Luk 7 - RUAC KUƆTH IN RƐL RƆ

Jak Yecu kɛ läät kua̱r kä gɔaa

¹ Mëë ci Yecu ruaacnikɛ diaal thuk kɛ lät naath, cuɛ wä kä Ka-pɛr-ni-äm.

² Kä cuɛ tekɛ bo̱o̱th lathkëëri, mi tekɛ kuanydɛ mi nhɔkɛ ɛlɔ̱ŋ, mi tekɛ juey mi go̱o̱r ni näkdɛ.

³ Mëë cɛ kɛ̈k Yecu liŋ, cuɛ jɛ jäk kä di̱t ji̱ Juudh, thiëckɛ jɛ kɛ ɣöö bɛ kuanydɛ ben jakä gɔaa.

⁴ Mëë cikɛ ben kä Yecu, cukɛ jɛ läŋ, cukɛ wee i̱, “Ro̱ŋɛ ɛn ram ɛmɔ kɛ ɣöö deri jɛ luäk kɛ nɛmɛ,

⁵ kɛ ɣöö nhɔkɛ nɛɛkɔ, kä ɛ jɛn täth luaak doläda mɔ.”

⁶ Cu Yecu wä kɛ kɛ kɛɛl. Mëë cɛ thia̱k kɛ ciëŋ, cu bo̱o̱th lathkëëri jɛ jäk kä mäthnikɛ, jio̱kɛ jɛ i̱, “Kuäär ni Kuoth, /cu rɔɔdu jut kɛ ben, kɛ ɣöö /cä ro̱ŋ kɛ ɣöö deri ben duëëlä.

⁷ Kɛ kui̱ ɛmɔ /ka̱n ɛ go̱r ɛn ɣöö, a dee ben ni puɔ̱nydä kä ji̱. Ku lar ni riet mi bi raandä jakä gɔaa kärɔa.

⁸ Kɛ ɣöö cäŋɛ ɣän bä ta̱a̱ kɛ kuäär mi guɔ̱ɔ̱rä, kä ta̱a̱ kɛ lathkëëri ti guɔ̱ɔ̱rkɛ ɣä. Mi jiökä ram kɛl kä kɛ i̱, ‘Wër’, jɛn la wee. Kä mi jiökä dɔ̱diɛn i̱, ‘Bër’, jɛn la bëë. Kä mi jiökä kuanydä i̱, ‘Lätni nɛmɛ’, la lätdɛ jɛ.”

⁹ Mëë ci Yecu nɔmɔ liŋ, cuɛ ga̱a̱c ɛlɔ̱ŋ kɛ jɛ. Cuɛ rɔɔdɛ riet bunä in guur jɛ, kä cuɛ kɛ jiök i̱, “Ɣän la̱rä jɛ yɛ, /ka̱n ŋa̱th mi ce̱tkɛ ŋa̱th wutdä ɛmɛ met jek kä I-thɛ-rɛl.”

¹⁰ Kä mëë ci nɛy tëë ca ja̱k loc cieŋ, cukɛ kuany jek a ci puɔ̱nydɛ pual.

Tëk Yecu kɛ gat ciëk jɔkä

¹¹ Kɛ kɔr gua̱th mi tɔt cu Yecu wä wi̱c mi cɔal i̱ Neen. Cu ji̱ kɔaarɛ kɛnɛ buɔ̱n nath mi di̱i̱t ɛlɔ̱ŋ wä kɛ jɛ kɛɛl.

¹² Min cɛ thia̱k kɛ thok wec, cu nɛy ti kapkɛ ram mi ci li̱w ben raar. Ɛ jɛn gat ɛ kɛl ɔ kä man, min la ciek jɔkä. Kä te buɔ̱n mi di̱i̱t kä ji̱ wec kɛ jɛ kɛɛl.

¹³ Mëë ci Kuäär ni Yecu ciek nɛn, cu lɔcdɛ luäkdɛ go̱r, kä cuɛ jɛ jiök i̱, “/Cu wiee.”

¹⁴ Kä cuɛ ben, cuɛ gal thiap, kä cu nɛy tin kapkɛ gal cuɔ̱ŋ. Kä cuɛ wee i̱, “Ŋuɛ̈t, ɣän jiökä ji̱, jiɛc rɔɔdu!”

¹⁵ Kä cu ram in ci li̱w rɔ jiëc nyuur, kä cuɛ jɛ tok kɛ mi ruacɛ, kä cu Yecu jɛ ka̱m man.

¹⁶ Cu naath diaal dual ɛlɔ̱ŋ, kä cukɛ Kuoth liak, wäkɛ i̱, “Ci gök mi di̱i̱t jɔɔc rɛydan!” Kä cukɛ wee i̱, “Ci Kuoth ben kɛ ɣöö bɛ nɛɛkɛ ben kän.”

¹⁷ Cu kɛ̈kdɛ ɛmɛ räth kä Ju-dia kɛɛliw kɛnɛ wi̱i̱ tin thieek kɛ jɛ.

