Mak 12 - RUAC KUƆTH IN RƐL RƆ

Cäät läätdä mi jiääk

¹ Cu Yecu jɛ tok kɛ mi ruacɛ kɛ kɛ, kɛ cäätni ti̱ti̱, cuɛ wee i̱, “Cu wut kɛl kak wal kɛ kui̱ kɔaŋ pith. Cuɛ jɛ rɛk kä cuɛ gua̱a̱th nhiecä kɔaŋ tɛt rɛydɛ, kä cuɛ dhaŋ mi bäär kɛ kui̱ yien bɛɛl la̱t rɛydɛ. Kä cuɛ kak ba̱ny pi̱eeth wal, kä cuɛ wä ro̱o̱l dɔ̱diɛn.

² Mëë ci gua̱a̱th ciɛkädiɛn cop, cuɛ raan la̱tdɛ jäk kä pi̱eeth kakä, kɛ ɣöö kui̱dɛ kä dɛy wal kakä wä nööŋ.

³ Kä cukɛ jɛ käp, cukɛ jɛ duäc, kä cukɛ jɛ jakä loc jɔk baaŋ.

⁴ Cuɛ kɛ lɛni nyɔk kɛ jäk kä läät dɔ̱diɛn. Mëë cɛ ben kä kɛ, cukɛ jɛ duäc wi̱i̱dɛ, kä cukɛ jɛ yak.

⁵ Cuɛ kɛ jäk kä radɔ̱diɛn bä, kä cukɛ jɛ näk. Kä cua jɛn min cua lät kä nɛy kɔ̱kiɛn ti ŋuan. Cukɛ tha̱a̱ŋkiɛn duäc, kä cukɛ tha̱a̱ŋkiɛn näk.

⁶ Cu ŋot ni ram kɛl cieŋ min la gatdɛ min nhɔkɛ. Cuɛ jɛ jäk kä kɛ kɛ jɔak, wëë i̱, ‘Bikɛn gatdä luɔ̱th.’

⁷ Kä cu pi̱eeth kakä ruac kärɔ̱ i̱, ‘Nɛmɛ ɛ jɛn gatdɛ min bi nyinkɛ guäl, bia kuanɛ jɛ näk, kɛ ɣöö banɛ nyinkɛ cu ka̱n.’

⁸ Cukɛ jɛ käp, cukɛ jɛ näk, kä cukɛ jɛ yuɔr raar rɛy kakä wal kɛ kui̱ kɔaŋ.

⁹ Ɛŋu mi bi gua̱n kakä kɛ kui̱ kɔaŋ ɛmɔ jɛ la̱t? Bɛ ben kä bɛ ji̱ pi̱thä diaal tɔ̱tɔ̱ näk, kä bɛ kak wal kɛ kui̱ kɔaŋ ka̱m nɛy kɔ̱kiɛn.

¹⁰ /Ka̱nɛ ruac ɛmɛ kuɛn i̱, ‘Päm ëë ca lo̱k ɛ ta̱a̱th duëli, Ɛ jɛn ci ben a päm gɔŋtɔtdä mɔ.

¹¹ Nɛmɛ ɛ la̱t Kua̱r ni Kuoth kä ɛ mi gääy nëndɛ naath’?”

¹² Kä cukɛ käpdɛ go̱r kɛ ɣöö cikɛ jɛ mir ɛn ɣöö latdɛ cäät ɛmɛ kɛ kui̱diɛn, kä duundɛ ɣöö cukɛ dual kɛ buɔ̱n. Kä ɛnɔ cukɛ jɛ ba̱ny piny cukɛ jiɛɛn.

Thiec kɛ kui̱ tho̱pä tho̱lbo̱kä

¹³ Kä cukɛ jɛ jäk kä tha̱a̱ŋ ji̱ Pa-ri-thii kɛnɛ ji̱ Ɣɛ-rod, kɛ ɣöö bikɛ jɛ bi̱m kɛ kui̱ ruacdɛ.

¹⁴ Mëë cikɛ ben, cukɛ jɛ jiök i̱, “Ŋi̱i̱c, ŋa̱ckɔ jɛ ɛn ɣöö ɛ ji̱n gua̱n thukä kä /ci riɛk kɛ raan. Kä ciɛŋi nɛy diaal a päär, kɛ ɣöö nyuthi naath ruac Kuɔth kɛ thuɔ̱k. Gɔaaɛ ɛn ɣöö ba Thii-thɛr luɔ̱ny tho̱lbo̱k, kiɛ /cɛ gɔaa?

¹⁵ Dëëkɔ jɛ luɔ̱ny jɛ, kiɛ /ca̱kɔ jɛ bi luɔ̱ny jɛ?” Kä kɛ ɣöö ŋäc Yecu ca̱riɛn, cuɛ kɛ jiök i̱, “Ɛŋu ɣɔ̱n yɛn ɣä mɔ? Nöŋɛ ɣä yiëëth, a bä jɛ ben nɛn.”

