Kä cua jɛ guɔ̱ɔ̱r ɛ ŋuɛ̈t mi ciɛŋ bi̱i̱ mi puɔth. Cukɛ jɛ käp,

⁵² duundɛ ɣöö cuɛ kɛ ba̱ny bi̱i̱ cuɛ rɔ bar juutdä.

Yecu nhiam ji̱ luɔ̱k

⁵³ Cukɛ Yecu naŋ nhiam bo̱o̱thä palä in di̱i̱t, kä cu bööth palä diaal tin di̱t kɛ di̱t ji̱ Juudh, kɛ ji̱ gɔ̱rkä rɔ̱ dol.

⁵⁴ Cu Pi-tɔr jɛ guɔ̱ɔ̱r a na̱n, amäni wädɛ rɛy kal bo̱o̱thä palä in di̱i̱t. Cuɛ nyuur kɛnɛ yiëën kɛɛl, ɣɔ̱ɔ̱cɛ mac.

⁵⁵ Täämɛ cu bööth palä tin di̱t kɛnɛ kua̱r luɔ̱k diaal mi dëë gɔny ni Yecu go̱r, kɛ ɣöö dëë jɛ näk, kä thilɛ mi ci kɛn ɛ jek.

⁵⁶ Kä cu nɛy ti ŋuan jɛ cäkikä, duundɛ ɣöö /ken ruacdiɛn a kɛl.

⁵⁷ Cu tha̱a̱ŋ nëëni rɔ̱ jiɛc, kä cukɛ jɛ cäkikä, wäkɛ i̱,

⁵⁸ “Cakɔ jɛ liŋ, wëë i̱, ‘Ɣän bä luaak Kuɔth in la̱tkɛ kɛ tet nath däk, kä kɛ ni̱n da̱ŋ diɔ̱k bä ti̱c dɔ̱diɛn la̱t, mi /ca bi cuŋ kɛ tet nath.’ ”

⁵⁹ Kä cäŋɛ jɛn inɔ, /ken ruacdiɛn a kɛl.

⁶⁰ Cu bo̱o̱th palä in di̱i̱t rɔ jiɛc nhiam nath, kä cuɛ Yecu thiec i̱, “Thilɛ mi looci? Ɛŋu mi gɔanykɛ ji̱ ɛ nɛy ti̱ti̱ mɔ?”

⁶¹ Kä cuɛ biɛt a thilɛ mi cuɛ loc. Kä cu bo̱o̱th palä in di̱i̱t jɛ nyɔk kɛ thiec i̱, “Ɛ ji̱n Mɛ-thia in la Gat Kuɔth in ca poth?”

⁶² Cu Yecu jɛ jiök i̱, “Ɛ jɛn ɣän, kä bia Gat Ran nɛn a nyuurɛ cueec Kuɔth in Leny Buɔ̱mdɛ ti Diaal, kä bɛ ben piny kɛ pua̱a̱r nhial.”

⁶³ Cu bo̱o̱th palä in di̱i̱t bieynikɛ rɛ̈t, kä cuɛ wee i̱, “Ɛŋu lɛ̈nɛ go̱r nëën kɔ̱kiɛn ɔ?

⁶⁴ Cia kuethnidɛ kɛ Kuoth liŋ! Ɛŋu mi caar yɛn ɛ?” Cu kɛn diaal ɛ kuɛth i̱ ro̱ŋɛ kɛ lia̱a̱.

⁶⁵ Kä cu tha̱a̱ŋkiɛn ɛ tok kɛ mi ŋuɔ̱lkɛ nhiamdɛ kä ruɛy. Cukɛ nyinkɛ kum kɛ bi̱i̱, kä pi̱emkɛ jɛ, jio̱k kɛn ɛ i̱, “Mar ram ɔ ci ji̱ pi̱m ɔ!” Cu yiëën jɛ naŋ, kä cukɛ jɛ pi̱em.

Ga̱k Pi-tɔr kɛ Yecu

⁶⁶ Min te Pi-tɔr nyuurä rɛy kal, cu nyam mi la läät bo̱o̱thä palä in di̱i̱t ben.

⁶⁷ Mëë cɛ Pi-tɔr nɛn ɣɔ̱ɔ̱cɛ rɔ kɛ mac, cuɛ jɛ di̱el guic, kä cuɛ jɛ jiök i̱, “Ji̱n bä, ti̱i̱ kɛɛl kɛ Yecu, raan Na-dha-rɛth.”

⁶⁸ Kä cuɛ jɛ gak, wëë i̱, “Kuecä mɔ latdi mɔ, kä /cɛ cup lɔɔcdä bä.” Kä cuɛ wä cuɔ̱ŋ thok kal. Kä cu tuut manpalɛ̈k röt.

⁶⁹ Cu nyam ɛ nɛn ɛn wani, kä cuɛ nɛy ti bä kɛ li̱eŋ tok kɛ mi jio̱kɛ kɛ i̱, “Wut ɛmɛ ɛ ram kɛl kä kɛ.”

⁷⁰ Kä cu Pi-tɔr ɛ nyɔk kɛ mi gakɛ jɛ. Kɛ kɔr gua̱th mi tɔt cu nɛy ti bä kɛ li̱eŋ Pi-tɔr jiök i̱, “Ɛpuc, ji̱n lapi ram kɛl kä kɛ, kɛ ɣöö ɛ ji̱n raan Gɛ̈-lɛ-li.”

⁷¹ Cu Pi-tɔr ɛ tok kɛ mi biitdɛ rɔ, kä yaacɛ rɔ i̱, “Ɣän kuecä jɛn wut ɛ ruac yɛn kɛ kui̱dɛ mɔ.”

⁷² Kä ni ɛn guäth ɛmɔ cu tuut manpalɛ̈k röt kɛ lul in rɛwdɛ. Kä cu Pi-tɔr ɛ tim ɛn ɣöö ci Yecu ɛ la̱r jɛ i̱, “A ŋot /ken tuut manpalɛ̈k röt kä rɛɛw, bi ɣä gak ni kä diɔ̱ɔ̱k.” Kä cu Pi-tɔr wiee ɛlɔ̱ŋ.