Mak 10 - RUAC KUƆTH IN RƐL RƆ

Ŋi̱i̱c Yecu kɛ kui̱c däkä mään

¹ Cu Yecu jiɛɛn guäth ɛmɔ, kä cuɛ wä ro̱o̱l Ju-dia amäni kui̱c Jɔr-dɛn, kä cu nɛy ti ŋuan rɔ̱ nyɔk kɛ duɔ̱l gëëknikɛ, kä cuɛ kɛ nyɔk kɛ ŋi̱i̱c ce̱tkɛ ciaaŋdɛ mëë wen.

² Kä cu tha̱a̱ŋ ji̱ Pa-ri-thii ben kä jɛ, cua jɛ thiec kɛ ɣöö ɣɔ̱a̱nkɛ jɛ i̱, “Ɛ cuɔ̱ɔ̱ŋ ɛn ɣöö dee wut ciekdɛ däk?”

³ Cuɛ kɛ loc i̱, “Ɛŋu mi ca la̱r yɛ ɛ Muthɛ?”

⁴ Cukɛ wee i̱, “Cu Muthɛ ɛ nhɔk ɛn ɣöö bi wut luɔt däkä ciëkdɛ kɔŋ lat, kä bɛ jɛ kulɛ jakä wä.”

⁵ Kä cu Yecu kɛ jiök i̱, “Cu ruac ɛmɛ gɔ̱r kɛ kui̱ bumä wecdun.

⁶ Kä ni tuk cäkä ɣɔaa, ci Kuoth naath cak tuut kɛnɛ ŋuɔ̱ɔ̱t.

⁷ Kɛ kui̱ ɛmɔ bi wut gua̱n kɛnɛ man ba̱ny piny, kä ba jɛ mat kɛnɛ ciekdɛ.

⁸ Kä bi kɛn da̱ŋ rɛw a kɛl. Kä inɔ, /cikɛ bi lɛ ŋot ala rɛw, cikɛ a kɛl.

⁹ Kɛ ɣöö, nɛy ti ci Kuoth kɛ mat kɛɛl, akɛ /ca däk ɛ raan.”

¹⁰ Kɛ gua̱a̱th ëë tekɛ dueel cu jaakɛ jɛ nyɔk kɛ thiec kɛ kui̱ ruac ɛmɔ.

¹¹ Kä cuɛ kɛ jiök i̱, “Ɛn ramɔ wä ciekdɛ däk ɔ, kä bɛ dɔ̱diɛn kuɛn, ca dho̱o̱m kä ciekdɛ.

¹² Kä mi ci ciek da̱k cɔaadɛ, kä ca nyɔk kɛ kuën, jɛn cɛ dhɔm.”

Puɔ̱th Yecu kɛ gaat ti tiɛtni

¹³ Kä cu naath ɛ nöŋ gaat ti tiɛtni, kɛ ɣöö bɛ kɛ thiap, kä cu jaakɛ kɛ yɔ̱r.

¹⁴ Kä mëë ci Yecu nɛmɛ nɛn, cuɛ gaak, kä cuɛ kɛ jiök i̱, “A gaat ti tiɛtni bä kä ɣä, /cuarɛ kɛ pen, kɛ ɣöö puɔ̱th kuäärä Kuɔth ɛ duŋ nath ti ce̱t kɛ dho̱li ti̱ti̱.

¹⁵ Ɛpuc, ɣän la̱rä jɛ yɛ, ram mi /ci Kuäär Kuɔth bi nhɔk, ce̱tkɛ gat mi tɔt, /cɛ bi wä rɛydɛ.”

¹⁶ Kä cuɛ kɛ kuɔ̱l tetnikɛ, kä cuɛ kɛ poth, kueŋɛ tetkɛ pua̱nynikiɛn.

Ram mi riäŋ riäŋ

¹⁷ Täämɛ min tɛthɛ piny wëë jälɛ, cu wut riŋ kä jɛ, kä cuɛ rɔ ka̱m mua̱a̱l nhiamdɛ, cuɛ jɛ thiec i̱, “Ŋi̱i̱c in gɔaa, ɛŋu bä yi̱k la̱t ɔ, kɛ ɣöö bä tëk mi do̱raar jek?”

¹⁸ Kä cu Yecu jɛ jiök i̱, “Ɛŋu cɔɔli ɣä i̱ mi gɔaa ɔ? Thilɛ ram mi gɔaa, ɛ ni Kuoth kärɔa.

¹⁹ Ŋäci ŋut Kuɔth ti̱ti̱ i̱, ‘/Cu dho̱m, /cu riär lät, /cu kuel, /cu kac lat, /cu naath mac, kä luthni guur kɛnɛ muɔɔr.’ ”

²⁰ Kä cuɛ jɛ jiök i̱, “Ŋi̱i̱c, cä ŋut ti̱ti̱ diaal tit ni ŋuɛɛtädä.”

