Mak 1 - RUAC KUƆTH IN RƐL RƆ

Ŋi̱i̱c Jɔ̱ɔ̱n in la lääk

¹ Nɛmɛ ɛ jɛn tuk thukni ti gɔw kɛ kui̱ Yecu Kritho in la Gat Kuɔth.

² Ce̱tkɛ mëë ca gɔ̱r ɛ gök ni I-ca-yaa i̱, “Nɛnɛ, ɣän ja̱kä jääkdä kä nhiamdu, mi bi duɔ̱ɔ̱pdu wä rialikä.

³ Ɛ jɔw raam mi cio̱t där dɔaar i̱, ‘Rialɛ duɔ̱ɔ̱p Kua̱r ni Kuoth ikä, jakɛ dupkɛ kä cuŋ.’ ”

⁴ Cu Jɔ̱ɔ̱n in la lääk jɔɔc rɛy dɔaar, latdɛ ni la̱k nath kɛ ɣöö bikɛ rɔ ri̱t kɛ kui̱ pälä dueeri.

⁵ Kä cu ji̱ rööl Ju-dia amäni ji̱ Jɛ-ru-tha-lɛm diaal wä raar kä jɛ, kä cuɛ kɛ lak kiir Jɔr-dɛn, latkɛ dueerkiɛn.

⁶ Täämɛ, Jɔ̱ɔ̱n ciɛŋɛ ni bi̱i̱ mi̱em thɔ̱a̱rɔa̱a̱l, kä te lɛ̈tdɛ kɛ la̱a̱k gupä, kä camɛ ni kɔaryɔaamni kɛnɛ tuari dɔaar.

⁷ Kä cuɛ ruac lat, laarɛ jɛ i̱, “Ram mia̱ bëë kɔɔrä ni, bumni jɛn kä ɣä, a cäŋɛ läk wa̱a̱rikɛ /ci gɔɔydä ro̱ŋ i̱ dëë rɔ goŋ a bäkɛ lony.

⁸ Cä yɛ lak kɛ pi̱, kä jɛn bɛ yɛ lak kɛ Yiëë in Gɔaa in Rɛl Rɔ.”

La̱k Yecu kɛnɛ ɣɔ̱ndɛ

⁹ Kɛ ni̱n tɔ̱tɔ̱ cu Yecu ben kä Na-dha-rɛth, ro̱o̱l Gɛ̈-lɛ-li, kä cua jɛ lak ɛ Jɔ̱ɔ̱n kiir Jɔr-dɛn.

¹⁰ Kä min pälɛ bendɛ raar rɛy pi̱i̱ni, ɛn guäth ɛmɔ pa̱ny, cuɛ pua̱a̱r nɛn lɛpɛ rɔɔdɛ, kä bä Yiëë Kuɔth piny kä jɛ ce̱tkɛ guuk.

¹¹ Kä cu jɔw ben rɛy puɔ̱ɔ̱rä, wëë i̱, “Ɛ ji̱n Gatdä min nhɔakä, tɛth lɔcdä ɛlɔ̱ŋ kɛ ji̱.”

¹² Kä ni ɛn guäth ɛmɔ cu Yiëë Kuɔth ɛ böth där dɔaar.

¹³ Kä cuɛ te där dɔaar kɛ ni̱n ti jiɛn ŋuan, ɣɔamkɛ jɛ ɛ Gua̱n jiäkni, kä tëë kɛɛl kɛ ley dɔaar, kä la̱tkɛ jɛ ikä ɛ ja̱a̱k nhial.

Ciöt Yecu kɛ dëëp rɛc da̱ŋ ŋuaan

¹⁴ Täämɛ mëë ca Jɔ̱ɔ̱n yian, cu Yecu wä kä Gɛ̈-lɛ-li, latdɛ thuk Kuɔth ti gɔw, cuɛ wee i̱,

¹⁵ “Ci gua̱a̱th cop, kä ci ciaŋ rui̱cä Kuɔth thia̱k. Rietdɛ rɔ̱ dueerikun, kä ŋa̱thɛ thuk Kuɔth ti gɔw.”

