Luk 24 - RUAC KUƆTH IN RƐL RƆ

Jiëc Yecu li̱th

¹ Kɛ cäŋ in jio̱l kä juɔk ni bakä, cu män wä guäth kunyä, naŋkɛ wal tëë ci kɛn kɛ rialikä.

² Kä cukɛ päm jek a ca rial thok kɔ̱kä.

³ Kä mëë cikɛ coth rɛc, /ka̱n puɔ̱ny Yecu jek thi̱n.

⁴ Mëë cɛ wi̱cdiɛn yi̱c kɛ nɛmɛ, niɛn wa̱nɔ cu wutni da̱ŋ rɛw ti tekɛ bieyni ti riaw riaaw cuɔ̱ŋ gekädiɛn.

⁵ Kä cu män dual kä cukɛ wuɔ̱thkiɛn guɔ̱l piny, kä cu wutni kɛ jiök i̱, “Ɛŋu go̱o̱r yɛn ram mi tëk rɛy nɛɛni ti ci li̱w ɔ? Thilɛ jɛ ɛn wanɛ, cɛ rɔ jiɛc li̱th.

⁶ Tiɛmɛ mëë cɛ la̱r yɛ, mëë ŋotdɛ kä Gɛ̈-lɛ-li,

⁷ ɛn ɣöö ba Gat Ran ka̱m ji̱ dueeri, kä ba jɛ pua̱t jiaath, kä kɛ diɔ̱ɔ̱k ni̱ni bɛ rɔ jiɛc li̱th.”

⁸ Kä cukɛ rieetkɛ tim.

⁹ Mëë cikɛ luny jɔk kɔ̱kä kunyädɛ, cukɛ nɛmɛ kɛɛliw ben la̱t jaakɛ da̱ŋ wäl kɛl kɛnɛ nɛy tin kɔ̱ŋ.

¹⁰ Kɛn män kɛ Mɛri raan Mag-da-la, kɛ Jo-ana, kɛnɛ Mɛri man Je-mɛth, kɛ män kɔ̱kiɛn ti tekɛ kɛ kɛɛl mɛmɛ wä la̱t ja̱a̱k.

¹¹ Kä cu ruaacni tɔ̱tɔ̱ ce̱tkɛ ruac mi baŋ kä jaak. Kä /ken kɛn kɛ ŋäth.

¹² Kä cu Pi-tɔr rɔ jiɛc, cuɛ riŋ guäth kunyä. Cuɛ rɔɔdɛ goŋ, cuɛ rɛy kɔ̱kä guic. Cuɛ nɛn ni bieyni tin puɔth kärɔ̱. Cuɛ loc cieŋ a ga̱a̱cɛ kɛ min ci tuɔɔk.

Wä kä Ɛ-me-äth

¹³ Kɛ jɛn cäŋ ɛmɔ pa̱ny cu ji̱ kɔaar Yecu da̱ŋ rɛw wä cieŋ mi cɔal i̱ Ɛ-me-äth, mi tekɛ ki̱lumi̱ti̱ri da̱ŋ wäl kamdɛ kɛnɛ Jɛ-ru-tha-lɛm.

¹⁴ Kä muaŋkɛ ŋɔak diaal tëë ci tuɔɔk.

¹⁵ Kä mëë muɔŋkɛ latkɛ ŋɔak, cu Yecu rɔɔdɛ tieec thiekä, kä cuɛ ja̱l kɛ kɛ kɛɛl.

¹⁶ Kä /ken kɛ jɛ ŋic.

¹⁷ Cuɛ kɛ jiök i̱, “Ɛŋu lat yɛn ɛmɔ, min wiaa kɛ mi ja̱lɛ?” Cukɛ rɔ̱ ka̱p cuɔ̱ŋ kä jiɛth lo̱ckiɛn.

¹⁸ Kä cu ram kɛl kä kɛ mi cɔal i̱ Ki-lo-päth ɛ loc i̱, “Ɛ ji̱n ja̱l kɛl kärɔa kä Jɛ-ru-tha-lɛm, mi kui̱c tin ci tuɔɔk ɛn ni̱ni ti̱ti̱?”

