Luk 8 - RUAC KUƆTH IN RƐL RƆ

Män tëë jäl kɛɛl kɛ Yecu

¹ Kɛ kɔr gua̱th mi tɔt mëë jääl Yecu wi̱i̱ rɛy ciëëŋni, kä latdɛ thuk kuäärä Kuɔth ti gɔw. Cu jaakɛ da̱ŋ wäl rɛw wä kɛɛl,

² amäni tha̱a̱ŋ mään ti ca yiey ti jiäk kɛnɛ jua̱th woc kä kɛ te Mɛri min cɔal i̱ raan Mag-da-la rɛydiɛn, mëë ca yiey da̱ŋ bärɔw ti jiäk woc puɔ̱nydɛ,

³ kɛ Jo-ana, mi la ciek Ko-dha yuup kuakni Ɣɛ-rod, kɛnɛ Thu-dha-na, kɛ män kɔ̱kiɛn ti ŋuan ti la̱tkɛ kɛ ikä kä nyinkiɛn.

Cäät kɛ kui̱ pi̱thä

⁴ Mëë ci buɔ̱n nath mi di̱i̱t rɔ dol, nɛy ti bëë wi̱i̱ni diaal rɔ̱ ma̱t jɛ, cuɛ kɛ la̱t ruac cäätdä wëë i̱,

⁵ “Ci pi̱i̱th wä pi̱eth a kithɛ kuay. Min pi̱thɛ cu tha̱a̱ŋ kuayni pɛn dup, kä cua kɛ dɔany cu diit nhial kɛ ben cam.

⁶ Kä cu tha̱a̱ŋkiɛn pɛn guäth päämni mi thil mun mi di̱i̱t. Mëë cikɛ do̱ny, cukɛ rɔɔl, kɛ ɣöö ci mun ɛmɔ mal kööt.

⁷ Cu tha̱a̱ŋkiɛn pɛn rɛy jiɛn kuiyni, kä cu jiɛn piith, kä cu jiɛn kuiyni kɛ miɛt.

⁸ Kä cu tha̱a̱ŋkiɛn pɛn muun mi gɔaa. Kä mëë cikɛ piith cukɛ rɔ̱ rep kɛ dɛy ti kuɔ̱r.” Mëë cɛ nɔmɔ lar, cuɛ ciöt i̱, “Mi tëëkɛ ram mi tekɛ ji̱th ti li̱ŋ kɛ jɛ, a jɛ li̱ŋ!”

Luɔt cäätni

⁹ Kä cu ji̱ kɔaarɛ jɛ thiec kɛ luɔt cäätdä ɛmɔ.

¹⁰ Kä cuɛ kɛ jiök i̱, “Ca yɛ ka̱m tɛ̱̈ɛ̱̈ni kuäärä Kuɔth, kä duundɛ ɣöö kɛ kui̱ nɛɛni tin kɔ̱kiɛn bakɛ la̱t ŋɔak kɛ cäätni kɛ ɣöö, ‘Deekɛ guic kä /cikɛ luɔtdɛ dee jek, kä deekɛ liɛŋ, kä /cɛ bi cop lo̱cnikiɛn.’ ”

Lat Yecu kɛ luɔt cäätdä pi̱thä

¹¹ “Täämɛ, luɔt ca̱a̱tdä ɛ ɣöö nɛ. Kuay kɛ ruac Kuɔth.

¹² Ce̱t kuay tin ci pɛn dup kɛ nɛy tin ca ruac Kuɔth liŋ, kä cu gua̱n jiäkni ben, cuɛ ruac ben naŋ lo̱cnikiɛn, kɛ ɣöö /cikɛ bi ŋa̱th, kä /cakɛ bi kän.

¹³ Kä ce̱t kuay tin ci pɛn guäth päämni mi kuiy mundɛ kɛ nɛy tin ca ruac liŋ, kä cua jɛ nhɔk kɛ tɛ̈th lɔaac. Kä duundɛ ɣöö thilɛ kɛ mɛy, kä kɛ gua̱a̱th mi tɔt kackɛ jɔk kɛ gua̱a̱th ɣɔ̱nä.

¹⁴ Kä ce̱t kuay tin ci pɛn rɛy jiɛn kuiyni kɛ nɛy ti ca ruac liŋ, duundɛ min wäkɛ dupdiɛn cu diɛɛr kɛ nyin wec muɔ̱ɔ̱n kɛnɛ gör riäŋä, kɛ nyin tɛthkä lɔaac kɛ kui̱ teekä, kä /ci dɛykiɛn lɛ ciɛk.