¹⁶ Kä mëë jäl Yecu kɛ gëk baar Gɛ̈-lɛ-li, cuɛ Thay-mɔn nɛn kɛnɛ däman ni An-dɛ-röw depkɛ kɛ cambak, kɛ ɣöö kɛ dëëp rɛc.

¹⁷ Kä cu Yecu kɛ jiök i̱, “Guɔ̱ɔ̱rɛ ɣä, kä bä yɛ jakä dëëp nath.”

¹⁸ Cukɛ cambaknikiɛn ba̱ny piny, kä cukɛ jɛ guɔ̱ɔ̱r.

¹⁹ Kä mëë cɛ wä nhiam kä mi tɔt, cuɛ gaat Dhɛ-ba-dii nɛn, Je-mɛth kɛnɛ däman ni Jɔ̱ɔ̱n tekɛ rɛy ria̱a̱ydiɛn, kɔɔc kɛn cambakni.

²⁰ Kä ɛn guäth ɛmɔ cuɛ kɛ cɔl, kä cukɛ gua̱ndiɛn ni Dhɛ-ba-dii kɛnɛ la̱a̱tkiɛn ba̱ny rɛy ria̱a̱y, kä cukɛ jɛ guɔ̱ɔ̱r.

Wut mi tekɛ yiëë mi jiääk

²¹ Kä cukɛ wä kä Ka-pɛr-ni-äm. Kä kɛ cäŋ lɔ̱ŋä ji̱ Juudh, cuɛ wä rɛy luaak dolä ji̱ Juudh, kä cuɛ kɛ ŋi̱eec.

²² Kä cukɛ ga̱a̱c kɛ ŋi̱i̱cdɛ, kɛ ɣöö cɛ kɛ ŋi̱eec ce̱tkɛ ram mi tekɛ lua̱ŋ, mi /ci ce̱tkɛ ji̱ gɔ̱rä.

²³ Kä ɛn guäth ɛmɔ pa̱ny cuɛ tekɛ ram mi tekɛ yiëë mi jiääk rɛy duëël dolädiɛn.

²⁴ Kä cuɛ wiee wëë i̱, “Ɛŋu mi bi lät kä kɔ, ji̱n Yecu raan Na-dha-rɛth? Bi̱i̱ kɛ ɣöö bi kɔ ben däk? Ɣän ŋa̱cä jɛ ɛn ɣöö ɛ ji̱n ram mi rɛl Gɔɔydɛ rɔ mi bëë ni kä Kuoth.”

²⁵ Kä cu Yecu jɛ gok, cuɛ wee i̱, “Bitni, kä bër raar puɔ̱nydɛ!”

²⁶ Kä cu yiëë in jiäk ram ɛmɔ yɔ̱k ɛlɔ̱ŋ, cuɛ wak kɛ jɔw mi di̱i̱t, kä cuɛ ben raar puɔ̱ɔ̱nydɛ.

²⁷ Kä cu nɛy diaal ma̱a̱r kä thiëckɛ rɔ̱ kamnikiɛn i̱, “Ɛŋu ɛn nɛmɛ? Ɛ ŋi̱i̱c mi pay tuɔɔk, kä ŋi̱i̱cɛ jɛ kɛ lua̱ŋ mi di̱i̱t! A ruacɛ kɛ yiey ti jiäk, kä luth kɛn ɛ.”

²⁸ Kä ɛn guäth ɛmɔ cu kɛ̈kdɛ räth gua̱thni diaal tin wiɛlkɛ ro̱l Gɛ̈-lɛ-li.

Jak Yecu kɛ ji̱ jua̱thni ti ŋuan kä gɔw

²⁹ Kä niɛ min cɛ jiɛɛn dueel dolä ji̱ Juudh, cuɛ coth dueel Thay-mɔn kɛnɛ An-dɛ-röw kɛɛl kɛ Je-mɛth amäni Jɔ̱ɔ̱n.