¹⁹ Cuɛ kɛ thiec i̱, “Kɛ ŋɔak tin tith?” Cukɛ jɛ jiök i̱, “Kɛ tin ci tuɔɔk kä Yecu raan Na-dha-rɛth, mi la gök mi bum lätkɛ kɛnɛ ruacdɛ nhiam Kuɔth kɛnɛ nhiam nɛɛni diaal.

²⁰ Ci bööth paläda kɛnɛ kua̱rkɔ jɛ kuɛ̈th li̱th, kä cukɛ jɛ pua̱t jiaath.

²¹ Kä ɛ jɛn ram ëë ŋa̱th kɔ i̱ bi I-thɛ-rɛl kän. Kä wi̱i̱kä nɛmɛ bä, walɛ ɛ jɛn cäŋ in diɔ̱ɔ̱kdiɛn in tuɔɔk kɛ ŋɔak ti̱ti̱.

²² Kä ci tha̱a̱ŋ mään kä buɔ̱nda kɔ jakä ga̱a̱c, cikɛ wä guäth kunyä bakä ɣɔaa.

²³ Kä mëë /kenkɛ puɔ̱nydɛ jek, cukɛ jɛ ben lar ɛn ɣöö cikɛ ja̱a̱k nhial nɛn ti ci jɛ lar i̱ tëkɛ.

²⁴ Cu tha̱a̱ŋ nath ti tekɛ kɔ kɛɛl wä guäth kunyä, kä cukɛ ti diaal wä jek ce̱tkɛ tin ci mänkɛ lat, kä /kenkɛ jɛ nɛn.”

²⁵ Kä cuɛ kɛ jiök i̱, “Yɛn nɛy ti dɔa̱a̱r ti kuiy ŋa̱thdun kɛ ti diaal tëë ci göök kɛ lat!

²⁶ /Cɛ rɔ lot ɛn ɣöö bi Mɛ-thia ti bɛ̈c bɛ̈ɛ̈c ti̱ti̱ rut, kä bɛ cu wä rɛy wutädɛ?”

²⁷ Kä cu Yecu kɛ la̱t min ca lat kɛ kui̱dɛ rɛy buɔkni diaal a tookɛ jɛ ni kä buɔkni Muthɛ kɛnɛ buɔkni göökni diaal.

²⁸ Kä mëë cikɛ ben thiekä ciëŋ in wäkɛ thi̱n. Cuɛ ce̱tkɛ mi räth Yecu nhiam.

²⁹ Kä cukɛ jɛ läŋ, wäkɛ i̱, “Tey ni kɛ kɔ kɛɛl, kɛ ɣöö ci cäŋ thia̱k kɛ kony, ci ɣɔw ku thuŋ cuɔl.” Cuɛ wä rɛc kɛ ɣöö bɛ te kɛɛl kɛ kɛ.

³⁰ Kä min tëë guäth mi̱eth, cuɛ juray ka̱n, kä cuɛ jɛ poth, kä cuɛ jɛ puɔ̱ny, kä cuɛ jɛ ka̱m kɛ.

³¹ Kä cu nyinkiɛn rɔ̱ lɛp, kä cukɛ jɛ ŋic. Kä cuɛ bath waaŋdiɛn.

³² Cukɛ ruac kärɔ̱, wäkɛ i̱, “/Kän lo̱ckɔn pɛ̈t ce̱tkɛ mac rɛci min ruacɛ kɛ kɔn dup, kä nyuthɛ kɔn luɔt ruaacni Kuɔth tëë ca gɔ̱r?”

³³ Kä ni ɛn guäth ɛmɔ cukɛ rɔ jiɛc, kä cukɛ loc kä Jɛ-ru-tha-lɛm, kä cukɛ jaak Yecu da̱ŋ wäl wi̱cdɛ kɛl kɛnɛ nɛy kɔ̱kiɛn ti ca rɔ̱ dol jek.

³⁴ Kä lar kɛn ɛ i̱, “Ci Kuäär ni Yecu jiɛɛn li̱th ɛpuc, kä cɛ rɔ nyuɔ̱th Thay-mɔn!”

