Luk 6 - RUAC KUƆTH IN RƐL RƆ

Kuäär ca̱ŋ lɔ̱ŋä

¹ Kɛ cäŋ lɔ̱ŋä ji̱ Juudh, mëë jäl Yecu rɛy ka̱a̱kni, cu ji̱ kɔaarɛ wuɔ̱th bɛɛl töl. Kä cukɛ kɛ muɔny, kä cukɛ kɛ cam.

² Cu tha̱a̱ŋ ji̱ Pa-ri-thii wee i̱, “Ɛŋu lät yɛn mi /ci rɔ lot kɛ cäŋ lɔ̱ŋä mɔ?”

³ Cu Yecu ɛ loc i̱, “/Ka̱nɛ mëë ci Dee-bid ɛ la̱t kuɛn, mëë ci buɔth ɛ näk kɛnɛ nɛy tëë jäl kɛ jɛ kɛɛl?

⁴ Cuɛ wä rɛy luaak Kuɔth, cuɛ juray nhiam Kuɔth ka̱n, kä cuɛ jɛ cam, min /ci rɔ lot kɛ ɣöö dëë cam ɛ naath, ɛ ni bööth palä kärɔ̱ dee jɛ cam ɔ, kä cuɛ tha̱a̱ŋdɛ ka̱m nɛy tëë jäl kɛ jɛ kɛɛl?”

⁵ Kä cuɛ kɛ jiök i̱, “Gat Ran ɛ jɛn Kuäär Ca̱ŋ Lɔ̱ŋä.”

Wut mi cɛ tetdɛ niŋ

⁶ Kɛ cäŋ lɔ̱ŋä min dɔ̱ŋ mëë cɛ wä luaak dolä ji̱ Juudh kä ŋi̱i̱cɛ naath, kä te wut mi cɛ tet cuëëcdɛ niŋ thi̱n.

⁷ Cu ji̱ gɔ̱rä kɛnɛ ji̱ Pa-ri-thii jɛ guic, mi derɛ raan jakä gɔaa kɛ cäŋ lɔ̱ŋä, kɛ ɣöö derɛ cu tekɛ mi gɔny kɛnɛ ni jɛ.

⁸ Mëë cɛ cärkiɛn ŋa̱c, cuɛ wut in cɛ tetdɛ niŋ jiök i̱, “Bër, cuŋni wanɛ mɛ.” Cuɛ rɔ jiɛc, cuɛ wä cuɔ̱ŋ ɛn wi̱ni.

⁹ Cu Yecu kɛ jiök i̱, “Ɣän bä yɛ thiec, ɛ mith la cuɔ̱ɔ̱ŋɔ, ɛ la̱t kä mi gɔaa kiɛ ɛ la̱t kä mi jiääk kɛ cäŋ lɔ̱ŋä ɛ dëë ku tek ni raan, kiɛ dëë däk ni jɛ?”

¹⁰ Kä kɛ kɔr kä min cɛ kɛ gueec kɛn diaal cuɛ wut jiök i̱, “Ri̱c tetdu.” Cuɛ jɛ riny, kä cu tetdɛ cu gɔaa.

¹¹ Kä cuɛ lo̱ckiɛn waŋ ɛlɔ̱ŋ. Kä cukɛ ŋɛ̈r kärɔ̱ kɛ min dee kɛn ɛ lät kä Yecu.

Kuëny Yecu kɛ jaak da̱ŋ wäl rɛw

¹² Kä ɛn ni̱ni tɔ̱tɔ̱ cu Yecu wä raar, wëë pal wi̱i̱ pa̱a̱m. Cuɛ Kuoth wä pal kɛ wäär kɛɛliw.

¹³ Mëë ci ɣɔw a runwaŋ, cuɛ ji̱ kɔaarɛ cɔl, kä cuɛ nɛy da̱ŋ wäl wi̱cdɛ rɛw kuany rɛydiɛn, tin cuɛ cɔl i̱, “Jaak”.

¹⁴ Thay-mɔn min cɛ cɔl i̱ Pi-tɔr, kɛnɛ däman ni An-dɛ-röw, kɛ Je-mɛth kɛnɛ Jɔ̱ɔ̱n, kɛ Pi-lip, kɛnɛ Bar-tho-lo-miw,

¹⁵ kɛ Mɛ̈-thiw kɛnɛ Tɔ-mäth, kɛ Je-mɛth in la gat Ɛ̈l-pi-uth, kɛ Thay-mɔn min cɔal i̱, “Nho̱o̱k döörɛ”,

¹⁶ kɛ Juda gat Je-mɛth, kɛ Juda Ith-kɛ̈-ri-ɔt mëë a ram ëë cu jɛ kɔak.