Nɛy ti ca jäk kä Yecu Jɔ̱ɔ̱n in la lääk

¹⁸ Cu ji̱ kɔaar Jɔ̱ɔ̱n ŋɔak tɔ̱tɔ̱ diaal ben la̱r Jɔ̱ɔ̱n. Kä cu Jɔ̱ɔ̱n ji̱ kɔaarɛ da̱ŋ rɛw cɔl,

¹⁹ cuɛ kɛ jäk kä Kuäär ni Yecu, kɛ ɣöö ba jɛ thiec i̱, “Ɛ jɛn ji̱n ram ëë ca lar i̱ bi ben, kiɛ bakɔ radɔ̱diɛn lip?”

²⁰ Mëë ci wutni tɔ̱tɔ̱ ben kä jɛ, cukɛ jɛ jiök i̱, “Ci Jɔ̱ɔ̱n in la lääk kɔ jäk kä ji̱, kɛ ɣöö bakɔ ji̱ thiec i̱, ‘Ɛ jɛn ji̱n ram ëë ca lar i̱ bi ben, kiɛ bakɔ radɔ̱diɛn lip?’ ”

²¹ Ɛn guäth ɛmɔ ci Yecu nɛy ti ŋuan jakä gɔw kä jua̱th, kɛ liaw, kɛnɛ yiey ti jiäk, kä cɛ nɛy ti ciöör ti ŋuan jakä gui̱c.

²² Kä cuɛ kɛ loc i̱, “Wiaa, la̱rɛ Jɔ̱ɔ̱n min cia nɛn, kɛnɛ min ci yɛn ɛ liŋ, ɛn ɣöö ciöör gui̱ckɛ, kä ŋöt jälkɛ, kä ci ji̱ dhɔapni gɔw, kä mi̱eeŋ li̱ŋkɛ, kä nɛy ti ci li̱w ca kɛ jiɛc li̱th, kä ca thuk ti gɔw la̱t can.

²³ Puɔ̱th akɛ ram mi thil mi lo̱kɛ kä ɣä.”

²⁴ Mëë ci ji̱ kɔaar Jɔ̱ɔ̱n jiɛɛn, cu Yecu ruac tok kɛ buɔ̱n kɛ kui̱ Jɔ̱ɔ̱n, cuɛ kɛ jiök i̱, “Cia ŋu wä guic däär dɔaar? Ɛ ruɔ̱ɔ̱r mi yɔ̱k jiɔam ɛ?

²⁵ Ɛŋu görɛ nëndɛ raar ɔ? Ɛ ɣöö bia ram mi ciɛŋ bieyni ti kɔ̱a̱c kɔa̱a̱c wä guic? Nɛ̈nɛ jɛ, nɛy ti ciaŋkɛ bieyni ti kɔ̱a̱c kɔa̱a̱c, kä cieŋkɛ riäŋä, tekɛ rɛy duëli kua̱ri ti di̱t.

²⁶ Kä ɛŋu cia wä guic raar ɔ, ɛ gök? Ɣɔ̱ɔ̱n, ɣän la̱rä jɛ yɛ, ɛ mi leny gök.

²⁷ Kä nɛmɛ ɛ jɛn ram in ca mɛmɛ gɔ̱r kɛ kui̱dɛ i̱, ‘Nɛnɛ, ɣän ja̱kä jääkdä kä nhiamdu, mi bi duɔ̱ɔ̱pdu rialikä nhiamdu.’

²⁸ Ɣän la̱rä jɛ yɛ, ɛn ɣöö thilɛ ram mi di̱t ni jɛn kä Jɔ̱ɔ̱n rɛy nɛɛni diaal tin ca dap ɛ män, kä ram min kuiy ni jɛn kä nɛy diaal rɛy kuäärä Kuɔth, di̱t ni jɛn kä jɛ.”

²⁹ (Kä cu naath diaal amäni thuɔ̱ɔ̱l tho̱lbo̱kä tëë ca ruac ɛmɔ liŋ, Kuoth liak, kɛ ɣöö ca kɛ lak kɛ la̱k Jɔ̱ɔ̱n.

³⁰ Kä cu ji̱ Pa-ri-thii kɛnɛ ji̱ ŋuɔ̱tni ca̱p Kuɔth kɛ kui̱diɛn lo̱k, kɛ ɣöö /ka̱nkɛ lak kɛ la̱k Jɔ̱ɔ̱n.)

³¹ “Kä bä ri̱c ɛmɛ ku pa̱a̱r kɛ ŋu? Kä ce̱tkɛ kɛ ŋu?

³² Ce̱tkɛ kɛ gaat ti nyuur guäth ko̱kä, kä cɔal kɛ rɔ̱ i̱, ‘Cakɔ yɛ pua̱t thom, kä /ka̱nɛ duth. Cakɔ wiee, kä /ka̱nɛ pa̱r.’