³⁵ Kä cu kɛn tin ci tuɔɔk dup la̱tkɛ, amäni ɣöö ca jɛ ŋa̱c ɛ kɛn, mëë cɛ juray puɔ̱ny.

Nyuth Yecu kɛ rɔ jaakɛ

³⁶ Kä min ruackɛ kɛ kui̱ kä nɛmɛ, cu Yecu puɔ̱nydɛ ben cuɔ̱ŋ däriɛn, kä cuɛ kɛ jiök i̱, “A mal tekɛ yɛ.”

³⁷ Cukɛ ga̱a̱c kä dualkɛ, kä cukɛ car ni ɣöö cikɛ jɔak nɛn.

³⁸ Kä cuɛ kɛ jiök i̱, “Ɛŋu dualɛ mɔ, kä ɛŋu ta̱yɛ kɛ diw ɔ?

³⁹ Guɛcɛ tetkä kɛnɛ ciökä nɛ̈nɛ jɛ ɛn ɣöö ɛ ɣän puɔ̱nydä pa̱ny. Thiapɛ ɣä, kä guɛcɛ ɣä. Thilɛ jɔak mi tekɛ ri̱ŋ kɛnɛ cɔ̱w ce̱tkɛ ti nɛ̈nɛ kä ɣä ti.” [

⁴⁰ Kä mëë cɛ mɛmɛ lar, cuɛ kɛ nyuɔ̱th ciökɛ kɛnɛ tetkɛ.]

⁴¹ Mëë ŋot lɔcdiɛn kɛ ga̱a̱c kɛnɛ diw kɛ kui̱ tɛthä lɔaac, cuɛ kɛ thiec i̱, “Ta̱yɛ kɛ mi camkɛ ɛn wanɛ?”

⁴² Cukɛ jɛ ka̱m ŋuɔk rɛ̱̈c mi ca thal.

⁴³ Cuɛ jɛ ka̱n, kä cuɛ jɛ cam nhiamdiɛn.

⁴⁴ Kä cuɛ kɛ jiök i̱, “Ti̱ti̱ kɛ kɛn rieetkä tëë cä la̱r yɛ, mëë ŋuɔtdä kɛɛl kɛ yɛ, ɛn ɣöö ti diaal tëë ca gɔ̱r kɛ kui̱dä rɛy ŋuɔ̱tni Muthɛ kɛnɛ ruaacni göökni, kɛ Diit bikɛ dhil a thuɔ̱ɔ̱k.”

⁴⁵ Cuɛ cärkiɛn lɛp kɛ ɣöö bi ruaacni Kuɔth cop lɔɔcdiɛn.

⁴⁶ Kä cuɛ kɛ jiök i̱, “Ca jɛ gɔ̱r ɛn ɣöö bi Mɛ-thia ti bɛ̈c bɛ̈ɛ̈c rut, kä bɛ jiɛɛn li̱th kɛ diɔ̱ɔ̱k ni̱ni.

⁴⁷ Kä kɛ ciötdɛ ba ruac ri̱tdä nath dueeri kɛnɛ pälikä dueeri la̱t döör diaal, a tuɔkɛ jɛ nikä Jɛ-ru-tha-lɛm.

⁴⁸ Kä bi yɛn a nëën ŋɔaani ti̱ti̱.

⁴⁹ Kä nɛ̈nɛ jɛ, ɣän ja̱kä yɛ kä mi ca lar ɛ Gua̱a̱r i̱ bɛ ka̱m yɛ, kä liɛpɛ rɛy wec ɛmɛ amäni mi ca yɛ kum kɛ buɔ̱m mi bä ni nhial.”

Wä Yecu Nhial

⁵⁰ Cuɛ kɛ naŋ raar ni kä Beth-ani. Kä cuɛ tetkɛ kap nhial, kä cuɛ kɛ poth.

⁵¹ Kä min pothɛ kɛ, cuɛ jiɛɛn kä kɛ, kä cua jɛ naŋ nhial.

⁵² Kä cukɛ jɛ pal, kä cukɛ loc kä Jɛ-ru-tha-lɛm kɛ tɛ̈th lɔaac mi di̱i̱t.

⁵³ Kä cukɛ te luaak Kuɔth ni ciaŋ liakɛ Kuoth.