²¹ Kä cu Yecu jɛ guic, kä cuɛ jɛ nhɔk. Kä cuɛ jɛ jiök i̱, “Duɔ̱ɔ̱r kɛl a jɔ̱ɔ̱r kä ji̱. Wër, kɔkni nyinku diaal, kä kämni kɛ can, kä bi ria̱ŋdu wä jek cieŋ nhial, kä bër guuri ɣä.”

²² Cuɛ ŋɛ̈ɛ̈r kɛ ruaacni Yecu, kä cuɛ jiɛɛn kɛ jiath lɔaac, kɛ ɣöö tëëkɛ ŋɔak ti ŋuan.

²³ Cu Yecu ji̱ kɔaarɛ guic, kä cuɛ kɛ jiök i̱, “Kä bɛ buɔ̱m i̱di ɛn ɣöö bi nɛy ti ria̱ŋ ria̱a̱ŋ wä rɛy ciëŋ kuäärä Kuɔth!”

²⁴ Kä cu ji̱ kɔaarɛ ga̱a̱c kɛ rieetkɛ. Kä cu Yecu kɛ lɛni jiök i̱, “Gaatkä, bɛ ku lɛ buɔ̱m i̱di ɛn wä nath cieŋ kuäärä Kuɔth!

²⁵ Thia̱kni ɣöö dee thɔ̱rɔ̱l cooth kɛ waŋ riɛp, kä wä raam mi riäŋ riäŋ rɛy ciëŋ kuäärä Kuɔth.”

²⁶ Cuɛ wuɔ̱thkiɛn yi̱c ɛlɔ̱ŋ, kä cukɛ ruac kä rɔ̱ i̱, “Kä ɛŋa bi kään ɔ?”

²⁷ Cu Yecu kɛ guic, kä cuɛ wee i̱, “Mɛmɛ bumɛ kä naath, a /ci mɔ a Kuɔth, kɛ ɣöö ŋɔak diaal lua̱ŋ kɛ rɔ̱ kä Kuoth.”

²⁸ Cu Pi-tɔr ɛ tok kɛ mi jio̱kɛ jɛ i̱, “Nɛnɛ, cakɔ nyinkɔ diaal ba̱ny piny, kä cakɔ ji̱ guɔ̱ɔ̱r.”

²⁹ Cu Yecu wee i̱, “Ɛpuc, ɣän la̱rä jɛ ji̱, thilɛ ram mi ci ciëëŋdɛ, kiɛ dämani, kiɛ nyimani, kiɛ man, kiɛ gua̱n, kiɛ gaat, kiɛ ka̱a̱k ba̱ny piny kɛ kui̱dä kɛnɛ kui̱ thukni ti gɔw,

³⁰ mi /ci rëpdiɛn ti kuɔ̱r bi jek ɛn täämɛ. Jɛn bɛ rëëp duëli ti kuɔ̱r, kɛnɛ dämani, kɛ nyimani, kɛ man, kɛnɛ gaat amäni ka̱a̱k jek, a cäŋ tëëkɛ rik. Kä bɛ tëk in do̱raar jek kɛ gua̱a̱th ɔ bëë ɔ.

³¹ Kä nɛy ti ŋuan ti te nhiam täämɛ bikɛ a nɛy tin jɔak, kä nɛy tin te jɔk bikɛ a nɛy tin nhiam.”

Diɔ̱ɔ̱k lärä Yecu kɛ lia̱a̱dɛ

³² Min tekɛ dup, wäkɛ kä Jɛ-ru-tha-lɛm, a bo̱o̱th Yecu kɛ, cu wuɔ̱thkiɛn yi̱c, kä cu nɛy ti guɔ̱ɔ̱rkɛ kɛ dual. Kä mëë cɛ jaakɛ da̱ŋ wäl rɛw naŋ gekä, cuɛ kɛ tok kɛ mi lätdɛ kɛ min bi tuɔɔk kä jɛ.

³³ Cuɛ wee i̱, “Nɛnɛ, wä kɔn kä Jɛ-ru-tha-lɛm, kä ba Gat Ran la̱th tetni bööth palä tin di̱t, kɛnɛ gɔa̱a̱r, kä ba jɛ kuɛth li̱th, kä ba jɛ ka̱m jur.

³⁴ Kä bi kɛn ɛ yak, kä bikɛ jɛ ŋul kä ruɛy, kä ba jɛ duäc kɛ waat, kä bikɛ jɛ näk. Kä kɛ kɔr ni̱ni da̱ŋ diɔ̱k bɛ rɔ jiɛc li̱th.”

Thiec Je-mɛth kɛnɛ Jɔ̱ɔ̱n

³⁵ Kä cu Je-mɛth kɛnɛ Jɔ̱ɔ̱n, gaat Dhɛ-ba-dii, ben kä jɛ, kä cukɛ jɛ jiök i̱, “Ŋi̱i̱c, görkɔ ɣöö bi kɔ lät kä mɔ bakɔ thiec kä ji̱ mɔ.”

