Luk 4 - RUAC KUƆTH IN RƐL RƆ

Ɣɔm Yecu Kritho

¹ Cu Yecu loc jɔk kiir Jɔr-dɛn a cɛ ro̱ŋ kɛ Yiëë in Gɔaa in Rɛl Rɔ, kä cu Yiëë Kuɔth ɛ buath där dɔaar,

² guäth in ɣɔ̱a̱nkɛ jɛ thi̱n ɛ gua̱n jiäkni kɛ ni̱ni ti jiɛn da̱ŋ ŋuaan. Thilɛ mi cɛ cam kɛn ni̱ni tɔ̱tɔ̱. Kä mëë ci ni̱n tɔ̱tɔ̱ thuuk, cu buɔth ɛ näk.

³ Cu gua̱n jiäkni jɛ jiök i̱, “Mi ɛ ji̱n Gat Kuɔth, ruacni kɛ päm ɛmɛ kɛ ɣöö bɛ rɔ loc ni juray.”

⁴ Kä cu Yecu jɛ loc i̱, “Ca jɛ gɔ̱r i̱, ‘/Ci raan dee tëk kɛ mi̱eth kärɔa.’ ”

⁵ Cu gua̱n jiäkni jɛ naŋ nhial, kä kɛ gua̱a̱th mi tɔt cuɛ jɛ nyuɔ̱th kuääri ɣɔaa diaal.

⁶ Kä cuɛ jɛ jiök i̱, “Ɣän bä ji̱ ka̱m rui̱c kä ti̱ti̱ diaal amäni gɔɔydiɛn, kɛ ɣöö ca jɛ ka̱m ɣä, kä bä jɛ ka̱m ram mɔ göörä mɔ.

⁷ Mi wi̱i̱ ɣä pal, ba duŋdu kɛɛliw.”

⁸ Cu Yecu jɛ loc i̱, “Ca jɛ gɔ̱r i̱, ‘Bi pal ni Kuäär ni Kuothdu, kä bi lätni jɛ ikä kärɔa.’ ”

⁹ Kä cu gua̱n jiäkni jɛ naŋ kä Jɛ-ru-tha-lɛm, kä cuɛ jɛ naŋ wi̱i̱ luaak Kuɔth jio̱kɛ jɛ i̱, “Mi ɛ ji̱n Gat Kuɔth, yori rɔɔdu piny ɛn wanɛ mɛ,

¹⁰ kɛ ɣöö ca jɛ gɔ̱r i̱, ‘Jɛn bɛ ja̱a̱kɛ la̱t ruac kɛ kui̱du, kä ba ji̱ gaŋ.

¹¹ Kä bikɛ ji̱ thak kɛ tetkiɛn, kɛ ɣöö /ci cio̱o̱kdu bi pi̱em pa̱a̱m.’ ”

¹² Cu Yecu jɛ loc i̱, “Ca jɛ gɔ̱r i̱, ‘/Cu Kuäär in Kuothdu ɣɔ̱n.’ ”

¹³ Mëë ci gua̱n jiäkni thuɔ̱k kɛ ɣɔ̱ndɛ kɛ ti diaal, cuɛ jɛ ba̱ny piny kɛ gua̱a̱th mi tɔt.

Tuk Yecu kɛ la̱tdɛ kä Gɛ̈-lɛ-li

¹⁴ Cu Yecu loc kä Gɛ̈-lɛ-li a cɛ thia̱a̱ŋ kɛ buɔ̱m Yieekä Kuɔth. Kä cu kɛ̈kdɛ räth rɛy rööl ɛmɔ kɛɛliw.

¹⁵ Kä cuɛ naath ŋi̱eec rɛy lueekni palä ji̱ Juudh, kä cu nɛy diaal ɛ liak.

Lo̱k Yecu kä Na-dha-rɛth

¹⁶ Mëë ci Yecu ben kä Na-dha-rɛth, gua̱a̱th ëë pithɛ thi̱n. Cuɛ wä dueel palä ji̱ Juudh kɛ cäŋ lɔ̱ŋä, kɛ ɣöö ɛ jɛn ciaaŋdɛ. Cuɛ rɔ jiɛc kɛ ɣöö bɛ kuën.