¹⁵ Kä ce̱t kuay tin ci pɛn muun mi gɔaa kɛ nɛy tin ca ruac liŋ kä ka̱pkɛ jɛ kɛ luth kɛnɛ lo̱c ti gɔw, kä bikɛ dɛy ti gɔw kuir kɛ li̱ep bitdä kɛnɛ dhieel.”

Lɛmbär piny diëny

¹⁶ “Thilɛ ram mi dee lɛmbär dɔp, kä bɛ jɛ kuɔ̱m piny kɛ dhaar kiɛ bɛ jɛ wä la̱th thaar dhaŋä. Kä derɛ jɛ kuëŋ nhial wi̱i̱ kä duɔ̱ɔ̱r nhial, kɛ ɣöö bi nɛy tin wä dueel buay nɛn.

¹⁷ Thilɛ duɔ̱ɔ̱r mi ca tɛ̱̈ɛ̱̈ mi /ci bi jɔɔc. Kä thilɛ mi ca tɛ̱̈ɛ̱̈ mi /ca bi jakä ŋa̱ckɛ ɛ naath.

¹⁸ Niɛkɛ rɔ̱ kɛ li̱eŋ in bi liɛŋ kɛ yɛ. Kɛ ɣöö ram mi tekɛ duɔ̱ɔ̱r ba jɛ ma̱t dɔ̱diɛn, kä ram mi thil duɔ̱ɔ̱r, a cäŋɛ ni min tekɛ jɛ, ba jɛ ka̱n kä jɛ.”

Ciëŋ mani Yecu tin thuɔ̱ɔ̱k

¹⁹ Cu man Yecu kɛnɛ dämani ben kä jɛ, kä cukɛ thil gua̱a̱th mi cupkɛ kɛ gekädɛ kɛ kui̱ bunä.

²⁰ Kä cua jɛ jiök i̱, “Te muɔɔr kɛnɛ dämuɔɔri cuŋä raar görkɛ ji̱.”

²¹ Kä cuɛ kɛ jiök i̱, “Maar kɛnɛ dämaari kɛ nɛy tin liɛŋkɛ ruac Kuɔth kä la̱tkɛ jɛ.”

Guɔ̱k Yecu kɛ jiɔam

²² Cäŋ kɛl cu Yecu wä rɛy murkäbä kɛnɛ ji̱ kɔaarɛ, kä cuɛ kɛ jiök i̱, “Wanɛ kui̱ yiëër.” Kä cukɛ tɛth piny.

²³ Kä min wäkɛ, cu Yecu niɛɛn. Cu jiɔam mi di̱i̱t puɔ̱t, mëë ŋotkɛ däär yiëër, kä cu murkäb wäkɛ mi thiäŋɛ kɛ pi̱, kä cukɛ tekɛ riɛk.

²⁴ Cukɛ Yecu wä ker ni̱n, wäkɛ i̱, “Kuäär, Kuäär, muakɔ!” Cuɛ rɔ jiɛc, kä cuɛ jiɔam kɛnɛ muaŋ luek, kä cukɛ rɔ̱ ka̱p cuɔ̱ŋ, kä cuɛ piny käp ɛ kur.

²⁵ Cuɛ kɛ jiök i̱, “Ŋa̱thdun anikä?” Cukɛ dual, kä cukɛ ga̱a̱c, kä cukɛ ruac kärɔ̱ i̱, “Ɛŋa ɛn nɛmɛ, min ruacɛ kɛ a cäŋɛ ni jiɔam kɛnɛ muaŋ liɛŋkɛ ruacdɛ?”

Jak Yecu ram mi tekɛ yiey mi jiääk kä gɔaa

²⁶ Cukɛ cop ro̱o̱l Gɛ-ri-thiin mi te kui̱c baar Gɛ̈-lɛ-li.

²⁷ Kä min cɛ ben raar rɛy murkäbä, cuɛ röm kɛ wut mi bëë rɛy wec mi tekɛ yiey ti jiäk. Kɛ gua̱a̱th mi bäär tëë juutdä, kä /cɛ cieŋ rɛy ti̱ecni, la ciɛŋɛ ni rɛy kɔ̱a̱kni kunyä.