¹⁶ Cukɛ jɛ nöŋ yiëëth, kä cuɛ kɛ thiec i̱, “Ɛ wi̱c kɛnɛ ciöt ŋa ɛn ca gɔ̱a̱r thi̱n ɔ?” Cukɛ jɛ loc i̱, “Ɛ wi̱c Thii-thɛr.”

¹⁷ Kä cu Yecu kɛ jiök i̱, “Ka̱mɛ Thii-thɛr tin la nyin Thii-thɛr, kä ka̱mɛ Kuoth tin la nyin Kuɔth.” Kä cukɛ ga̱a̱c ɛlɔ̱ŋ kɛ jɛ.

Thiec kɛ kui̱ Jiecä nath li̱th

¹⁸ Cu tha̱a̱ŋ ji̱ Thɛ̈d-du-thii tin ruac ɛn ɣöö thilɛ jiëc nath li̱th, ben kä Yecu. Cukɛ jɛ thiec, wäkɛ i̱,

¹⁹ “Ŋi̱i̱c, ci Muthɛ kɔ gɔ̱a̱r ruac ɛn ɣöö, mi ci däman ran li̱w, kä ci ciekdɛ duɔth a thilɛ kɛ gat, bi däman ciek ɛmɔ ka̱n, kɛ ɣöö bɛ gaat di̱eth kɛ kui̱ däman.

²⁰ Tëëkɛ wutni da̱ŋ bärɔw ti gaat wutdä kɛl, cu kɛ̱̈ɛ̱̈ kuɛɛn, kä cuɛ li̱w a thil gaat.

²¹ Kä cu däman ciekdɛ guäl, kä cuɛ li̱w bä, a thilɛ kɛ gaat ti cɛ di̱eth. Kä cu diɔ̱ɔ̱kdiɛn ɛ la̱t inɔ bä.

²² Kä cu kɛn da̱ŋ bärɔw thil gaat. Kä kɛ jɔak cu ciek ɛmɔ li̱w bä.

²³ Kä cäŋ jiecä nath li̱th bɛ ku la ciek ŋa kä kɛ? Kä ci kɛn da̱ŋ bärɔw tɔ̱ɔ̱c kɛ jɛ.”

²⁴ Kä cu Yecu kɛ jiök i̱, “/Ken duerun jɔɔc, kɛ ɣöö kuecɛ ruaacni Kuɔth tëë ca gɔ̱r kɛnɛ buɔ̱mdɛ?

²⁵ Kɛ ɣöö mi wäkɛ wä jiɛɛn li̱th, /ci raan bi kuɛɛn kä /ca nyal bi kuɛn, kɛ ɣöö bikɛ ce̱t kɛ ja̱a̱k Kuɔth nhial.

²⁶ Kä kɛ kui̱ ruac jiecä nath li̱th, /ka̱nɛ ruac kuɛn rɛy warɛgakä Muthɛ, kä gua̱a̱th ëë waŋ butbut thi̱n, ɛn ɣöö ci Kuoth ɛ lar i̱, ‘Ɛ ɣän Kuoth A-bɛ-ram, kä ɛ ɣän Kuoth Ay-dhɛk, kä ɛ ɣän Kuoth Je-kɔb’?

²⁷ /Ciɛ Kuoth nɛɛni ti ci li̱w, ɛ Kuoth nɛɛni ti tëk. Ta̱yɛ kɛ duer pa̱ny.”

Ŋut in Di̱t ni jɛn

²⁸ Cu raan gɔ̱rkä ben thieekädɛ, kä cuɛ kɛ liŋ tekɛ kɛ ŋaknɔm kamdiɛn. Mëë cɛ jek ɛn ɣöö ci Yecu naath loc agɔaa, cuɛ jɛ thiec i̱, “Ɛ ŋut in mith di̱t ni jɛn rɛy ŋuɔ̱tni diaalɔ?”

²⁹ Cu Yecu jɛ loc i̱, “Ruac in nhiam ɛ jɛn nɛmɛ i̱, ‘Liɛŋɛ jɛ, yɛn ji̱ I-thɛ-rɛl, Kuäär ni Kuothdan ɛ jɛn Kuoth kɛl kärɔa,

³⁰ kä bi Kuäär ni Kuothdu nhɔk kɛ lɔcdu kɛɛliw, kɛ tieydu kɛɛliw, kɛ ca̱ru kɛɛliw, kɛ buɔ̱mdu kɛɛliw.’

³¹ Kä ŋut in rɛwdɛ ɛ jɛn nɛmɛ i̱, ‘Nhɔk gua̱n thieekädu ce̱tkɛ rɔɔdu.’ Thilɛ ŋut dɔ̱diɛn mi di̱t ni jɛn kä ŋut da̱ŋ rɛw ti̱ti̱.”

