Mak 13 - RUAC KUƆTH IN RƐL RƆ

Ruac Yecu kɛ kui̱ däkä luaak Kuɔth

¹ Min jiɛy Yecu luaak Kuɔth, cu raan kɔaarɛ jɛ jiök i̱, “Ŋi̱i̱c, nɛn pääm ti di̱t ti̱ti̱ kɛnɛ ti̱ec ti di̱t ti̱ti̱!”

² Cu Yecu jɛ jiök i̱, “Nɛɛni ti̱ec ti di̱t ti̱ti̱? Thilɛ päm kɛl mi bi duɔth wanɛ mɛ wi̱i̱ pa̱a̱m dɔ̱diɛn, a /ca bi kuɛr piny.”

Rik kɛnɛ ciaaŋ jiäkni

³ Min ci Yecu nyuur wi̱i̱ Pa̱a̱m Ɔ-lip lotdä luaak Kuɔth, cu Pi-tɔr kɛnɛ Je-mɛth kɛ Jɔ̱ɔ̱n kɛnɛ An-dɛ-röw jɛ thiec a tekɛ kärɔ̱.

⁴ Cukɛ jɛ jiök i̱, “Läri jɛ kɔ ɛn cäŋ ɛmɔ ba nɛy, kä bi nyuuth benä kä kɛn ti diaal ti̱ti̱ a ŋu?”

⁵ Cu Yecu jɛ tok kɛ mi lär jɛ kɛ i̱, “Niɛkɛ rɔ̱ kɛ ɣöö thilɛ ram mi bi yɛ buath jɔ̱ɔ̱r.

⁶ Bi nɛy ti ŋuan ben kɛ ciötdä, a wä i̱, ‘Ɛ ɣän!’ Kä bikɛ nɛy ti ŋuan buath jɔ̱ɔ̱r.

⁷ Mi wiaa ko̱o̱ri kɛnɛ thuk ko̱o̱r liŋ, a wuɔ̱thkun /cɛ yi̱c, nɛmɛ bɛ dhil tuɔɔk, kä ŋot guut.

⁸ Bi do̱rɔ nyiëëny kɛ do̱rɔ, kä bi kuäärɔ nyiëëny kɛ kuäärɔ. Bɛ tekɛ lath piɛny gua̱thni, kä bi ɣɔw tekɛ buaath ti di̱t. Kɛn ti̱ti̱ diaal bikɛ ce̱tnikɛ tuk bɛ̈c mäcni däpä gatdä.

⁹ “Niɛkɛ rɔ̱ kɛ kɛ, kɛ ɣöö bi nɛy tɔ̱tɔ̱ yɛ naŋ guäth luɔ̱ɔ̱kni, kä ba yɛ duäc gua̱th pali ji̱ Juudh. Bia cuɔ̱ŋ nhiam ruëëcni kɛnɛ kua̱r kɛ kui̱ cio̱tädä, ala nyuuth kä kɛ.

¹⁰ Kä ba thuk Kuɔth ti gɔw dhil la̱t döör diaal kɛ nhiam.

¹¹ Mi wa yɛ wä yiɛn kä naŋkɛ yɛ luɔ̱k, /cuarɛ diɛɛr kɛ nhiam kɛ min bia lar, latdɛ min ba ka̱m yɛ ɛn guäth ɛmɔ, kɛ ɣöö /ci mɔ a yɛn kɛn tin bi ruac, kä ɛni jɛn Yiëë in Gɔaa in Rɛl Rɔ.

¹² Bi raan dämani gɔany li̱th kä bi wutni gaatkiɛn kɔak, kä bi gaat tekɛ tɛ̈r kɛ diëëthkiɛn, kä bi kɛn kɛ jakä li̱w.

¹³ Ba yɛ nyir ɛ nɛy diaal kɛ kui̱ cio̱tädä, kä ba ram min te dhieel amäni pek teekädɛ kän.”

Lär rikni ti bi ben

¹⁴ “Mi wä yɛn mi jiääk ɛlɔ̱ŋ mi bi Kuoth ɛ lo̱k nɛn guäth mi /ci mɔ a gua̱a̱thdɛ, (a cup lɔɔc raam mi kuɛɛn nɛmɛ), a nɛy diaal tin cieŋ kä Ju-dia rɔ̱ barkɛ wuɔ̱thni päämni.

¹⁵ A ram mi te wi̱i̱ duëël /ci lɛ ben piny, a bɛ wä rɛy duëël kɛ ɣöö bɛ nyinkɛ ka̱n.

¹⁶ Kä a ram mi te rɛy kakä /ci loc wi̱c kɛ ɣöö bɛ bi̱i̱dɛ wä ka̱n.

¹⁷ Kä bɛ a riɛk kä män tin ruët kɛnɛ tin lueth ɛn ni̱ni tɔ̱tɔ̱!

