Mak 11 - RUAC KUƆTH IN RƐL RƆ

Cuɔ̱p Yecu kä Jɛ-ru-tha-lɛm

¹ Mëë cikɛ thia̱k kɛ Jɛ-ru-tha-lɛm kä Beth-pac kɛnɛ Beth-ani, thieekä Pa̱a̱m Ɔ-lip, cu Yecu ji̱ kɔaarɛ da̱ŋ rɛw ja̱k,

² cuɛ kɛ jiök i̱, “Wiaa rɛy ciëŋ mia̱ nhiamdun. Kä ni ɛn cuɔ̱pdun thi̱n, bia ruath muɔ̱l mi /ken raan met kɔt jɔkdɛ kä ca yian piny jek. Luɔnyɛ jɛ, kä nööŋɛ jɛ.

³ Kä mi wëë tekɛ ram mi wä yɛ thiec i̱, ‘Ɛŋu la̱tdɛ nɛmɛ ɔ?’ Jiökɛ jɛ i̱, ‘Go̱o̱r Kuäär ni Kuoth ɛ, kä bɛ jɛ ja̱k nikä kɛɛl.’ ”

⁴ Cukɛ wä kä cukɛ ruath muɔ̱l jek a ca yian piny thok kal gekä duɔ̱p. Kä min lony kɛn ɛ,

⁵ cu nɛy ti te cuŋä ɛn wi̱ni kɛ thiec i̱, “La̱tdɛ ni ŋu, mɔ luɔnyɛ ruath muɔ̱l ɔ?”

⁶ Cukɛ kɛ la̱t min ca la̱rkɛ ɛ Yecu, kä cukɛ kɛ pa̱l ɣöö naŋkɛ jɛ.

⁷ Kä cukɛ ruath muɔ̱l nöŋ Yecu, kä cukɛ bieynikiɛn la̱th jɔkdɛ, kä cu Yecu nyuur thi̱n.

⁸ Cu nɛy ti ŋuan bieynikiɛn ɣa̱r piny dup, kä cu tha̱a̱ŋkiɛn kar jiɛn tëm, cukɛ kɛ ɣa̱r dup.

⁹ Cu nɛy tin jäl nhiamdɛ kɛnɛ tin guɔ̱ɔ̱rkɛ jɛ rɔal wäkɛ i̱, “A liak tekɛ jɛ! Puɔ̱th akɛ ram mi bëë kɛ ciöt Kua̱r ni Kuoth!

¹⁰ Puɔ̱th akɛ kuäär gua̱ndɔɔŋdan ni Dee-bid in bëë! Liakɛ jɛ rɛy ciëŋ nhial!”

¹¹ Mëë cɛ cop kä Jɛ-ru-tha-lɛm, cuɛ wä rɛy luaak Kuɔth, cuɛ ŋɔak diaal gueec, kä cuɛ loc Beth-ani kɛnɛ jaakɛ da̱ŋ wäl rɛw kɛ ɣöö ci ɣɔw ku thuŋ a wäär.

La̱m Yecu kɛ jiath ŋɔa̱a̱p

¹² Mëë ruɔ̱n lunydiɛn jɔk kä Beth-ani, cu Yecu buɔthɛ näk.

¹³ Cu Yecu jiath ŋɔa̱a̱p mi tekɛ ji̱th ti tɔ̱ɔ̱c nɛn a na̱n, kä cuɛ wä thi̱n kɛ ɣöö dɔ̱ŋ derɛ dɛy wä jek thi̱n. Mëë cɛ cop thaar jiaath, cuɛ thil dɛy ti cɛ jek thi̱n, ɛ ni ji̱th kärɔ, kɛ ɣöö ŋot gua̱a̱th in la kui̱r kɛ ŋɔ̱a̱p.

¹⁴ Kä cuɛ ŋɔ̱p ɛmɔ jiök i̱, “Thilɛ ram mi bi dɛyku met nyɔk kɛ mi̱eth amäni cäŋ kɛl.” Kä cu jaakɛ jɛ liŋ.

Wä Yecu rɛy Luaak Kuɔth

¹⁵ Cukɛ ben kä Jɛ-ru-tha-lɛm, kä cu Yecu wä rɛy luaak Kuɔth, kä cuɛ tok kɛ mi tukɛ ji̱ ko̱kä diaal kɛnɛ nɛy tin ko̱k raar. Cuɛ tharbëtni ji̱ luël yio̱o̱ni buɔ̱p, kɛnɛ kɔamni nyuurä nɛɛni tin kɔakɛ guɔ̱kni.