¹⁷ Cua jɛ ka̱m bok go̱kä ni I-ca-yaa. Cuɛ bok lɛp kä cuɛ gua̱a̱th jek mi ca gɔ̱r thi̱n i̱,

¹⁸ “Te Yiëë Kua̱r ni Kuɔth puɔ̱nydä, kɛ ɣöö cɛ ɣä mɛk ɛn ɣöö bä thuk ti gɔw nöŋ can. Cɛ ɣä ja̱k kɛ ɣöö bä luɔ̱ny nath tëë ca pɛc lat, kɛnɛ ɣöö bä nyin ciööri lɛp, kä bä nɛy tin ciaŋkɛ a jiäk woc.

¹⁹ Kä bä naath la̱t gɔɔy runä Kuɔth.”

²⁰ Cuɛ bok gäk, kä cuɛ jɛ luɔ̱c ram min yoop jɛ, kä cuɛ nyuur. Kä cu wäŋ nɛɛni diaal tëë te guäth dolä ji̱ Juudh guic ni jɛ.

²¹ Kä cuɛ jɛ tok kɛ mi ruacɛ kɛ kɛ i̱, “Ɛn walɛ ci ruac Kuɔth ɛmɛ a thuɔ̱k, ce̱tkɛ min cia jɛ liŋ.”

²² Cu nɛy diaal ruac agɔaa kɛ jɛ, cukɛ ga̱a̱c kɛ laat tin gɔw tin bä raar thokdɛ. Kä cukɛ wee i̱, “Ɛn nɛmɛ /ciɛ jɛn gat Jo-thɛp?”

²³ Kä cuɛ kɛ jiök i̱, “A thil diw bi yɛn ɣä nya̱l cäät ɛmɛ i̱, ‘Ki̱i̱m tek rɔɔdu,’ Kä bia wee i̱, ‘Ɛn min cakɔ liŋ i̱ ci la̱t kä Ka-pɛr-ni-äm, lätni jɛ rɛy wecdun ɛmɛ bä.’ ”

²⁴ Kä cuɛ wee i̱, “Ɛpuc, ɣän la̱rä jɛ yɛ, thilɛ gök mi ca met nhɔk rɛy wecdiɛn.

²⁵ Kä bä yɛ la̱r thuɔ̱k, mëëdan kɛ ni̱n E-li-yaa, te män jɔɔkni ti ŋuan kä I-thɛ-rɛl. Kä mëë /ken nhiaal dɛ̈m kɛ run diɔ̱k wi̱cdɛ päth bäkɛl, cu buɔth mi di̱i̱t ben wi̱i̱ muɔ̱ɔ̱n kɛɛliw.

²⁶ Kä /ka̱n E-li-yaa jäk kä I-thɛ-rɛl, kä cua jäkä ciek jɔkä mi te kä Dhar-pɛ̈th, rɛy rööl Dhi-don.

²⁷ Kä cuɛ tekɛ ji̱ dhɔapni ti ŋuan kä I-thɛ-rɛl, kɛ ni̱n go̱kä ni E-li-yaa, kä cuɛ thilɛ ram kɛl rɛydiɛn mi cua jakä gɔaa, ɛ ni Naa-man kärɔa, raan Thi-ri-ya.”

²⁸ Mëë cikɛ ruac ɛmɛ liŋ, cu lo̱c nɛɛni diaal tin te rɛy luaak dolä ɛmɔ jiääk.

²⁹ Cukɛ rɔ̱ jiɛc, kä cukɛ jɛ naŋ raar rɛy wec, naŋkɛ ŋɛpä pa̱a̱m in ca wec la̱t thi̱n, kɛ ɣöö deekɛ jɛ ɣɔak piny.

³⁰ Kä cuɛ kamdiɛn rɛt, cuɛ wä kɛ wädɛ.

Wut mi tekɛ yiëë mi jiääk

³¹ Kä cu Yecu wä kä Ka-pɛr-ni-äm, wec mi te ro̱o̱l Gɛ̈-lɛ-li, guäth ëë ŋi̱i̱cɛ naath thi̱n kɛ cäŋ lɔ̱ŋä.