²⁸ Mëë cɛ Yecu nɛn, cuɛ rɔ yuɔr piny nhiamdɛ, kä cuɛ yɔal kɛ jɔw mi di̱i̱t wëë i̱, “Ji̱n, Yecu Gat Kuɔth nhial in di̱i̱t, ti̱i̱ kɛ ŋu kɛ ɣä? Ɣän la̱ŋä ni ji̱, /cu ɣä lät kä mi jiääk.”

²⁹ Kä ɣöö ci Yecu yiëë mi jiääk la̱t ɣöö bɛ ben raar puɔ̱ɔ̱ny wutdä mɔmɔ. (Kɛ ɣöö cɛ jɛ käp kä ti nyin ŋuan, kä cäŋni mëë gaŋkɛ jɛ, cä jɛ yian kɛ kuatni ciikni kɛnɛ dep, cuɛ tin ca yian kɛ jɛ puɔ̱t, kä cu yiëë mi jiääk ɛ yɔ̱a̱ŋ dɔɔr.)

³⁰ Kä cu Yecu jɛ jiök i̱, “Cɔal ciötdu i̱di?” Cuɛ jɛ loc i̱, “Cɔal ciötdä i̱, ‘Ti nyin ŋuan,’ ” kɛ ɣöö ci yiey ti ŋuan wä puɔ̱ɔ̱nydɛ.

³¹ Kä cu yiey ti jiäk Yecu läŋ, kɛ ɣöö /cɛ kɛ bi jäk kä rɛy kɔ̱kä mi thil piny.

³² Ɛn guäth ɛmɔ tëëkɛ buɔ̱n kuɔ̱ndhuɔ̱ɔ̱ri mi läk wi̱i̱ pa̱a̱m. Kä cu yiey Yecu läŋ, kɛ ɣöö bɛ kɛ pa̱l wä puɔ̱ɔ̱ny kuɔ̱ndhuɔ̱ɔ̱ri tɔ̱tɔ̱. Kä cuɛ kɛ pa̱l wä.

³³ Cu yiey ti jiäk ben raar puɔ̱ɔ̱ny wutdä ɛmɔ, kä cukɛ wä puɔ̱ɔ̱ny kuɔ̱ndhuɔ̱ɔ̱ri, cu buɔ̱n kuɔ̱ndhuɔ̱ɔ̱ri riŋ piny po̱mä mi luŋ luŋ, rɛy baar, kä cukɛ mua.

³⁴ Mëë ci yiëën kuɔ̱ndhuɔ̱ɔ̱ri mëë ci tuɔɔk nɛn, cukɛ riŋ, kä cukɛ jɛ wä la̱r ji̱ wec kɛnɛ ji̱ rööl ɛmɔ.

³⁵ Cu naath ben raar kɛ ɣöö bikɛ min ci tuɔɔk wä nɛn. Cukɛ ben kä Yecu, kä cukɛ wut in ca yiey ti jiäk woc puɔ̱ɔ̱nydɛ jek, nyuurɛ ciökni Yecu a ca kum kɛ bieyni, kä ci wi̱cdɛ lony. Kä cukɛ dual.

³⁶ Kä cu nɛy tin ca jɛ nɛn ɛ la̱t naath ɛn ɣöö ca wut ëë tekɛ yiey ti jiäk jakä gɔaa i̱di.

³⁷ Cu ji̱ Gɛ-ri-thiin diaal Yecu läŋ kɛ ɣöö bɛ jiɛɛn kä kɛ, kɛ ɣöö cikɛ dual ɛlɔ̱ŋ. Cu Yecu loc rɛy murkäbä, kä cuɛ loc jɔk.

³⁸ Kä cu wut in ca yiey ti jiäk woc kä jɛ Yecu läŋ kɛ ɣöö bɛ te kɛɛl kɛ jɛ, kä duundɛ ɣöö cu Yecu jɛ jakä jiɛn, jio̱kɛ jɛ i̱,

³⁹ “Locni dhɔru, wër läri naath min di̱i̱t in ci Kuoth ɛ lät kä ji̱.” Kä cuɛ jiɛɛn, cuɛ naath wä la̱t min di̱i̱t ëë ci Yecu ɛ lät kä jɛ rɛy wec.