¹⁸ Palɛ Kuoth kɛ ɣöö /ci nɛmɛ bi ben kɛ jiɔam.

¹⁹ Kɛ ɣöö ɛn ni̱ni tɔ̱tɔ̱ bɛ tekɛ cuɔ̱c mi di̱i̱t ɛlɔ̱ŋ, mi /ka̱n met nɛn ni tukä ɣɔaa mëë cak Kuoth ɛ amäni täämɛ, kä /cɛ bi lɛ met nyɔk.

²⁰ Kä mi /ken Kuoth ni̱n tɔ̱tɔ̱ jakä kuiy, thilɛ ram kɛl mi dee kään. Kä cɛ ni̱n tɔ̱tɔ̱ jakä kuiy, kɛ kui̱ nɛɛnikɛ ti cɛ mɛk.

²¹ Kä ɛn guäth ɛmɔ mi wëë tekɛ ram mi wä yɛ jiök i̱, ‘Nɛnɛ, Mɛ-thia ɛn!’ Kiɛ bɛ wee i̱, ‘Guɛcɛ jɛ, jɛn ni̱n!’ /Cuarɛ ruacdɛ liŋ.

²² Bi mɛthiani kɛnɛ go̱o̱k ka̱a̱cni jɔɔc, kä bikɛ nyuuthni kɛnɛ ti ga̱ykɛ naath la̱t, kɛ ɣöö mi tekɛ kɛ lua̱ŋ bikɛ nɛy ti ca mɛk buath jɔ̱ɔ̱r.

²³ Kä niɛkɛ rɔ̱! Cä yɛ la̱r ti̱ti̱ kɛ nhiam.”

Ben Gatdä Ran

²⁴ “Kä ɛn ni̱ni tɔ̱tɔ̱, kɛ kɔr cu cä ɛmɔ, bi cäŋ a muth, kä /ci pay bi lɛ̈p,

²⁵ Kä bi ciɛr pën nhial, kä ba buɔ̱m buɔ̱ɔ̱m nhial yɔ̱k.

²⁶ Kä bikɛ Gat Ran nɛn a bëë piny kɛ pua̱a̱r kɛ buɔ̱m mi di̱i̱t kɛnɛ gɔɔy puɔnyä.

²⁷ Bɛ ja̱a̱k nhial jäk kä raar, bikɛ nɛɛkɛ tin cɛ mɛk wä ruɔ̱ɔ̱l kui̱cni da̱ŋ ŋuan diaal pek piɛny amäni nhial.”

Ŋi̱i̱c kɛ kui̱ jiaath ŋɔa̱a̱p

²⁸ “Carɛ ruac cäätdä jiaath ŋɔa̱a̱p. Mëë ci yuan kɛ kɔ̱a̱c, kä ci ji̱thkɛ tunh ŋa̱cɛ jɛ ɛn ɣöö ci ruel thia̱k.

²⁹ Kä inɔ bä, mi wä ŋɔak ti̱ti̱ tuɔɔk bia cu ŋa̱c ɛn ɣöö ci gua̱a̱th thia̱k, a cɛ cop thukni duëli.

³⁰ Ɛpuc, ɣän la̱rä jɛ yɛ, /ci ri̱c ɛmɛ bi thuuk a /ken ŋɔak ti̱ti̱ diaal ni tuɔɔk.

³¹ Bi nhial kɛnɛ piny thuuk, kä /ci ruaacnikä bi met thil.”

Thilɛ ram mi ŋäc cäŋ kiɛ thaak

³² “Thilɛ ram mi ŋäc cäŋ ɛmɔ kiɛ thaak ɛmɔ, a cäŋɛ ni ja̱a̱k nhial, kiɛ Gat, ŋäcɛ ni Gua̱a̱r in te nhial kärɔa.

³³ Niɛkɛ rɔ̱, kä ta̱yɛ jinä, kɛ ɣöö kui̱c yɛn gua̱a̱th benädɛ.

³⁴ Ce̱t ta̱a̱dɛ kɛ mi ci wut wä ja̱l. Mëë jiɛyɛ cieŋ, cuɛ nyinkɛ la̱th tetni la̱a̱tnikɛ, cuɛ ramɔ ka̱m la̱tdɛ, kä cuɛ ruac kɛ gääŋ thuɔk rɛ̈ɛ̈k kɛ ɣöö bɛ guic agɔaa.

³⁵ Kɛ kui̱c ɛmɔ, ta̱yɛ jinä, kɛ ɣöö kuecɛ gua̱a̱th in bi ben kɛ gua̱n ciëŋ, mi ɛ thiaŋ kiɛ wäärdär, kiɛ bakä kiɛ runwaŋ.

³⁶ Kä mi cɛ mal ben /cɛ yɛ bi jek ni̱n.

³⁷ Kä mɛ cä la̱t yɛ mɛ, la̱tdä jɛ nɛy diaal i̱, ‘Ta̱yɛ jinä!’ ”