³² Kä cu raan gɔ̱rkä jɛ jiök i̱, “Ti̱i̱ kɛ cuɔ̱ɔ̱ŋ, Ŋi̱i̱c, ji̱n ci thuɔ̱k lar pa̱ny ɛn ɣöö thilɛ Kuoth dɔ̱diɛn ɛ ni jɛn kärɔaadɛ.

³³ Kɛnɛ ɣöö bi raan Kuoth nhɔk kɛ lɔcdɛ kɛɛliw, kɛ ca̱rɛ kɛɛliw, kɛ buɔ̱mdɛ kɛɛliw, kɛnɛ ɣöö bi raan gua̱n thieekädɛ nhɔk ce̱tnikɛ rɔɔdɛ. Kä gɔaa ni jiɛn kä muc diaal tin la thöpkɛ Kuoth kä waŋkɛ kɛ kɛn diaal kɛ kui̱dɛ.”

³⁴ Mëë ci Yecu jɛ nɛn ɛn ɣöö cuɛ jɛ loc kɛ pɛl, cuɛ jɛ jiök i̱, “Thia̱ki kɛ ciëŋ kuäärä Kuɔth.” Kɛ kɔr kä mɔmɔ thilɛ ram mi ci jɛ thiec kɛ mi dɔ̱ŋ.

Thiec kɛ kui̱ Mɛ-thia

³⁵ Kä min ŋi̱i̱c Yecu naath rɛy luaak Kuɔth, cuɛ wee i̱, “Dee ji̱ gɔ̱rkä jɛ lar ɛn ɣöö Mɛ-thia ɛ gat Dee-bid i̱di?

³⁶ Kä ci Dee-bid ɛ lar kɛ Yiëë in Gɔaa in Rɛl Rɔ i̱, ‘Ci Kuäär ni Kuoth, Kuäärä jiök i̱, “Nyuuri kui̱c cuëëcdä, amäni mi wa̱a̱ ji̱ tɛ̈ru la̱th ciökniku.” ’

³⁷ Ci Dee-bid puɔ̱nydɛ jɛ cɔl i̱, ‘Kuäärä ni Kuoth,’ kuɛ la gatdɛ i̱di?” Kä cu nɛy ti ŋuan ruaacnikɛ liŋ kɛ tɛ̈th lɔaac.

Lui̱k Yecu kɛ kui̱ ŋi̱eecni ŋuɔ̱tni

³⁸ Kä min ŋi̱i̱cɛ naath cuɛ kɛ jiök i̱, “Niɛkɛ rɔ̱ kɛ ji̱ gɔ̱rkä tin nhɔakɛ ja̱l kɛ bieyni ti ba̱a̱r ba̱a̱r, kä nhɔakɛ ner luthä guäth ko̱kä,

³⁹ kɛnɛ ɣöö bikɛ nyuur kɛ kɔamni ti gɔw gua̱thni palä ji̱ Juudh kɛnɛ gua̱th mi̱thni kuën.

⁴⁰ Mackɛ duël mään jɔɔkni, kä latkɛ la̱ŋ ti ba̱a̱r ba̱a̱r. Ɣän la̱rä jɛ yɛ i̱ bi nɛy ti̱ti̱ kuëth mi di̱t ni jɛn jek.”

Muc Ciëk Jɔkä

⁴¹ Mëë ci Yecu nyuur lotdä guäth dolä yio̱o̱ni luaak Kuɔth, cuɛ nɛy ti ŋuan guic ti thöpkɛ yio̱o̱kiɛn gua̱a̱th yio̱o̱ni ɛmɔ. Kä cu nɛy ti ria̱ŋ ria̱a̱ŋ ti ŋuan yio̱w ti ŋuan ɛlɔ̱ŋ la̱th thi̱n.

⁴² Kä cu ciek jɔkä mi can ben, cuɛ yio̱w la̱ŋni ti nyin tiɛtni da̱ŋ rɛw ti ce̱tkɛ miliimni la̱th thi̱n.

⁴³ Cu Yecu ji̱ kɔaarɛ cɔl, kä cuɛ kɛ jiök i̱, “Ɛpuc, ɛpuc, ɣän la̱rä jɛ yɛ, i̱ ciek jɔkä mɛ can ɛmɛ cɛ thöp ni yio̱w ti la̱nykɛ yio̱w nɛɛni diaal tin thöpkɛ wanɛ mɛ.

⁴⁴ Kɛ ɣöö ci nɛy diaal tɔ̱tɔ̱ muɔ̱c rɛy yio̱o̱nikiɛn ti ŋuan, kä duundɛ ɣöö ci ciek ɛmɛ thöp ni pek nyinäkɛ tin dee tëk kɛ jɛ, cäŋ dakɛ.”