³³ Kɛ ɣöö ci Jɔ̱ɔ̱n in la ben /cɛ mi̱th, kä /cɛ kɔaŋ math, kä laar yɛn ɛ i̱, ‘Jɛn tekɛ yiëë mi jiääk.’

³⁴ Kä ci Gat Ran ben, mi̱thɛ kä mäthɛ, kä laar yɛn ɛ i̱, ‘Nɛnɛ, ɛ gua̱n da̱r kä ɛ yɔ̱ŋ kɔaaŋni. Ɛ määth thuɔ̱ɔ̱l tho̱lbo̱kni kɛnɛ ji̱ dueeri!’

³⁵ Ba pɛl nyoth ɛn ɣöö ɛ thuɔ̱k ɛ gaatkɛ diaal.”

Ciek mi ci duer

³⁶ Cu raan Pa-ri-thii Yecu ciöl mi̱eth. Kä cuɛ wä dueel ran Pa-ri-thii, cuɛ nyuur guäth mi̱eth.

³⁷ Kä mëë ci ciek mi gua̱n dueeri mi te rɛy wec ɛmɔ jɛ ŋa̱c ɛn ɣöö mi̱th Yecu dueel ran Pa-ri-thii. Cuɛ cuk mi tekɛ yieer nööŋ.

³⁸ Kä cuɛ cuɔ̱ŋ jɔkdɛ ciöknikɛ ro̱tdɛ. Cuɛ ciökɛ luäny kɛ merkɛ, kä cuɛ kɛ coth kɛ mi̱em wecdɛ. Kä cuɛ ciökɛ ciɛm, kä cuɛ kɛ yi̱r kɛ yi̱eer.

³⁹ Mëë ci raan Pa-ri-thii in ci Yecu cɔl ɛ nɛn, cuɛ ruac kärɔa i̱, “Duŋ mi wut ɛmɛ ɛ gök, derɛ jɛ ŋa̱c ɛn ɣöö ciek ɛ ci jɛ thiapɛ ɛ gua̱n, dueeri.”

⁴⁰ Kä cu Yecu jɛ jiök i̱, “Thay-mɔn, ta̱a̱kɛ mi bä la̱r ji̱.” Cuɛ jɛ loc i̱, “Ŋi̱i̱c, ruacni.”

⁴¹ Cu Yecu wee i̱, “Tëëkɛ wut mi go̱o̱r yio̱w kä ji̱ ŋua̱lɛ da̱ŋ rɛw. Go̱rɛ ram kɛl ŋua̱l yio̱o̱ni ti kur dhieec, kä go̱rɛ ram min dɔ̱ŋ yio̱w ti jiɛn da̱ŋ dhieec.

⁴² Mëë cikɛ thil yio̱w ti dëë cuɔ̱lɛ, cuɛ kɛn da̱ŋ rɛw pa̱l ŋuälkiɛn. Ɛŋa kä kɛn da̱ŋ rɛw mi bi jɛ nhɔk ɛlɔ̱ŋ?”

⁴³ Cu Thay-mɔn ɛ loc i̱, “Diwdä ɛ jɛn ram min cɛ pa̱l ŋua̱l in di̱t ni jɛn.” Cu Yecu Thay-mɔn jiök i̱, “Ci jɛ luk kɛ cuɔ̱ɔ̱ŋ.”

⁴⁴ Kä cuɛ rɔ riet ciek, cuɛ Thay-mɔn jiök i̱, “Nɛɛni ciek ɛmɛ? Ci ɣän ben dueelu, kä /keni ɣä nöŋ pi̱ ti lakä ciökä, kä jɛn cɛ ciökä luäny kɛ merkɛ, kä cɛ kɛ puɔc kɛ mi̱em wecdɛ.

⁴⁵ Kä ji̱n /keni ɣä cim, kä ni min ba̱a̱ dueel /kenɛ ci̱em ciöknikä päl.

⁴⁶ Kä ji̱n /keni wi̱cdä yi̱r kɛ liɛɛth, kä jɛn cɛ ciökä yi̱r kɛ yi̱eer.

⁴⁷ Kɛ kui̱ ɛmɔ, ɣän la̱rä jɛ ji̱, ca dueerkɛ ti ŋuan päl, kɛ ɣöö cɛ nhök mi di̱i̱t nyoth. Kä ram mi ca pälikä kɛ mi tɔt, tëëkɛ nhök mi tɔt.”

⁴⁸ Kä cu Yecu ciek jiök i̱, “Ca dueerku päl.”

⁴⁹ Cu nɛy tin nyuur kɛ jɛ kɛɛl guäth mi̱eth ɛ tok kɛ mi ruackɛ kärɔ̱ wäkɛ i̱, “Ɛŋa ɛn ram ɛmɛ, mɛ päl naath dueerkiɛn ɛ?”

⁵⁰ Kä cuɛ ciek jiök i̱, “Ŋa̱thdu cɛ ji̱ kän. Wër kɛ mal.”