Tëk Yecu kɛ nya kua̱r kɛnɛ ciek mi ci bi̱i̱dɛ thiap

⁴⁰ Täämɛ mëë ci Yecu luny jɔk, cu buɔ̱n nath ɛ nyuɔ̱ɔ̱r agɔaa, kɛ ɣöö liip kɛn diaal ni jɛ.

⁴¹ Kä cu wut mi cɔal i̱ Jay-räth ben, mi la bo̱o̱th gua̱th dolä ji̱ Juudh. Min cuɛ rɔ yuɔr piny nhiam Yecu, cuɛ jɛ läŋ ɛn ɣöö bɛ wä cieeŋdɛ,

⁴² kɛ ɣöö tëëkɛ nyaadɛ kɛl kärɔa, mi tekɛ run wäl wi̱cdɛ rɛw, mi li̱w. Min wä Yecu, cu naath ɛ dhoc.

⁴³ Kä täämɛ tëëkɛ ciek mi ci cuuc kɛ löny riɛm, kɛ run da̱ŋ wäl wi̱cdɛ rɛw. Kä cäŋ ni mëë cɛ nyinkɛ thuk kɛ lät ki̱mni cuɛ thil ram mi cu jɛ jak kä gɔaa.

⁴⁴ Cuɛ ben kɛ jɔk Yecu, kä cuɛ thok bieydɛ thiap, kä ni ɛn guäth ɛmɔ, cu löny riɛmdɛ juuc.

⁴⁵ Cu Yecu wee i̱, “Ɛŋa ci ɣä thiap ɔ?” Mëë ci kɛn diaal ɛ gak, cu Pi-tɔr ɛ jiök i̱, “Kuäär, ci bun ji̱ go̱l, kä dhuɔc kɛ ji̱.”

⁴⁶ Cu Yecu wee i̱, “Tëëkɛ ram mi ci ɣä thiap, kɛ ɣöö ci ɣän ɛ jek ɛn ɣöö ci buɔ̱m jiɛɛn puɔ̱nydä.”

⁴⁷ Mëë ci ciek ɛ ŋa̱c ɛn ɣöö /cɛ rɔɔdɛ luäŋ kɛ tey, cuɛ ben a lathɛ jɛ. Kä cuɛ rɔɔdɛ yuɔr piny nhiamdɛ, kä cuɛ luɔt kä min thiapɛ jɛ lat nhiam nɛɛni diaal, kɛnɛ ɣöö cu puɔ̱nydɛ cu gɔaa ni ɛn guäth ɛmɔ.

⁴⁸ Kä cu Yecu jɛ jiök i̱, “Nyaadä, ci ŋa̱thdu ji̱ jak kä gɔaa, wër kɛ mal.”

⁴⁹ Min ŋot Yecu kɛ ruac, cu raan ben dhɔr kua̱r, kä cuɛ kuäär jiök i̱, “Ci nyaadu li̱w, /cu ŋi̱i̱c lɛ jut.”

⁵⁰ Mëë ci Yecu mɛmɛ liŋ, cuɛ jɛ loc i̱, “/Cu dual. A duŋdu la ŋa̱th, kä ba jɛ kän.”

⁵¹ Mëë ci Yecu ben cieŋ, cuɛ thil ram mi nho̱kɛ wä dueel kɛ jɛ kɛɛl, ɛni Pi-tɔr kɛnɛ Jɔ̱ɔ̱n, kɛ Je-mɛth, kɛ gua̱n kɛnɛ man gatdä.

⁵² Kä ro̱t nɛy diaal, kä parkɛ jɛ. Kä cuɛ wee i̱, “/Cuarɛ wiee, kɛ ɣöö /kenɛ li̱w, duŋdɛ ni̱en.”

⁵³ Kä cukɛ jɛ dol, kɛ ɣöö ŋäc kɛn ɛ i̱ cɛ li̱w.

⁵⁴ Kä duundɛ ɣöö cuɛ tet nyaal käp, kä cɔɔlɛ jɛ i̱, “Gat jiɛc rɔɔdu.”

⁵⁵ Kä cu yiëëdɛ luny puɔ̱nydɛ, kä cuɛ rɔ jiɛc ni kä kɛɛl. Kä cu Yecu kɛ la̱r ɣöö ba jɛ moc kɛ mi camɛ.

⁵⁶ Cu diëëthkɛ ga̱a̱c, kä cu Yecu kɛ gok, ɛn ɣöö thilɛ ram mi ba la̱r min ci tuɔɔk.