³² Cu naath ga̱a̱c kɛ ŋi̱i̱cdɛ, kɛ ɣöö ruacɛ kɛ lua̱ŋ.

³³ Kä te wut mi tekɛ yiëë mi jiääk rɛy duëël dolä ji̱ Juudh. Kä cuɛ wak kɛ jɔw mi di̱i̱t wëë i̱,

³⁴ “Aɣ, ji̱n Yecu, raan Na-dha-rɛth, ɛŋu mi go̱o̱ri kä kɔ? Ji̱n bi̱i̱ kɛ ɣöö bi kɔ ben däk? Ɣän ŋa̱cä ji̱, ɛn ɣöö ɛ ji̱n kɛl Kuɔth in Rɛl rɔ.”

³⁵ Kä cu Yecu jɛ gok, cuɛ wee i̱, “Bitni, kä bër raar puɔ̱nydɛ!” Mëë ci yiëë in jiääk wut ɛmɔ yuɔr piny nhiam nath, cuɛ ben raar puɔ̱nydɛ a thil mi jiääk mi cɛ lät kä jɛ.

³⁶ Kä cu kɛn diaal ma̱a̱r, kä ruackɛ kärɔ i̱, “Ɛ ruac ŋukä ɛn nɛmɛ? Kɛ ɣöö jɛn ruacɛ kɛ yiey ti jiäk kɛ lua̱ŋ kɛnɛ buɔ̱m, kä la bäkɛ raar.”

³⁷ Cua kɛ̈kdɛ wä lat gua̱thni diaal rɛy rööl ɛmɔ kɛɛliw.

Jak Yecu kɛ ji̱ jua̱thni ti ŋuan kä gɔw

³⁸ Mëë jiɛy Yecu dueel dolä ji̱ Juudh, cuɛ wä duëël Thay-mɔn. Täämɛ manthu Thay-mɔn cucɛ kɛ lëth pua̱ny, kä cukɛ jɛ thiec kɛ kui̱dɛ.

³⁹ Cu Yecu cuɔ̱ŋ wi̱i̱dɛ, kä cuɛ juey woc, kä cu juey jiɛɛn puɔ̱nydɛ. Kä ni ɛn guäth ɛmɔ cuɛ rɔ jiɛc, kä cuɛ jɛ tok kɛ mi lätdɛ kɛ ikä.

⁴⁰ Kɛ thiaŋ konyä ca̱ŋ, cu nɛy diaal tin tekɛ nɛɛkiɛn ti tekɛ jua̱th ti gööl nöŋ Yecu. Kä cuɛ tetkɛ la̱th wuɔ̱thnikiɛn, kä cuɛ kɛ jak kä gɔw.

⁴¹ Kä cu yiey ti jiäk ben raar pua̱nyni nɛɛni ti ŋuan, kä cukɛ rɔal i̱, “Ɛ ji̱n Gat Kuɔth!” Kä cuɛ kɛ gok, kɛ ɣöö /cikɛ bi ruac, kɛ ɣöö ŋa̱ckɛ jɛ i̱ ɛ jɛn Mɛ-thia.

Lat Yecu kɛ ruac duëli duɔ̱ɔ̱li ji̱ Juudh

⁴² Mëë ci ɣɔw baak, cu Yecu jiɛɛn, cuɛ wä guäthdɛ kärɔa. Kä cu naath ɛ go̱r, kä mëë cikɛ jɛ jek, cukɛ jɛ lo̱k ɛn ɣöö bɛ kɛ ba̱ny piny.

⁴³ Kä cuɛ kɛ jiök i̱, “Ɣän bä thuk ti gɔw kɛ kui̱ kuäärä Kuɔth lat wi̱i̱ni ti kɔ̱kiɛn bä, kɛ ɣöö ja̱kɛ ɣä kɛ jɛn kui̱ kä mɛmɛ.”

⁴⁴ Kä cuɛ ŋot latdɛ ruac Kuɔth gua̱thni dolä ji̱ Juudh kä Ju-dia.