¹⁶ Kä /kenɛ jɛ nhɔk ɛn ɣöö dee raan duɔ̱ɔ̱r kap a rɛɛtdɛ rɛy luaak Kuɔth.

¹⁷ Kä cuɛ kɛ ŋi̱eec wëë i̱, “/Ka̱n ɛ gɔ̱r i̱, ‘Ba luaakdä cɔl i̱ luaak palä kɛ kui̱ dööri diaal?’ Kä ci yɛn ɛ jakä luaak ma̱a̱cni.”

¹⁸ Kä min ci bööth palä tin di̱t kɛnɛ ji̱ gɔ̱rkä jɛ liŋ, kä görkɛ ca̱p mi dëë näk ni jɛ, kä dualkɛ kɛ jɛ, kɛ ɣöö ci nɛy diaal ga̱a̱c kɛ ŋi̱i̱cdɛ.

¹⁹ Kä mëë ci ɣɔw a thiaŋ, cu Yecu wä raar rɛy rɛ̈ɛ̈k kɛnɛ jaakɛ.

Ŋi̱i̱c kɛ kui̱ jiath ŋɔa̱a̱p mi ci rɔɔl

²⁰ Kä kɛ runwaŋ mi jälkɛ dup, cukɛ ŋɔ̱p nɛn, cɛ rɔɔl amäni ciökɛ.

²¹ Kä cu Pi-tɔr ruacdɛ tim, kä cuɛ wee i̱, “Ŋi̱i̱c, nɛn ɛ. Ci jiath ŋɔa̱a̱p ëë ci lam rɔɔl.”

²² Cu Yecu kɛ loc i̱, “Ŋa̱thɛ Kuoth.

²³ Ɛpuc, ɣän la̱rä jɛ yɛ, mi ci yɛn päm ɛmɛ jiök i̱, ‘Woc rɔɔdu wanɛ mɛ, kä wër där baar,’ mi thilɛ lɔcdu diw, a bi ŋa̱th ni ji̱n ɛn ɣöö bi min ci lar tuɔɔk ba lät kä ji̱.

²⁴ Kɛ kui̱ ɛmɔ, ɣän la̱rä jɛ yɛ ɛn ɣöö mɔ bia thiec kɛ palɔ, ŋa̱thɛ jɛ ɛn ɣöö cia jɛ jek, kä bɛ cu a duŋdun.

²⁵ “Kä mi ta̱yɛ cuŋä a palɛ, pa̱lɛ mi jiäk mi te kamdun kɛ ram mi dɔ̱ŋ, kɛ ɣöö dee Guurun in te nhial dueerkun pälikä bä.” [

²⁶ Kä mi /ci yɛn naath bi pälikä, amäni Guurun in te nhial /cɛ dueerkun bi pälikä bä.]

Thiec kɛ kui̱ luäŋä Yecu

²⁷ Kä cukɛ lɛni ben kä Jɛ-ru-tha-lɛm. Kä min jälɛ rɛy luaak Kuɔth, cu bööth palä kɛnɛ ji̱ gɔ̱rkä amäni di̱t ben kä jɛ.

²⁸ Cukɛ jɛ jiök i̱, “Ɛ lua̱ŋ ŋu kä lätdi ŋɔak ti̱ti̱ ɔ? Kä ɛŋa käm ji̱ lua̱ŋ mi lätdi kɛ?”

²⁹ Cu Yecu kɛ loc i̱, “Täämɛ, bä yɛ thiec kɛ kɛl, kä mi dee yɛn ɛ luɔ̱c ɣä, bä yɛ la̱r lua̱ŋ in la̱tdä ŋɔak ti̱ti̱.

³⁰ Bä la̱k Jɔ̱ɔ̱n nhial kä Kuoth, kiɛ bëë kä naath? Luɔ̱cɛ jɛ ɣä.”

³¹ Kä cukɛ ruac kärɔ̱, wäkɛ i̱, “Mi wä kɔn ɛ wä lar i̱ bëë nhial, bɛ kɔn jiök i̱, ‘Kä ɛŋu /ka̱nɛ jɛ ŋäth ɔ?’

³² Kä mi wä kɔn ɛ lar i̱, ‘Ɛ duŋ nath’?” Kä dualkɛ kɛ naath, kɛ ɣöö ci nɛy diaal ɛ ŋäth ɛn ɣöö Jɔ̱ɔ̱n ɛ gök.

³³ Kä inɔ cukɛ Yecu loc i̱, “Kɔn kueckɔ jɛ.” Kä cu Yecu kɛ jiök i̱, “Kä amäni ɣän bä, /cä yɛ bi la̱r ɛn lua̱ŋ in la̱tdä ŋɔak ti̱ti̱.”