³⁶ Kä cuɛ kɛ jiök i̱, “Ɛŋu go̱o̱r yɛn ɣöö bä la̱t kä yɛ mɔ?”

³⁷ Cukɛ jɛ jiök i̱, “Jaknikɔ kä nyuur, a te ram kɛl cueecdu kä te min dɔ̱ŋ caamdu, rɛy gɔɔyä puɔnyädu.”

³⁸ Cu Yecu kɛ jiök i̱, “Kui̱c yɛn mɔ thieec yɛn ɛ mɔ kä ɣä. Bia tekɛ lua̱ŋ kɛ ma̱th kɛ liɛɛr in mäth kɛ ɣä, kiɛ ba yɛ lak kɛ la̱k in ca lak ni ɣä?”

³⁹ Cukɛ jɛ jiök i̱, “Ɣɔ̱ɔ̱n, ta̱kɔ lua̱ŋ.” Cu Yecu kɛ jiök i̱, “Inɔ, bi yɛn maath kɛ liɛɛr in mäth kɛ ɣä, kä ba yɛ lak kɛ la̱k in lakɛ ni ɣä.

⁴⁰ Kä duundɛ ɣöö nyuur cuëëcdä kiɛ caamdä /ciɛ duŋdä mi dee thöp ɣän, ɛ duŋ nɛɛni tin ca nɛmɛ rialikä kɛ kui̱diɛn.”

⁴¹ Mëë ci jaakɛ da̱ŋ wäl ɛ liŋ, cukɛ gaak kɛ Je-mɛth kɛnɛ Jɔ̱ɔ̱n.

⁴² Kä cu Yecu kɛ ciöl rɔ, kä cuɛ kɛ jiök i̱, “Ŋa̱cɛ jɛ ɛn ɣöö nɛy tin ca ŋa̱c i̱ bi a ruëëc juri, ruackɛ naath kɛ buɔ̱m, kä bööthkiɛn la ruackɛ naath kɛ buɔ̱mdiɛn.

⁴³ Kä /cɛ bi te inɔ rɛydun. Ram mɔ go̱o̱r ɣöö bɛ a ram mi di̱i̱t rɛydun bɛ dhil a läätdun,

⁴⁴ kä ram mi go̱o̱r ɣöö ba bo̱o̱th rɛydun, bɛ dhil a kuanydun diaal.

⁴⁵ Kɛ ɣöö /ken Gat Ran ben kɛ ɣöö ba jɛ lätikä, bëë kɛ ɣöö bɛ naath lätikä, kɛnɛ ɣöö bɛ tëkdɛ thöp ala lueel kɛ kui̱ nɛɛni ti ŋuan.”

Lëp Yecu kɛ wäŋ cɔaar ni Bar-ti-me-äth

⁴⁶ Kä cukɛ ben kä Jɛ-ri-ko. Kä min bänyɛ Jɛ-ri-ko piny kɛnɛ jaakɛ kɛ buɔ̱n mi di̱i̱t, te Bar-ti-me-äth gat Ti-me-äth mi cɔr mi li̱i̱m nyuurä gekä duɔ̱p.

⁴⁷ Mëë cɛ liŋ ɛn ɣöö ɛ Yecu raan Na-dha-rɛth, cuɛ rɔal ɛlɔ̱ŋ, kä cuɛ wee i̱, “Yecu, Gat Dee-bid, a lɔcdu kɔ̱c kɛ ɣä!”

⁴⁸ Kä cu nɛy ti ŋuan cɔr yɔ̱r, kɛ ɣöö bɛ biɛt. Kä cu ku tuɔ̱l ni jɛn kɛ rɔal ɛlɔ̱ŋ i̱, “Gat Dee-bid, a lɔcdu kɔ̱c kɛ ɣä!”

⁴⁹ Cu Yecu cuɔ̱ŋ, kä cuɛ wee i̱, “Ciölɛ jɛ ɣä.” Cukɛ wut in cɔr cɔl, jiökɛ jɛ i̱, “Bum lɔcdu, jiɛc rɔ, cɔlɛ ji̱.”

⁵⁰ Cuɛ bi̱i̱dɛ min del yäk, kä cuɛ rɔ yuɔ̱th nhial, kä cuɛ ben kä Yecu.

⁵¹ Kä cu Yecu jɛ thiec i̱, “Ɛŋu mi go̱o̱ri i̱ bä lät kä ji̱?” Cu cɔr ɛ loc i̱, “Ŋi̱i̱cdä, jakni ɣä kä ɣöö bä rɔ nyɔk kɛ guic.”

⁵² Cu Yecu jɛ jiök i̱, “Wër dupdu. Ci ŋa̱thdu ji̱ jakä gɔaa.” Kä ɛn guäth ɛmɔ pa̱ny cu waŋkɛ rɔ̱ cu lɛp, kä cuɛ Yecu guɔ̱ɔ̱r rɛy duɔ̱p.