Luk 3 - RUAC KUƆTH IN RƐL RƆ

Ŋi̱i̱c Jɔ̱ɔ̱n in la lääk

¹ Kɛ wäl dhieec runi, ruëc Tay-bi̱i̱-riäth kuäär in di̱i̱t, mëë Pɔn-tiäth Pay-lɛt ɛ mädhi̱i̱r kä Ju-dia, kä Ɣɛ-rod ɛ rueec Gɛ̈-lɛ-li, kä däman ni Pi-lip ɛ rueec rööl I-tu-ria kɛnɛ Tu-ri-kɔ-ni-tith, kä Li-thi-niäth ɛ rueec rööl Abi-liin,

² kä ɛ jɛn gua̱a̱th ëë A-nath kɛnɛ Kay-pɛth kɛ bööth palä tin di̱t. Kä cu ruac Kuɔth ben kä Jɔ̱ɔ̱n, gat Dhɛ-kar-yaa däär dɔaar.

³ Cuɛ wä ro̱o̱l jɔak kiɛɛr Jɔr-dɛn kɛɛliw, latdɛ jɛ ɛn ɣöö ba naath lak, kɛ ɣöö bikɛ rɔ̱ ri̱t kɛ kui̱c päli dueerkiɛn.

⁴ Kä ce̱tkɛ min ca gɔ̱r rɛy buɔk go̱kä ni I-ca-yaa i̱, “Jɔw raam mi cio̱t där dɔaar i̱, ‘Rialɛ duɔ̱ɔ̱p Kua̱r ni Kuoth ikä. Jakɛ dupkɛ kä cuŋ.

⁵ Ba täp diaal di̱er, kä ba pääm diaal tin di̱t kɛnɛ tin tiɛtni pa̱a̱r kɛ piny. Ba gɔ̱a̱ŋ dupni cuɔ̱ŋ, kä ba dup tin yath yaath jakä puɔth.

⁶ Kä bi nɛy diaal ka̱n Kuɔth nɛn.’ ”

⁷ Kɛ kui̱ ɛmɔ cuɛ nɛy ti ŋuan tëë ci ben kä jɛ kɛ ɣöö bɛ kɛ ben lak jiök i̱, “Yɛn, dɛy thɔ̱ɔ̱li! Ɛŋa mi ci yɛ la̱r lär, kɛ ɣöö bia rɔ bar kä duäc Kuɔth in bi ben?

⁸ La̱tdɛ lät ti gɔw ti ro̱ŋ kɛ rietdun kɛ rɔ̱ dueeri. /Cuarɛ jɛ car a ruac yɛn kärɔ̱ i̱, ‘Kɔn akɛ gua̱ndɔɔŋda ni A-bɛ-ram’. Kɛ ɣöö ɣän la̱rä jɛ yɛ, ɛn ɣöö te Kuoth kɛ lua̱ŋ kɛ ɣöö bɛ A-bɛ-ram moc gaat kɛ pääm ti̱ti̱.

⁹ Kä ɛn täämɛ te jio̱p thäri jiɛn. Kɛ kui̱ ɛmɔ jiɛn diaal ti /ci dɛy ti gɔw bi kuir ɔ, ba jɛ jɔap piny, kä ba jɛ yuɔr maac.”

¹⁰ Kä cu buɔ̱n nath ɛ thiec i̱, “Kä ɛŋu mi ba̱kɔ la̱t?”

¹¹ Cuɛ kɛ loc i̱, “Ram mi tekɛ luɔ̱ɔ̱t da̱ŋ rɛw akɛ nyuaakɛ kɛnɛ ram mi thil bi̱i̱. Kä ɛ ram mi tekɛ mi̱th, lät inɔ bä.”

¹² A cäŋ ɛ thuɔ̱ɔ̱l tho̱lbo̱kä cukɛ ben kɛ ɣöö bakɛ ben lak, kä cukɛ Jɔ̱ɔ̱n thiec i̱, “Ŋi̱i̱c, ɛŋu mi ba̱kɔ la̱t?”

¹³ Cuɛ kɛ jiök i̱, “/Cuarɛ ti lɛ̱̈nykɛ pek kä tëë ca la̱r yɛ thol.”

¹⁴ Kä cu lathkëëri jɛ thiec bä i̱, “Kä kɔn, ɛŋu mi ba̱kɔ la̱t?” Kä cuɛ kɛ jiök i̱, “/Cuarɛ yio̱w thol kä naath kɛ kok, kiɛ kɛ gɔny ran kɛ kac, a lo̱ckun ro̱ŋ kɛ pek ko̱kädun.”

¹⁵ Kä cu ŋa̱th nath rɔ tok kɛ mi jiɛɛcɛ rɔ, kä cukɛ jɛ tok kɛ mi ga̱a̱ckɛ mi dee Jɔ̱ɔ̱n a jɛn Mɛ-thia.