³⁰ Täämɛ, manthu Thay-mɔn tëë tɔ̱ɔ̱cä kɛ juey, leth puɔ̱nydɛ, kä niɛ cuɔ̱pdɛ cua la̱r jɛ.

³¹ Kä cu Yecu ben, cuɛ tetdɛ käp, kä cuɛ jɛ jiac nhial, kä cu lëth pua̱a̱nydɛ thuɔ̱k, kä cuɛ kɛ lätikä.

³² Kä kɛ jɛn thiaŋ ɛmɔ, konyä ca̱ŋ cua jɛ nöŋ ji̱ jua̱thni diaal, kiɛ tin tekɛ yiey ti jiäk.

³³ Kä cu ji̱ wec diaal rɔ̱ dol thok duëël.

³⁴ Kä cuɛ nɛy ti ŋuan ti tekɛ jua̱th ti gööl jak kä gɔw, kä cuɛ yiey ti jiäk ti ŋuan woɔc, kä penɛ yiey tɔ̱tɔ̱ ɣöö dee kɛ ruac, kɛ ɣöö ŋäc kɛn ɛ.

Lat Yecu kɛ ruac kä Gɛ̈-lɛ-li

³⁵ Kä kɛ runwaŋ ni po̱o̱tdä cu Yecu keer, kä cuɛ jiɛɛn, wëë guäth mi thil naath, kä cuɛ la̱ŋ ɛn wi̱ni.

³⁶ Kä cu Thay-mɔn kɛnɛ nɛy tin tekɛ jɛ kɛɛl ɛ guɔ̱ɔ̱r.

³⁷ Kä mëë ci kɛn ɛ jek, cukɛ jɛ jiök i̱, “Nɛy diaal görkɛ ji̱.”

³⁸ Kä cuɛ kɛ loc i̱, “Wanɛ nhiam wi̱i̱ni thieekä tɔ̱tɔ̱, kɛ ɣöö dëë ruac Kuɔth wä lat thi̱n bä, kɛ ɣöö ɛ jɛn min bäkɛ ɣä bä ben la̱t.”

³⁹ Cuɛ wä rɛy ciëëŋni Gɛ̈-lɛ-li, latdɛ ruaacni Kuɔth rɛy lueekni dolä palädiɛn, kä wocɛ yiey ti jiäk kä naath.

Jak Yecu kɛ ram mi tekɛ juey kä gɔaa

⁴⁰ Kä cu ram mi tekɛ dhɔp ben kä jɛ, läŋɛ jɛ, kä kämɛ rɔ mua̱a̱l nhiamdɛ, wëë i̱, “Mi nhɔki jɛ, deri puɔ̱nydä jakä gɔaa.”

⁴¹ Cu Yecu lɔcdɛ ŋɛ̈p kɛ kui̱dɛ, kä cuɛ tetdɛ riny cuɛ jɛ thiap, kä cuɛ jɛ jiök i̱, “Nhɔakä jɛ. A puɔ̱nydu gɔaa.”

⁴² Kä niɛ wan ɔ cu jiɛɛn kä jɛ. Kä cu puɔ̱nydɛ cu gɔaa.

⁴³ Kä cu Yecu jɛ gok a bum, kä cuɛ jɛ jakä wä ɛn täämɛ pa̱ny.

⁴⁴ Cuɛ jɛ jiök i̱, “Nɛnɛ, /cu jɛ lär radɔ̱diɛn, kä wër nyuthni rɔɔdu bo̱o̱th palä, kä tho̱pni muc kɛ kui̱ puɔlä pua̱a̱nydu, ce̱tkɛ mëë ci ŋut Muthɛ ɛ lar, kɛ ɣöö ba nyuuth kä nɛy diaal.”

⁴⁵ Kä cu wut ɛmɔ wä raar, kä cuɛ tok kɛ mi latdɛ jɛ ce̱tkɛ min go̱o̱r ɛ, kä cuɛ thok jak kä wä raar, a /ci Yecu dee wä rɛy wec a ŋa̱ckɛ a tɛny tɛɛny, kä cuɛ cieŋ guäthdɛ kärɔa. Kä cu naath ben kä jɛ pekni diaal.