Ŋi̱i̱c Yecu kɛnɛ jakdɛ kɛ naath kä gɔw

¹⁷ Kä mëë ci Yecu ben piny wi̱i̱ pa̱a̱m kɛɛl kɛ jaakɛ, cuɛ ben cuɔ̱ŋ guäth mi carcar kɛɛl kɛnɛ ji̱ kɔaarɛ ti ŋuan kɛ bua̱n nɛɛni ti ŋuan ti bä kä Ju-dia kɛnɛ Jɛ-ru-tha-lɛm, kɛ wi̱i̱ jɔak yiëër Dhor kɛnɛ Dhi-don.

¹⁸ Kä bä kɛn diaal kɛ ɣöö bikɛ ben liɛŋ kɛnɛ ɣöö bakɛ ben jakä gɔaa kä jua̱thkiɛn. Kä cuɛ nɛy tëë ca moc riɛk ɛ yiey ti jiäk jakä gɔw.

¹⁹ Cu nɛy diaal ɛ go̱r ɛn ɣöö bikɛ jɛ thiap, kɛ ɣöö ci buɔ̱m ben raar puɔ̱nydɛ, mi cu kɛn diaal jakä gɔw.

Tɛ̈th lɔaac kɛnɛ riɛk

²⁰ Kä cu Yecu ji̱ kɔaarɛ guic, kä cuɛ wee i̱, “Ca yɛ poth, yɛn nɛy ti can, kɛ ɣöö Kuäär Kuoth ɛ duŋdun.

²¹ Ca yɛ poth, yɛn nɛy tin näk buɔthkɛ ɛn täämɛ, kɛ ɣöö ba yɛ riäŋ. Ca yɛ poth, yɛn nɛy tin ro̱t ɛn täämɛ, kɛ ɣöö bia to̱k dɔl.

²² “Ca yɛ poth mi nyiir naath yɛ, kä wuɔckɛ yɛ rɛydiɛn, kä la̱tkɛ yɛ kä jiäk, kä lökɛ yɛ kɛ kui̱ cio̱tdä Gatdä Ran.

²³ Kietdɛ kä ra̱wɛ kɛ tɛ̈th lɔaac ɛn cäŋ ɛmɔ, kɛ ɣöö mucdun nhial di̱tdɛ ɛlɔ̱ŋ. Kɛ ɣöö ɛ jɛn min ci gua̱ndɔɔŋnikiɛn ɛ lät kä göök.

²⁴ Kä riɛk akɛ yɛ, yɛn nɛy tin ria̱ŋ ria̱a̱ŋ, kɛ ɣöö cia tɛth lɔaacdun jek.

²⁵ Kä riɛk akɛ yɛ, yɛn nɛy tin ci ria̱ŋ kɛ mi̱eth ɛn täämɛ, kɛ ɣöö bi buɔth yɛ näk. Riɛk akɛ yɛn nɛy tin dɔalkɛ to̱k täämɛ, kɛ ɣöö bia pa̱r kä bia wiee.

²⁶ “Riɛk akɛ yɛ, mi wä nɛy diaal yɛ liak, kɛ ɣöö ɛ jɛn mëë ci gua̱ndɔɔŋnikiɛn ɛ lät kä göök ka̱a̱cni.”

Nhök ji̱ tɛ̈r

²⁷ “Ɣän la̱rä jɛ yɛ, yɛn nɛy tin li̱ŋ ɛn ɣöö, nhɔakɛ ji̱ tɛ̈run. Kä la̱tdɛ nɛy tin nyiɛrkɛ yɛ kä gɔy.

²⁸ Puɔthɛ nɛy tin lamkɛ yɛ, kä palɛ Kuoth kɛ kui̱ nɛɛni tin kuëthkɛ yɛ.

²⁹ Mi ci raan raŋdu pat, ri̱tni jɛ pek in dɔ̱ŋ bä. Kä mi wä raan bi̱i̱ kɔ̱a̱cdu ka̱n, /cu jɛ pen käni biey mi luɔ̱t bä.

³⁰ Moc nɛy diaal ti liɛmkɛ ji̱. Kä mi ci raan nyinku ka̱n, /cukɛ lɛ nyɔk kɛ thiec kä jɛ.

³¹ Kä la̱tdɛ nɛy tin kɔ̱kiɛn kä min görɛ i̱ dëë lät kä yɛ.

³² “Mi nhɔk yɛn ni nɛy tin nhɔakɛ yɛ, ɛ muc ŋukä bia jek ɔ? Kɛ ɣöö cäŋɛ ni ji̱ dueeri nhɔakɛ ni nɛy tin nhɔakɛ kɛ.

³³ Kä mi lät yɛn gɔy kä nɛy ti la̱tkɛ yɛ kä gɔy, ɛ gɔɔy ŋukä bia jek ɔ? Kɛ ɣöö a cäŋɛ ni ji̱ dueeri lät kɛn inɔ.

³⁴ Mi tho̱p yɛn ŋua̱l nɛy tin ŋa̱thɛ i̱ dëë yɛ moc ŋua̱l, ɛ gɔɔy ŋukä bia jek ɔ? A cäŋɛ ni ji̱ dueeri ka̱mkɛ ji̱ dueeri ŋua̱l, kɛ ɣöö bikɛ pek mi di̱i̱t lɛni jek.