¹⁶ Cu Jɔ̱ɔ̱n kɛ loc kɛn diaal, wëë i̱, “Ɣän lakä yɛ kɛ pi̱, kä ram mi bum ni jɛn kä ɣä a bëëni. Kä cäŋɛ ni ɣän /ci gɔɔydä ro̱ŋ kɛ ɣöö dëë läk wa̱a̱rikɛ lony. Jɛn bɛ yɛ lak kɛ Yiëë in Gɔaa in Rɛl Rɔ kɛnɛ mac.

¹⁷ Kä te duŋ lök bɛɛl tetädɛ, bɛ do̱r kɔ̱mädɛ la̱t agɔaa, bɛ bɛl kuëŋ rɛy yiirä, kä bɛ jil waŋ kɛ mac mi /ca yieny.”

¹⁸ Kɛ dup ti ŋuan ti gööl cu Jɔ̱ɔ̱n thuk tin gɔw la̱t naath.

¹⁹ Kä cu Ɣɛ-rod in la rueec mëë ci Jɔ̱ɔ̱n ɛ luek kɛ kui̱ Ɣɛ-ro-diäth in la ciek däman kɛnɛ jiäk diaal tëë cɛ la̱t.

²⁰ Cuɛ duer ɛmɛ lɛ mat wi̱i̱diɛn, mëë cɛ Jɔ̱ɔ̱n la̱th luaak yieenä.

La̱k Yecu

²¹ Täämɛ mëë ca naath diaal lak, kä ca Yecu lak bä, cuɛ pal, kä cu nhial rɔ lɛp.

²² Cu Yiëë in Gɔaa in Rɛl Rɔ ben piny kä jɛ kɛ puɔ̱ny mi jɔc ce̱tkɛ guuk. Kä cu jɔw päl nhial wëë i̱, “Ɛ ji̱n Gatdä min nhɔakä, in tɛth lɔcdä kɛ jɛ.”

Ciööt gua̱ndɔɔŋni Yecu

²³ Mëë took Yecu la̱tdɛ, tëëkɛ run ti jiɛn da̱ŋ diɔ̱k. Kä cu naath ɛ car ɛn ɣöö ɛ gat Jo-thɛp, min la gat Ɣɛli,

²⁴ min la gat Ma-that, min la gat Lii-bay, min la gat Mɛ̈l-ki, min la gat Ja-nay, min la gat Jo-thɛp,

²⁵ min la gat Ma-ta-thiath, min la gat A-mɔth, min la gat Nɛ̈-ɣum, min la gat Ɛthli, min la gat Na-gay,

²⁶ min la gat Maath, min la gat Ma-ta-thiath, min la gat Thɛ-mi-ɛn, min la gat Jo-thɛk, min la gat Joda,

²⁷ min la gat Yo-a-nan, min la gat Re-tha, min la gat Dhɛ-ru-ba-bɛl, min la gat Cɛ-ɛ̈l-ti-el, min la gat Nɛ-ri,

²⁸ min la gat Mɛl-ki, min la gat Adi, min la gat Ko-tham, min la gat Ɛl-ma-dam, min la gat Ër,

²⁹ min la gat Jɔ-cua, min la gat Ɛ-li-dher, min la gat Jo-rim, min la gat Ma-that, min la gat Lii-bay,

³⁰ min la gat Cim-on, min la gat Juda, min la gat Jo-thɛp, min la gat Jo-nam, min la gat Ɛl-ya-kim,

³¹ min la gat Mɛ-lia, min la gat Mɛ-na, min la gat Mɛ̈-ta-tha, min la gat Na-than, min la gat Dee-bid,

³² min la gat Jɛthi, min la gat O-bɛd, min la gat Bo-ɛ̈dh, min la gat Thal-mɔn, min la gat Na-con,

³³ min la gat A-mi-na-dab, min la gat Ɛ̈d-min, min la gat Ar-ni, min la gat Ɣɛdh-ron, min la gat Pɛ-rɛdh, min la gat Juda,

³⁴ min la gat Je-kɔb, min la gat Ay-dhɛk, min la gat A-bɛ-ram, min la gat Tɛra, min la gat Na-ɣor,

³⁵ min la gat Thɛ-rug, min la gat Riw, min la gat Pɛ-lɛg, min la gat E-bɛr, min la gat Cɛla,

³⁶ min la gat Kay-nan, min la gat Ar-pak-thad, min la gat Cɛm, min la gat Nowa, min la gat Lɛ-mɛk,

³⁷ min la gat Mɛ-thu-cɛ-la, min la gat Ä-nɔk, min la gat Yɛ-rɛd, min la gat Ma-ɣala-lel, min la gat Kay-nan,

³⁸ min la gat I-nɔth, min la gat Thɛth, min la gat A-dam, min la gat Kuɔth.