³⁵ Kä yɛn, nhɔakɛ ji̱ tɛ̈run, la̱tdɛ kɛ kä gɔy, kä ka̱mɛ kɛ ŋua̱l a thilɛ mi bia lɛ go̱r thi̱n. Bi mucdun di̱t, kä bi yɛn a gaat Kuɔth in Di̱t ni jɛn. Kɛ ɣöö gɔaa lɔcdɛ kɛ nɛy tin jiäk kɛnɛ ji̱ dueeri.

³⁶ A lo̱ckun kɔ̱c, ce̱tkɛ min kɔ̱c lɔc Guurun in te nhial.”

Luk nɛɛni kɔ̱kiɛn

³⁷ “/Cuarɛ naath luk, kɛ ɣöö /ca yɛ bi luk. /Cuarɛ naath kueth duer, kɛ ɣöö /ca yɛ bi kueth duer. Pa̱lɛ naath dueerkiɛn, kä ba yɛ pa̱l dueerkun.

³⁸ Muɔcɛ nɛy kɔ̱kiɛn, kä ba yɛ moc. Kɛ thuɔ̱k ba yɛ moc kɛ theem mi ro̱ŋ, kä ca yɔ̱k, kä lɛny wi̱cdɛ jɔ̱ɔ̱r, ba jɛ la̱th buɔ̱ɔ̱ru. Kɛ ɣöö theem in bia thöp, ɛ jɛn min ba luɔ̱c yɛ.”

³⁹ Cuɛ kɛ la̱t ruac cäätdä bä i̱, “Dee ram mi cɔr, cɔr dɔ̱diɛn buɔth? /Ci kɛn da̱ŋ rɛw dee pɛn kɔ̱kä kɛɛl?

⁴⁰ /Ci di̱t ni raan kɔaar, kä ŋi̱i̱cdɛ. Kä nɛy diaal tin ci ŋɔaani diaal ŋa̱c, bikɛ ce̱tkɛ ŋi̱i̱cdiɛn.

⁴¹ Ɛŋu nɛɛni ni thuɔr thuɔr mi te waaŋ dämuɔɔr ɔ, kä /ci jiath in te waaŋdu ŋäc?

⁴² Kä deri dämuɔɔr kulɛ jiök i̱di i̱, ‘A ka̱mä thuɔr thuɔr waŋdu raar, dämaar,’ kä /ci jiath in te waaŋdu nɛn? Ji̱n, gua̱n mɛtdä, kɔŋni jiath in te waaŋdu ka̱m raar, bi kulɛ guic agɔaa kɛ ɣöö bi thuɔr thuɔr mi te waaŋ dämuɔɔr kulɛ ka̱m raar.”

Jiath kɛnɛ dɛykɛ

⁴³ “Thilɛ jiath mi gɔaa mi kui̱r kɛ dɛy ti jiäk, kä thilɛ jiath mi jiääk mi kui̱r kɛ dɛy ti gɔw.

⁴⁴ Kɛ ɣöö jiath ŋa̱ckɛ jɛ kɛ dɛykɛ. /Ca dɛy ŋɔa̱a̱p dee pon kä jiɛn kuiyni. Kä /ca dɛy buɔ̱cä dee pon kä tɔalɔar.

⁴⁵ Ram mi gɔaa bä ti gɔw raar rɛy lɔaacdɛ mi gɔaa. Kä ram mi jiäk bä lät ti jiäk raar rɛy lɔaacdɛ mi jiääk. Kɛ ɣöö ruac raan kɛ tin te lɔɔcdɛ.”

Wutni rɛw ti ta̱thkɛ duël

⁴⁶ “Ɛŋu cɔalɛ ɣä mɔ i̱, ‘Kuäär ni Kuoth, Kuäär ni Kuɔth,’ kä /cia lät ni mi ca la̱r yɛ?

⁴⁷ Ɣän bä yɛ nyuɔ̱th ciaŋ nɛɛni diaal tin bëë kä ɣä, kä liɛŋkɛ ruaacnikä, kä la̱tkɛ kɛ.

⁴⁸ Ce̱tkɛ kɛ ram mi lät duelɛ, cuɛ këŋdɛ tɛ̈t piny ɛlɔ̱ŋ, kä cuɛ cuɔ̱ɔ̱ŋkɛ guäth mi bum. Mëë ci nyɔc ben raar, kɛ löny mi di̱i̱t kuirɛ rɔ puɔ̱ny duëël, kä /kenɛ jɛ kuir, kɛ ɣöö ca jɛ täth a bum.

⁴⁹ Kä ce̱t ram in ci ruaacnikä liŋ kä /cɛ kɛ lät, kɛ ram mi ci duelɛ la̱t guäth litdä mi thil keŋ mi bum. Mëë ci nyɔc ben, cuɛ jɛ kuir. Kä cuɛ tɛɛth ni ɛn guäth ɛmɔ, kä cu duel ɛmɔ tëthdɛ di̱t ɛlɔ̱ŋ.”